यूहन्नाले लेख्या सुसमाचार 5 - डोटेली नयाँ करार

जल कुण्डमी लुलो मान्स निको भया

¹ तइ पछा यहुदिको काजबार थ्यो, रे येशू यरुशलेम सहरमि गया।

² यरुशलेम सहरमि भेडा नाउँ भया ढोका नजिकै पाँच पाखो भया दलानले घेर्या एक जल कुण्ड रइछ, जइलाइ हिब्रु भासामि बेथस्दा भणिन्छ।

³ ताँ अनेक रोगि बिमारी अर्थात-काना, डुणा लुला पडिरइथ्या। (तिनन पानी कइ बेला छचल्किन्छ भणबर पखिरइथ्या।

⁴ क्याकि परमप्रभुका एक दुतले बेला-बेलामि जल-कुण्डमी ओलीबर पानी हलाइ दिन्थ्या, रे पानी छचल्किया पछा जो पइल्ली पानी भितर पसन्थ्यो, जसाइ रोगले ग्रस्त भयालगइ त्यो निको होइजान्थ्यो।)

⁵ ताँ अठ्तिस बर्ष बठेइ बिरामी भया एक जाना मान्स थ्यो।

⁶ येशूले तइलाइ ताँ पडिरया धेक्यो, लामो समय बठेइ त्यो यइ दसामि रइछ भणि जाणिबर येशूले तइलाइ भण्यो, “कि तु निको हुन चाहन्छइ?”

⁷ तइ रोगिले येशूलाइ भण्यो, “हजुर, जइ बेला पानी छचल्किन्छ मलाइ जल-कुण्डमी लइजान्या मेरो कोइ मान्स आथिन, म जाना-जानाइ म भण्ना पइल्ली अर्खो मान्स पानिमि ओलिजान्छ।”

⁸ येशूले तइलाइ भण्यो, “उठ रे आफ्नो बिस्त्तरा उठाइबर हिट।”

⁹ उतन्जेइ त्यो मान्स निको भयो, रे आफ्नो बिस्तरा बोकिबर उ हिटियो। त्यो दिन बिश्राम दिन थ्यो।

¹⁰ तबइकिलाइ निको बनाया तइ मान्सलाइ यहुदिले भण्यो, “यो त बिश्राम दिन हो, मोशाको कानुन अन्सार तुलाइ बिस्तरा बोक्दु ठीक आथिन।”

¹¹ तइले तिननलाइ जबाफ दियो, “जइले मलाइ निको बनायो उनइले भण्यो, ‘आफ्नो बिस्तरा बोकिबर हिट।’”

¹² तिननले तइलाइ सोध्यो, “तुलाइ बिस्तरा बोकिबर हिट भण्न्या मान्सको हो?”

¹³ तर निको भया तइ मान्सले उन को हुन भणि पछेण्या थेइन, क्याकि तइ ठाउँमि भिड भया हुनाले येशू ताँ बठेइ निइय्या।

¹⁴ तइ पछा येशूले तइलाइ मन्दिरको आगनमी भेटीबर भण्यो, “हेर, तु निको होइरइछइ। आजी पाप जन अरेइ, रे तुमि आजी बड्ता खराबी आइ जन पडउ।”

¹⁵ उइलाइ निको बनाउन्या त येशू रइछन भणबर तइ मान्सले गइबर यहुदि अगुवानलाइ भणिदियो।

परमेश्वरका चेला बठेइ जीवन

¹⁶ तइका लाग्दा यहुदि अगुवानले येशूलाइ खेदो अद्द पस्या, क्याकि उनले यो काम बिश्राम दिनमि अरिराइथ्यो।

¹⁷ तब येशूले तिननलाइ भण्यो, “परमेश्वर, मेरो पिताले दिना दिन काम अरिराइछन, रे म लगइ काम अद्दइ लाछु।”

¹⁸ तबइकिलाइ यहुदि अगुवानले येशूलाइ माद्दाइ आजी बड्ता कोशिस अद्द पस्या, क्याकि उनले बिश्राम दिन तोड्या काम मान्तर होइन, तर आफइलाइ परमेश्वरको बराबर माणिबर उनले परमेश्वरलाइ आफनाइ पिता भणिराइथ्यो।

¹⁹ येशूले तिननलाइ भण्यो, “साँच्चि, म तमनलाइ भण्नउ, चेलो आफइले केइ अद्द सक्दैन, तर पिताले जी अर्या धेकन्छ तेइ मान्तर अरन्छ, क्याकि पिताले जी अरन्छ, म मान्सको चेलो लगइ तसोइ अद्दउ।

²⁰ क्याकि पिताले चेलोलाइ प्रेम अरन्छ, रे उन आफइले अर्या सब काम चेलोलाइ धेकाउनाहान। यिन भण्ना महान काम उनले चेलोलाइ धेकाउनाहान रे तमन अचम्म माण्न्या हौ।

²¹ क्याकि जसेरि पिताले मर्यालाइ उठाउनाहान रे तिननलाइ जीवन दिनाहान, तसेरि चेलो लगइ जइलाइ मन अरन्छ, तइलाइ जीवन दिन्छ।

^22-23 क्याकि जसेरि मान्सनले पिता परमेश्वरलाइ आदर अद्दाहन, तेसरी तिनन मलाइ अथवा चेलोलाइ लगइ आदर अरुन, पिता परमेश्वरले म चेलोलाइ न्याय अद्द्या सब अधिकार दिइराइछ। यदि कसइले मलाइ आदर दिनइन भण्या, तइले पिता परमेश्वरको आदर अद्दैन, जइले मलाइ पठाया हो।”

²⁴ “साँच्चि, म तमनलाइ भण्नउ, जइले मेरा बचन सुणन्छ, रे मलाइ पठाउन्यामि बिश्वास अरन्छ, तइसित अनन्त जीवन छ। तइले दण्ड पाउन्या आथिन, तर अनन्त मृत्यु बठेइ बचिबर नयाँ जीवनमी प्रवेश अरिसक्या छन।

²⁵ साँच्चि, म तमनलाइ भण्नउ, त्यो समय आउनाछ, रे त्यो समय अइलइ हो, जब मर्याले परमेश्वरका चेलोको डाको सुण्नाहान, रे जो सुण्न्या छन तिनन सब सदाइ बाँच्या छन।

²⁶ क्याकि जसेरि पिता आफइमी जीवन छ, उसेरी उनले चेलोलाइ लगइ आफइमी जीवनको स्रोत हुन्या अधिकार दिइराइछ।

²⁷ रे क्याकि म, मान्सको चेलो हु, पिता परमेश्वरले मलाइ सब मान्सनको न्याय अद्द्या अधिकार दिराइछ।”

²⁸ “यइमि अचम्म जन माण, क्याकि समय आउनाछ, जइ बेला सब मर्या मान्सनले मान्सको चेलोको डाको सुण्या छन,

²⁹ रे बाइर निकलिबर आउन्याहुन: सुकर्म अद्द्या मर्या बठेइ जिउना भइबर अनन्त जीवन पाउन्या छन, रे कुकर्म अद्दया जिउना भइबर दण्ड पाउन्या छन।

³⁰ म आफइ केइ अद्द सक्दैन। मइले मान्सनको न्याय तसोइ अद्दउ जसो पिताले मलाइ उनरो न्याय अद्दाइ भण्या छ, रे मेरो न्याय ठीक माणिन्छ, क्याकि म आफ्नो इच्छा खोज्जइन, तर मलाइ पठाउन्याको इच्छा खोज्जउ।

³¹ यदि मइले आफना बारेमि गवाही दिया भण्या मेरो गवाही सत्य हुनइन।

³² एक छन जो मेरा पिता हुन उनले लगइ मेरा बारेमि गवाही दिन्याहान, रे म जाँण्नउ, कि मेरा बारेमि उन जी गवाही दिनाहान, त्यो गवाही सत्य माणिन्छ।”

³³ “तमनले यूहन्ना वाँ सोद्दाइ पठाया, रे उइले सत्यको गवाही दिइराइछ।

³⁴ मइले ग्रहण अद्द्या गवाही मान्सको होइन, तर तमरो उद्दार होलो भणबर म यिन गवाही भण्नउ।

³⁵ यूहन्ना बल्या रे चम्कन्या बत्ति जसोइथ्यो, रे तमन उइको प्रकासमि थोकाइ समय लगइ आनन्द मनाउनाइ राजि भया।

³⁶ तर मसित जी गवाही छ, त्यो यूहन्ना भण्ना ठुलो छ। क्याकि जइ काम पुरा अद्दाइ पिताले मलाइ दिइराइछ, तिन काम म अद्दाछु, तिनइले मेरा बारेमि गवाही दिइराइछ कि पिताले मलाइ पठाया हो।

³⁷ मलाइ पठाउन्या पिता आफइले मेरा बारेमि गवाही दिइराइछ। न तमन उनरो डाको सुण्या हौ रे न त तमनले उनलाइ आम्ने-साम्ने धेकिराइछौ।

³⁸ उनरो शिक्षा तमनमि रनइन, क्याकि तमन ममि बिश्वास अद्दान, जइलाइ परमेश्वरले पठाइराइछ।

³⁹ तमन पबित्र सास्त्रमि पढन्छौ, क्याकि ताँ अनन्त जीवन पाइन्छ भणि तमन सोच्नन्छौ। मेरा बारेमि गवाही दिन्या तिनइ पबित्र सास्त्र हुन,

⁴⁰ तर तमन अनन्त जीवन पाउनाइ मेरा वाँ आउनाइ इन्कार अरन्छौ।”

⁴¹ “म मान्स बठेइ महिमाको आस अद्दैन,

⁴² तमन आफ्ना मनले परमेश्वरलाइ प्रेम अद्दान भणि मलाइ था छ।

⁴³ म आफ्ना पिता परमेश्वरको अधिकार लेइबर आया छु रे तमन मलाइ स्वीकार अद्दान। तर आफनोइ अधिकार लेइबर आउन्यालाइ तमनले स्वीकार अरन्छौ।

⁴⁴ तमन ममि बिश्वास अद्द सक्दानु, क्याकि तमन एक-अर्खा बठेइ प्रसंसा लिन्छौ, रे तमन एक मान्तर परमेश्वरको प्रसंसा पाउनाइलाइ कोशिस अद्दान।

⁴⁵ यो जन सम्ज्या, कि म पिता अगाडी तमलाइ दोस लाउनाछु। मोशा, जइमि तमनले आफ्नो आसा राख्याछौ, उनले तमनमि दोस लाउन्या छ।

⁴⁶ क्याकि तमनले मोशालाइ बिश्वास अर्या भया मलाइ लगइ बिश्वास अद्देइथ्या, क्याकि उइले मेरा बारेमि लेखिराइथ्यो।

⁴⁷ क्याकि तमन मोशाले लेख्या कानुनमी बिश्वास अद्दानु, पइ तमन पक्‍का रुपले यइमि लगइ बिश्वास अद्दया आथिन कि म कि भण्नाछु।”