यूहन्नाले लेख्या सुसमाचार 1 - डोटेली नयाँ करार

बचन देहधारी भयो

¹ संसारको सृष्टि हुनाहइ पइल्ली एक जानाथ्या जइलाइ बचन भणिन्छ, रे उन परमेश्वरसित थ्या रे उन परमेश्वर थ्या।

² संसारको सृष्टि हुनाहइ अगाडी बठेइ उन परमेश्वरसित थ्या।

³ बचनइ बठेइ परमेश्वरले सब चिज सृष्टि अर्यो, रे सृष्टि भया केइ चिज लगइ उन बिना सृष्टि भएइन।

⁴ उन सब जीवनका मुल हुन, रे सब मान्सनलाइ ज्योति दिन्या उनइ हुन।

⁵ त्यो ज्योति अनारामि चम्कन्छ, रे अनाराले तइलाइ निमाउन सकेइन।

⁶ परमेश्वरले यूहन्ना नाउँ भया एक जानो मान्स पठायो।

⁷ उ ज्योतिका बारेमि भण्नाइ आयो, ताकि उइले दिया गवाहिका लाग्दा सबले बिश्वास अरुन।

⁸ यूहन्ना आफइ त त्यो ज्योति थेइन, तर उ ज्योतिका बारेमि गवाही दिनाइ आयाथ्यो।

⁹ एक जाना जो साँचो ज्योति हुन त्यो ज्योति संसारमी आइबर सब मान्सनलाइ उज्यालो दियो।

¹⁰ उन संसारमी थ्या, संसार उन बठेइ सृष्टि भयो, पइलगइ संसारका मान्सनले उनलाइ पछेणेइन।

¹¹ उन आफनाइ मान्सनका वाँ आया, तर उनरा आफना मान्सनले उनलाइ अस्वीकार अर्यो।

¹² तर जतिले उनलाइ स्वीकार अर्यो रे उनमी बिश्वास अर्यो, उनले तिननलाइ परमेश्वरका सन्तान हुन्या अधिकार दियो।

¹³ तिनन पुर्खा बठेइ होइन, मान्सनका इच्छा बठेइ होइन, रे मान्सका बच्चा जन्माउन्या इच्छा बठेइ होइन तर परमेश्वरका इच्छा बठेइ जन्मिया हुनाहान।

¹⁴ बचन एक मान्स भया रे उन अनुग्रह रे सत्यले पुरा भइबर हामरा बिचमि बास अद्दाहान। हामले उनरो महिमा धेक्या, जो महिमा परमेश्वर बठेइ आया एकइ चेलोको महिमा जसोथ्यो।

¹⁵ यूहन्नाले उनरा बारेमि गवाही दिनोइ जोरले भण्यो, “उन तिनइ मान्स हुन, जइका बारेमि मइले भणिराइछु, म पछा आउन्या म भण्ना उच्च छन, क्याकि उन म जन्मनु भण्ना पइल्ली बठेइ थ्या”।

¹⁶ उनरा अनुग्रहको पुर्णता बठेइ हामले एक आशिषमी अर्खो आशिस पाइराइछौ।

¹⁷ क्याकि मोशाको कानुन मोशा बठेइ दिइयो, तर हामले येशू ख्रीष्ट बठेइ परमेश्वरको अनुग्रह रे सत्यता पाइराइछौ।

¹⁸ परमेश्वरलाइ कसइले लगइ कभइ धेक्या आथिन। तर पितासित हुन्या एकइ चेलोले उनलाइ धेकिराइछ।

बप्तिस्मा दिन्या यूहन्नाको गवाही

¹⁹ जब यरुशलेम सहर बठेइ यहुदि अगुवानले केइ यहुदि पुजारि रे मन्दिरको सेवामि सहयोग अद्द्या लेवि कुलकालाइ यूहन्ना को रइछ भणि सोद्दाइ पठायो, तब यूहन्नाको गवाही यो थ्यो।

²⁰ उइले स्पष्ट तरिकाले भण्यो कि, “म ख्रीष्ट होइन।”

²¹ तब तिननले उइलाइ सोध्यो, “तसो भया तु को हइ? कि तु एलिया अगमबक्ता हइ?” उइले भण्यो, “म होइन” उनले आजी सोध्यो, “कि तु त्यो अगमबक्ता हइ?” उइले जबाफ दियो, “होइन।”

²² तिननले उइलाइ भण्यो, “तु को हइ पइ? हामलाइ भण, रे हामलाइ पठाउन्यालाइ हाम जबाफ दिन सकउ। तु आफना बारेमि कि भणन्छइ”?

²³ उइले भण्यो, “यशैया अगमबक्ताले भण्या जसो, परमप्रभुको बाटो तयार पाड भणबर उजाड ठाउँमि कला हाल्या एक मान्सको म आवाज हु”।

²⁴ तिननलाइ फरिसि मान्सनको समुहले पठाइराइथ्यो।

²⁵ पइ तिननले उइलाइ सोध्यो “तु ख्रीष्ट लगइ हइनि, एलिया अगमबक्ता लगइ हइनि, त्यो अगमबक्ता लगइ हइनि भण्या, क्याइ बप्तिस्मा दिन्छइ?”

²⁶ यूहन्नाले तिनलाइ जबाफ दियो, “म त पानिले बप्तिस्मा दिनउ। तर तमरा बिचइनि एक जाना कल्लीया छन, जइलाइ तमन पछेण्नानु।

²⁷ म पछा आउन्या उनइ हुन। उनरा जुताको ताना खोलल्या लायकको म आथिन”।

²⁸ यिन कुरणी यर्दन नदी पारि बेथानिया सहरमि हुन्नथ्या, जाँ यूहन्नाले मान्सनलाइ बप्तिस्मा दिनथ्या।

परमेश्वरका थुमा येशू

²⁹ भोलिबार यूहन्नाले येशूलाइ आफतिर आउन्नारया धेकिबर भण्यो, “हेर, संसारको पाप उठाइ लइजान्या परमेश्वरका थुमा!

³⁰ तिन उनइ हुन, जइका बारेमि मइले भणिराइथ्या, म पछा एक जाना मान्स आउन्ना छन, जो म भण्ना उच्च छन, क्याकि उन म जन्मनु भण्ना पइल्ली बठेइ थ्या।

³¹ म आफइले ख्रीष्टलाइ पछेण्या थेइन, तर ख्रीष्टलाइ इस्राएल देशका मान्सनले जाणुन भणबर पानिले बप्तिस्मा दिनोइ म आया हु”।

³² यूहन्नाले यिसो भण्नोइ गवाही दियो, “मइले पबित्र आत्मा ढुकुरका रुपमि स्वर्ग बठेइ ओलीबर येशूमि बसिरया धेक्या।

³³ मइले ख्रीष्टलाइ पछेण्या थेइन, तर जइले मलाइ पानिले बप्तिस्मा दे भणि पठायो, उनइले मलाइ भण्यो, जइमि तु पबित्र आत्मालाइ ओल्लारया रे बस्सारया धेकि, पबित्र आत्माले बप्तिस्मा दिन्या उनइ हुन।

³⁴ मइले धेकिराइछु, रे म तमनलाइ साच्ची भण्नाछु, कि उनइ परमेश्वरको चेलो हुन”।

येशूका पइल्लिका शिष्या

³⁵ आजी अर्खा दिन यूहन्ना उनरा शिष्यामि हइ दुइ जनासित कलिरइथ्या।

³⁶ उइले येशूलाइ नजिकै बठेइ जान्नारया धेकिबर उनले भण्यो, “हेर, उनइ परमेश्वरका थुमा हुन।”

³⁷ उइले भण्या यिन कुरणी सुणिबर तिन दुइ शिष्या येशूका पछा लाग्या।

³⁸ येशूले फर्किबर तक्यो, रे तिननलाइ पछा-पछा आउन्नारया धेकिबर तिननलाइ सोध्यो, “तमन कि खोज्जा छौ?” तिननले उनलाइ भण्यो, “रब्बी (जइको अर्थ हो गुरुज्यू), तम काँ बसन्छौ?”

³⁹ उनले तिननलाइ भण्यो, “आस रे तमन धेक्द्या हौ।” तइ बेला बसाइतको चार बज्जाथ्यो। तिनन येशूसित गया रे उन बस्या ठाउँ हेर्यो रे तइ दिन उनसित बास बस्या।

⁴⁰ यूहन्नाले भण्या कुरणी सुण्न्या रे येशूलाइ पछ्याउन्या तिन दुइ जनामि हइ एक जाना सिमोन पत्रुसको भाइ अन्द्रियास थ्यो

⁴¹ तइले पइल्ली आफ्नो भाइ सिमोनलाइ भेट्यो, रे उइलाइ भण्यो, “हामले मसिहलाइ (जइको अर्थ हो ख्रीष्ट) भेटिराइछौ”।

⁴² अन्द्रियासले सिमोन पत्रुसलाइ येशूका वाँ लेया। येशूले उइलाइ हेर्यो रे भण्यो, “तु योआनेसको चेलो सिमोन हइ, हेर तेरो नाउ केफास हुन्या हो (जइको अर्थ पखान हो)।”

फिलिप रे नथानेल

⁴³ भोलिबार उनले गालील जिल्लामि जान्या पक्‍का अर्यो, रे फिलिपलाइ भेटाइबर येशूले तइलाइ भण्यो, “शिष्य हुनाइलाइ मेरा पछा लाग”।

⁴⁴ अन्द्रियास रे पत्रुस जसोइ फिलिप लगइ बेथसेदा गाउँको रइछ।

⁴⁵ फिलिपले नथानेललाइ भेटाइबर भण्यो, “हामले तइ मान्स भेटिराइछौ, जइका बारेमि मोशाको कानुनमी रे अगमबक्ताले लगइ लेखिराइथ्यो। उ नासरत गाउँका योसेफको चेलो येशू हो”।

⁴⁶ नथानेलले तइलाइ भण्यो, “कि नासरत गाउँ बठेइ केइ निकी कुरणी आउन सकन्छ ब?” फिलिपले तइलाइ जबाफ दियो, “आइबर हेर।”

⁴⁷ येशूले नथानेललाइ आफना वाँ आउन्नारया धेकिबर तइका बारेमि भण्यो, “हेर एक जानो पक्‍का इस्राएल देशका मान्स, जइमि केइ छल आथिन।”

⁴⁸ नथानेलले सोध्यो, “तमले मलाइ कसेरी पछेण्या?” येशूले तइलाइ जबाफ दिइबर भण्यो, “फिलिपले तुलाइ बोलाउना हइ पइल्ली, अन्जिरको रुखका तल्तिर मइले तुलाइ धेकिराइ थ्या।”

⁴⁹ नथानेलले उनलाइ भण्यो, “गुरु, तम त परमेश्वरको चेलो हौ, तम इस्राएल देशका राजा हौ”।

⁵⁰ येशूले तइलाइ जबाफ दिबर भण्यो, “मइले तुलाइ अन्जिरको रुखका तल्तिर धेक्या भण्या हुनाले तु बिश्वास अरन्छइ? तुइले यिन भण्ना आँजीठुला कुरणी धेक्द्या हइ।”

⁵¹ पइ उनले तइलाइ भण्यो, “साँच्चि, म तुलाइ भण्नउ, तमनले स्वर्ग उगड्या रे परमेश्वरका स्वर्गदुतलाइ म, मान्सको चेलो मल्तिर उकल्लाइ रे ओरल्लाइ धेक्दे हउ।”