लूका 14 - डोटेली नयाँ करार

येशू एक जाना फिरिसिका घरमि

¹ एक बिश्राम दिनमि येशू फरिसि मान्सनको समुहका कोइ एक जाना सासकका घरमि खानाइ गया। ताँ फरिसि मान्सन रे कानुन सिकाउन्यावाला उनरो दोस खोज्जाइलाइ दोबा लागीरइथ्या।

² ताँ एक जाना मान्स हात खुट्टा ओसाउन्या रोगले पिडीत थ्यो।

³ येशूले मोशाको कानुन सिकाउन्यावालाइ रे फरिसि मान्सनको समुहलाइ सोध्यो, “हामरो कानुनमी बिश्राम दिनमि मान्सनलाइ निको बनाउन्या अनुमति छ, कि छैन?”

⁴ तर तिनन चुप्प लागिरया, रे उनले तइ रोगिमि हात राखिबर निको बनायो रे तइलाइ बाहिर पठायो।

⁵ तब उनले तिननलाइ भण्यो, “यदि तमरो चेलो अथवा बल्ल बिश्राम दिनमि इनारमि झड्यो भण्या तइलाइ झट्ट निकाल्लानु ब?”

⁶ तिननले यइ कुरणीको जबाफ दिन सकेइन्न।

पाउनाको सत्कार

⁷ भोजमि आया पाउनाले बिसेस मान्स बस्या ठाँउ छान्या धेकिबर येशूले तिननलाइ एक काहानि भण्यो:

⁸ “जब तुलाइ कसइको भोजको निउतो दियो भण्या बिसेस मान्स बस्या ठाउँमि जन बसेइ। क्याकि तु भण्ना बड्ता प्रतिष्‍ठित कसइले ताँ निउतो पाया होलो।

⁹ यदि तम दुएइलाइ निउतो दिन्या मेजमानले आइबर तुलाइ भण्न्या हो, ‘यइ मान्सलाइ तेरो बस्स्या ठाँउ दे’, रे तुइले लज्जित होइबर साधारण मान्स बस्या ठाउँमि बस्सु पड्डया हो।

¹⁰ तर जब तुइले निउतो पाउन्या हइ, गइबर साधारण मान्स बस्या ठाउँमि बस, रे मेजमानले आइबर तुलाइ भण्न्या हो, ‘ओ साथी, बिसेस मान्स बस्या ठाउँमि गइबर बस।’ तइ बेला तुसित खानाइ बस्या अगाडी तेरो इज्जत हुन्या हो।

¹¹ क्याकि हरेक जइले आफलाइ ठुलो बनाउछ, त्यो नानो बनाइन्या हो, रे आफलाइ नानो बनाउन्या ठुलो बनाइन्या हो।”

प्रतिफल

¹² तइ पछा उनले निउतो दिन्या फरिसिलाइ भण्यो, “तुइले बिहान अथवा बसाइतक भोज लाउन्ज्या, आफना साथीलाइ, आफना दाइ-भाइ अथवा तेरा आफान्तलाइ अथवा धनि पडउसिलाइ निउतो जनदेइ, नतित तिननले लगइ सट्टामि तुलाइ निउतो दिइबर तेरो गुण फर्काइ दिन्या हुन।

¹³ तर जब तुइले भोज लाउन्ज्या, गरिब, लुला, लंगडा, अन्धालाइ बोला,

¹⁴ रे तुइले आशिस पाउन्या हइ, क्याकि तिननले तेरो गुण फर्काउन सक्दाइन्न। तर जब धर्मिजन मर्या बठेइ जिउना हुनाहान परमेश्वरले तुइले यइको प्रतिफल दिन्या हुन।”

ठुलो भोजको काहानि

¹⁵ उनसित खान बस्यामि हइ एक जनाले यिन कुरणी सुणिबर येशूलाइ भण्यो, “त्यो धन्य हो, जइले परमेश्वरो राज्यमि भोज खान्या हो!”

¹⁶ तर येशूले तइलाइ यइ काहानि बठेइ भण्यो, “कोइ एक मान्सले बसाइतक एक ठुलो भोज तयार अर्यो, रे भौतलाइ निउतो दियो।

¹⁷ उइले आफना नौकरलाइ भोज खान्या बेलामि निम्त्यारालाइ यिसो भण्नाइ पठायो, ‘आस, आब सब चिज तयार छ।’

¹⁸ तर तिनन सब एकइ किसिमले एकइनासो बाहाना बनाउन पस्या। पइल्लिकाले तइलाइ भण्यो, ‘मइले एक खेत किनिराइछु, मलाइ त्यो हेद्दाइ जानु पडिरइछ। म बिन्ति अद्दउ, मलाइ माफ अर।’

¹⁹ तइ पछा अर्खाले भण्यो, ‘मइले पाँच हल बल्ल किनिराइछु, म तिन हेद्दाइ जानौ। म बिन्ति अद्दउ, मलाइ माफ अर।’

²⁰ अर्खाले भण्यो, ‘मइले ब्या अरिराइछु। तबइकिलाइ म आउन सक्दैन।’

²¹ तब नौकरले आइबर आफना मालिकलाइ यिन कुरणी भणिदियो। तब घरको मालिकले रिसाइबर आफना नौकरलाइ भण्यो, सहरका सडक रे गल्लिमि छिटाइ जा, रे गरिब, लुला, अन्धा, लङ्गडालाइ याँ भितर ल्या।

²² तब नौकरले भण्यो, हजुरले आज्ञा अर्या अन्सार काम होइरइछ, तर आजी ठाँउ खाली छ।

²³ मालिकले नौकरलाइ भण्यो, ‘मुख्य सडकइ रे गल्लि होइबर मान्सलाइ भितर आउनाइ कर अर, रे मेरो घर भरिजाउ।

²⁴ क्याकि म तमनलाइ भण्नउ, निम्तारामि हइ कसइल्लगइ मेरा भोजको स्वाद चाख्द पाउन्या आथिन।’”

खीष्टका शिष्याले तिद्दु पड्या मोल

²⁵ मान्सनको ठुलो भिड येशूसित जान्नाथ्यो, रे उनले फर्किबर तिननलाइ भण्यो,

²⁶ “जो मान्सन मेरा वाँ आउनाहान तिनन तब सम्म मेरा शिष्या हुन सक्दाइनन, जबसम्म तिननले मलाइ आफना बा, इजा, स्वानी, चेलाचेली रे दाइ-भाइ, दिदि-बइनीलाइ रे आफनाइ प्राण हइ बड्ता प्रेम अद्दाइन्न।

²⁷ जो मान्स आफ्नो दुःख सन रे मद्दाइलाइ तयार हुनइन, त्यो मेरा शिष्य हुना लायकको हुनइन।

²⁸ उदाहरणकिलाइ: यदि तमनमि हइ कसइले एक धरहरा बनाउन्या योजना बनाउछ भण्या, तइले पइल्ली बसिबर हिसाब अरन्छ कि यइलाइ बनाउनाइलाइ कति खर्च लागद्या हो रे उइसित यइलाइ पुरा बनाउनाइलाइ चाइन्या जति पैसा छ कि छैन भणि हेरन्छ।

²⁹ यदि उइले इसो अरेइन भण्या उइले जग हालि सक्या पछा पुरा बनाउन सकेइन भण्या, धेक्द्या सब यिसो भणबर तइकि खिसी काट्ट्या हुन,

³⁰ ‘यइ मान्सले बनाउन त सुरु अर्यो, तर पुरा बनाउन सकेइन।’

³¹ आजी, यदि एक राजा जो दस हजार मान्सन लइजाइबर अर्खा राजा जइसित बीस हजार मान्सन छन उइका बिरुद्द लड्डाइ जान्छ भण्या, उ पइल्ली बसिबर उइले अर्खा राजालाइ सामना अददाइ सक्तिशाली छ कि छैन भणि निर्णय अरन्छ।

³² यदि उइले नसक्द्या हो भण्या, त्यो अर्खो राजा दूरइ हुन्ज्या सान्तिको समझोताकिलाइ छलफल अद्दाइलाइ खबर लइजान्या मान्सलाइ पठाउन्या हुन।

³³ तबइकिलाइ तमनमि हइ जइले आफसित भया सब चिज छाडइन, त्यो मेरो शिष्या हुन सक्दैन।”

बिना स्वादको नुन

³⁴ नुन चाइन्या चिज हो, तर नुनको स्वाद बिगण्यो भण्या क्याले त्यो नुन्यो हुन्या हो?

³⁵ त्यो न त जमिनको निउति न मलको निउति काम लाग्द्या हुन्छ। मान्सनले तइलाइ बाइर खितदिनाहान। तम जो सुणनाछौ, तइ सुण्या कुरणिका बारेमि ध्यानले सोच।