यूहन्नाले लेख्या सुसमाचार 2 - डोटेली नयाँ करार

काना गाउँमी येशूले पानीलाइ अंगुरको रसमि बदल्या

¹ तेसरा दिन गालील जिल्लाको काना गाउँमी एक ब्या थ्यो। येशूकी इजा ताँ थिन।

² येशू रे उनरा शिष्यालाइ लगइ ब्यामि निउतो दिइराइथ्यो।

³ अंगुरको रस सकिया पछा येशूकी इजाले उनलाइ भण्यो, “तिननसित अंगुरको रस आथिन।”

⁴ येशूले तिनलाइ भण्यो, “ओ इजा मइले कि अद्दु पणन्छ मलाइ जन भण। मेरो बेला आजी सम्म आया आथिन।”

⁵ उनरी इजाले नौकरलाइ भण्यो, “तमन उनले भण्या अन्सार अर।”

⁶ आब यहुदि मान्सनको आफनोइ धार्मिक चलन अन्सार हात धुन्या रितिरिवाज थ्यो। इसो अद्दाइलाइ, तिननले ताँ ढुङाको छइ ठुला फोला राखिराइथ्यो, सब फोलामि लगभग एक सय लिटर अटाउन्थ्यो।

⁷ येशूले नौकरलाइ भण्यो, “तिन सब फोला पानिले भर।” तिननले फोला चुलि सम्म पानी भरिदियो।

⁸ येशूले तिननलाइ भण्यो, “थोकाइ पानी निकलिबर भोजका मुख्याका वाँ लैजा।” तिननले पानी मुख्याका वाँ लैया।

⁹ भोजका मुख्याले तइ पानी चाख्यो, जो आब अंगुरको रसमि बद्लिरइथ्यो। त्यो काँ बठेइ आयो त्यो मुख्यालाइ था थेइन, तर पानी भद्या नौकरलाइ मान्तर थाथ्यो। तब भोजका मुख्याले ब्याउलालाइ बोलाइबर भण्यो,

¹⁰ “हरेक मान्सले पइल्ली असल अंगुरको रस खानाइ दिन्छ पइ मान्सले निक्केरि खाया पछा कमसल अंगुरको रस राखिदिनाहान। तुइले त असल अंगुरको रस अइल सम्म राखिराख्या रइछइ।”

¹¹ उनरा चिन्हमि हइ यो पइलो चिन्ह गालील जिल्लाको काना गाउँमी अरिराइथ्यो। यिसेरी उनले आफ्नो महिमा धेकायो, पइ येशूका शिष्याले उनमी बिश्वास अर्यो।

येशूले मन्दिरलाइ सुद्द अर्यो

¹² तइ पछा येशू आफनी इजा, भाइ रे उनरा शिष्यासित कफर्नहुम गाउँमी गया, रे केइ दिन ताँइ बस्या।

¹³ यहुदिको निस्तार काजबार नजिकै थ्यो, रे येशू यरुशलेम सहरमि गया।

¹⁴ येशूले मन्दिरको आगनमी गोरु, भेडा रे परेवा बेच्चार्या रे रुप्या साँटा साँट अद्दार्या भेट्यो।

¹⁵ तब डोरिको एक कोर्रा बनाइबर उनले मन्दिर बठेइ तिन सबलाइ, तिनरा भेडा, गोरु समेत मन्दिरको क्षेत्र बठेइ बाइर निकाल्दियो, रे रुप्या साँट्या मान्सनका रुप्या छरबट्टेइ दियो रे तिनरा टेबुल घोप्टेइ दियो।

¹⁶ परेवा बेच्चयालाइ उनले भण्यो, “याँ बठेइ यिन सब चिज लैजा। मेरा पिताको भबनलाइ ब्यापारको घर जन बना।”

¹⁷ उनरा शिष्यालाइ पबित्र सास्त्रमि लेखिया यिन कुरणी याद भयो, “हे परमेश्वर, तमरा मन्दिरका निउति मेरो भक्ति म भितर आगाकी जसेरि बल्ला छ”।

¹⁸ यहुदि अगुवानले येशूलाइ रोकिबर भण्यो, “कि तमलाइ इसो अद्द्या अधिकार छ? कि हामलाइ केइ अचम्मको चिन्ह धेकाउन सकन्छौ?”

¹⁹ येशूले तिननलाइ जबाफ दियो, “यइ मन्दिर उदारि दिय, रे म यइ मन्दिरलाइ आजी तीन दिनमि बनाइ दिनउ।”

²⁰ तब यहुदि अगुवानले भण्यो, “यइ मन्दिरलाइ बनाउनाइ छयालिस बर्ष लाग्या हो, रे कि तम यइलाइ तीन दिनमि बनाइ सकन्छौ ब?”

²¹ तर येशू जइ मन्दिरको बारेमि भण्नाथ्या, त्यो उनरो शरीर थ्यो।

²² जब उन मर्या बठेइ जिउना होइबर उठ्या, तब येशूले भण्या यो कुरणी शिष्याले सम्ज्यो, रे तिननले पबित्र सास्त्रमि रे येशूले बोल्या बचनमी बिश्वास अर्यो।

²³ उन निस्तार काजबारको भोजका बेला यरुशलेम सहरमि थ्या, रे उनले अर्या चिन्ह धेकिबर भौतले उनमी बिश्वास अर्यो।

²⁴ तर येशू उनरा भरमि रएइन, क्याकि उनले सब मान्सनलाइ नीकेरि चिन्याथ्यो,

²⁵ उनले मान्सनकि मनकि कुरणी जाण्या हुनाले कसले लगइ उनलाइ कसइ मान्सको बारेमि भणनु आवश्यक थेइन।