यूहन्नाले लेख्या सुसमाचार 8 - डोटेली नयाँ करार

व्यभिचारि स्वानिको उद्दार

¹ येशू जैतुन डाङामि आफ्ना शिष्यासित गया।

² भोलिबार ब्याहानइ उन दोसर्या मन्दिरका आगनमी आया रे भौत मान्स उनरा वाँ आया, रे उन बस्या, पइ येशूले तिननलाइ शिक्षा दिन पस्या।

³ जबइ उन शिक्षा दिन्नाथ्या तसइ बेला मोशाको कानुन सिकाउन्यावाला रे फरिसि मान्सनको समुहले एक व्यभिचारमि पकोडिएइ स्वानीलाइ येशूका वाँ लेइबर आया रे तिनरा अगाडी कल्लेयो।

⁴ तिनले येशूलाइ भण्यो, “हे गुरुज्यू, यो स्वानी व्यभिचार अद्दा-अद्दाइ पाकोडिएइ हो,

⁵ इसो अद्द्या मान्सलाइ माद्दाइलाइ ढुङाले हाण्नु पणन्छ भणबर मोशाले कानुनमी आज्ञा अर्याछ तर तम कि भण्न्छौ रे हामले कि अददु पणन्छ?”

⁶ तर तिननले येशूको परिक्षा अरिबर दोस लाउनाइलाइ केइ कुरणी पाइन्छ कि भणबर सोध्या हो तर येशूले नसुण्या जसो अरिबर निउणिबर औलाले जमिनमी लेख्यो।

⁷ तर जब तिननले येशूलाइ बेर बेरि सोध्यो, तब येशूले तिननलाइ हेरिबर भण्यो, “तमनमि हइ जइले कभइ पाप अर्या छैन, उइले पइल्ली तइलाइ ढुङाले हाणउ।”

⁸ पइ आजी येशूले जमिनमी निउणिबर लेख्यो।

⁹ पइ जइ जइले यो कुरणी सुण्यो तिननलाइ थाथ्यो कि तिनन पापी हु भणबर तबइकिलाइ तिनन एक-एक अरिबर ठुला बठेइ नाना सम्म सब बाइर गया रे येशू मान्तर ताँ रया रे अगाडी कल्लिएकि त्यो स्वानी ताइ थी।

¹⁰ जब येशूले वलतिर पलतिर तक्यो ताँ त्यो स्वानी बाहेक कोइ धेकेइन रे पइ तइ स्वानिलाइ भण्यो, “हे नारी, तुलाइ दोस लाउन्या मान्स काँ छन? कसइले तुलाइ दोषि ठहराएइन?”

¹¹ तइले भण्यो, “कसइले ठहराएइन प्रभु।” पइ येशूले भण्यो, “म लगइ तुलाइ दोषि ठहराउनइन, आब आफ्ना घर जा रे आब बठेइ पाप जन अरेइ।”

¹² येशूले आजी मान्सनलाइ इसो भण्यो, “म तेइ ज्योति हु जइले संसारलाइ ज्योति दिन्छ जइले मेरा कुरणी माणन्छ उ अन्धकारमि हिट्टया आथिन तर तिननले त्यो ज्योति पाउन्या हुन जइले अनन्त जीवन दिन्छ।”

¹³ पइ फरिसि मान्सनको समुहले उनलाइ भण्यो, “तम आफनाइ बिसयमि गवाही दिन्छौ; तमरो गवाही सत्य आथिन।”

¹⁴ येशूले जबाफ दियो, “तिनलाइ मइले आफना बारेमि गवाही दिया लगइ मेरो गवाही सत्य छ। क्याकि म काँ बठेइ आया हु, रे काँ जान्या हु त्यो म जाँण्नउ। तर म काँ बठेइ आया हु, रे काँ जान्या हु तमन जाण्न्नान।

¹⁵ तमन मान्सको सोच अन्सार न्याय अरन्छौ, म कसइको न्याय अद्दैन।

¹⁶ पइलगइ मइले न्याय अरेले मेरो अर्या न्याय सत्य हुन्छ, क्याकि न्याय अद्द्या म एकलो हैन, तर मलाइ पठाउन्या पिता मसित छन।

¹⁷ मोशाले दिया तमरा कानुनमी लेखिया छ कि दुइ मान्सले दिया गवाही सत्य ठहरिन्छ।

¹⁸ एक मइ हु जइले आफना बिसयमि गवाही दिन्छ रे अर्खा मलाइ पठाउन्या पिता जइले मेरा बिसयमि गवाही दिनाहान।”

¹⁹ तब तिननले उनलाइ भण्यो; “तमरा पिता काँ छन?” येशूले जबाफ दियो, “तमन न त मलाइ चिनन्छौ न त मेरा पितालाइ पछयाणन्छौ। तमनले मलाइ चिन्या भएले मेरा पितालाइ लगइ पछयाण्न्याइ थ्या।”

²⁰ यिन कुरणी येशूले मन्दिरका आगनमी शिक्षा दिन्या बेला भेटी दिन्या पेटी भया ठाउकि भण्याथ्यो तबइकिलाइ कसइले लगइ उनमी हात हालेइन क्याकि उनरो मद्दया समय भया थेइन।

²¹ तब येशूले तिननलाइ आजी भण्यो, “म जानउ रे तमनले मलाइ खोज्जया हौ रे आफना पापको क्षमा नपाइबरइ मद्दया हौ क्याकि जाँ म जानउ ताँ तमन आइ सक्दानु।”

²² तबइकिलाइ यहुदि मान्सनका अगुवानले सोध्यो, “कि उइले आफइलाइ मारलो पइ? क्याकि उइले जाँ म जानउ ताँ तमन आइ सक्दानु भणन्छ।”

²³ पइ येशूले तिननलाइ भण्यो, “तमन इसइ संसारमी जनम्या हउ तर म स्वर्ग बठेइ आया हु। तमन यइ संसारका हौ। म यइ संसारको होइन।

²⁴ तबइकिलाइ मइले तमनलाइ भण्या, ‘तमन आफना पापको क्षमा नपाइबरइ मद्दया हउ,’ यदि ‘म जो हु तेइ हु’ भणबर तमनले ममि बिश्वास अर्यानु भण्या तमन मद्द्या हौ रे तमरा पापको क्षमा हुन्या आथिन।”

²⁵ पइ यहुदि अगुवानले येशूलाइ भण्यो, “तम को हो पइ?” पइ येशूले तिननलाइ भण्यो, “म उइ हु जो सुरु बठेइ तमलाइ भण्ना छु।

²⁶ तमरा बिसयमि भण्नाइ रे न्याय अद्दाइ भौत कुरणी मसित छन तर जइले मलाइ पठाया हो, उन सत्य हुन पइ उन बठेइ मइले जी सुण्या तिन कुरणी म संसारका मान्सनलाइ भण्नउ।”

²⁷ उनले तिननलाइ आफ्ना पिताका बिसयमि भण्या हो भण्नेइ कुरणी तिननले बुजेइन।

²⁸ तब येशूले तिनलाइ भण्यो, “जब तमनले म, मान्सको चेलोलाइ क्रुसमि टाङ्द्या हौ तइ पछा ‘म जो हु तेइ हु’ भणि था पाउन्या हौ, रे म आफना अधिकार बठेइ केइ अद्दइन, तर मेरा पिताले मलाइ सिकाया अन्सार म यिन कुरणी बोल्ल्या रइछु भणि तमनले था पाउन्या हौ।

²⁹ जइले मलाइ पठायो उन मसित छन। पिताले मलाइ एकलोइ छाड्या आथिन क्याकि उनलाइ सदाइ खुशी पाड्डया कुरणी म सदाइ अद्दउ।”

³⁰ येशूले भण्या कुरणी सुणबर भौतले उनमी बिश्वास अर्यो।

अब्राहामका सन्तान

³¹ तब आफलाइ बिश्वास अद्द्या तिनन यहुदि मान्सनलाइ येशूले भण्यो, “तमन मेरा बचनमी लागिरया भण्या साँच्चि तमन मेरा शिष्या हौ।

³² तमनले सत्य जाण्न्या हौ रे सत्यले तमनलाइ स्वतन्त्र अराउन्या हो।”

³³ तिननले येशूलाइ जबाफ दियो, “हाम त अब्राहामका सन्तान हु पइ कभइ कसइका दासत्वमि पड्या आथिन, त कसेरी तम भणन्छौ हाम स्वतन्त्र पाणिन्या हौ?”

³⁴ येशूले तिननलाइ जबाफ दियो, “साँच्चि, म तमनलाइ भण्नउ जइले पाप अरन्छ त्यो पापको दास हो।

³⁵ दास सदाइ भरि घरमि रनइन तर चेलो सदाइ भरि रन्छ।

³⁶ तबइकिलाइ यदि तमन मलाइ स्वतन्त्र अद्दाइ अनुमति दिन्छौ भण्या, तब तमन साच्ची स्वतन्त्र हुन्या हौ।

³⁷ म जाण्नउ तमन अब्राहामका सन्तान हौ तर तमन मलाइ माद्द खोजन्छौ; क्याकि तमनले मेरा शिक्षालाइ स्वीकार अर्या आथिनौ।

³⁸ मइले मेरा पिताका वाँ हुन्ज्या जी धेक्या छु त्यइ कुरणी बोल्लउ और तमनले आफना पिताका वाँ जी सुण्याछौ त्यइ अरन्छौ।”

³⁹ तिननले येशूलाइ जबाफ दिबर भण्यो “अब्राहाम हामरा पुर्खा हुन।” येशूले तिनलाइ भण्यो, “तमन अब्राहामका सन्तान भया भयले अब्राहामका जसाइ काम अद्देइथ्या।

⁴⁰ तर आब तमन मलाइ माद्द खोजन्छौ। क्याकि मइले तमनलाइ सत्य कुरणी भणन्ना छु, जो मइले परमेश्वर बठेइ सुण्याछु यो ताँ इसा काम अब्राहामले अरेन।

⁴¹ तमन आफना पिताका काम अरन्छौ।” तब तिननले उनलाइ भण्यो, “हाम व्यभिचार बठेइ जन्मेका होइन हामरा एकै पिता छन जो परमेश्वर हुन।”

दुष्टका सन्तान

⁴² येशूले तिननलाइ भण्यो, “यदि परमेश्वर तमरा पिता भया भयले तमनले मलाइ प्रेम अद्देइन्थ्या क्याकि म परमेश्वर बठेइ आया हु। म आफइ बठेइ आया होइन, तर उनले मलाइ पठायाको हो।

⁴³ तमन क्याकि मइले भण्या कुरणी बुज्जानु? क्याकि तमन मेरा भण्या कुरणी स्वीकार अद्द सक्दानउ।

⁴⁴ तमन आफना बा सैतान बठेइका हउ, तब आफनाइ बाका कुइच्छा पुरा अद्द चाहन्छौ। त्यो त सुरु बठेइ हत्यारा थ्यो रे सत्यमी रएन क्याकि तइमि सत्य आथिन, जब त्यो झुट बोलन्छ तब आफनोइ बानि ब्यबहार बठेइ बोलन्छ क्याकि त्यो झुट हो रे झुटको बा हो।

⁴⁵ म सत्य बोल्लउ, तर तमन मलाइ बिश्वास अद्दान।

⁴⁶ तमनमि हइ कसइले मलाइ पापको आरोप लाउन्छौ? यदि म सत्य बोल्लउ भण्या तमन मलाइ क्याकि बिश्वास अद्दानौ?

⁴⁷ जो परमेश्वरको सन्तान हो तइले परमेश्वरकि कुरणी सुणन्छ। तर तमन परमेश्वरका सन्तान नभया हुनाले तमन परमेश्वरकि कुरणी सुण्नानु।”

येशू रे अब्राहाम

⁴⁸ तब यहुदि मान्सनका अगुवानले जबाफ दिबर येशूलाइ भण्यो, “हामले भण्या ठीक हो, तु सामरि मान्स हइ, रे तुलाइ एक भूत लाग्या छ।”

⁴⁹ येशूले जबाफ दियो, “मलाइ भूत लाग्या आथिन, तर म आफना पितालाइ आदर अद्दउ रे तमन मलाइ आदर अद्दान।

⁵⁰ म आफ्नो आदर खोज्जइन, तर एक जाना छन जइले मलाइ आदर अर्या चाहानाहान, रे उन तिनइ हुन जो न्याय लगइ अद्दाहान।

⁵¹ साँच्चि, म तमनलाइ भण्नउ, कसइले मेरा बचन पालन अरन्छ भण्या त्यो कभइ मद्द्या आथिन।”

⁵² तब यहुदि अगुवानले येशूलाइ भण्यो, “आब हामलाइ था भयो कि तमलाइ भूतइ लाग्या छ। अब्राहाम रे अगमबक्तान लगइ मर्या तर तम भणन्छौ कसइले मेरो बचन पालन अरन्छ भण्या उ कभइ मद्द्या आथिन।

⁵³ कि तम हामरा पुर्खा अब्राहाम रे अगमबक्ता भण्ना ठुला हउ? जो मरिबर गया, तम आफलाइ कि सोचन्छौ?”

⁵⁴ येशूले जबाफ दियो, “यदि मइले आफनो आदर आफइ अद्दउ भण्या मेरो आदर केइलगइ होइन, जो मलाइ आदर अद्दाहान तिन मेरा पिता हुन, रे तमन भणन्छौ कि उन तमनका परमेश्वर हो।

⁵⁵ आजी लगइ तमनले उनलाइ पछण्या रइन्छौ, तर म उनलाइ पछयाण्नउ तर मइले उनलाइ पछण्नइन भण्या म लगइ तमन जसोइ झुट ठहरिनेइथ्या तर म उनलाइ पछेण्नउ रे उनरो आज्ञापालन अद्दउ।

⁵⁶ तमनका पुर्खा अब्राहाम मेरो आउन्या दिन धेक्द्या आसामि खुशी थ्या, उनले धेक्यो रे भौत आनन्दित भया।”

⁵⁷ तब यहुदि अगुवानले उनलाइ भण्यो, “तम आजी पचास बर्ष पुग्या आथिन पइ कि तमले अब्राहामलाइ धेकिराइछौ?”

⁵⁸ येशूले तिननलाइ भण्यो, “साँच्चि, म तमनलाइ भण्नउ अब्राहाम जन्मनु भण्ना पइल्ली म थ्या।”

⁵⁹ तब तिननले उनलाइ हाण्नाइलाइ ढुङा समायो तर येशू लुकीबर मन्दिर बठेइ बाइर गया।