लूका 4 - डोटेली नयाँ करार

येशूको परिक्षा

¹ येशू पबित्र आत्माले भरिबर यर्दन नदी बठेइ फर्किबर आया। रे पबित्र आत्माले येशूलाइ उजाड ठाउँमि लैया,

² रे चालिस दिन सम्म उजाड ठाउँमि सैतान बठेइ उनलाइ परिक्षा भयो। चालिस दिन सम्म उनले केइलगइ खाएइन, रे चालिस दिन पछा उन भोकाया।

³ सैतानले उनरा वाँ आइबर भण्यो, “यदि तम परमेश्वरका चेला हौ भण्या, यिन ढुङालाइ रोटा होइजाउन भणि आज्ञा अर, ताकि तम तिन रोटा खान सक।”

⁴ येशूले तइलाइ जबाफ दिइबर भण्यो, “लेखिरइछ मान्स रोटाले मान्तर जिउनो रनइन।”

⁵ सैतानले उनलाइ एक उच्चा ठाउँमि लइजाइबर एकै बेरमि धर्तिका जम्माइ राज्य धेकायो।

⁶ सैतानले उनलाइ भण्यो, “म यो सब अधिकार रे यइको गौरब तमलाइ दिनउ, क्याकि यिन जम्माइ मलाइ दिइराइछ, रे म जइलाइ इच्छा अद्दउ उइलाइ दिनउ।”

⁷ तमले मलाइ आराधना अर्या भण्या यिन सब तमरा हुन्या हुन।

⁸ येशूले तइलाइ जबाफ दिइबर भण्यो, “लेखिरइछ तुइले परमप्रभु, आफना परमेश्वरलाइ आराधना अरेइ, रे उनरो मान्तर सेवा अरेइ।”

⁹ आब सैतानले येशूलाइ पबित्र यरुशलेम सहरमि लइय्यो रे मन्दिरका टुप्पामि पुगाइबर उनलाइ भण्यो, “यदि तम परमेश्वरको चेला हौ भण्या याँ बठेइ तल्तिर फट्टक हाल।”

¹⁰ क्याकि पबित्र सास्त्रमि लेखिरइछ, “तमलाइ बचाउनाइ परमेश्वरले आफना स्वर्गदुतलाइ आज्ञा अद्या हुन

¹¹ रे तिननले तमलाइ आफना हात-हातइ समाउन्या हुन, रे तमरा खुट्टा ढुङामि ठोकिन्या होइन्न।”

¹² येशूले तइलाइ जबाफ दिइबर भण्यो, “यिसो भणिरइ छ, तुइले परमप्रभु आफ्ना परमेश्वरको परिक्षा जनअरेइ।”

¹³ सैतानले उनलाइ सब परिक्षा अरिसकिबर अनुकूल समय नहुन्ज्या उनलाइ छाडिबर गयो।

¹⁴ येशू पबित्र आत्माको सक्तिमि गालील जिल्लामि फर्किबर गया, रे उनरा बिसयको कुरणी वलतिर पल्तिरका सब ठाउँमि फैलियो।

¹⁵ येशूले यहुदि सभाघरमी सिकाउन लाग्या, रे सबले उनरो प्रसंसा अर्यो।

¹⁶ उन नासरत गाउँमी फर्किबर गया, जाँ उन हुर्क्या। उन आफ्नो चलन अन्सार बिश्राम दिन यहुदि सभाघरमी गया, रे पबित्र सास्त्र पड्डाइलाइ कलिया।

¹⁷ उनलाइ यशैया अगमबक्ताको किताब दियो। उनले तइ किताब खोल्यो, रे यो खण्ड निकाल्यो जइमि यिसो लेखिरइथ्यो:

¹⁸ परमेश्वरका आत्मा ममि छ, क्याकि गरिबलाइ सुसमाचार सुणाउनाइलाइ उनले मलाइ अभिषेक अरिराइछ। कैदीनलाइ स्वतन्त्रताको घोषणा अद्दाइलाइ, रे अन्धालाइ दृष्टि दिनाइलाइ, अत्याचारमि पड्या सबलाइ मुक्त अद्दाइलाइ,

¹⁹ रे परमेश्वरको दया धेकाउन्या समय आया छ भण्नाकिलाइ उनले मलाइ पठाया छ।

²⁰ उनले तइ किताब बन्द अर्यो, रे एक जाना सेबकलाइ दिइबर उन बस्या। यहुदि सभाघर भितर भया सबले येशूलाइ एकोरो हेर्यो।

²¹ तब उनले तिननलाइ भण्यो, “आज पबित्र सास्त्रको यो बचन तमनले सुण्न्ना सुण्न्नाइ पुरा भया छ।”

²² सबले उनरो बडवाँइ अर्यो, रे उनरो मुख बठेइ निकल्या कृपापूर्ण बचनमी छक्‍क पड्या, रे तिननले भण्यो, “यिन योसेफका चेला होइन्न ब?”

²³ उनले तिननलाइ भण्यो, “पक्‍कालगइ तमनले मलाइ यो उखान भण्न्या हौ, ‘ए बैद्दी, आफइलाइ निको बना। कफर्नहुम गाउँमी तुइले जी जति अर्या भणि हामले सुणिराइथ्या, तिन याँ आफना सहरमि लगइ अर’।”

²⁴ रे उनले भण्यो, “साँच्चि म तमनलाइ भण्न्नउ, कोइलगइ अगमबक्तालाइ आफनाइ देस रे आफनाइ ठाउँमि मान्स सम्मान अद्दाइन्न।

²⁵ मेरी कुरणी सुण। यो सत्य हो कि इस्राएल देशमि एलिया अगमबक्ताको पालामि ताँ भौत बिधवा थिन, तइ बेला जब साडे तीन बर्ष सम्म पानी पडेइन, याँ सम्मकि पुराइ इस्राएल देशमि ठुलो अनिकाल पड्या थ्यो।

²⁶ तर एलिया सिदोन सहरको नजिक सारपत गाउँमी भएइ एक गैर-यहुदि बिधवाका वाँ मान्तर पठाइया, रे इस्राएल देशमि और कसइ बिधवा वाँ पठाइयइन्न।

²⁷ एलिशा अगमबक्ताको पालामि इस्राएल देशमि भौत कोणी थ्या, तर सिरिया देस बठेइ नामान, गैर-यहुदि मान्स मान्तरइ निको पाडीयो, और कोइलगइ निको पाडिएइन्न।”

²⁸ यिन कुरणी सुणिबर यहुदि सभाघरमी भया सब जाना रिसले मुर्मुरिया।

²⁹ तिनन उठ्या रे उनलाइ सहर बठेइ बाइर निकाल्यो, रे जइ पहाडमि तिनरो सहर बनाइराइथ्यो, तइका टुप्पामि लइजाइबर उनलाइ माद्दाइकीलाइ तल्तिर खित्ताइ खोज्यो।

³⁰ तर उन तिनरा बिच बठेइ निकलिबर गया।

भूत लाग्या मान्स

³¹ तइ पछा येशू गालील जिल्लाको कफर्नहुम गाउँमी गया रे बिश्राम दिनमि उनले तिननलाइ शिक्षा दिन लाग्या।

³² तिनन येशूको शिक्षा सुणिबर छक्‍क पड्या, क्याकि उनले बचन पुरा अधिकारसित सिकाउन्थ्या।

³³ यहुदि सभाघरमी एक मान्स थ्यो जइलाइ भूत लागिरइथ्यो, रे तइले जोरले कला हाल्यो,

³⁴ “हे नासरत गाउँका येशू, तमरो हामसित कि काम? कि तम हामलाइ नास पाड्डाइ आया हौ? म तमलाइ पछेण्नउ, तम को हौ? तम मान्तर पबित्र जनहउ जो परमेश्वरका वाँ बठेइ आया हौ।”

³⁵ रे येशूले भूतलाइ यिसो भणि हकाद्द पस्या, “चुप लाग रे तइ बठेइ निकलिबर जा।” तइ मान्सलाइ घुडबुडयाउनोइ तइलाइ केइलगइ हानि नअरिबर त्यो भूत तइ मान्स बठेइ निकलिबर गयो।

³⁶ तब तिनन सब मान्सले भौत अचम्म माण्यो, रे एक-अर्खासित यिसो भण्यो, “यो ज्ञानकी कुरणी रइछ यिनले त अधिकारसित रे सक्तिसित भूतलाइ आज्ञा दिनाहान रे भूत निजानाहान।”

³⁷ येशूका बारेमि वलतिर पल्तिरका सब ठाउँमि फैलियो।

³⁸ यहुदि सभाघर बठेइ निकलिबर उन सिमोनका घर पस्या। सिमोनकि सासु जरले सिकिस्त होइरइथिन, रे तिननले उइकी निउति येशूसित बिन्ति अर्यो।

³⁹ उइका नजिकै गइबर उनले जरलाइ हकार्यो, रे जरले उइलाइ छाड्यो, उतनजेइ उठीबर उइले तिननलाइ खानाइ दियो।

⁴⁰ बसाइतक भौत मान्सन जो बिमारी रे जइलाइ भूत लाग्याथ्यो सबलाइ तिननले उनरा वाँ लेया। उनले तिनन सबमि आफना हात राखिबर तिननलाइ निको पाड्यो।

⁴¹ भौत मान्सन बठेइ भूत लगइ कला हाल्लाइ रे इसो भण्नाइ निकल्या, “तम परमेश्वरको चेलो हौ।” तर उनले तिनलाइ हकारिबर बोल्लइ दिएइन, क्याकि भूतले उन येशू ख्रीष्ट हुन भणि चिन्याथ्यो।

⁴² परभातइ सुर्य आउना हइ पइल्ली येशू उठीबर एकान्त ठाउँमि गया। भिड उनलाइ खोज्जाइ उनरा वाँ आया, रे “हामलाइ छाडिबर जन जा” भणि उनलाइ रोक्दाइ कोशिस अर्यो।

⁴³ तर येशूले तिनलाइ भण्यो, “मइले परमेश्वरको राज्यको सुसमाचार और सहरमि लगइ प्रचार अद्दु पणन्छ, क्याकि म इसइकि निउति पठाइया हु।”

⁴⁴ रे उन यहुदिया जिल्लाका यहुदि सभाघरमी प्रचार अद्द लाग्या।