लूका 24 - डोटेली नयाँ करार

मर्या बठेइ येशू जिउना भया

¹ हप्ताको पइलो दिन परभातइ तिन स्वानिनले तयार अर्या सुगन्धित द्रब्य लैजाइबर तिन चिहान आइन।

² तिननले ढुङो चिहान बठेइ हटाया भेट्यो।

³ तर भितर पसन्ज्या तिननले प्रभु येशूको शरीर पाएइन।

⁴ जब तिन यइ बारेमि अलमल पडेइथीन, तब चम्किलो लत्ता लाया दुइ बैकान तिनरा नजिकइ खडा भया।

⁵ तिनन डराइगइन पइ जमिन तिर मुन्टो निउणायो, तर तिन दुइ बैकानले भण्यो, तमन जिउना मान्सलाइ मर्या बिचमि क्याकि खोज्जा छौ?

⁶ उन याँ आथिन, तर जिउना भइ उठिरइछन। गालीलमि हुनज्या उनले तमनलाइ कि भण्याथ्यो त्यो याद अर,

⁷ कि उन, मान्सको चेलो पापी मान्सका हातमि सुम्पिनु, रे क्रुसमि टाँगिनु, रे तेसरा दिनमि मर्या बठेइ जिउनो हुनु आवश्यक छ।

⁸ आइमाइले उनरा बचन सम्ज्या।

⁹ पइ चिहान बठेइ फर्किबर तिननले यिन सब कुरणी एघार शिष्या रे और सबलाइ बतायो।

¹⁰ तिन स्वानिन चाइ, मग्दला गाउँकी मरियम, योअन्ना, रे याकुबकि इजा मरियम थिन। तिननसित रया और स्वानिनले लगइ यिन कुरणी येशूले छान्या शिष्यालाइ भण्यो,

¹¹ तर तिननले यिन कुरणी तसाइ हुन भणि ठान्यो, रे तिननले बिश्वास अरेइन।

¹² तर पत्रुस उठीबर चिहानमि दकुडिबर गयो, रे निउणिबर हेरन्ज्या सुति कपडाका पट्टि मान्तर धेक्यो। त्यो घटना धेकिबर अचम्म माणिबर उन निय्या।

येशू इम्माउसका बाटामि

¹³ तसइ दिन उनरा शिष्यामि हइ दुइ जाना शिष्या यरुशलेम सहर बठेइ करीब एघार किलोमिटर दूरको इम्माउस नाउँको एक गाउँ तिर जान्नाथ्या।

¹⁴ येशूसित घटेका सब घटनाका बारेमि तिन आपसमी कुरणी अद्दाथ्या।

¹⁵ तिनन आपसमी कुरणी अद्दाइ रे बहस अद्दारया बेलामि येशू आफइ नजिकइ आइबर तिननसित हिट्या।

¹⁶ तर परमेश्वरले तिनन येशूलाइ पछेण्न नसक्द्या बनाइदियो।

¹⁷ येशूले तिनलाइ सोध्यो, “तमन हिट्टाइ आपसमी कि बहस अद्दाछौ?” तिनन टक्‍क रोकिया रे तिनरा अनार भौत उदासभया।

¹⁸ तिन दुइमि हइ क्लेओपास भणन्या मान्सले उनलाइ जबाफ दियो, “यरुशलेम सहरमि तम मान्तर एक मान्स होला जसलाइ केइ दिन इथा याँ कि हुन्नाछ भणबर था आथिन।”

¹⁹ येशूले तिननलाइ सोध्यो, “कि कुरणी?” तिननले जबाफ दियो, “नासरत गाउँका येशूका बारेमि, उन एक जाना अगमबक्ता थ्या, रे परमेश्वर रे सब मान्सका सामने अचम्मका काम रे सक्तिशाली बचनका शिक्षा दिन्थ्या।

²⁰ तर यहुदि मुख्य पुजारि रे हामरा सासकले उनलाइ मृत्यु दण्डको निउति सुम्पिदियो, रे उनलाइ क्रुसमि टाँङ्यो।

²¹ रोमी बठेइ इस्राएल देशका मान्सनको उद्दार अद्द्या उनइ हुन भण्न्या हामले आसा अर्याथ्या। यिन सब कुरणी छाडिबर, यो घटना घट्या आज तेसरो दिन हो।

²² त्यो बाहिक हामरा दलका कोइ-कोइ स्वानिनले हामलाइ चकित बनाया छन। तिनन आज परभातइ चिहानमि गइन,

²³ रे तिननले येशूको शरीर पायइन। तिनन आइबर हामलाइ भण्यो, ‘हामले स्वर्गदुतलाइ धेक्या, जइले येशू जिउना छन भण्यो।’

²⁴ हामरा दलमि हइ कोइ-कोइ चिहानमि गया, रे तिन स्वानिनले जी भण्याथ्यीन, तसोइ भेट्यो, तर उनलाइ धेकेइन।”

²⁵ येशूले तिन दुइ शिष्यालाइ भण्यो, “ए मुर्ख मान्सन हो! पबित्र सास्त्रमि अगमबक्ताले लेख्या सब कुरणी बिश्वास अद्दाइ तमनलाइ भौत असजि लागन्छ।

²⁶ ख्रीष्टले यिन सब कष्ट भोग्दु रे तइ पछा आफ्नो महिमामि पस्सु आवश्यक थ्यो।”

²⁷ येशूले तिननलाइ पबित्र सास्त्रमि मोशाले लेख्या कानुन बठेइ सुरु अरिबर सब अगमबक्ता सम्म, आफना बारेमि लेखिया सब कुरणीको ब्याख्या अर्यो।

²⁸ तिनन जइ गाउँमी जान्नाथ्या तइका नजिकइ पुग्या। येशूले और उथ जान्या जसो अर्यो।

²⁹ तर तिननले उनलाइ यिसो भणबर कर लायो, “हामसित बस, क्याकि रात हुन लाग्गइ, रे दिन भौत ढल्किया।” रे उन तिननसित बस्साइलाइ घर भितर पस्या।

³⁰ जब येशू तिननसित खानाइ बस्या, उनले रोटा समाइबर आसिर्बाद दियो, रे तोडीबर तिननलाइ दिन लाग्या।

³¹ तब तिनरा आँखा खुल्या, रे तिननले उनलाइ पछेण्यो। रे उन तिनरा नजर बठेइ हराया।

³² तिननले आपसमी भण्यो, “उनले हामसित बाटामि कुरणी अरनज्या, रे हामलाइ पबित्र सास्त्रको अर्थ भणनज्या हामरो हृदय उत्साह रे आसाले प्रज्वलित भयाथ्यो।”

³³ उतन्जेइ तिनन उठीबर यरुशलेम सहरमि फर्क्या, रे एघार जाना शिष्या रे तिननसित जम्मा भयालाइ भेट्यो,

³⁴ रे तिननलाइ यिसो भण्यो, “प्रभु साँच्चि जिउना भइ उठिरइछन रे सिमोन पत्रुसका वाँ धेकिया।”

³⁵ तब तिननले बाटामि भया कुरणी रे उनले रोटा तोडन्ज्या तिननले येशूलाइ पछेण्या कुरणी भणिदियो।

येशू शिष्याका वाँ धेकिया

³⁶ तिनन यिन कुरणी अद्दा-अद्दाइ येशू तिनरा बिचमि धेकिया, रे भण्यो, “तमनलाइ सान्ति होउ।”

³⁷ तिनन तरासिया, रे डरले आतिया, रे “हामले त भूत धेक्दाछु” भण्न्या सम्झया।

³⁸ तर उनले तिननलाइ भण्यो, “तमन क्याइ बिचलित हुन्छौ? रे तमनका मनमि क्याइ संका आउँछ?

³⁹ मेरा हात रे खुट्टा हेर, मइ हु, मलाइ छोइबर हेर। क्याकि भुतको मासु रे हाड हुनइन, तर तमन धेकन्छौ, मेरा त छन।”

⁴⁰ यिसो भण्या पछा उनले तिननलाइ आफना हात रे खुट्टा धेकायो।

⁴¹ तर, खुशी रे अचम्म पड्या हुनाले तिननले आजी लगइ येशू जिउना छन भणि बिश्वास अद्द सकेइन। रे येशूले तिननलाइ भण्यो, “तमनसित याँ केइ खान्या चिज छ?”

⁴² तिननले आगामी सेक्या माछाको एक खन्टो उनलाइ दियो।

⁴³ रे उनले त्यो समाइबर तिननले हेद्या बेला खाइदियो।

⁴⁴ उनले तिननलाइ भण्यो, “तमनसित हुन्ज्या मइले बोल्या बचन यिनइ हुन, मोशाको कानुन, अगमबक्ता रे भजनका किताबमी मेरा बारेमि लेखिया सब कुरणी सत्य हुनुइ पणन्छ।”

⁴⁵ तब पबित्र सास्त्र बुज्जाइलाइ उनले तिननलाइ सहयोग अर्यो।

⁴⁶ उनले तिननलाइ भण्यो, “पबित्र सास्त्रमि यिसो लेखिया छ, कि ख्रीष्टले दु:ख भोग्दु रे तेसरा दिनमि मर्या बठेइ जिउनो हुनु पणन्छ,

⁴⁷ रे यरुशलेम सहर बठेइ सुरु अरिबर सब जातिलाइ उनरा नाउँमि पाप अद्द छाडिबर परमेश्वरतिर फर्क्या रे पाप क्षमाको प्रचार हुनु पणन्छ।

⁴⁸ तमन यिन सब कुरणिका साक्षि हउ।

⁴⁹ रे मेरो पिताले तमनलाइ दिन्या बाचा अर्या पबित्र आत्मा म आफइ तमनमि पठाउन्या हु। तर तमनले स्वर्ग बठेइ सक्ति नपाउन्ज्या तमन इसइ सहरमि पखीराख्दु पणन्छ।”

येशू स्वर्ग गया

⁵⁰ तइ पछा येशूले तिननलाइ सहरको बाइर बेथानिया गाउँको नजिक लइय्या, रे आफ्नो हात उठाइबर तिननलाइ आसिर्बाद दियो।

⁵¹ उनले तिननलाइ आशिस दिन्ज्या, उन तिनन बठेइ छुटिया रे स्वर्गमि गया।

⁵² तिननले उनरो आराधना अर्यो, रे बडा आनन्दसित यरुशलेम सहरमि फर्क्या।

⁵³ रे तिनन परमेश्वरको प्रसंसा अद्दाइ मन्दिरमि लगातार रन पस्या।