मत्ती 27 - डोटेली नयाँ करार

यहूदा इस्करियोतको आत्माहत्या

¹ परभातइ जब यहुदि मुख्य पुजारिन रे यहुदि मान्सनका अगुवानले येशूलाइ मृत्यु दण्ड दिन्या भणबर येशूलाइ आरोप लाउन्या सल्लाह अर्यो।

² तिननले येशूलाइ बादिबर लैया रे पिलातस हाकिमको राज महलमि न्याय अद्दाइलाइ लैया।

³ तब उनलाइ पकडाउन्या यहूदाले येशूलाइ दण्ड आज्ञा भया जाणिबर पछ्ताउन पस्यो रे यहुदि मुख्य पुजारि रे यहुदि मान्सनका अगुवाका वाँ जाइबर चाँदीका तीस सिक्‍का फिर्ता अर्यो।

⁴ रे भण्यो, “मइले निर्दोष मान्सलाइ माद्दाइलाइ धोका दिबर ठुलो पाप अर्या।” तर तिननले भण्यो, “हामलाइ कि मतलब आफइ जाण।”

⁵ तब चाँदीका सिक्‍का मन्दिरका आगनमी खितिबर त्यो गयो, रे झुणिबर मर्यो।

⁶ तर यहुदि मुख्य पुजारिले भण्यो, “हामरो कानुनले यो सिक्‍कालाइ मन्दिरको दान पेटिमी राख्दु अनुमति दीनइन क्याकि यो कसइलाइ माद्दया रगतको मोल हो।”

⁷ तिननले आपसमी सल्लाह अरिबर तइ पैसाले परदेशिलाइ दफन अद्दाइ कुमालेको जमिन किन्यो।

⁸ तबइकिलाइ त्यो जमिनलाइ आज सम्मलगइ रगतको जमिन भणिन्छ।

⁹ तब यर्मिया अगमबक्ताले भण्याको बचन पुरा हुनाइलाइ इसो भयो। तिनले भण्यो, “उनकिलाइ इस्राएल देशका मान्सनले चाँदीका तीस सिक्‍का दिनाइलाइ सहमत भया,

¹⁰ रे तिननले तइ सिक्‍काले कुमालेको जमिन किन्यो, जसो प्रभुले मलाइ भण्याथ्यो।”

पिलातस हाकिमले येशूलाइ प्रश्न सोध्यो

¹¹ येशू हाकिमका अगाडी कल्लिया रे तिनले येशूलाइ सोध्यो, “कि तम यहुदिका राजा हौ?” येशूले जबाफ दियो, “जसो तम भण्नाछौ तसोइ हो।”

¹² पइ यहुदि मुख्य पुजारिन रे यहुदि मान्सनका अगुवाले उनलाइ दोस लायो तर उनले केइ जबाफ दिएइन।

¹³ तब पिलातस हाकिमले उनलाइ भण्यो, “तेरा बिसयमि औरले इति आरोप लाइराइछ, कि तु सुण्नइनि?”

¹⁴ तर येशूले केइ जबाफ दिएइन। याँ सम्मकि पिलातस हाकिम लगइ छक्‍क पण्या।

येशूलाइ छाड्डामि पिलातस असफल

¹⁵ हरेक बर्ष निस्तार काजबारका बेला पिलातस हाकिमले सदाइ एक कैदीलाइ छाड्डया रित थ्यो।

¹⁶ तइ समयमि बरब्बा नाउँको एक कुख्यात कैदी थ्यो,

¹⁷ जब मान्स जम्मा भया पिलातस हाकिमले तिनलाइ सोध्यो तमन कि चाहन्छौ? म तमरा निउति कइलाइ छाडि दिउ? बरब्बा कि ख्रीष्ट भणिन्या येशूलाइ?

¹⁸ क्याकि यहुदि मुख्य पुजारिनले येशूलाइ रिसले सुम्पया हुन भण्न्या पिलातसलाइ थाथ्यो।

¹⁹ पिलातस न्याय आसनमी बस्या बेला तिनरि स्वानिले इसो खबर पठायो कि तइ निर्दोष मान्सलाइ केइ जन अर्या, क्याकि आज सपनामि मइले तिनरा लाग्दा भौत दु:ख भोगेइ छु।

²⁰ यहुदि मुख्य पुजारि रे यहुदि मान्सनका अगुवाले बरब्बालाइ हामरा निउति छाड्डाइ माग अर, रे येशूलाइ मृत्यु दण्ड दिन्या माग अर भणीबर मान्सलाइ सूरेयो।

²¹ हाकिमले आजी तिननलाइ सोध्यो, “यिन दुइ मध्ये कइलाइ छाडि दिउ?” तर तिननले भण्यो, “बरब्बालाइ।”

²² तब पिलातस हाकिमले तिननसित सोध्यो, “आब ख्रीष्ट भण्या येशूलाइ चाइ क्यारुँ पइ?” तिन सबले भण्यो, “तइलाइ क्रुसमि मारीदिय।”

²³ पिलातस हाकिमले तिननलाइ भण्यो, “क्याकि? यइले कि कुकर्म अरिराइछ?” भिडले झिक कला हालिबर भण्न पस्या, “तइलाइ क्रुसमि मारीदिय।”

²⁴ पइ पछा केइ सिप नलाग्या धेकिबर खैलाबैला मच्चिन्छ भण्न्या डरले पिलातस हाकिमले पानी ल्याइबर भिडका अगाडीतिर आफ्ना हात धोइबर भण्यो, “यो तमरो दोस हो! म येइ मान्सका रगत बठेइ निर्दोष छु”।

²⁵ सबइ मान्सले जबाफ दियो, “हाम रे हामरो आफ्नो परिबारले उइको हत्याको दोस लिन्या हु।”

क्रुसमि टाँङदाइ सुम्पिया

²⁶ तब तिनले भिडलाइ सन्तुष्ट पड्डया इच्छाले तिनका निउति बरब्बालाइ छाडिदियो रे येशूलाइ कोर्रा लाइबर क्रुसमि माद्दाइ रोमी सिपाइलाइ सुम्पि दियो।

येशूको अपमान

²⁷ तब हाकिमका सिपाइनले येशूलाइ हाकिमको महलको आगनमी लैया (जइलाइ प्रेटोरियन भण्नान), रे सिपाइनको एक ठुलो पल्टन उनरा अगाडी जम्मा अर्यो।

²⁸ तिननले उनलाइ लाल रङका लत्ता लाइबर उन एक राजा हुन भणीबर उनरो हासो अदद पास्या,

²⁹ तिननले काणा भया हाङ्गाको मुकुट बनाइबर खिसि काट्टाइ मुन्टामि लाइदियो, पइ उनरा दाइन हातमि निङालोकि लठ्ठी दिबर उनरा अगाडी घुडा टेकिबर उनलाइ इसो भणबर गिल्ला अर्यो, “यहुदि मान्सनका राजा अमर रया, सलाम!”

³⁰ तब तिननले बेला बेलामि निङालोले उनरा मुन्टामि हाण्यो, रे उनरो अपमान अद्दाइलाइ भौत बेर थुक्यो।

³¹ उनरो खिसि काटीबर थग्गया, तिननले येशूका लत्ता फुकाइ दियो रे उनराइ लत्ता लाइदियो, रे उनलाइ क्रुसमि माद्दाइलाइ लैया।

क्रुसमि येशू

³² जाना जानाइ तिननले सिमोन नामको कुरेनि सहरको मान्स गाउँ बठेइ यरुशलेम सहरमि जान्नारया भेट्यो रे उइलाइ क्रुस उठाइबर तइ ठाउ सम्म लइजानाइ कर अर्यो।

³³ जब तिनन येशूलाइ गलगथा भण्न्या ठाउँमि लैया, जइलाइ खोपडिको ठाउ भणिन्छ।

³⁴ तब तिननले येशूलाइ गन्धरस नाउको औषधी मिसाया अंगुरको रस पिनाइलाइ दियो, तर उनले चाखिबर तइ पिन्या मन अरेन।

³⁵ तिननले उनलाइ क्रुसमि किला ठोकिबर टाङया पछा उनरा लत्तालाइ कइले कि लैजान्या भणबर चिट्ठा हाल्यो रे बाण्यो।

³⁶ तब तिनन ताइ बसिबर उनलाइ पहरा दिन पस्या।

³⁷ येशूका मुन्टाका मल्तिर “येशू यहुदिका राजा।” भण्न्या दोषपत्र टाङयाथ्यो।

³⁸ उनसित क्रुसमि दुइ जना डाँकुलाइ एकलाइ उनरा दाइन तिर रे अर्खालाइ बाँउतीर टाङयो।

³⁹ जो लगइ ताँ बठेइ हिटिबर गया उनले आफना मुन्टा हलाइबर इसो भण्नाइ खिसि काट्यो।

⁴⁰ रे भण्यो, “ओहो! तु मन्दिर भत्काउन्या रे तइलाइ तिन दिनमि बनाउन्या! आफलाइ बचा रे परमेश्वरको चेलो हइ भण्या क्रुस बठेइ ओलीबर आ।”

⁴¹ तस्याइ यहुदि मुख्य पुजारिन रे मोशाको कानुन सिकाउन्यावाला रे यहुदि मान्सनका अगुवाले सङै खिसि काटीबर इसो भण्यो,

⁴² “एइले औरलाइ त बचायो तर आफलाइ बचाउन सकेन। यो मान्स इस्राएल देशका ख्रीष्ट रे राजा हो, भण्या क्रुस बठेइ तलतिर ओलउ, रे हामले धेकु रे तममि बिश्वास अदद सकु।”

⁴³ येइले परमेश्वरसित भौत भरोसा अरन्थ्यो उनले येइलाइ चायो भण्या अइलइ छुटकारा दिउन क्याकि येइले म परमेश्वरको चेलो हु भण्थ्यो।

⁴⁴ जो डाँकु उनसित क्रुसमि टाङगीरइथ्या। उनले लगइ येशूको बेइजत अद्दाथ्या।

येशू मर्या

⁴⁵ आब बार बजे बठेइ लगभग तीन बजे सम्म देस भरि अन्धकार भयो।

⁴⁶ तीन बजे तिर येशू ठुलो डाको छाडि इसो भण्न लाग्या इलोइ, इलोइ, लामा सबखथनी? अर्थात हे मेरा परमेश्वर, हे मेरा परमेश्वर तमले मलाइ क्याकि त्याग्या?

⁴⁷ जो मान्सन ताँ नजिक कल्लिय्या थ्या, तिननले यो सुण्यो रे नबुजिबर एक अर्खालाइ भण्न लाग्या, “सुण, यो त एलिया अगमबक्तालाइ आफ्ना मदत अद्दाइलाइ बोलाउन्नाछ!”

⁴⁸ पइ उतन्जेइ तिन मध्ये एक जनाले दगुणिबर एक स्पन्ज लेयो रे तइमि सिर्का भर्यो रे तइ एक निङालोमि राखि उनलाइ पिनाइ दियो।

⁴⁹ तर औरले भण्यो कि उइलाइ एक्लोइ छाडदिए, हाम लगइ हेद्दाउ काइ एलिया तइलाइ बचाउनाइ आउछ कि।

⁵⁰ येशूले आजी जोरले कल्ला हालिबर प्राण त्याग्यो।

⁵¹ पइ मन्दिरको पर्दा टुप्पा बठेइ ठेक सम्म दुइ भाग होइबर चिरियो, रे पृथ्बी हल्लियो चट्टान लगइ फुट्या।

⁵² पइ चिहान खोलिया, रे परमेश्वरका जनका मर्या शरीर आजी जिउना भया।

⁵³ तिनन चिहान बठेइ बाइर निकल्या रे येशू मर्या बठेइ जिउना भया पछा, तिनन पबित्र सहर भित्तर पस्या रे भौत मान्सनका वाँ धेकिया।

⁵⁴ जब सुबेदार रे उनसित येशूलाइ पहरा दिन्यावालनले भुइँचालो रे ताँ भाएका घटना धेक्यो तब भौत डराइबर इसो भण्यो साँच्चि यिन त परमेश्वरका चेलो रइछन।

⁵⁵ ताँ भौत स्वानिन थिन, जो गालील जिल्ला बठेइ येशूको सेवा अददाइ उनरा पछा-पछा लागेइ थिन। तिनन टाडा बठेइ यिन सब हेद्दा थिन।

⁵⁶ तिन मध्ये मग्दला गाउँकी मरियम, याकुब रे योसेफकि इजा मरियम रे जब्दियाका चेलाकि इजा थिन।

येशूलाइ गाडियो

⁵⁷ आब साँज भया पछा योसेफ नाउँ भएका अरिमाथियाका एक जना धनि मान्स आया, तिन आफ लगइ येशूका शिष्या थ्या।

⁵⁸ पइ पिलातस हाकिमका वाँ जाइबर येशूको शरीर माग्यो। तब शरीर दिइयोस भणि पिलातस हाकिमले हुकुम अर्यो।

⁵⁹ पइ योसेफले तइ शरीर लइजाइबर एक सफा सुति कपडामि लपेट्यो,

⁶⁰ रे तइले तिनरो आफ्नोइ नयाँ चिहानमि राख्यो जइलाइ तिनले चट्टानमि खोपेर बनायाथ्यो तइ पछा एक ठुलो ढुङो घुरकाइबर चिहानका दारमि राखिबर तिन हिट्या

⁶¹ ताँ मग्दला गाउँकी मरियम, अर्खि मरियम चिहानका अगाडी बसिरइथ्या।

येशूका चिहानको पहरा

⁶² अर्खो दिन, तयारीको दिन थ्यो, यहुदि मुख्य पुजारिन रे फरिसि मान्सनको समुह पिलातस हाकिमलाइ भेटाइ गया।

⁶³ तिननले भण्यो, “हजुर, हामलाइ याद छ त्यो ठग जिउनोइ छ, उनले भण्याथ्यो, तीन दिन पछा म आजी जीउनो हुन्या हु।”

⁶⁴ तबइकिलाइ तेसरा दिन सम्म सिपाइनले त्यो चिहान सुरक्षित राखियोस भणि हुकुम दियो, यदि तमनले इसो अर्यानु भण्या तइका शिष्या आइबर उनरो लास चोरीबर लैजान्ना रे मान्सनलाइ भणन्या हुन, उन मर्या बठेइ जिउना भया छन, रे त्यो पछाको ठग पइलो ठग भण्ना झिक खराब होलो।

⁶⁵ पिलातस हाकिमले तिननलाइ भण्यो, “तमनसित और पहरेदार सिपाइ लैजा, तमन जा रे तइलाइ सकेसम्म सुरक्षित राख।”

⁶⁶ तिनन गया रे सुरक्षित राख्दाइ चिहानका मुखका ढुङामि छाप लायो ताकि कसइले तइ ढुङालाइ हटाउन जन सकउ। रे तिननले चिहान सुरक्षित राखदाइ केइ सिपाइनलाइ ताँ छाड्यो।