यूहन्नाले लेख्या सुसमाचार 10 - डोटेली नयाँ करार

येशू असल ग्वालो

¹ “साँच्चि, म तमनलाइ भण्नउ, जो भेडा-गोठको ढोका बठेइ भितर पस्सइन, तर अर्खा बठेइ चडिबर पसन्छ, त्यो चोर रे डाँका हो,

² तर ढोका बठेइ भितर पस्या भेडा ग्वालो हो।

³ गोठको चौकिदारले उइका निउति ढोका खोल्दिन्छ, रे भेडाले उइको डाको पछेण्नाहान, रे उइले आफना भेडाको नाउँ भणबर बोलाउछ, रे तिननलाइ बाइर लैजान्छ।

⁴ जब उइले आफना भेडालाइ बाइर निकालि सकन्छ, उ तिनरा अगाडी-अगाडी हिटन्छ, रे भेडा उइलाइ पछ्याउनाहान, क्याकि तिनले उइको डाको पछेण्नाहान।

⁵ नपछेण्या मान्सलाइ तिन पछ्याउनाइन, तर तइ धेकि भाग्दाहान। क्याकि नपछेण्या मान्सको डाको तिन पछेण्नाइन।”

⁶ येशूले तिननलाइ यो काहानि भण्यो, तर उनले तिननलाइ भण्या कुरणीको अर्थ तिननले बुजेइन।

⁷ तबइकिलाइ येशूले आजी तिननलाइ भण्यो, “साँच्चि, म तमनलाइ भण्नउ, म तेइ भेडाको ढोका हु। जइ बठेइ भेडा भितर पस्साहान।

⁸ म भण्ना पइल्ली आउन्या सब चोर रे डाँका हुन, तर मेरा भेडाले तिनरो डाको सुणेइन।

⁹ म तेइ भेडाको ढोका हु, यदि कोइ मान्स म बठेइ भितर पस्यो भण्या परमेश्वरले तइलाइ बचाउन्या हुन, रे भितर बाइर आउन्या जान्या अरन्छ, रे खनाइ पाउछ।”

¹⁰ “चोर त भेडा चोद्दाइ, माद्दाइ रे नास पाड्डाइ मान्तरइ आउँछ। म त तिननले अनन्त जीवन पाउन, रे त्यो प्रसस्त पाउन भण्न्या उइले आया हु।

¹¹ म असल ग्वालो हु। असल ग्वालाले आफना भेडाकि निउति आफ्नो प्राण दिन्छ।

¹² नौकर मान्स भेडा आफनाइ ग्वालो जसो होइन। तइले त ब्वाँसा आया धेकिबर भेडा छाडिबर डरले भागन्छ, रे ब्वाँसाले भेडालाइ झ्म्टीन्छ रे तितर बितर पाडीदिन्छ। क्याकि त्यो तिनारो ग्वालो होइन रे तिनन उइका भेडा होइन।

¹³ त्यो भागन्छ, क्याकि त्यो नौकर मान्तर हो, तइले भेडाको साच्ची रेख देख अद्दैन, त्यो भागन्छ।”

¹⁴ “म असल ग्वालो हु, म आफना भेडा पछेण्नउ, मेरा भेडाले लगइ मलाइ पछेण्नाहान।

¹⁵ जसेरि पिता मलाइ पछेण्नाहान, म पितालाइ पछेण्नउ, रे म भेडाकि निउति आफ्नो प्राण दिनाइ तयार हुनउ।

¹⁶ मेरा और भेडा लगइ छन, जो यइ गोठका होइन। तिननलाइ लगइ मइले ल्याउनु पडिरइछ, रे तिननले मेरो डाको पछेण्न्या हुन, रे तिनन एकै बगाल हुनाहान, रे तिनरो एकै ग्वालो हुन्छ।

¹⁷ पिताले मलाइ तबइकिलाइ प्रेम अद्दाहान, क्याकि म मेरो इच्छाले आफ्नो प्राण दिनउ, ताकि म आजी जिउनो रन सकु।

¹⁸ कसइले म बठेइ मेरो प्राण लैन सक्दैन, तर म आफनाइ मनले आफ्नो प्राण अर्पण अद्दउ। आफ्नो प्राण अर्पण अद्द्या अधिकार मसित छ, पइ आजी लैन्या अधिकार लगइ मइसित छ। यो आज्ञा मइले मेरा पिता बठेइ पाइराइछु।”

¹⁹ यिन बचनका उइले यहुदिमि आजी फाटो होइय्यो।

²⁰ तिननमि हइ भौत भण्नाथ्या, “यइलाइ भूत लागिरइछ, रे यो बौलिरइछ। तमन यइकि कुरणी जन सुण।”

²¹ और भण्नाथ्या, “भूत लाग्या मान्सकि कुरणी इसी हुनिन। कि भूतले कानाको आँखा खोल्ल सकन्छ ब?”

यहुदि मान्सनको अबिश्वास

²² तब मन्दिर समर्पणको काजबार यरुशलेम सहरमि मनाइयाथ्यो।

²³ यो हिउँनको दिन थ्यो। येशू मन्दिरको आगनमी सोलोमन नाउ भया दलान मणि हिट्टाथ्या।

²⁴ यहुदि अगुवानले उनरा चारै तिर जमा होइबर सोध्यो, “तम हामलाइ भौत समय सम्म दोधारमि राख्दाछौ। तम ख्रीष्ट हउ भण्या हामलाइ खुलस्त भणिदिय?”

²⁵ येशूले तिननलाइ जबाफ दियो, “मइले तमनलाइ भणि सक्या छु, तर तमन बिश्वास अद्दान। मेरा पिताको अधिकारले जी काम म अद्दउ, तिनैले मेरो गवाही दिनाहान।

²⁶ तर तमन बिश्वास अद्दान, क्याकि तमन मेरा भेडामिका होनु।

²⁷ जसेरि भेडाले आफ्नो असल गोठालोको सोर पछेण्नाहान, तसेरि मेरो मान्सन मेरा कुरणी ध्यानले सुण्नाहान। म तिननलाइ पछेण्नउ रे तिनन शिष्या हुनाइलाइ मेरा पछा लाग्दया हुन।

²⁸ तिननलाइ म अनन्त जीवन दिनउ, रे तिनन कभइ नास हुन्या आथिन, रे कसइले तिननलाइ म बठेइ खोसीबर लैजान्या आथिन।

²⁹ मेरा पिताले मलाइ त्यो दिइराइछ, उन सब भण्ना माहान छन। मेरा पिताका हात बठेइ त झिक कसइले लगइ तिननलाइ खोसीबर लैजान्या आथिन।

³⁰ पिता रे म एकै हु।”

³¹ आजी यहुदि मान्सनका अगुवानले उनलाइ हाण्नाउ भणि ढुङा समाउन पस्या।

³² येशूले तिननलाइ भण्यो, “मइले तमनलाइ मेरा पिता बठेइ भौत ठुला अचम्मका काम धेकाया, तिनमि हइ कइ कामको निउति तमन मलाइ ढुङाले हाण्न चाहान्छौ?”

³³ यहुदि अगुवानले उनलाइ जबाफ दियो, “ठुला अचम्मका कामका निउति हाम तुलाइ ढुङाले हाण्नाइन, तर परमेश्वरको बिरुद्द निन्दा अर्या हुनाले, तु मान्स होइबर लगइ आफइलाइ परमेश्वर हु भणि क्याकि भणन्छइ।”

³⁴ येशू तिननलाइ जबाफ दियो, “पबित्र सास्त्रमि लेखिया छ कि परमेश्वरले आफ्नो मान्सनका अगुवानलाइ भण्यो कि तिनन देब हुन।

³⁵ रे तमन जाणन्छौ कि पबित्र सास्त्र बदल्लु सक्दाहान। तबइकिलाइ यदि परमेश्वरको मान्सका अगुवान भणिया छन भण्या,

³⁶ जब म परमेश्वरको चेलो हु भणनौ तर तमन मलाइ क्याइ भण्न्छौ, कि म परमेश्वरको बिरुद्द निन्दा अद्दाछु? म तेइ हु जइलाइ परमेश्वरले अलग अर्यो रे यइ संसारमी पठायो।

³⁷ यदि मइले मेरा पिताको काम अर्या आथिन भण्या ममि बिश्वास जन अर।

³⁸ तर यदि म पिताको काम अद्दउ रे पइलगइ तमन ममि बिश्वास अद्दानु भण्या यिन काममी बिश्वास अर, रे तमनले था पाउन सकन्छौ रे बुजन्छौ, कि परमेश्वर ममि छन, रे म परमेश्वरमि छु।”

³⁹ तिननले आजी उनलाइ पकड्डाइ खोज्यो, तर उन तिनन बठेइ दुर गइसक्या थ्या।

⁴⁰ पइ येशू आजी यर्दन नदी पारि तसइ ठाउँमि गया, जाँ यूहन्नाले बप्तिस्मा दिन्या अरन्थ्यो, रे उन ताँइ बस्या।

⁴¹ भौत मान्स उनरा वाँ आउन पस्या, रे तिननले भण्यो, “यूहन्नाले केइ अचम्मको चिन्ह अरेन, तर यूहन्नाले यिनरा बारेमि जी जति लगइ भणिराइथ्यो त्यो सत्य रइछ।”

⁴² ताँ भौत मान्सनले उनमी बिश्वास अर्यो।