लूका 20 - डोटेली नयाँ करार

येशूको अधिकारका बारेमि प्रश्न

¹ एक दिन मन्दिरमि उन मान्सलाइ सिकाउन्नाथ्या, रे तिननलाइ सुसमाचार प्रचार अद्दाथ्या। यहुदि मान्सनका अगुवासित यहुदि मुख्य पुजारिन रे मोशाको कानुन सिकाउन्यावाला उनरा वाँ आया,

² रे उनलाइ सोध्यो, “हामलाइ भण, कइ अधिकारले तम यिन काम अरन्छौ, अथवा यिन काम अदद्या अधिकार तमलाइ कइले दियो?”

³ उनले तिननलाइ जबाफ दियो, “म तमलाइ एक प्रश्न सोद्दउ, मलाइ तमनले तइको जबाफ दिय।

⁴ यूहन्नालाइ मान्सको बप्तिस्मा दिनाइ कइले पठायो? मलाइ जबाफ दिय मान्सले कि परमेश्वरले।”

⁵ पइ तिनन यिसो भण्नाइ आपसमी बहस अद्द पस्या, “यदि त्यो स्वर्गका परमेश्वर बठेइ भण्नाउ भण्या, तमले यूहन्नामी क्याकि बिश्वास अर्यान भणि तिन भण्न्या हुन।

⁶ मान्स बठेइ भणबर भण्नाउ भण्या, सब मान्सले हामलाइ ढुङाले हाण्न्या हुन, क्याकि यूहन्नालाइ परमेश्वरको साँच्चीको अगमबक्ता भणि बिश्वास अर्याथ्यो।”

⁷ तबइकिलाइ तिननले येशूलाइ जबाफ दिइबर भण्यो, “हामलाइ था आथिन कि यूहन्ना काँ बठेइ मान्सनलाइ बप्तिस्मा दिन आया हो।”

⁸ येशूले तिनलाइ भण्यो, “म लगइ कइ अधिकारले इसो काम अद्दउ, त्यो तमलाइ भण्नइन।”

दुष्ट किसानको काहानि

⁹ उनले मान्सलाइ यो काहानि भण्यो: “एक मान्सले अंगुरको बारी लायो, रे अदिया बनाउन्यावाला खेतालालाइ कमाउनाइ दियो, रे आफ लामो यात्रामि गया।

¹⁰ फसल काटया बेलामि फल लइन्नाइ अंगुरको बारिका मालिकले आफ्नो एक नौकरलाइ अदिया बनाउन्यावाला खेतालाका वाँ पठायो। तर अदिया बनाउन्यावाला खेतालाले तइ नौकरलाइ हाणबर पठायो।

¹¹ तइले आजी अर्खा नौकरलाइ पठायो, तर तिननले तइलाइ लगइ चुटिबर बेइजत अरिबर रितोइ पठाइदियो।

¹² तइले तेसरालाइ लगइ पठायो। तर तिननले तइलाइ लगइ घाइते बनाइबर निकाल्दियो।”

¹³ “तइ पछा अंगुरको बारिका मालिकले भण्यो, ‘आब म कि अरु? म आफ्नो प्यारो चेलो पठाउनउ। सायद तिनले मेरा चेलाको आदर अरन्ना।’”

¹⁴ तर अदिया बनाउन्यावाला खेतालाले उइलाइ धेकिबर आपसमी कुरणी अद्द पस्या, “त्यो त जाइजातको हकवालो हो। हाम यइलाइ माद्दाउ, रे जाइजात हामरोइ हुन्या हो।”

¹⁵ तइ पछा तिननले उइलाइ समाइबर मार्यो रे मुर्दालाइ अंगुरका खेत बाइर खिद्दियो। आब अंगुरका खेतका मालिक क्यारन्ना?

¹⁶ त्यो मालिक आउन्या हो, तिन अदिया बनाउन्यावाला खेतालालाइ माद्द्या हो, रे अंगुरका खेत औरलाइ दिन्या हो। मान्सले यो सुणिबर भण्यो, यिसो कभइ जन होउ।

¹⁷ तर उनले तिननलाइ हेरिबर भण्यो, यो लेखिया कि हो? जइ ढुङालाइ भबन बनाउन्याले रद्द अर्यो, तेइ चाइ कुना सीर-ढुङो बन्यो।

¹⁸ तइ ढुङामि झड्या सब धुलोधुलो हुन्या हो, तर जइमि त्यो झड्डे हो तइले तइलाइ धुलोधुलो बनाउन्या हो।

मोशाको कानुन सिकाउन्यावाला रे यहुदि मुख्य पुजारिको षडयन्त्र

¹⁹ तब मोशाको कानुन सिकाउन्यावाला रे यहुदि मुख्य पुजारिले जाणीहालथ्यो कि येशूले उनारा बिरोधमी यो काहानि भणिराइथ्यो। उतन्ज्यइ तिननले येशूलाइ पकड खोजाथ्या। रे तिनन मान्सनले बिरोध अददाहान भणि डरायाथ्या। तबइकिलाइ तिनन येशूलाइ छाडिबर गया।

सम्राटलाइ तिद्दया कर

²⁰ तिनन मौका हेद्द पस्या, रे धर्मि होइबर टोपल्या जासुसलाइ तिननले उनरा वाँ पठायो। येशूले भण्या कुरणीमि उनलाइ फसाइबर अधिकारी रे हाकिमका हात उनलाइ सुम्पिदिन्या दाउमि तिनन थ्या।

²¹ तिननले उनलाइ सोध्यो, “गुरुज्यू, हाम जाण्नाउ, तम ठीक बोलन्छौ रे ठीक सिकाउन्छौ, रे कसइको पक्षपात लगइ अद्दान, तर सत्यसित परमेश्वरको बाटो सिकाउछौ।

²² मोशाको कानुनले सम्राटलाइ कर तिद्दाइ अनुमति दिन्छ कि दिनइन?”

²³ तर उनले तिनरो कपट बुजिबर तिननलाइ भण्यो,

²⁴ मलाइ एक चाँदीका सिक्‍का धेका। यइमि कइको चित्र रे कइको नाउँ खोपिरइछ? तिननले भण्यो, सम्राटको।

²⁵ उनले तिननलाइ भण्यो, “तबइकिलाइ जी सम्राटका हुन सम्राटलाइ दिय, रे जी परमेश्वरका हुन परमेश्वरलाइ दिय।”

²⁶ मान्सका साम्नेइ तिननले उनलाइ कुरणीमि फसाउन सकेइन, रे उनरो जबाफमि तिनन अचम्म होइबर चुप्प रया।

मर्या हइ जिउना रे ब्या

²⁷ तइ पछा उनरा वाँ केइ सदुकीको समुह आया। मर्या बठेइ जिउना हुनइन भण्न्या तिनरो बिचार थ्यो। तिननले उनलाइ सोध्यो,

²⁸ गुरुज्यू, मोशाले हामलाइ लेखिदिराइछ, कि कसइ मान्सको ब्या अर्या दाइ नि:सन्तान मर्यो भण्या, भाइले तइकि स्वानिलाइ ब्या अरिबर दाइको सन्तान खडा अद्दु पणन्छ।

²⁹ एक परिबारमि सात भाइ थ्या। जेठाले ब्या अर्या, रे त्यो मान्स सन्तानइ नहोइबर मर्यो।

³⁰ रे माइलाले

³¹ रे साइलाले तइलाइ ब्या अर्यो। रे तसोइ अरिबर तिन सातइ भाइका सन्तान भएइन।

³² छाड्डीबार त्यो स्वानी लगइ मरि।

³³ तबइकिलाइ जब मर्या मान्सन मर्या बठेइ जिउना हुनाहान, तइ बेला उ कइकि स्वानी हुनेइहो? हाम यो सोद्दाउ क्याकि उइले सातइ भाइनसित ब्या अरिराइथ्यो!

³⁴ येशूले तिननलाइ भण्यो, यइ जमाना मान्स ब्या अद्दाहन्, रे ब्या अरिदिनाहान।

³⁵ तर तइ जमाना सम्म पुग्द्या योग्य हुन्याले, रे मर्या बठेइ जिउना होइबर उठ्या योग्य हुन्याले न ब्या अद्दाहान, न ब्या अरिदिनाहान।

³⁶ तिनन आजी मद्दाइन, क्याकि तिन स्वर्गमि भया स्वर्गदुत जसा हुनाहान, रे मर्या बठेइ जिउना सन्तान भया हुनाले परमेश्वरका सन्तान हुन।

³⁷ तर मर्या सब जिउना हुन्या हुन भण्न्या कुरणी मोशाले लगइ झुलको बिबरणमि परमप्रभुलाइ अब्राहाम, इसहाक रे याकुबले आराधना अद्दया परमेश्वर भणिबर पुकार अरन्ज्या धेकाइदियो। तबइकिलाइ उन मर्या मान्सनको परमेश्वर होइन,

³⁸ रे उन तिन मान्सनका परमेश्वर हुन जो जिउना छन! क्याकि सब चिज उनराइ निउति जिउना छन।

³⁹ तइ पछा मोशाको कानुन सिकाउन्यावलामि हइ कसइ कसइले भण्यो, “गुरुज्यू, तमले निकोइ भण्या।”

⁴⁰ तइ पछा आजी येशूलाइ सवाल अदद्या कसइको हिम्मत भएइन।

ख्रीष्ट दाउदका चेला हुन

⁴¹ तर उनले तिननलाइ भण्यो, “कसेरी ख्रीष्ट राजा दाउदका सनतान हुन?”

⁴² क्याकि भजनका किताबमी दाउद आफइ भण्नाहान, परमप्रभुले मेरा प्रभुलाइ भण्यो, तु मेरा दाइन हाततिर बस,

⁴³ जबसम्म म तेरा शत्तुरलाइ तेरा अधिनमी ल्याउनइन।

⁴⁴ यिसेरी राजा दाउद आफइले लगइ खीष्टलाइ प्रभु भण्नाहान, “तम काँ बठेइ राजा दाउदका बंसज भया?”

मोशाको कानुन सिकाउन्यावाला बिरुद्द येशूको चेतावनी

⁴⁵ मान्सनले सुण्ना सुण्नाइ उनले आफना शिष्यालाइ भण्यो,

⁴⁶ “लामा लत्ता लाइबर इथउथ हिट्या, रे बजारमि मान खोज्या, रे मोशाको कानुन सिकाउन्यावाला धेकि होशियार रया, तिनन मान्सनलाइ धेकाउनाइलाइ सार्वजनिक ठाउँमि लामा रे महंगो लत्ता लाउनाइ मन पणउनाहान, रे मान्सनले बजारमि मान दिइबर अबिबादन अरेको मन पणउनाहान। तिननले यहुदि सभाघरमी मुख्य ठाउँ रे भोजमि आदरको ठाउँ बस्साइलाइ मन पडाउनाहान।

⁴⁷ तिनन धोका दिइबर बिधवाका घरको सब सम्पति लइनाहान, रे तिनन मान्सलाइ आफ निको हु धेकाउनाइलाइ सार्वजनिक ठाउँमि लामा-लामा प्रार्थना अद्दाहन, यिसा मान्सलाइ परमेश्वर पक्‍का आजी बड्ता दण्ड दिन्या हुन।”