यूहन्नाले लेख्या सुसमाचार 9 - डोटेली नयाँ करार

जन्म बठेइका अन्धालाइ ज्योति दिया

¹ जब येशू आफ्ना शिष्यासित जान्नाथ्या तब ताँ जन्मइ बठेइको एक जाना अन्धालाइ धेक्यो।

² उनरा शिष्याले येशूलाइ सोध्यो, “गुरु, यो मान्स क्याइ अन्धा जन्म्यो? यइका पापका लाग्दा कि, यइका इजा-बाका पापका लाग्दा?”

³ येशूले जबाफ दियो, “न त यइले पाप अर्यो, न त यइका इजा-बाले, तर यइ परमेश्वरको अचम्मको काम यइ मान्सका जीवनमी धेकिनाइ यइ अन्धाको जन्म भयो।

⁴ जइले मलाइ पठायो, उनले मलाइ जिम्मा दिया काम दिनइमी छिटाइ भण्ना छिटाइ अद्दु पणन्छ। रात आउछ, जब कसइले केइ काम अद्द सक्दइन।

⁵ म यइ संसारमी रन्ज्या म संसारको ज्योति हु।”

⁶ यिन कुरणी भण्या पछा उनले भइय्यइनि थुक्यो, रे थुकले माटी मुछिबर तइका आँखामी लाइदियो।

⁷ पइ उनले तइलाइ भण्यो, “जा, सिलोआमको (जइको अर्थ पठाइया) तालइनि गइबर पखालेइ।” तइले गइबर पखाल्यो, रे धेक्द्या होइबर फर्क्यो।

⁸ तब तइका पडउसि रे और मान्सनले जइले तइलाइ भिक माग्या धेक्द्याले एक अर्खालाइ भण्न पस्या, “बसिबर भिक माग्द्या मान्स यो होइन ब?”

⁹ कसइ-कसइले भण्यो, “यो तेइ हो।” औरले भण्यो, “होइन यो तसइ जसो धेकिन्छ।” तर तइले भण्यो, “म तेइ हु।”

¹⁰ तब तिननले तइलाइ सोध्यो, “तु कसेरी धेक्द्या भइ?”

¹¹ तइले भण्यो, “येशू भण्न्या एक मान्सले माटी मुछिबर मेरा आँखामी लाइबर भण्यो, ‘जा रे आफ्नो मुख सिलोआम तालमि पखाल।’ तब गइबर मइले पखाल्या, रे म धेक्द्या भया।”

¹² तिननले तइलाइ भण्यो, “तिन मान्स काँ छन पइ?” तइले भण्यो, “म जाण्नइन।”

फरिसि बठेइ सोध-खोज

^13-14 जइ दिन येशूले माटी मुछिबर तइ मान्सलाइ निको बनायो त्यो बिश्राम दिन थ्यो। तब तिननले तइ अन्धा मान्सलाइ फरिसि मान्सनको समुहका वाँ लैया।

¹⁵ फरिसि मान्सनको समुहले तइलाइ सोध्यो, “तु कसेरी धेक्द्या भइ?” तइले तिननलाइ भण्यो, “उनले मेरा आँखामी माटी मुछिबर लाइदियो, रे मइले पखाल्या रे धेक्द्या भया।”

¹⁶ फरिसि मान्सनको समुहमी हइ कसइले भण्यो, “त्यो मान्स परमेश्वर बठेइ आया होइन, क्याकि तइले बिश्राम दिन पालना अद्दइन।” तर औरले भण्यो, “यइ जसो पापी मान्सले कसेरी यिसा अचम्मका काम अद्द सकन्छ?” रे तिनरा बिचइनि फाटो हुन पस्यो।

¹⁷ तिननले तइ अन्धालाइ आजी सोध्यो, “उइले तुलाइ धेक्द्या बनाया हुनाले तु उइका बारेमि कि भणन्छइ?” तइले भण्यो, “उन अगमबक्ता हुन।”

¹⁸ तर यहुदि मान्सनका अगुवानले त्यो अन्धो थ्यो, रे आब धेक्द्या भयो भणि बिश्वास अरेइन। तबइकिलाइ तिननले उइका इजा बा बोलाइबर सोध्यो।

¹⁹ तब यहुदि अगुवानले तिननलाइ सोध्यो, “कि यो तमरो चेलो हो? जो अन्धो जन्मिरइथ्यो भणि तमन भणन्छौ? आब त्यो कसेरी धेक्द्या भयो?”

²⁰ तइका इजा बाले तिननलाइ भण्यो, “हाम जाँण्नाउ यो हामरो चेलो हो रे अन्धो जन्म्या हो।

²¹ तर यो आब कसेरी धेक्द्या भयो त्यो हाम जाँण्नाइन, कि यइका आँखा कइले खोल्दियो त्यो लगइ हाम जाँण्नाइन। यो आफ्ना बारेमि आफइ भान्न सक्द्या भइरइछ, इसइलाइ सोध। आफना बारेमि त्यो आफइ बोलन्छ।”

²² तइका इजा बाले यिन कुरणी भण्यो, क्याकि उन यहुदि अगुवानसित डराउथ्या। क्याकि कसइले येशूलाइ ख्रीष्ट भणि स्वीकार अर्यो भण्या, तइलाइ यहुदि सभाघर बठेइ निकाल्दिनु पणन्छ भणि यहुदि अगुवान पइल्ली बठेइ सहमत होइरइथ्या।

²³ तबइकिलाइ तइका इजा बाले भण्यो, “यो आफ्ना बारेमि आफइ भान्न सक्द्या भइरइछ, इसइलाइ सोध।”

²⁴ तब यहुदि अगुवानले तइ आखा धेक्द्या मान्सलाइ दोसर्या बोलाइबर भण्यो, “परमेश्वरको कसम खाइबर भण। हाम जाण्नाउ कि यो मान्स पापी हो।”

²⁵ तइले भण्यो, “उन पापी हुन कि होइन, म जाण्नइन। एकइ कुरणी म जाण्नउ कि म अन्धो थ्या, तर आब धेक्दउ।”

²⁶ तब तिननले तइलाइ भण्यो, “उइले तुलाइ कि अर्यो? रे उइले तेरा आँखा कसेरी निको बनायो?”

²⁷ तइले तिननलाइ जबाफ दियो, “मइले तमलाइ पइल्ली भणि हाल्या, तर तमनले सुण्यानु। आब आजी क्याइ सुण्न्या मन अद्दाछौ? तमन लगइ उनरा शिष्या हुनाइ चाहान्छौ कि कसो?”

²⁸ तिननले तइलाइ गालि दिनाइ भण्यो, “तु ब उइको शिष्य हइ, तर हाम त मोशाका शिष्या हु।

²⁹ हामलाइ था छ मोशासित परमेश्वर बोल्या हुन, तर हाम जाँण्नाइन कि यो मान्स काँ बठेइ आया हो।”

³⁰ तइ मान्सले जबाफ दिइबर तिननलाइ भण्यो, “कसि अचम्मइ कुरणी! उन काँ बठेइ आया हुन तम जाण्नानु, तर उनले मेरा आँखा निको बनायो।

³¹ हाम जाँण्नाउ कि, परमेश्वर पापिका कुरणी सुणनाइन, तर परमेश्वरको डर माण्न्या रे उनरो इच्छा पालन अद्द्या मान्सनकि कुरणी परमेश्वर सुण्नाहान।

³² संसारको सृष्टि भया बठेइ अइल सम्म यिसो जन्मनइको अन्धो कसइले धेक्द्या बनायो भण्नेइ कुरणी कभइ सुणिएइन।

³³ यदि यिन मान्स परमेश्वर बठेइ नआइदिया भया उनले केइ अद्द सक्देइ थेइन।”

³⁴ तिननले तइलाइ भण्यो, “तु त बिल्कुलइ पापी जन्मिरइथि, रे कि आब तु हामलाइ सिकाउन चाहान्छइ?” तइ पछा तिननले तइ मान्सलाइ सभाघर बठेइ बाइर निकाल्दियो।

आत्मिक अन्धो

³⁵ यहुदि अगुवानले निको भया मान्सलाइ बाइर निकाल्दियो भण्नेइ कुरणी येशूले सुण्यो, रे तइलाइ भेटीबर भण्यो, “कि तुइले म, मान्सको चेलोमी बिश्वास अरन्छइ?”

³⁶ तइले भण्यो, “प्रभु, मान्सका चेलोको हुन मलाइ भण, ताकि म उनमी बिश्वास अद्द सकु।”

³⁷ येशूले तइलाइ भण्यो, “म मान्सको चेलो हु, तुइले मलाइ पइल्ली लगइ धेकिराइछइ, रे म उइ हु जो तुसित अइल बोल्या छु।”

³⁸ तब तइले भण्यो, “प्रभु, म तमलाइ बिश्वास अद्दउ।” रे तइले उनलाइ आराधना अर्यो।

³⁹ पइ येशूले भण्यो, “म न्यायको निउति यइ संसारमी आया हु, कि नधेक्याले धेकुन रे धेक्द्या जति अन्धा होइजाउन।”

⁴⁰ यिन कुरणी सुणिबर उनरा नजिकै भया फरिसि मान्सनको समुहमी हइ कसइ-कसइले उनलाइ भण्यो, “तम कि भणन्ना छौ कि हाम लगइ अन्धा हु पइ?”

⁴¹ येशूले तिननलाइ भण्यो, “तमन अन्धा भया लगइ पापको दोषि हुनेइ थ्यानु, तर तमन हाम धेक्दाउ भणन्छौ, तबइकिलाइ तमन पापको क्षमा पाउन्या हौउनु।”