मत्ती 24 - डोटेली नयाँ करार

अंतिम दिनका चिन्ह

¹ तइ पछा येशू मन्दिर बठेइ बाइर जान्या बेला शिष्याले उनलाइ मन्दिरका भयंकर भबन धेकाउनाइ उनरा नजिकै आया।

² तर उनले तिननलाइ भण्यो, “तमन यिन सब धेकन्छौ, होइन ब? साँच्चि, म तमनलाइ भण्नउ, एक ढुङामि अर्खो ढुङा रन्या आथिन, यिन ढुङ्गानमी हइ एक लगइ आफ्नो ठाउँमि हुन्या होइन।”

³ येशू मन्दिर छाडिबर जैतुन डाङामि बसन्ज्या शिष्याले एकान्तमी आइबर सोध्यो, “हामलाइ भण, यिन कुरणी कब हुन्या हुन, रे तमरो आगमन रे यइ युगका अन्तको चिनो कि हुन्या हो?”

⁴ तब येशूले तिननलाइ भण्यो, “होस अर, कि कसइले तमलाइ भ्रममि जन पाडउ।

⁵ क्याकि भौत जाना मेरा नाउँ प्रयोग अरिबर आउन्या हुन, रे तिनन ‘म ख्रीष्ट हु’ भण्नाइ आउन्या हुन, रे भौतलाइ भ्रममि पाड्या हुन।

⁶ तमले लडाइका हल्ला नजिकै सुणन्या हौ रे लडाइका बारेमि टाढाको समाचार सुणन्या हौ। घबराया जन, क्याकि इसा घटना हुनु जरुरि छ तर संसारको अन्त छिट्टाइ त हुनइन।

⁷ क्याकि एक जातिका मान्स अर्खा जातिका मान्सलाइ हमला अद्या हुन, रे एक राज्यका मान्स अर्खा राज्यका मान्सका बिरोधमी लड्या हुन। रे भौत ठाउँमि भुइँचालो जान्या हो, रे अनिकाल पड्या हो।

⁸ यिन घटना केवल खेदोका समयका सुरु मान्तर हुन जसो स्वानीले बालक पाउन्या बेलाको पिडा हुन्छ। तिननले भौत खेदोका समय आउनार्या धेक्द्या हुन।”

⁹ तब जो मान्स तमरो बिरोध अरन्छ तमनलाइ संकटकि निउति दिन्या हुन, रे मारिदिन्या हुन। रे तमनलाइ सब जातिले घृणा अद्दया हुन क्याकि तमन ममि बिश्वास अर्न्छौ।

¹⁰ रे भौत जाना ममि बिश्वास अद्द छाड्या हुन, रे एकले अर्खालाइ बिश्वासघात रे घृणा अद्दया हुन।

¹¹ भौत झुटा अगमबक्ता आउन्या हुन, रे भौत मान्सनलाइ धोका दिन्या हुन।

¹² क्याकि दुष्टता बड्या हुनाले भौतले एकले अर्खालाइ प्रेम अद्द छाड दिन्या हुन।

¹³ तर यइ संसारमी बाचन्ज्या दु:ख नसकिन्ज्या सम्म ममि भरोसा अरन्छौ, रे हार मान्नाइनानु, परमेश्वरले तमलाइ बचाउन्या हुन।

¹⁴ रे परमेश्वरका राज्यको सुसमाचारका बारेमि संसारका सब जातिमी प्रचार अरिन्या हो, ताकि सब जातिकी निउति स्वीकार अद्दाइ मौका हुन्या हो। तइ पछा संसारको अन्त्य आउन्या हो।

महासंकटको सुरु

¹⁵ तबइकिलाइ जब तमन दानिएल अगमबक्ता बठेइ बोलिया खराब मान्सलाइ यरुशलेम सहरमि कल्लिया धेक्द्या हउ। (पाठकले बुजउ),

¹⁶ तब यहुदिया जिल्लामि हुन्या पहाड तिर भागुन।

¹⁷ तम घरका छ्तमि छौ भण्या आफना घरमि भया सामान लैनाइ घर भितर जन जा।

¹⁸ जो खेतमी छ त्यो आफ्नो लत्ता लैनाइ घर जन फर्कउ।

¹⁹ कठै! तिन स्वानिलाइ एक भयानक समय हुन्या छ जो बालक पाउन्यावालि छन, रे उनरी निउति जो नाना बालकलाइ दुध ख्वाउन्नाछिन।

²⁰ तर यो प्रार्थना अर कि यो दुःखदाइ समय हिउनमि अथवा बिश्राम दिनमि जनहउ, जब इथउथ जान समस्या हुन्या हो।

²¹ क्याकि तइ दिनमि भौत मान्स गम्भीर महासंकटमि हुन्या हुन, जो संसारको सुरु बठेइ अइल सम्म भया आथिन न त कभइ हुन्या हो।

²² तिन दिन नघटाया भया कोइ मान्स बच्चेइ थेइन, क्याकि उनले छान्या मान्सनका लाग्दा, उनले समय घटाउन्या हुन।

²³ तइ बेला यदि कसइले तमलाइ हेर, ख्रीष्ट याँ छन! कि हेर ताँ छन! भण्यो भण्या, तम बिश्वास जन अर्या।

²⁴ क्याकि झुटा ख्रीष्ट रे झुटा अगमबक्ता आउन्या रे चिन्ह रे अदभूत काम धेकाउन्या छन, सक्या सम्म उन मान्सलाइ धोका दिन्या हुन, जइलाइ परमेश्वरले चुनीराइछ।

²⁵ याद राख्या, मइले तमलाइ यो सब घटनाका बारेमि भणिराइछु।

²⁶ यदि तिननले तमनलाइ हेर उन उजाड ठाउँमि छन, भणि भण्नाहान भण्या बाइर निकलिबर जन जा। हेर, उन भितर कोठामी छन भण्या लगइ बिश्वास जन अर।

²⁷ क्याकि जसेरि बिजुलि पुर्व बठेइ चम्कन्ज्या पश्चिम सम्म उजालो हुन्छ, तसेरि म, मान्सको चेलाको आगमन हुन्या हो।

²⁸ जाँ डिङो छ, ताँ चील लगइ जमा हुनाहान।

²⁹ तइ दिनमि, भयानक दु:खको समय साकिया पछा सुर्या रे जुन दुएइ उजालो दिन छाड्या हुन, रे अग्गास हइ तारा झड्या हुन रे अग्गासको सक्ति हल्लीन्या हुन।

³⁰ तब म, मान्सको चेलाको चिन्ह अग्गासमी धेका पड्डया हुन, रे धर्तिका सब जाति बिलाप अद्दया हुन, रे तिननले मान्सको चेलोलाइ अग्गासका बादलमि सक्ति रे ठुलो महिमासित आउन्नारया धेक्द्या हुन।

³¹ उइले आफ्नो स्वर्गदुतलाइ तुरहिको ठुलो आवाजसित पठाउन्या हो, रे तिननले सबलाइ अग्गासका सबतिर बठेइ मइले चुन्या सब मान्सलाइ जम्मा अद्दया हुन।

अन्जिरको रुख बठेइ शिक्षा

³² तर अन्जिरको रुख बठेइ यो पाठ सिक जसोकि तइको हाँङामि पालुवा रे तइका पात पलाउन्या बेला बठेइ, तम जाणन्छौ कि बसन्त ॠतु नजिक छ।

³³ यिसेरी, जब तम यिन सब घटना हुन्नारया धेकन्छौ, तब तमलाइ था हुनु पणन्छ कि यइ संसारको अन्त छिटाइ हुन्नाछ।

³⁴ साँच्चि, म तमलाइ भण्नउ, अइल बस्या कोइ मान्स पक्‍का रुपमि यिन सब कुरणी पुरा हुनज्या सम्म मद्द्या होइन।

³⁵ अग्गास रे धर्ति सकीबर जान्या हो, सदाइका निउति रन्या होइन पइ मइले जो बचन भणिराइछु त्यो सदाइकि निउति रन्या हो।

जागा बस

³⁶ तर म कब फर्किन्या हु, यइको पक्‍का समय कसइलाइ था आथिन। न त स्वर्गदुत, न त, परमेश्वरको चेलो तर पिताले मान्तर तइ दिन जण्नाहान।

³⁷ जब म, मान्सको चेलाको आगमन हुन्या हो, तब त्यो समय नोआका पालामि भया जसोइ हुन्या हो।

³⁸ क्याकि जसेरि जलप्रलय भण्ना पइलि नोआ जहाज भितर पस्या दिन सम्म, मान्स खाइरया, पिरया रे ब्याबारि अद्दाथ्या,

³⁹ रे जलप्रलय आइबर तिनन सबलाइ स्वाट्टइ बगाइ नलैजान्ज्या सम्म तिननले था पाएइन। म, मान्सको चेलोको आगमन लगइ तसेरि हुन्या हो।

⁴⁰ तइ बेला दुइ जाना खेत बारीमि हुन्या हुन, एक लइजाइन्या हो रे अर्खो छाडिन्या हो।

⁴¹ दुइ आइमाइ जितारा पिस्सारएइ हुनेइ हुन, एक लइजाइनेइ हो, अर्खि छाडनेइ हो।

⁴² तबइकिलाइ तमले नीकेरि हेद्दु पड्या हो, क्याकि कइ दिन तमरा प्रभु आउनाहान, त्यो तम जन्नानु।

⁴³ तर यो जाण, कि घरको मालिकले चोर रातको कइ बेला आउछ भणि जाण्या भया, उ बिउजोइ रनेइथ्यो, रे आफ्नो घर फुटाउन दिनेइ थेइन।

⁴⁴ तबइकिलाइ तमन लगइ तयार र, क्याकि म, मान्सको चेलो तमनले नसुच्या बेलामि आउन्या हो।

बिश्वासयोग्य दास रे दुष्ट दास

⁴⁵ रे एक बिश्वासि रे बुद्दिमान नौकर यइ जसो छ: जइलाइ तइको मालिकले और नौकरलाइ निगरानि अद्दाइलाइ राख्यो। उइले नौकरलाइ ठीक बेलामि खानाइ दिनाइलाइ भणन्छ रे उ लामा यात्राकीलाइ जान्छ।

⁴⁶ त्यो नौकर धन्य हो, जइलाइ मालिक आउन्ज्या तसोइ अर्या भिटन्छ।

⁴⁷ साँच्चि, म तमनलाइ भण्नउ, मालिकले तइलाइ आफ्नो जम्माइ सम्पतिमि जिम्मा दिन्छ।

⁴⁸ तर यदि तइ दुष्ट नौकरले मेरा मालिक ब्यालो अद्दाहन भणि मनमि सोचि,

⁴⁹ आफसित काम अद्दया नौकरलाइ चुट्ट रे दराहा सित खान रे पिन लाग्यो भण्या,

⁵⁰ मालिक नौकरले नसोच्या दिन रे नजाँण्या बेला फर्किन्या हुन।

⁵¹ मालिकले तइलाइ कडा दण्ड दिन्या हुन, रे तइलाइ कपटीका बिचइनि खिद्दिन्या हुन, जाँ मान्स रुन्या हुन रे दारा किट्या हुन।