हिब्रु 13 - डोटेली नयाँ करार

¹ प्रभुका अनुयायीले अद्द्या एक अर्खाको हेरबिचार अरि राख।

² याद अर परदेशिलाइ लगइ पाउनाको सत्कार अददु पणन्छ, क्याकि यिसेरी कसइ-कसइले था नपाइबर स्वर्गदुतको सत्कार अरिराइछ।

³ आफइ लगइ तिननसित कैदमी पड्या जसेरि झेलमि हुन्याको बिचार अर, रे आफ सतावटमी पण्या मान्सन जसेइ तमन तिनरा पिडा आफना सरीरमि अनुभव अरन्छौ।

⁴ ब्या सब बठेइ आदरणीय होउ, रे एक अर्खा प्रति बिश्वासयोग्य बनीराख, क्याकि दुराचारी रे ब्यभिचारीको इन्साफ परमेश्वरले अद्दया हुन।

⁵ आफ्नो जिवनलाइ धनको मोह बठेइ मुक्त राख। तमनसित भएइ कुरणीमि सन्तुष्ट बस, क्याकि परमेश्वर आफइले भणिराइछ, “म तमनलाइ कभइ छाड्ड्या आथिन, रे म तमनलाइ कभइ त्याग्द्या आथिन।”

⁶ तबइकिलाइ साहससित हाम भण्नाउ, प्रभु मेरा सहायक छन, म डराउन्या आथिन। कसइ मान्सनले मलाइ क्याद्द सक्दाहान रे?

⁷ आफना अगुवाको सम्जना राख, जइले परमेश्वरको बचन तमनलाइ सुणायो। कसेरी तिननले आफ्नो जीवन बितायो रे मृत्यु सम्मलगइ बिश्वासयोग्य रया, रे तसोइ बिश्वास धेका जसो बिश्वास परमेश्वरमि तिननले धेकायाथ्यो।

⁸ येशू ख्रीष्ट बेलि, आज रे सदासर्वदा एकनासका छन। उन कभइ बदलिनाइन।

⁹ हामले यो सब नयाँ रे फरक शिक्षाका पछाडी लाग्दु हुनइन, जइले ननिका बाटामि लइजान्छ। खान्या कुरणिका बारेमि नियमलाइ माणिबर होइन, परमेश्वरको अनुग्रह बठेइ तमरा हृदय बलियो होउ। इसा बिधि पालना अद्द्या उपकार भया आथिन।

¹⁰ हामसित पाल छ जइ बठेइ बेदिमि भया पुजारिले खान्या अधिकार आथिन।

¹¹ पइलो करार अनसार प्रत्येक बर्ष यहुदि प्रधान पुजारिले पापबलिका निउति जनावरको रगत महा-पबित्रस्थानमि पापको क्षमाका निउति तइलाइ ल्याउनाहान, तर तिनरा शरीर सिबिर बाइर लइजाइबर पोल्दिनाहान।

¹² तबइकिलाइ येशूले लगइ उनरो आफनाइ रगत बठेइ मान्सलाइ पबित्र अराउनाइ यरुशलेम सहर भण्ना बाइर उनले कष्ट भोग्यो रे मर्या।

¹³ तबइकिलाइ हाम लगइ सिबिर बाइर उनरा वाँ जानाउ, रे जसेरि उनले अनादर सहयो तसेरि हाम लगइ अनादर सहउ।

¹⁴ क्याकि यो संसार हामरो स्थाइ घर होइन, तर आउन्या सहरको हाम प्रतिक्षा अद्दाउ।

¹⁵ तबइकिलाइ आस हाम परमेश्वरलाइ येशू बठेइ लगातार हामरा परमेश्वरको नाउको महिमाको घोषणा अददाइ प्रसंसाको बलिदान चढाऔ। यो उनमी भया हामरो बिश्वास स्वीकार अद्दाइ हामरा मुख बठेइ आउन्या प्रसंसा हो।

¹⁶ भलाइ अद्द रे आफसित भया कुरणी आवश्यकतामि पण्यालाइ बाँडचुड अद्द जनबिसर, क्याकि यिसाइ बलिमि परमेश्वर भौत खुशी हुनाहान।

¹⁷ तमरा अगुवाको आज्ञा पालना अर, रे तिनरा अधिनमी बस। क्याकि तिनरो काम तमरो आत्माको पहरा दिनु हो। तिननले तमरा बारेमि परमेश्वरलाइ लेखा दिनु पड्डया हो। तिनरो आज्ञापालन अर ताकि यइ काम तिननले आनन्दसित अरुन। उदास भइबर होइन, तब तमनले केइ फाइदा पाउन्या होइनु।

¹⁸ हामरा निउति प्रार्थना अर। हामलाइ निश्चय था छ कि हामरो बिबेक स्वच्छ छ, रे हामले अद्दया सब कुरणीमि हाम परमेश्वरलाइ आदर दिन चाहानाउ।

¹⁹ तमनलाइ मेरो बिसेस आग्रह यो छ, कि मेरा निउति प्रार्थना अरिदिय, रे म आजी तमरा वाँ छँटाइ आउन सकु।

^20-21 रे आब, सान्तिका परमेश्वर, जइले प्रभु येशूलाइ मर्या बठेइ जिउना बनायो, उनरो इच्छा पुरा अददाइ निउति तमनलाइ चाइन्या सब कुरणी बठेइ सुसत्जित पाड्डया हुन। उनलाइ मन पड्डया सब कुरणी येशू ख्रीष्टको सक्ति बठेइ तमनमि उत्पन्न अराउन्या हुन। येशूइ असल ग्वाला हुन भणन्या कुरणी अनन्त करारको चिनो उनरो रगत बठेइ धेकाउनछ। उनइलाइ सदासर्वदा महिमा मिलउ। आमेन।

²² बिश्वासि भाइन हो, म तमनलाइ निबेदन अद्दउ, कि मइले लेख्या यो उत्साहको सन्देसलाइ धैर्यसित सुण, क्याकि तमनलाइ मइले छोटकरीमी लेखिराइछु।

²³ तमनलाइ यो था दिन चाहानौ, कि हामरो साथी तिमोथी कैद बठेइ छुटिरइछ। यदि उ छँटाइ आयो भण्या म उइसित तमनलाइ भिट्टाइ आउन्या हु।

²⁴ तमरा सब अगुवान रे सब परमेश्वरका मान्सनलाइ अबिबादन दिय। इटालिया प्रदेस बठेइ आया बिश्वासीनले तमनलाइ अबिबादन पठाइराइछन।

²⁵ तमन सबसित परमेश्वरको अनुग्रह रइजाउ। आमेन।