हिब्रु 7 - डोटेली नयाँ करार

^1-3 यिनइ मल्कीसेदेक पुजारि शालेम सहरका राजा रे सर्वोच्च परमेश्वरका पुजारि थ्या। उनरो नाउको अर्थ “न्यायसित राज्य अद्द्या राजा” हो, रे शालेमको राजाको अर्थ “सान्तिका राजा” हो। पबित्र सास्त्रमि उनरो बा, उनरी इजा, रे उनरा पुर्खा अथवा उनरो जन्म, अथवा उनरो मृत्युको बारेमि केइ कुरणी लेखिया आथिन। उन सदाइकि निउति पुजारि छन। तबइकिलाइ उन परमेश्वरको चेलो जसा छन। जब अब्राहाम चार राजालाइ मारिबर आउनाथ्या, तब मल्कीसेदेकको उनसित भेट भयो रे आसिर्बाद दियो। रे अब्राहामले युद्द बठेइ जितिबर पाया सब चिजको दशांश दियो।

⁴ आब बिचार अर पइ, मल्कीसेदेक कसा माहान बैकान थ्या, जइलाइ हामरा पुर्खा अब्राहामले युद्द बठेइ जित्या सब चिजको दशांश दियो।

⁵ मोशाको कानुनले यो कुरणी सिकाउनाहान कि लेविका बंस जो पुजारि छन, तिननले और इस्राएल देशका मान्सन बठेइ दशांश लिनु पणन्छ, जो तिनरा आफ्नाइ मान्सन हुन। तर तिनन पुजारि रे और मान्सन भाइन जसाइ हुन, क्याकि तिनन सब अब्राहामका सन्तान हुन।

⁶ तर यो मान्स मल्कीसेदेक, जो लेवि बंशको लगइ थेइन, उइले अब्राहाम बठेइ दशांश लिया हो, रे परमेश्वरको करार पाउन्या अब्राहाम भया लगइ मल्कीसेदेकले अब्राहामलाइ आसिर्बाद दिया हुन।

⁷ हाम यो पक्‍का जाण्नाउ कि आसिर्बाद दिन्या आसिर्बाद पाउन्या भण्ना ठुलो हुन्छ।।

⁸ पुजारिन जइले दशांश पाउनाहान, तिनन मरिबर जान्या मान्सन मान्तर हुन, तर अब्राहाम बठेइ दशांश पाया मल्कीसेदेक सदाइकि निउति जिउना छन, जसेरि पबित्र सास्त्रमि लेख्या छ।

^9-10 जब अब्राहामले मल्कीसेदेक पुजारि लाइ दशांश दियो, तइ बेला सम्म लेवि अब्राहामको परिबारमि जन्मया थेइन। पइलगइ अब्राहामका सन्तान भए हुनतक, यो लेवि आफइले मल्कीसेदेक पुजारि लाइ दशांश दिया जसो हो।

येशू मल्कीसेदेक जसाइ

¹¹ मान्सनलाइ पुजारि को चलनको आधारमी कानुन दिन्या अरिनथ्यो, जो हारुनको बंस बठेइ लेवि कुलका थ्या तर तिनन तइ चलन बठेइ सिद्द हुन सकेइन। तबइकिलाइ अर्खो पुजारि आउनु आवश्यक थ्यो, त्यो पुजारि हारुन जसो होइन तर मल्कीसेदेक पुजारि जसोइ हुनु पणनथ्यो।

¹² क्याकि जब पुजारि छान्या नियम बद्लिन्छ, तब कानुन लगइ बद्लिनुइ पणन्छ।

¹³ हामले यिन कुरणी ख्रीष्टका बारेमि भण्नाछु, जो अर्खा कुलका थ्या। तइ कुल बठेइ कसइले लगइ कभइ बेदिमि पुजारिको रुपमि सेवा अर्या थेइन।

¹⁴ क्याकि सबलाइ था छ कि हामरा प्रभु येशू यहूदाको बंस हुन, रे मोशाले यहूदाका कसइ बंस लगइ यहुदि पुजारि बन्नया कुरणिका बारेमि केइ भणेइन रे यहूदाका कोइ लगइ बंस कभइ पुजारि भया आथिन।

¹⁵ तबइकिलाइ आब हाम और नीकेरि बुज्न सक्दाउ कि मोशाको कानुन रे पुजारि साटिया छन, क्याकि हामरा प्रधान पुजारि आया छन, जो मल्कीसेदेक पुजारि जसाइ हुनु।

¹⁶ येशू लेविको बंस भया नियम कानुन अनसार पुजारि भया होइन। तर उन आफना जीवनको सक्तिका लाग्दा पुजारि बन्या जइको कभइ अन्त हुनइन।

¹⁷ क्याकि पबित्र सास्त्रमि परमेश्वरले उनरा बारेमि गवाही दिनाहान, “मल्कीसेदेक पुजारि भया जसेरि तु सदाइ भरिकि निउति पुजारि हइ।”

¹⁸ क्याकि पुरानो कानुन केइ अद्द नसक्द्या रे काम नलाग्द्या भया हुनतक खारेज अरिया छ,

¹⁹ क्याकि मोशाको कानुनले त केइलगइ सिद्द पाड्ड सकेइन। रे हामसित एक असल आसा छ, त्यो आसा येशू ख्रीष्ट हुनु, जइले हामलाइ परमेश्वरको नजिकै पुर्याउनाहान।

²⁰ रे परमेश्वरको करार अनसार येशूलाइ पुजारि बनाया हो।

²¹ लेविका बंशलाइ भण्या परमेश्वरले कसम खाइबर यहुदि पुजारि बनाया होइन, तर येशूलाइ कसम खाइबर पुजारि बनाया हो, रे उनरो बिसयमि परमेश्वर भण्नाहान, “म परमेश्वरले कसम खाया छु, रे म आफ्नो मन कभइ बदल्ल्या आथिन, तु सदाइकि निउति पुजारि हइ।”

²² तबइकिलाइ येशूइले यो उत्तम करारलाइ सम्भब बनाउनाहान।

²³ येशू पुजारि भया अर्खो फाइदा भण्या पइल्लिका यहुदि पुजारिले आफ्ना काम लगातार अद्द सकेइन, क्याकि तिनन हरेक जाना मरिबर गया। तबइकिलाइ पइल्लिका पुजारि को सङ्‍ख्‍या भौत भयाथ्यो।

²⁴ तर येशू अनन्त भया हुनाले उन सदाइकि निउति पुजारि हुन।

²⁵ तबइकिलाइ येशू बठेइ परमेश्वरका नजिक आउन्यालाइ उनले सदाइ बचाउन सक्दाहान। क्याकि तिननकी निउति मद्यस्थताको प्रार्थना चडाउनाइ उन सदाइ जिउना रनाहान।

²⁶ येशू हामलाइ चाइयाको यहुदि प्रधान पुजारिका राजा हुन। उन पबित्र, निर्दोष, सुद्द रे परमेश्वरले उनलाइ पापी मान्सन बठेइ छुटाइबर सब भण्ना मल्तिर स्वर्गमि बसायो।

²⁷ रे हारुनको बंशका यहुदि प्रधान पुजारिले जसेरि पइल्ली आफ्नाइ पापकी निउति रे तइ पछा मान्सनका पापकी निउति येशूले दिन दिनइ बलिदान चडाइ राख्दु पड्डइन। मान्सनका पापका निउति आफइलाइ बलिका रुपमि अर्पण अरिबर येशूले यो काम सदाइकि निउति एकइ बेर पुरा अरिदिय।

²⁸ क्याकि मोशाको कानुनले दुर्बल मान्सनलाइ यहुदि मुख्य पुजारि नियुक्त अरन्छ, तर मोशाको कानुन भण्ना पछा आउन्या कसमले परमेश्वरको चेलोलाइ प्रधान पुजारि नियुक्त अर्याथ्यो। रे उन सदाइकि निउति सिद्द प्रधान पुजारि भया छन।