हिब्रु 11 - डोटेली नयाँ करार

बिश्वासका उदाहरण

¹ आब बिश्वास आसा राखिया कुरणीको निश्चय रे नधेकिएइ कुरणीको पक्‍का भरोसा हो।

² हामरा पुर्खाले इसो बिश्वास अर्याथ्या। तबइकिलाइ परमेश्वर तिननसित प्रसन्न थ्या भणबर धेकायो।

³ बिश्वास बठेइ हाम बुज्जाउ कि संसार परमेश्वरको बचन बठेइ बन्यो, हामले धेक्द सक्द्या थोक बनाउनाइ परमेश्वरले नधेकिन्या कुरणी प्रयोग अर्यो।

⁴ बिश्वास बठेइ आदमको चेलो हाबिलले परमेश्वरलाइ आफ्नो दाइ कयिन भण्ना और ग्रहणयोग्य बलि चडायो, रे तसइ बलि बठेइ परमेश्वरले हाबिललाइ धर्मि मान्सका रुपमि ग्रहण अर्यो। हाबिलले चडाया बलि बठेइ परमेश्वर प्रसन्न भया भणबर धेकायो। रे हाबिल मर्या लगइ परमेश्वरमि बिश्वास अद्द्या बारेमि अइल लगइ उनले हामलाइ सिकाउनाहान।

⁵ हनोक नाउ अर्या मान्सका बिश्वास बठेइ परमेश्वरले तिनलाइ जिउनोइ स्वर्ग उठाइ लइया रे उन मरेइन। तबइकिलाइ कसइले लगइ तिनरो मर्या शरीर भेट्टाएइन। स्वर्गमि उठाइ लइजानाहइ पइल्ली हनोकले परमेश्वरलाइ प्रसन्न बनायो, इसेरि पबित्रशास्त्रमी लेख्या छ।

⁶ उनमी बिश्वास अर्या मान्तर हामले परमेश्वरलाइ प्रसन्न बनाउन सक्दाउ। क्याकि परमेश्वरका वाँ आउन्याले बिश्वास अददु पणन्छ कि परमेश्वर छन रे साच्ची उनरो खोजी अद्द्यालाइ उनले इनाम दिन्या हुन।

⁷ बिश्वास बठेइ नोआ नाउ भया मान्सले कभइ नधेक्या बाढीका बारेमि परमेश्वर बठेइ चेताउनी पाया पछा उनरो आज्ञापालन अरिबर आफ्नो परिवारलाइ बचाउनाइ एक ठुलो जहाज बनायो। रे नोआको बिश्वास भणना पइल्ली, और बिश्वास नअद्द्या मान्सन दोषि ठहरिया, रे बिश्वास बठेइ परमेश्वरले नोआलाइ धर्मि घोषणा अर्यो।

⁸ बिश्वास बठेइ अब्राहाम भणन्या मान्सले परमेश्वरले बोलाया बेला आज्ञापालन अर्यो, जा भण्या ठाउँ तिर गया, जइ ठाउँ, परमेश्वरले उत्तराधिकारका रुपमि उनलाइ पछा दिन्या थ्या, काँ जान्ना छु भणन्या था नपायइ उन आफ्नो देस छाडिबर हिट्या।

⁹ परमेश्वरले बाचा अर्या ठाउँमि अब्राहाम परदेशी जसेरि पाल टाँङिबर बस्या। अब्राहाम सितइ उनरो चेलो इसहाक रे नाति याकुबले लगइ परमेश्वर बठेइ तेइ प्रतिज्ञा पायो रे तसेरि पाल टाँङिबर बस्या।

¹⁰ क्याकि उन सदाइ रन्या जगमि बन्या सहरमि रनाइ पख्याथ्या, जइलाइ बनाउन्या रे निर्माण अद्द्या परमेश्वरइ थ्या।

¹¹ विश्वासइ बठेइ अब्राहामकी स्वानी साराले लगइ आफ्नो उमेर ढल्या पछा गर्भधारण अद्द्या योग्यता पाइन। क्याकि परमेश्वरले आफ्नो बाचा पुरा अद्द्या हुन भणबर साराले बिश्वास अरेइथिन।

¹² बच्चा पाउनाइ भौत बुढो भइ सक्या अब्राहाम बठेइ अग्गासका तारा जति असंख्य रे समुद्रका किनारका अनगिन्ती बालुवाका कण जति सन्तान भया।

¹³ यिन सब परमेश्वरमि बिश्वास अद्द्या मान्सन परमेश्वरले प्रतिज्ञा अर्या कुरणी नपाइबर मर्या। तर तिनन परमेश्वरले भविष्यमी अद्द्या काम बुजिबर खुशी भया, रे तिननले यो लगइ बुज्यो कि तिनन यइ पृथ्वीमि परदेशी रे शरणार्थी हुन।

¹⁴ यिसा कुरणी भण्न्या मान्सले यो प्रष्टै धेकाउनाहान कि तिनन आफ्ना निउति एक देस खोज्जा छन, जो तिनरो हुन्या हो।

¹⁵ जइ देस बठेइ तिनन निकलिबर गयाथ्या, तिननले तसइ देशका बारेमि सोचेइन, नतित तिननलाइ फर्कन्या मौका मिल्लेइथ्यो।

¹⁶ तर तिनन और निका देस, त्यो भण्या एक स्वर्गीय देशको इच्छा अद्दाहान। तबइकिलाइ म तिनरा परमेश्वर हु भण्नाइ परमेश्वर गर्व अद्देइथ्या, क्याकि उनले तिनरा निउति एक सहर तयार बनाइराइछ।

¹⁷ बिश्वास बठेइ आफ्नो परिक्षा हुन्ज्या अब्राहामले आफ्नो चेलो इसहाकलाइ बलि चडायो। रे परमेश्वरले अब्राहाम सितइ बाचा अर्याथ्यो, पइलगइ आफ्नो एकइ चेलाकि बलि चडाउनाइ उन तयार भया।

¹⁸ परमेश्वरले उनलाइ भण्याथ्यो, “मइले प्रतिज्ञा अर्या अनसार इसहाक बठेइ तेरो बंस बड्डया हो।”

¹⁹ परमेश्वरले मान्सलाइ मर्या बठेइ आजी जिउना बनाइ सक्दाहान भण्नेइ कुरणी अब्राहामले सोच्यो, रे एक किसिमले, उनले इसहाकलाइ मर्या बठेइ जिउनो भया जसोइ आजी पायो।

²⁰ बिश्वास बठेइ इसहाकले आफ्ना दुइ चेला याकुब रे एसावलाइ प्रतिज्ञा अर्या भबिष्यका आशीषका बारेमि आसिर्बाद दियो।

²¹ बिश्वास बठेइ मद्द्या बेलामि याकुबले योसेफका दुइ चेलालाइ आसिर्बाद दियो रे आफना लठ्ठीमि अडिबर परमेश्वरको आराधना अर्यो।

²² बिश्वास बठेइ योसेफले मद्द्या बेला निर्धक्‍क भइबर इस्राएलीले मिश्र देस छाड्डया बारेमि भण्या थ्यो, रे मिश्र देस छाडिबर जान्ज्या उनले तिननलाइ आफ्नो हड्डी लगइ सङइ लैजानाइ भण्या थ्यो।

²³ जब मिश्र देशका राजाले इस्राएलीका चेलालाइ जन्मन्जेइ मद्द्या आदेस दियो, तब विश्वासइ बठेइ मोशा जन्मन्ज्या तिनका इजा बाले तिनलाइ तीन महिना सम्म लुकाइ राख्यो। रे तिननले आफ्नो बालक खास धेकिबर तिननले राजाको आदेस नमाण्या लगइ डर माणेइन।

²⁴ मिश्र देशका राजाकि चेलिले मोशालाइ पालेइ हुन। मोशा ठुलो भया पछा, विश्वासइ बठेइ उनले सोचेइन कि मान्सनले उनलाइ राजकुमारीको चेलो भणुन।

²⁵ एक बेरको पापको सुख भोग्दा हइ बरु परमेश्वरका मान्सनसित दुःख भोग्दाइ मोशाले रोज्यो।

²⁶ मिश्र देशको धन-दौलत भण्ना ख्रीष्टको निउति निन्दित हुनाइ तइले किमति सम्पत्ति माण्यो। क्याकि तइले आफ्नो इनाम पाउन्या बाटो हेरिराइथ्यो।

²⁷ राजाकि रिससित नडराइबर विश्वासइ बठेइ तइले मिश्र देस छाड्यो। क्याकि तइलाइ थाथ्यो कि परमेश्वर नधेकिया लगइ उइसित हिट्टाहान।

²⁸ विश्वासइ बठेइ मोशाले इस्राएलका मान्सनलाइ निस्तार काजबार माणन्या रे ढोकामि बलिको रगत छर्किन्या आज्ञा दियो, ताकि परमेश्वरले पठाया जेठा माद्द्या मृत्युदुतले इस्राएलीका जेठालाइ जनमारौ।

²⁹ विश्वासइ बठेइ ओबानो जमिनमी जसोइ अरि हिटिबर इस्राएलका मान्सनले लाल समुद्र पार अर्यो, तर मिश्र देशका मान्सन भण्या तसेरि समुद्र तद्दाइ अरन्ज्या डुबिबर मर्या।

³⁰ क्याकि इस्राएलका मान्सनले बिश्वास अर्या हुन्तक सात दिन सम्म यरिहो गाउँको पर्खालका बरिपरी चक्कर लाइराख्यो तइ पछा पर्खाल ढल्यो।

³¹ बिश्वासइका भरमि राहाब बेश्या परमेश्वरको आज्ञा नमाणन्या सित नास भइन, क्याकि लुकीबर यरियो सहरमि हेद्दाइ गया इस्राएलका जासुसलाइ तिनले स्वागत अरेइथिन।

³² यइ हइ बड्ता मइले भण्नु जरुरत आथिन। क्याकि गिदोन, बाराक, शिमशोन, यिप्ता, राजा दाउद, शमुएल अगमबक्ता जसा मान्सन रे अगमबक्ताका बारेमि भणिराख्दाइ मसित समय आथिन।

³³ विश्वासइ बठेइ तिननले राज्य कब्जा अर्यो, रे न्यायसित राज्य अर्यो, परमेश्वरले प्रतिज्ञा अर्या कुरणी लगइ पायो, सिंहले तिननलाइ खाएइन,

³⁴ आगाले तिननलाइ पोलेइन, तरबारले तिननलाइ काटेइन, तिनन कमजोर थ्या तर आब बलियो भया, युद्दमि बीर भया, रे तिननले आफ्नो सत्तुरका फौजलाइ भगायो।

³⁵ केइ स्वानिले आफ्ना प्यारा मान्सलाइ मर्या बठेइ जिउना पायो। कति मान्सन त कुटाइ खाइबर मर्या, तर आफ्नो बिश्वास त्याग्द चाएइन, ताकि तिननले मर्या बठेइ जिउना भइबर और निको जीवन पाउन सकुन।

³⁶ केइ मान्सनले गिल्ला सनु पण्यो, कोर्रा खानु पण्यो रे बाँधिबर कैदी हुनुपण्यो।

³⁷ तिनन मध्य कसइलाइ ढुङाले हाणिबर मार्यो। औरलाइ आरिले चिरिबर दुइ टुकरामि काट्यो, औरलाइ तरबारले मार्यो। और गरिब थ्या, रे तिननलाइ कष्ट दियो रे तिननसित ननिका ब्यबहार अर्यो। रे तिनन भेडा रे बाकराका छाला लाइबर इथउथ डुल्लाइ हिटनथ्या।

³⁸ यो ननिको संसार तिनन बिश्वासीनका निउति योग्यको थेइन। मरुभुमि, पहाड, गुफा रे पृथ्‍विका ओराड मणि तिननले घुमिबर हिट्टु पण्यो।

³⁹ तिनन सबले बिश्वास अर्या हुनाले परमेश्वर तिननसित प्रसन्न थ्या। तर परमेश्वरले तिननलाइ प्रतिज्ञा अर्या कुरणी तिननले पाएइन।

⁴⁰ परमेश्वरले हामलाइ केइ असल कुरणी दिन्या योजना अर्याछ, ताकि तिनन हामसित मान्तर सिद्द बन्न सकुन।