हिब्रु 3 - डोटेली नयाँ करार

मोशा भण्ना येशू माहान

¹ तबइकिलाइ परमेश्वरले स्वर्गमि उनसित सहभागी हुनाइलाइ बोलाया बिश्वासि भाइन हो, येशूमि मन ला, जो हामरा निउति परमेश्वरका राजदुत रे यहुदि प्रधान पुजारि छन।

² येशूले परमेश्वर बठेइ दिया सब काम अर्यो, तसेरि मोशाले परमेश्वर बठेइ दिया सब काम बिश्वासयोग्यसित पुरा अर्यो।

³ जसेरि घर भण्ना घर बनाउन्याले भौत सम्मान पाउछ। तसेरि मोशा भण्ना येशू भौत ठुलो सम्मानको योग्य छन।

⁴ क्याकि हरेक घर कसइ न कसइ मान्स बठेइ बनाइया हुन्छ, तर सब थोक बनाउन्या त परमेश्वरइ हुन।

⁵ मोशा परमेश्वरका घरका सब मान्सनसित नौकरका रुपमि बिश्वासयोग्य भया, रे मोशाले अर्याको कामइ परमेश्वरले भविष्यमी बोल्या सत्य कुरणीको सत्य उदाहरण थ्यो।

⁶ तर ख्रीष्ट भण्या परमेश्वरका घरका मान्सनसित चेलोका रुपमि बिश्वासयोग्य थ्या। यदि हाममि साहस रे हामरा आसामि भरोसा छ भण्या जो ख्रीष्ट बठेइको हो, तब हाम परमेश्वरका मान्सन हौ।

अविश्वासका बिरुद्दमि चेताउनी

⁷ तबइकिलाइ परमेश्वरले पबित्र आत्मा बठेइ पबित्र सास्त्रमि भण्नाहान, “आज तमनले परमेश्वरको आवाज सुण्या भण्या,

⁸ उजाड ठाउँमि परिक्षाका बेलामि तमरा पुर्खाले परमेश्वरको बिरोध अर्या जसो उनरो आज्ञापालन अद्द इन्कार जन अर,

⁹ ताँ तमरा पुर्खाले मलाइ नपत्तेइबर मेरो परिक्षा अर्यो, जबकि चालिस बर्ष सम्म मेरा अचम्मका काम धेक्याथ्यो।

¹⁰ तबइकिलाइ तइ पुस्तासित म भौत रिसाया, रे भण्या, ‘तिननले मलाइ अस्वीकार अर्या छन, तिननले मइले दिया काम अददाइ इन्कार अर्या छन।’

¹¹ तबइकिलाइ मइले आफना रिसमि यिसेरी कसम खाया, ‘मइले बिश्राम दिन्या ठाउँमि तिनन कभइ पस्स्या आथिन।’”

¹² बिश्वासि भाइन हो, होस अर्या, तमनमि हइ कसइमी भया दुष्ट रे अबिश्वासी हृदयले तमनलाइ जीवन दिन्या परमेश्वरलाइ इन्कार जन अरउ।

¹³ जबसम्म पबित्र सास्त्रमि “आजका दिन” भण्नया सब्द छ, तब सम्म हरेक दिन एकले अर्खालाइ हौसला दिय। पापले तमनलाइ धोका जन देउ रे तमन हठी जन होउ।

¹⁴ यदि हामले हामरो पइल्ली अर्या बिश्वासमि हाम छाड्डीबार सम्म बलिया भया भण्या हाम ख्रीष्टसित सज्जा हकदार हुन्या हौ।

¹⁵ जसेरि पबित्र सास्त्रमि लेखिया छ, “आजइ तमनले परमेश्वरको आवाज सुण्या भण्या तमरा पुर्खाले परमेश्वरको बिरोध अर्या जसो, उनरो आज्ञापालन अद्द इन्कार जन अर।”

¹⁶ कइले परमेश्वरको आवाज सुणिबर लगइ उनरो बिरोध अर्यो? तिनन इजरायल देशका मान्सन हुन, जइलाइ मोशाले मिश्र देस बठेइ निकलिबर लेयाथ्या।

¹⁷ चालिस बर्ष सम्म परमेश्वर तिन मान्सनसित रिसाया, जइले पाप अर्याथ्यो रे उजाड ठाउँमि मरिबर गया।

¹⁸ जब परमेश्वरले कसम खाइबर यो घोषणा अर्यो कि तमन मइले दिन्या बिश्रामका ठाउँमि पस्स पाउन्या आथिनु, उनले तिन मान्सनका बारेमि भण्नाथ्या, जइले उनरो आज्ञापालन अद्द बठेइ इन्कार अर्याथ्यो।

¹⁹ यइ बठेइ हामले था पायाछौ कि बिश्वास नअर्या हुनाले तिननले बिश्रामको ठाउँमि पस्स पाएइन।