हिब्रु 9 - डोटेली नयाँ करार

मान्सनले बनाएइ पालामि आराधना

¹ पुरानो करारमी आराधना सम्बन्धि कानुन थ्या, रे मान्सनले बनाया आराधनाकि निउति एक पाल लगइ थ्यो।

² यो पाल पशुको छाला बठेइ बनाइया थ्यो। तइ पालका बिचमि, तिननले पर्दा झुण्डेइबर दुइ कोठा बनायाथ्यो। पहिलो कोठामी सात शाखा भया सामदान थ्यो। ताँ एक टेबल थ्यो जइमि परमेश्वरलाइ चढाइया रोटा थ्या। यइ कोठालाइ पबित्रस्थान भणिन्थ्यो।

³ पाल भितर पर्दा पछाडिको दोसरो कोठालाइ महापबित्र स्थान भणिन्थ्यो।

⁴ तइ कोठामी धुप बाल्लाइ सुनको बेदि राखिया थ्यो रे ताँ एक करारको सन्दुक लगइ थ्यो। जो भितर रे बाइर बठेइ सुनले बन्याथ्यो। तइ सन्दुकमि तीन चिज थ्या: मन्न राख्या सुनको भाँडो, कोपिला लाग्या हारुनकि लठ्ठी रे परमेश्वरले मोशालाइ दिया दस आज्ञाको दुइ शिला-पाटि।

⁵ सुनको सन्दुकका टुप्पामि करुब भणिन्या दुइ पखेटाका मुर्ति थ्या, जो यइ कुरणीको संकेत थ्यो कि परमेश्वर ताँ छन। तिनरा खुल्ला पखेटाले सन्दुकको मल्तिरको भागलाइ ढाक्न्छ जइमि रगत छर्किन्थ्यो ताकि मान्सनका पाप क्षमा होउन। तर हाम यिन सब कुरणीको अइल ब्याख्या अद्द सक्दाइन।

⁶ यिसेरी तिननले तिन सब चिज तइ पालको दुइ कोठामी तयार पाण्यो। रे यहुदि पुजारि प्रत्येक दिन आफ्ना रीतीतिथि अददाइ पइलो कोठामी जान्या अरनथ्या।

⁷ तर बर्षमि एक बेर मान्तर यहुदि प्रधान पुजारि महापबित्र ठाउँमि जान्या अरन्थ्या। जब उन भितर जान्थ्या, तब उनले आफसित जनावरको रगत लइजाइबर जान्थ्या। उनले तइ रगत आफ्ना पाप क्षमाकि निउति रे मान्सनले नजाणिबर अर्या पापकी निउति परमेश्वरलाइ चढाउन्या अरनथ्या।

⁸ परमेश्वरले पुजारि बठेइ चायाको काम बठेइ पबित्र आत्माले हामलाइ केइ कुरणी भण्नाहान। स्वर्गमि भया परमेश्वरको सत्य महापबित्र स्थान मान्सनकि निउति तब सम्म खुल्या आथिन, जबसम्म तइ पालको पइलो कोठा रे तइमि हुन्या सब कुरणी पालन अरिनाहान।

⁹ यइ बठेइ यो प्रस्ट हुन्छ कि परमेश्वरलाइ चडाया बलिमि मान्सनको हृदय सिद्द बनाउन्या सक्ति आथिन।

¹⁰ क्याकि तिनन बाहिरि जीवनका नियममि मान्तर आधारित छन, अथवा खान्या, पिउन्या रे बिभिन्न बिधिका इसनान। परमेश्वरले मान्सनसित नयाँ करार बाद्या पछा मान्तर यो पुरा हुनु आवश्यक थ्यो।

ख्रीष्टको रगत

¹¹ तर ख्रीष्ट यहुदि प्रधान पुजारि भइबर आइ सक्या छन, जइले याँ भया सब असल कुरणी दिनाहान। उन और माहान् रे सिद्द पालामि प्रवेश भया छन। यो मान्सले बनाया होइन रे यइ संसारको लगइ होइन।

¹² ख्रीष्टले स्वर्गमि भया महापबित्र ठाउँमि एकइ बेर सदाइकि निउति प्रवेश अर्यो। उनले आफसित बोक्या रे बाछ्छाको रगत लइजाइबर गएइन। उनरो बलि उनरो आफ्नोइ रगत थ्यो, रे यइ बठेइ उनले हामलाइ पाप बठेइ सदाइकि निउति छुटकारा दियो।

¹³ पुरानो कानुनमी बोक्या रे गोरुका रगत रे होमेको कोरेली बाछ्छाको छार रीतीतिथि अनसार असुद्द मान्सनमि छर्किन्या अरनथ्या। इसेरी तिनन बाहिरि रुपले सुद्द हुन्थ्या।

¹⁴ तर ख्रीष्ट पाप रहित थ्या, रे उनले आफइलाइ अनन्त रे आत्मिक बलिका रुपमि परमेश्वरलाइ चडायो। तबइकिलाइ उनरो रगत भौत सक्तिशाली छ रे हामरो बिबेकलाइ सुद्द बनाउन्छ। आब हाम जिबित परमेश्वरको सेवा अद्द सक्दाउ रे त्यो काम अद्द्या आथिनु, जइले मृत्यु तिर लइजान्छ।

¹⁵ तबइकिलाइ ख्रीष्ट नयाँ करारका मध्यस्थकर्ता हुन, उन मर्या हुनाले पइल्लिका करारमी भया बेला अर्या पाप बठेइ मान्सनलाइ छुटकारा दियो। तबइकिलाइ परमेश्वरले बोलाया मान्सनले उनले प्रतिज्ञा अर्या आशिस पाउनाहान, जो आशिस सदाइकि निउति रन्या हो।

¹⁶ हाम जाण्नाइ कि कसइ मान्सले मद्दा हइ अगाडी आफ्नो सम्पति कसलाइ दिन्या भणबर इच्छापत्र लेख्न्छ भण्या, उइको इच्छापत्र अनुसार हुनाइलाइ तइ मान्सको मृत्यु हुनु पणन्छ।

¹⁷ क्याकि सम्पतिको मालिक बाँचन्ज्या सम्म तइ इच्छापत्रको केइ महत्व हुनइन। त्यो मान्स मर्या पछा मान्तर तइ इच्छापत्रको महत्व हुन्छ।

¹⁸ तबइकिलाइ परमेश्वरले दिया पहिलो करारलाइ पक्‍का अददाइ निउति लगइ रगत बगाइया थ्यो।

¹⁹ तबइकिलाइ मोशाले कानुनको हरेक आज्ञा मान्सनलाइ भणि सक्या पछा उनले बाछ्छा रे बोक्याको रगत लइजाइबर पानीसित मिसायो। उनले रातो उनलाइ हिसपको बोटका हांगामि बाद्यो रे यइलाइ तइ रगतमि डुबाइबर कानुनका किताबमी रे सब मान्सनमि छर्किया।

²⁰ मोशाले यो अद्दा-अददाइ, उनले मान्सनलाइ भण्यो, “यइ रगतले करार पक्‍का अरन्छ, जो परमेश्वरले तमनलाइ पालन अद्दया आज्ञा दिया छ।”

²¹ तसेरि मोशाले पबित्र बासस्थानमी रे आराधनामी चलाइन्या सब भाँडामि तसेरि रगत छर्क्या।

²² मोशाको कानुनले भणन्छ कि प्राय सब थोकलाइ रगत छर्कीबर सुद्द बनाइन्छ, रे रगत नचडाइबर पाप क्षमा हुन सक्दइन, रगत चडाउनुले मृत्यु धेकाउन्छ।

²³ तबइकिलाइ संसारमी भया त्यो पाल रे यइमि भया सब कुरणी जनावरका रगतले चोख्याउनुइ पणन्थ्यो। यिन चिज स्वर्गमि भया चिजको नकल हो। तर स्वर्गमि भया सत्य चीजलाइ जनावरको रगत भण्ना और निको बलिले चोख्याउनुइ पणन्थ्यो।

²⁴ तबइकिलाइ ख्रीष्ट मान्सनले बनाया तइ महापबित्र ठाउँमि गएइन, जो सत्य कुरणीको नक्‍कल मान्तर हो। तर उन त सक्कलि ठाउँ स्वर्गमि गया, ताकि उन हामरो फाइदाकी निउति परमेश्वरकका अगाडी जान सकुन।

^25-26 यहुदि प्रधान पुजारि हरेक बर्ष पसु बलिको रगत लइजाइबर महापबित्र स्थान जान्या अददाहान। तर ख्रीष्ट त बेर बेरि आफइ बलि हुनाइ गयइन। यदि उनले इसो अददु पड्या भयाले, उनले संसारको सृष्टि भया बठेइ बेर बेरि दु:ख भोग्दु पडद्या थ्यो। बरु यिन आखिरी दिनमि, आफ्नो बलि बठेइ पापको सक्ति सदाइकि निउति हटाउनाइलाइ ख्रीष्ट एकइ बेर सबइकि निउति आया।

²⁷ हरेक मान्स एक बेर मद्दु पणन्छ। रे मर्या पछा परमेश्वरले हरेक मान्सको न्याय अद्दया हुन।

²⁸ तसेरि भौत मान्सनका पाप उठाइबर लइजानाइ ख्रीष्टले आफइलाइ एक बेर बलि अर्यो। रे उन दोसर्या लगइ आउन्याहुन। तइ बेला आफइलाइ पापकी निउति बलि अददाइलाइ होइन, तर उनरो बाटो हेरिबर बस्यालाइ बचाउनाइ आउन्याहुन।