यूहन्नाले लेख्या सुसमाचार 18 - डोटेली नयाँ करार

येशू पकोडियाका

¹ येशूले प्राथना अरिसक्या पछा आफना शिष्यासित किन्द्रोन खोल्सा पारि गया जाँ एक बगैचा थ्यो तइ भित्तर उन रे उनरा शिष्या पस्या।

² उनलाइ पकोडाइ दिन्या यहूदा इस्करियोत लगइ तसइ ठाउँमि थ्यो क्याकि येशू आफना शिष्यासित ताँ बेर बेरि जम्मा हुन्थ्या।

³ तब सिपाइको एक टोलि, रे यहुदि मुख्य पुजारि रे फरिसि मान्सनको समुह बठेइ चौकीदार पठाइबर यहूदा इस्करियोत बत्ति, राँका रे हतियार लेइबर आयाथ्या।

⁴ तब येशूले आफुमि आइ पड्डया सब था पाइबर अगाडी गया रे तिननलाइ भण्यो, “तमन कइलाइ खोज्जा छौ?”

⁵ तिननले उनलाइ जबाफ दियो “नासरत गाउँको येशूलाइ।” येशूले तिननलाइ भण्यो, “म उइ हु।” येशूलाइ पकडाउन्या यहूदा इस्करियोत लगइ ताँ उनसितइ कल्लिरइथ्यो।

⁶ जब येशूले तिननलाइ “म उइ हु” भण्यो, तब तिनन पछा हटिबर, भैयाइनि लोट्या।

⁷ तब उनले तिनलाइ दोसर्या सोध्यो, “तमन कइलाइ खोज्जा छौ?” तब तिननले जबाफ दियो, “नासरत गाउँका येशूलाइ।”

⁸ येशूले जबाफ दियो, “म उइ हु, भणि मइले तमलाइ भणि सक्या छु पइ मलाइ आजी खोज्जा छौ भण्या यिन और मान्सनलाइ जान दिय।”

⁹ “हे पिता तमनले मलाइ कतिजना दिया मइले तिननमि हइ कसइलाइ लगइ हराएन” भणि येशूले पइल्ली लगइ भण्याको कुरणी पुरा होउ भणि इसो भयो।

¹⁰ तब सिमोन पत्रुससित तरबार भया हुनाले तइ निकालिबर यहुदि प्रधान पुजारिका चौकीदारलाइ हाणिबर दाइन कान काटदियो। तइ चौकिदारको नाउँ मालखस थ्यो।

¹¹ तब येशूले पत्रुसलाइ भण्यो, “आफ्नो तरबार दाब भित्तर हाल। कि म मेरा पिताको दिया यो दुःखको कटौरा जन पिउँ?”

येशूलाइ हन्नासका वाँ लैयाको

¹² तब यहुदि सिपाइका कप्तान समेत चौकिदारले येशूलाइ पकड्यो रे उनलाइ बाद्यो।

¹³ पइ तिननले उनलाइ हन्नासका वाँ लैया, जो तइ सालका यहुदि प्रधान पुजारि कैयाफाका ससुरा थ्या।

¹⁴ यिन उनै कैयाफा थ्या जइले जनताकी निउति एक जाना मान्स मद्दु पणन्छ भणि यहुदि अगुवानलाइ सल्लाह दियो।

पत्रुसको पइल्ली बेरको इन्कार

¹⁵ पइ सिमोन पत्रुस रे येशूका अर्खा शिष्य उनरा पछा-पछा लाग्या। आब त्यो अर्खो शिष्याको यहुदि प्रधान पुजारि सित निकोइ चिनजान थ्यो, तबइकिलाइ येशूसित प्रधान पुजारिका आगन भित्तर पस्या।

¹⁶ तर पत्रुस बाहिर ढोकालाइ कल्लियो तर अर्खो शिष्य जो यहुदि प्रधान पुजारि सित निकोइ चिनजान थ्यो बाइर गयो रे ढोकालाइ पहरा दिनेइ नौकर्नी सित कुरणी अर्यो रे पत्रुसलाइ भित्तर लेइबर आयो।

¹⁷ तब ढोकालाइ बस्सेइ एक नौकर्नीले पत्रुसलाइ भण्यो, “कि तु लगइ यइ मान्सका शिष्यामि को एक जानो हइनि ब?” उनले भण्यो, “म त होइन।”

¹⁸ ताँ नौकर रे मन्दिरको चौकीदार कोइलाको आगो सल्काइबर तइका वलतिर पलतिर कल्लिरइथ्या। क्याकि ताँ ठण्नी थी रे पत्रुस लगइ तिननसित आगो ताप्दाथ्यो।

येशूलाइ प्रधान पुजारिको प्रश्न

¹⁹ तब यहुदि प्रधान पुजारिले येशूलाइ उनरा शिष्या रे उनरो शिक्षाका बारेमि सोध्यो।

²⁰ येशूले उनलाइ जबाफ दियो, “मइले सबलाइ खुल्लम खुल्ला भण्या। मइले सदाइ यहुदि सभाघर रे मन्दिरमि शिक्षा दिया जाँ यहुदि मान्सन सदाइ जम्मा हुनाहान। मइले गोप्यमी केइलगइ भण्या आथिन।

²¹ तम मलाइ क्याकि सोदन्छौ? तिननलाइ सोध मइले तिननलाइ जी जी भण्याथ्या सुणन्या वालालाइ था छ।”

²² येशूले यिन कुरणी भण्न्या बेला नजिकै कल्लिया मन्दिरको एक चौकिदारमि हइ एकले इसो भणबर एक थप्पडी लाइदियो, “कि तु यहुदि प्रधान पुजारि लाइ इसेरि जबाफ दिन्छइ?”

²³ येशूले तइलाइ जबाफ दियो, “मइले खराब बोल्या भयले मेरो गल्ती धेकाइ दिय, तर ठीक बोल्या छु भण्या तम मलाइ क्याकि हाणन्छौ?”

²⁴ आब हन्नासले उनलाइ यहुदि प्रधान पुजारि कैयाफाका वाँ बादिबरै पुर्याउन लायो।

पत्रुसको दोसरो रे तेसरो इन्कार

²⁵ सिमोन पत्रुस कलिबर आगो तप्दाथ्या। और आगो ताप्द्या मान्सनले तिनलाइ भण्यो, “कि उनरा शिष्यामि हइ एक जानो तु लगइ हइनि ब?” उनले इन्कार अरिबर भण्यो, “म होइन।”

²⁶ यहुदि प्रधान पुजारिका नौकरमी हइ एक जनाले जो पत्रुसले कान काट्याको मान्सको आफन्त थ्यो, तइले भण्यो, “कि मइले तुलाइ बगैचामि येशूसित धेक्या हुनु ब?”

²⁷ तब पत्रुसले आजी इन्कार अर्यो रे उतन्जेइ भाल्या बास्यो।

पिलातासका अगाडी येशू

²⁸ तइ पछा तिननले येशूलाइ कैयाफाका वाँ बठेइ रोमीका ठुला हाकिम, पिलातासका महलमि लैया। त्यो परभातइको समय थ्यो, रे यहुदि मान्सन महलमि पस्या थेइन। तिननमि हइ यदि कोइ भितर पस्या भयाले तिनन असुद्द हुन्थ्या रे तइलाइ निस्तार काजबारको भोज खान्या अनुमति मिलनथेइन।

²⁹ पिलातस हाकिमले बाइर तिनरा वाँ जाइबर भण्यो, “येइ मान्सका बिरोधमी तमन कि आरोप लाउछौ?”

³⁰ तिननले जबाफ दियो, “उ कुकर्मि नभया भएले हाम तमरा वाँ खाली क्याइ ल्याउनेइथ्या रे?”

³¹ पिलातस हाकिमले तिननलाइ भण्यो, “तमन उइलाइ लैजा रे आफ्नो मोशाको कानुन अन्सार उइको इन्साफ अर।” तब यहुदि अगुवानले उनलाइ भण्यो, “हामसित कसइलाइ मद्द्या अधिकार आथिन।”

³² आफ कसेरी मद्द पड्या हो भणि तइको संकेत अरिबर येशूले भण्या बचन पुरा होउ भणबर इसो हुन्नाथ्यो।

³³ तब पिलातस हाकिमले आजी महल भित्तर बोलाइबर येशूलाइ सोध्यो, “कि तम यहुदि मान्सनका राजा हौ?”

³⁴ येशूले उनलाइ जबाफ दियो, “तु आफइ यिन कुरणी भण्नाछौ कि और कसइले तमलाइ मेरा बारेमि भण्यो?”

³⁵ पिलातस हाकिमले भण्यो, “तमलाइ था छ कि म यहुदि होइन। तेरा आफनाइ जाति रे यहुदि मुख्य पुजारिले तुलाइ मेरा वाँ सुम्पेका छन, तइले कि अर्या हो?”

³⁶ येशूले जबाफ दियो, “मेरो राज्य यइ संसारको होइन मेरो राज्य यइ संसारको हुनो हो तम यहुदि अगुवानका हात बठेइ पकोडिनेइ थेइन। मलाइ पछ्याउन्याले मेरी निउति झगडा अद्देइथ्या तर आब मेरो राज्य यइ संसारको होइन।”

³⁷ पिलातस हाकिमले येशूलाइ सोध्यो, “कि तम यहुदि मान्सनका राजा हउ?” येशूले जबाफ दियो, “म राजा हु भणि तम आफइ भणन्छौ। मेरो जन्म रे यइ संसारमी यइ उइले आया हु कि म सत्यका बारेमि सिकाउन सकौ। सत्यको पालन अद्या जति मेरा कुरणी सुणनाहान।”

³⁸ पिलातस हाकिमले सोध्यो, “सत्य कि हो?” इसो भणबर उन आजी यहुदि अगुवानका वाँ गया रे भण्यो, “म येइ मान्समि एक लगइ दोस पाउनइन।”

³⁹ तर निस्तार काजबारका बेला तमनका निउति एक कैदीलाइ छाड्डया रित छ। “कि तम इसोइ चाहन्छौ? कि म तमरि निउति यहुदि मान्सनका राजालाइ छाडि दिउ?”

⁴⁰ पइ आजी तिनन इसो भणि कला हाल्ल पस्या, “यइ मान्सलाइ होइन तर बरब्बालाइ छाडिदिय” जो बिद्रोह रे हत्याको अरोपमि झेल पड्या थ्यो।