यूहन्नाले लेख्या सुसमाचार 19 - डोटेली नयाँ करारयेशूलाइ क्रुसमि टाङद्या दण्ड आज्ञा ( मत्ती २७:१५-३१ ; मर्क १५:६-२० ; लूका २३:१३-२५ ) 1 पइ पिलातस हाकिमले चौकीदारलाइ भण्यो, “येशूलाइ लैजाइबर कोर्रा ला।” 2 सिपाइनले काणा भया हाङ्गाको मुकुट बनाइबर उनरा मुन्टामि लाइदियो, रे खिसि काट्याइ उनलाइ बैजनि रंङको लत्ता लाइदियो। 3 रे भण्यो, “यहुदि मान्सनका राजालाइ सलाम!” रे उनलाइ तिननले थप्पड लगइ हाण्यो। 4 तब पिलातस हाकिमले बाइर निकलिबर तिननलाइ भण्यो, “हेर, म यिनलाइ तमरा वाँ बाइर ल्याउन्ना छु, रे तमनलाइ जणाउन चाहानौ, कि म यिनमि केइ दोस पाउनइन।” 5 तब काँणाको मुकुट रे बैजनि रङको लत्ता लाइबर येशूलाइ बाइर लेया, रे पिलातस हाकिमले तिननलाइ भण्यो, “तक, यइ मान्स!” 6 जब यहुदि मुख्य पुजारि रे मन्दिरका चौकिदारले उनलाइ धेक्यो, तिनन यिसो भण्न्नाइ कला हाल्ल पस्या, “तइलाइ क्रुसमि मारीदिय।” पिलातस हाकिमले तिननलाइ भण्यो, “तमनइ तइलाइ क्रुसमि मारीदिय, क्याकि म यिनमि केइ दोस पाउनइन!” 7 यहुदि अगुवानले भण्यो, “मोशाको कानुन अन्सार तइले मृत्यु दण्ड पाउनु पणन्छ, क्याकि तइले आफइलाइ परमेश्वरको चेलो हु भणि भणन्छ।” 8 यइ कुरणी सुणिबर पिलातस हाकिम भौत डरायो। 9 उन आजी राज भबन भितर पस्या रे येशूलाइ सोध्यो, “तु काँ को हइ?” तर येशूले तिनलाइ केइ जबाफ दिएइन। 10 तबइकिलाइ पिलातस हाकिमले उनलाइ भण्यो, “कि तु मसित बोल्लइनि? तुलाइ छाडि दिन्या अधिकार मसित छ, रे तुलाइ क्रुसमि टाँङ्द्या अधिकार लगइ मसित छ भण्न्या तुलाइ था आथिन?” 11 येशूले जबाफ दियो, “यदि तमलाइ परमेश्वर बठेइ नदिया भया ममि तमरो केइ अधिकार हुनेइ थेइन। तबइकिलाइ मलाइ तमरा हातमि सुम्पिदिन्या मान्सन आजी बड्ता पापको दोषि हुन्या हुन।” 12 यो सुणिबर पिलातस हाकिमले उनलाइ छाडि दिन्या बड्ता कोशिस अर्यो। तर यहुदिले यिसो भण्नाइ कला हाल्ल पस्या, “यदि तमले यइ मान्सलाइ छाडिदिया भण्या तम सम्राटका मित्तुर हुन्या होनु। आफइलाइ राजा हु भणि दाबि अद्द्या सब सम्राटका बिरोधमी खडा हुन्छ।” 13 पइ पिलातस हाकिमले यो सुण्यो, उनले येशूलाइ बाइर लेया रे उ न्याय आसनमी बस्यो जो “ढुङ्गाका पाटि” भणिन्या ठाउँमि थ्यो। यइलाइ हिब्रु भासामि गब्बथा भणिन्छ। 14 यो निस्तार काजबार तयारीको दिन थ्यो। तइ बेला दिनको बार बज्याथ्यो। पइ पिलातस हाकिमले यहुदि मान्सनलाइ भण्यो, “हेर तमरा राजा।” 15 रे तिननले आजी कला हालिबर भण्न पस्या, “तइलाइ क्रुसमि मारीदिउ। तइलाइ क्रुसमि मारीदिउ।” तब पिलातस हाकिमले भण्यो, “तमरा राजालाइ क्रुसमि मारीदिउ?” पइ यहुदि मुख्य पुजारिले जबाफ दियो, “सम्राट बाहेक हामरो और कोइ राजा आथिन।” 16 तब पिलातस हाकिमले येशूलाइ क्रुसमि टाँङदाइ रोमी सिपाइलाइ सुम्पिदियो। येशू क्रुसमि ( मत्ती २७:३२-४३ ; मर्क १५:२१-३२ ; लूका २३:२६-४३ ) 17 तब रोमी सिपाइले येशूलाइ पकडयो। तिननले उनलाइ आफ्नो क्रुस उठाइबर यरुशलेम सहर बठेइ बाइर खप्परे भण्न्या ठाउँमि लैजानाइकिलाइ भण्यो, जइलाइ हिब्रु भासामि गलगथा भणिन्छ। 18 जाँ तिननले उनलाइ क्रुसमि टाङयो। उनसित और दुइ जना लगइ थ्या। एकलाइ येशूको दाइन तिर रे अर्खालाइ बाँउतीर क्रुसमि टाङयो। 19 पिलातस हाकिमले एक दोषपत्र लेख्यो रे येशूका मुन्टाका मल्तिर क्रुसमि दोषपत्र टाङयाथ्यो, रे तइमि इसो लेखिरइथ्यो: “नासरत गाउँका येशू यहुदिका राजा।” 20 तब भौत यहुदि मान्सनले यो दोषपत्र पढयो क्याकि येशू क्रुसमि टाङिया ठाउ यरुशलेम सहर नजिकै थ्यो। त्यो दोषपत्र ग्रीक भासामि, हिब्रु भासामि रे ल्याटिन भासामि लेखिराइथ्यो। 21 तब यहुदि मुख्य पुजारिले पिलातस हाकिमलाइ भण्यो, “यहुदि मान्सनका राजा होइन्न तर उइले म यहुदि मान्सनका राजा हु भण्थ्यो भणि लेख।” 22 पिलातस हाकिमले जबाफ दियो, “मइले जी लेख्या, त्यो बदलिन्या छैन।” 23 तब सिपाइले, येशूलाइ क्रुसमि टाङया पछा येशूका लत्ता लगइ जाइबर हरेक सिपाइनकिलाइ एक-एक भाग हुन्या अरि चार भाग लायो। रे उनरो कुर्ता मल्तिर बठेइ तल्तिर सम्म एकइ धागाले सिल्या थ्यो। 24 त्यो धेकबर सिपाइले एक अर्खालाइ भण्यो, “यइलाइ चिद्दाइन यो कइका भागमि पणन्छ चिट्ठा हाल्लाउ।” पबित्र सास्त्रमि लेखिया कुरणी पुरा हुनाइलाइ यो भया हो। “तिननले मेरा लत्ता आपसमी बाड्यो, रे मेरो कुर्ताको चिट्ठा हाल्यो।” 25 येशूलाइ क्रुसको नजिकै उनरि इजासित इजाकी बैनि, क्लोपासकि स्वानी मरियम रे मग्दला गाउँकी मरियम कल्लियइ थिन। 26 जब येशूले आफनी इजा रे तइ प्रेम अद्द्या शिष्य युहुन्नालाइ नजिकै कल्लिया धेक्यो पइ उनले आफनी इजालाइ भण्यो, “ए इजा हेर तमरो चेलो!” 27 तब येशूले तइ शिष्यालाइ भण्यो, “हेर तेरि इजा!” पइ तइ बेला बठेइ तइ युहुन्नाले उनलाइ आफना परिबारमि सामिल अर्यो। येशू मर्या ( मत्ती २७:४५-५६ ; मर्क १५:३३-४१ ; लूका २३:४४-४९ ) 28 तइ पछा सब काम पुरा भयो भणि जाणिबर पबित्र सास्त्र साचो साबित होस भणि येशूले भण्यो, “मलाइ तिस लागी।” 29 ताँ सिर्काले भरिया एक भाँडो राख्याथ्यो सिपाइनले एक स्पन्जलाइ सिर्काले भर्यो, तइलाइ एक हिसपमि राखबर उनरा मुख सम्म पुगायो। 30 जब येशूले सिर्का चाख्यो तब उनले भण्यो, “पुरा भयो” तइ पछा उनले आफ्नो मुन्टो झुकाइबर मर्या। 31 त्यो दिन तयारीको दिन थ्यो, रे अर्खा दिन बिश्राम दिन रे निस्तार काजबार थ्यो। त्यो यहुदि मान्सनको निउति दिन ठुलो दिन थ्यो, तिनन चाहान्थेइन कि त्यो ठुलो दिनमि लास क्रुसमि रइरउ। तबइकिलाइ तिननले पिलातस हाकिमलाइ भण्यो कि तिन मान्सनको खुट्टा तोडीदेउ ताकि तिनरो मृत्यु छिटाइ हउ रे तिनरा लास तल्तिर लैजाउन। 32 तब सिपाइ आया रे पइल्ली उनसित क्रुसमि टाङियका दुएइ मान्सनको खुट्टा तोडिदियो। 33 जब तिनन येशूका वाँ आया रे उनलाइ पइल्ली मरिसक्या धेक्यो तब तिननले उनरा खुट्टा तोडेइन। 34 तर सिपाहिमी हइ एकले उनरा कोखीमि भालाले गोद्यो रे उतनजेइ रगतइ रे पानी निकल्यो। 35 तिननले येशूमि बिश्वास अद्द सकुन भणबर जइले यो धेक्यो उसइले गवाही दिराइछ रे उइको गवाही सत्य छ, सत्य बोलन्छ भणि उ जाणन्छ। 36 उनरो एकइ लगइ हड्डी टुट्टया आथिन भणबर पबित्र सास्त्रमि लेखिया बचन पुरा होउ भणबर यो सब भया हो। 37 पइ आजी अर्खा ठाउँमि पबित्र सास्त्र भणन्छ, “जइलाइ तिननले घोचिराइछ, तिननले उनलाइ हेद्द्या हुन।” येशूलाइ गाड्डया काम ( मत्ती २७:५७-६१ ; मर्क १५:४२-४७ ; लूका २३:५०-५६ ) 38 पइ तइ पछा अरिमाथिया गाउँका योसेफ यहुदि अगुवानका डरका लाग्दा गोप्यमी येशूका शिष्य भयाथ्या। येशूको लास लैजान पाउ भणि बिन्ति अर्यो। पइ पिलातस हाकिमले अनुमति दियो रे उनले येशूको लास लैया। 39 निकोदेमस लगइ जो रात येशूलाइ भेट्टाइ आयाथ्या, उनले लगभग तेत्तिस किलो धुप रे मुर्र मिलाया तेल लेइबर येशूका वाँ आया। 40 तिननले येशूको लास लैया रे यहुदिन लास गाड्डया रित अन्सार येशूको शरीरलाइ बास आउन्या धुप सहित सुति कपडामि लट्पटायो। 41 उन क्रुसमि टाँङिएका ठाउँमि एक बगैचा थ्यो, त्यो बगैचामि कभइ कोइ लास नराखिया नयाँ चिहान थ्यो। 42 तबइकिलाइ येशूको लासलाइ तइ चिहानमि राख्यो जाँ एक गुफा थ्यो, क्याकि त्यो नजिकै थ्यो रे त्यो दिन यहुदि मान्सनको बिश्रामदिनको तयारीको दिन थ्यो। |
Dotyali (डोटेली) New Testament, by The Love Fellowship is licensed under Creative Commons Attribution-ShareAlike 4.0 License.
Beyond Translation