यूहन्नाले लेख्या सुसमाचार 20 - डोटेली नयाँ करार

खाली चिहान

¹ हप्ताको पइलो दिन बिहान अनारो छनाइ मग्दला गाउँकी मरियम और स्वानिन लागइ गुफामि आइन रे तिननले गुफाको मुख बठेइ ढुङो हटाइया धेक्यो।

² तबइकिलाइ उन सिमोन पत्रुस रे येशूलाइ प्रेम अद्द्या अर्खो शिष्याका वाँ दौडिबर गइन, रे तिननलाइ भणिन कि, “प्रभु येशूको लासलाइ त लैजाइ सक्या रैछ उनलाइ काँ ब लैया। उनलाइ काँ लैया हामलाइ था आथिन।”

³ पइ पत्रुस रे अर्खा शिष्य चिहानतिर गया।

⁴ दौडिबर तिन दुइसित आया पत्रुस हइ पइल्ली अर्खो शिष्य युहुन्ना पुग्यो।

⁵ उनले निउणिबर हेरन्ज्या, पइल्ली लपेटिया सुति लत्ता मान्तर धेक्यो तर उन भित्तर पसेइन।

⁶ तब उनलाइ पछाइनि आउन्या सिमोन पत्रुस सिदाइ चिहान भित्तर पस्यो रे उइले लगइ लपेटिया सुति लत्ता मान्तर धेक्यो।

⁷ रे उनरा मुन्टामि बाद्या रुमाल सुति लत्तासित पड्या थेइन तर अलग्गै एक ठाउँमि लपेटिया धेक्यो।

⁸ तब चिहानमि पइल्ली आउन्या शिष्य लगइ भित्तर पस्यो रे धेक्यो रे येशू मर्या बठेइ जिउना भया हुन भणि बिश्वास अर्यो।

⁹ पबित्र सास्त्रमि येशूका बारेमि यो पक्‍का रुपले लेखियाथ्यो कि उन आफ्ना मृत्यु बठेइ आजी जिउना हुन्या छन, तर तिननले अइल सम्म बुज्या थेइन।

येशू मरियम मग्दलनिका वाँ धेकिया

¹⁰ तइ पछा तिनन दुइ शिष्या आ-आफ्ना घर गया।

¹¹ तर मरियम भण्या चिहानका बाइर तिर रोइबर कल्लिरइ, रुना रुनै चिहानतिर निउणिबर तक्द पसि।

¹² जाँ येशूको लास राख्याथ्यो ताँ तिनले सेता लत्ता लाया दुइ स्वर्गदुत एक मुन्टाइतिर रे एक खुट्टाइतीर बस्या धेक्यो।

¹³ रे उननले तिनलाइ भण्यो, “हे नारी तु क्याइ रुन्छेइ?” तिनले उलाइ भण्यो, “तिननले मेरा प्रभु येशूको लासलाइ लैया छन रे काँ राख्या छ म जाण्नैन।”

¹⁴ इसो भणबर तिन पछाडी फर्किन रे येशूलाइ कल्लिया धेक्यो रे उन येशू हुन भणि चिनेइन।

¹⁵ येशूले तिनलाइ भण्यो, “हे नारी तु क्याकि रुन्छेइ? कै खोज्जाछेइ?” उइले तिनलाइ मालि हुन भणि सुचिबर उनलाइ भण्यो, “हजुर तमले येशूको लासलाइ या बठेइ लैजाइराइछ भण्या, मलाइ भणिदिय काँ राख्याछौ म वाँइ बठेइ उनलाइ लैजानउ।”

¹⁶ येशूले तिनलाइ भण्यो, “मरियम!” तिन पछा फर्किन रे उनलाइ हिब्रु भासामि भण्यो, “रब्बोनी”, अर्थात “गुरुज्यू”

¹⁷ येशूले तिनलाइ भण्यो, “मलाइ समाइ जन राख, क्याकि म अइल सम्म मल्तिर मेरा पिताका वाँ गया आथिन; तर तम मेरा शिष्याका वाँ जा रे उनलाइ भण्दिय, म मल्तिर मेरा पिता रे तमनका पिता मेरा परमेश्वरका वाँ जान्ना छु।”

¹⁸ मग्दला गाउँकी मरियम आइबर मइले प्रभुलाइ धेक्या भणबर शिष्यासित भणि रे उनले यिन कुरणी लगइ भण्या छ भण्यो।

येशू शिष्याका वाँ धेकिया

¹⁹ तसइ आइतबारका दिन बसाइतक यहुदि अगुवानका डरले शिष्या जम्माइ एक ठाउँमि जम्मा भया रे ढोका बन्द अर्या बेला येशू तिनरा बिचमि प्रकट भया रे भण्यो, “तमनलाइ सान्ति होउ।”

²⁰ इसो भणबर उनले तिननलाइ आफना हात रे कोखीको घा धेकायो रे प्रभुलाइ धेकिबर शिष्या खुशी भया।

²¹ पइ येशूले तिननलाइ आजी भण्यो, “तमनलाइ सान्ति होउ जसेरि मेरा पिताले मलाइ यइ संसारमी पठाया छ तसेरि म लगइ तमनलाइ यइ संसारमी पठाउन्या हु।”

²² इसो भणबर येशूले तिननमि सास फुकिदियो रे भण्यो, “पबित्र आत्मा लिय।

²³ जइ जइका पाप तमन क्षमा अरन्छौ तइका पाप क्षमा हुन्ना, तमन जइका पाप क्षमा अद्दानौ तइका पाप रन्ना।”

येशू थोमाका वाँ धेकिया

²⁴ येशू प्रकट हुइय्याँ दिदुमस भण्न्या थोमा जो बार शिष्यामि हइ एक थ्यो, ताँ उ थेइन।

²⁵ तबइकिलाइ और शिष्याले तइलाइ भण्यो, “हामले प्रभुलाइ धेक्या।” तर तिनले उनलाइ भण्यो, “जबसम्म म उनरा किला ठोक्या हात रे कोखिका घामि औला हाल्लइन तब सम्म उन मर्या बठेइ जिउना भया छन भणी म बिश्वास अद्दैन।”

²⁶ एक हप्ता पछा उनरा शिष्या आजी घर भित्तर थ्या। उनसित थोमा लगइ थ्यो तब ढोका बन्द थ्या, येशू आजी तिनरा बिचइनि प्रकट भया रे भण्यो, “तमनलाइ सान्ति होउ।”

²⁷ तब उनले थोमालाइ भण्यो, “तेरा औला याँ राख, रे मेरा हात हेर तेरा हात याँ राख, रे मेरा कोखि समा पइ संका अद्द बन्द अर, रे बिश्वास अर कि म जिउनो छु।”

²⁸ थोमाले उनलाइ भण्यो, “हे मेरा प्रभु हे मेरा परमेश्वर!”

²⁹ येशूले तइलाइ भण्यो, “थोमा तुइले मलाइ धेक्या हुनाले बिश्वास अर्या हइ तर तिनन धन्य हुन जइले मलाइ नधेकेइ बिश्वास अद्दाहान।”

यइ किताबको उदेश्य

³⁰ साँच्चि येशूले आफना शिष्याका अगाडी भौत अचम्मका चिन्ह धेकायो जो यइ किताबमी लेखिया आथिन।

³¹ तर इसो लेखिया छ, कि येशूइ परमेश्वरको चेलो ख्रीष्ट हुन भणबर तमन उनमी बिश्वास अद्द सक रे बिश्वास अरिबर उनरा नाउँमि अनन्त जीवन पाओस।