मत्ती 11 - डोटेली नयाँ करार

येशू रे बप्तिस्मा दिन्या यूहन्ना

¹ आफना बारइ शिष्यालाइ आदेस दिइसक्या पछा येशू ताँ बठेइ गालील जिल्लाका गाउँमी सिकाउनाइ रे सुसमाचार प्रचार अद्दाइ गया।

² यूहन्नाले येशू ख्रीष्टका कामको चर्चा झेलमि सुण्यो, रे आफना शिष्यालाइ उनरा वाँ केइ प्रश्न सोद्दाइ पठायो,

³ “जो आउन्याहुन, कि तम उनै हउ? कि हाम कसइको बाटो हेद्दाउ?”

⁴ येशूले तिनलाइ भण्यो, “तमनले सुण्या रे धेक्या कुरणी यूहन्नालाइ भण्दिय,

⁵ कि अन्धा धेक्दाहान, लङडा हिट्टाहान, कोणी सुद्द हुनाहान, टोल्या सुण्नाहान, मर्या जिउना हुनाहान, गरिबलाइ सुसमाचार सुणाइन्छ।

⁶ धन्य हो त्यो, जइले ममि बाधाको कारण पाउनइन।”

⁷ यूहन्नाका शिष्या गया पछा येशूले यूहन्नाका बारेमि भिडलाइ भण्न पस्या, “तमन उजाड ठाउँमीकी हेद्दाइ निकल्या? कि बतासले हलाया निङालो?

⁸ तब तमन क्यालाइ निकल्या? कि चम्कन्या लत्ता लाया मान्स हेद्दाइ? नइ, लत्ता लाउन्या त राजाका महलमि बस्साहान।

⁹ तमन क्याइ निकल्या रे? कि तमन अगमबक्तालाइ हेद्दाइ निकल्या? हो, म तमनलाइ भण्नउ, अगमबक्ता भण्ना लगइ महान मान्सलाइ।”

¹⁰ पबित्र सास्त्रमि परमेश्वरले यूहन्नाको बारेमि भणिराइछ, “हेर, म आफना खबर पुर्याउन्या मान्सलाइ तेरा अगाडी-अगाडी पठाउनउ, जइले तेरा अगाडी तेरो बाटो तयार अरन्छ।”

¹¹ “साँच्चि, म तमनलाइ भण्नउ, स्वानी बठेइ जन्म्या मध्ये बप्तिस्मा-दिन्या यूहन्ना भण्न्ना महान और कोइ भया आथिन। पइलगइ स्वर्गको राज्यमि जो सब भण्न्ना नानो छ, त्यो यिन भण्न्ना महान हो।

¹² बप्तिस्मा-दिन्या यूहन्नाले प्रचार अद्द सुरु अर्या बठेइ अइल सम्म स्वर्गको राज्य जोरले फइलिरइछ, रे हिंसक मान्सनले यइलाइ खतम अद्दया कोशिस अद्दा छन।

¹³ अगमबक्तानका सब किताबले रे मोशाका कानुनले बप्तिस्मा-दिन्या यूहन्ना आया सम्म राज्यका बारेमि अगमबाणी अर्यो।

¹⁴ यदि तमन ग्रहण अद्दाइ इच्छा अरन्छौ, उन एलिया हुन जइ आउन्या अगमबाणी अर्याथ्यो।

¹⁵ तम जो सुणनाछौ, तइ सुण्या कुरणिका बारेमि ध्यानले सोच।

¹⁶ आब यइ पुस्ता तुलना म कि सित अरुँ? यो त बजारमि ना-न्नाना केटाकेटिले खेल्या जसो हो। केइ केटाकेटिले आफ्ना साथिनलाइ बोलाइबर भण्नाहान,

¹⁷ हामले तमरा निउति ब्याका गीत बजाया, तर तमन नाच्यानु। हामले बिलापको गीत बजाया, तर तमन रोर्यानु।

¹⁸ क्याकि यूहन्ना बेर-बेरि बर्त बसनथ्या रे मध्य खानाइन्नथ्या, रे तिनन भण्नाहान, ‘उइलाइ भूत लागिरइछ।’

¹⁹ तर म, मान्सको चेलो खानोइ रे पिनोइ आयो, रे तिनन भण्नाहान, ‘हेद्दा, घिचुवा, पिउन्यावालो, कर उठाउन्या रे पापीको साथी!’ तर मान्सका कामले साबित अरन्छ कि उ बुद्दिमान छ।”

पछुतो नमान्या सहर

²⁰ तब येशू सहरमि बस्या मान्सनलाइ हकाद्द पस्या जइ सहरमि उनले भौत जसा अचम्मका काम अर्याथ्यो, क्याकि तिननले पाप अद्द छाडिबर परमेश्वरतिर फर्केइनन।

²¹ तमन भयानक समस्यामि छौ! तम मान्सनलाइ जो खोराजिन सहरमि बसन्छौ! तमन भयानक समस्यामि छौ! तम मान्सन जो बेथसेदा गाउँमी बसन्छौ! यदि तमनमि धेकाया अचम्मका काम टुरोस रे सिदोन सहरमि धेकाया भयले, ताँका मान्सनले पइल्ली भाङरा लाइबर छार घस्सेइ थ्या, यो धेकाउनाइ कि तिनन पाप अद्द छाडिबर परमेश्वरतिर फर्किया छन!

²² तर म तमनलाइ भणनउ परमेश्वरले न्यायका दिनमि तमलाइ दिन्या दण्ड भण्ना टुरोस रे सिदोन सहरलाइ दिन्या दण्ड कम हुन्या हो।

²³ रे तमन, कफर्नहुम गाउँका मान्सन, कि तु अग्गास सम्मइ उचिन्या हइ ब? तु नरक सम्मइ खितिन्या हइ। क्याकि तुमि अरिया अचम्मका काम सदोम सहरमि अरिया भया त्यो आजका दिन सम्म रइरनेइथ्यो।

²⁴ तर म तमनलाइ भण्नउ, परमेश्वरले न्यायका दिनमि तमलाइ दिन्या दण्ड भण्ना टुरोस रे सदोम सहरलाइ दिन्या दण्ड कम हुन्या हो।

थग्या मान्सलाइ आराम

²⁵ तइ बेला येशूले भण्यो, “हे पिता, अग्गास रे धर्तिका प्रभु, म तमलाइ धन्यबाद दिनउ, क्याकि तमले यिन कुरणी बुद्दिमान रे समजदार मान्सन बठेइ गोप्य राख्या, तर साधारण मान्सनलाइ प्रकट अर्या।

²⁶ हो पिता, क्याकि इसेरि अददु तमलाइ निको लाग्यो।

²⁷ मेरा पिताले जम्माइ चिज मलाइ दिइराइछ। चेलोलाइ पछेण्न्या उन मान्तर हुन। पितालाइ साँच्चि पछेण्न्या चेलो मान्तर हुन। रे तिनन मान्सन जइलाइ म, चेलाले पितालाइ पछेण्न्या चाहानउ।

²⁸ ए सब कठीन काम अद्दयावाला रे बोजले चेपिया हो, मेरा वाँ आस, म तमनलाइ आराम दिन्या हु।

²⁹ मेरो जउँ आफमी राख, रे मसित सिक, क्याकि म बिनम्र रे नम्र मनको छु, रे तमले आफना प्राणमी आराम पाउन्या हौ।

³⁰ क्याकि मेरो जउँ सजी छ, रे मेरो भारि हलुको छ।”