प्रेरित 8 - डोटेली नयाँ करार

शाउलले मण्डलिलाइ सतावट अर्या

¹ स्तिफानसका हत्यामि शाउल लगइ सहमत थ्या। तसइ दिन यरुशलेम सहरमि भया मण्डलिका बिरोधमी ठुलो सतावट सुरु भयो, रे येशू ख्रीष्टका छान्या शिष्या बाहेक तिनन सब यहुदिया जिल्ला रे सामरिया जिल्लातिर छरिया।

² कोइ भक्त बैकान जो परमेश्वरको आदर अरन्थ्या, उनले स्तिफनसलाइ लैजाइबर चिहानमि गाण्यो, रे तिनरि निउति ठुलो बिलउना अर्यो।

³ तर शाउलले मण्डलिलाइ नास अद्दाथ्या, तिन घर-घर पसिबर बिश्वासि बैकान रे स्वानी मान्सनलाइ घसाणीबर लैजान्थ्या रे झेल हाल्दिन्थ्या।

सामरिया जिल्लामि फिलिप

⁴ तर छरिया बिश्वासीले चारै तिर गइबर बचन प्रचार अर्यो।

⁵ तर फिलिप सामरिया जिल्लाको एक गाउँमी गइबर तिननलाइ ख्रीष्टको प्रचार अर्यो।

⁶ फिलिपले भण्या बचन सुणिबर तइले अर्या अचम्मका काम धेकिबर, भीड़ले एकै मनका होइबर तइकि कुरणीमि ध्यान दिइबर सुण्यो।

⁷ जब फिलिपले आज्ञा दियो, तब भौत जाना बठेइ भूत जोरले कला हालिबर निकल्ल पस्या, भौत जाना झाण्नो पड्या, बिमारी रे डुणा मान्सन लगइ निका भया।

⁸ यिसेरी तइ सामरिया जिल्लाको गाउँका मान्सन भौत खुशी भया।

सिमोन जादुगर

⁹ सिमोन नाउँ भया एक जानो मान्स ताँ थ्यो। तइले पइल्ली बठेइ तइ गाउँमी जादु धेकाइबर सामरिया जिल्लाका मान्सनलाइ अचम्म पाडीराइथ्यो, रे आफइलाइ मइ ठुलो हु भणि सोचन्थ्यो।

¹⁰ तइ जादुगर मान्सलाइ नाना बठेइ ठुला सम्म मान्सनले यिसो भणि माणन्थ्या, “यो मान्स देबताको त्यो सक्ति हो, जइलाइ महासक्ति भणिन्छ।”

¹¹ तिनन तइलाइ माणन्थ्या, क्याकि भण्या भौत बेला बठेइ तइले आफना जादुगरिले मान्सनलाइ अचम्म पाड़िराइथ्यो।

¹² तर जब तिननले परमेश्वरको राज्य रे येशू ख्रीष्टको नाउँको सुसमाचार सुणाउन्या फिलिपका सन्देश सुण्यो, रे तिननले बिश्वास अर्यो, तब सब बैकान रे स्वानी मान्सनले बप्तिस्मा लियो।

¹³ सिमोन आफइले लगइ फिलिपका सन्देशमि बिश्वास अर्यो। तइले बप्तिस्मा लियो, रे त्यो फिलिपसित हिट्ट लाग्यो, चिन्ह रे ठुला-ठुला अचम्मका काम अर्या धेकिबर तइलाइ अचम्म लाग्यो।

¹⁴ सामरिया जिल्लाका मान्सनले परमेश्वरको बचन ग्रहण अर्यो भण्न्या सुणिबर यरुशलेम सहरमि रया येशू ख्रीष्टका छान्या शिष्याले पत्रुस रे यूहन्नालाइ तिनरा वाँ पठायो।

¹⁵ उन ताँ आइबर तिननले पबित्र आत्मा पाउन भणबर तिनरा निउति प्रार्थना अर्यो।

¹⁶ क्याकि तइ बेला सम्म तिननमि हइ कसइमी लगइ पबित्र आत्मा आया थेइन। तिनरो बप्तिस्मा प्रभु येशूका नाउँमि मान्तर होइरइथ्यो।

¹⁷ तब पत्रुस रे यूहन्नाले आफना हात प्रभुमि बिश्वास अर्या तिन मान्सनमि राख्यो, रे तिननले पबित्र आत्मा पायो।

¹⁸ आब छान्या शिष्या पत्रुस रे यूहन्नाले हात राखइज्य्या पबित्र आत्मा पाइन्यारइछ भण्न्या धेकिबर सिमोनले तिननलाइ रुप्या दिनाइ लेयो,

¹⁹ रे भण्यो, “मलाइ लगइ यइ सक्ति दिय रे मइले जइमि लगइ हात राख्यो तइले पबित्र आत्मा पाउन सकुन।”

²⁰ पइ पत्रुसले भण्यो, “तेरा रुप्या तुइसित नास होउन, क्याकि परमेश्वरको बरदान रुप्याले किन्न सकिन्छ भणि तुइले बिचार अरि।

²¹ यइ सेबकाइ न त तेरो केइ भाग छ न हिस्साइ छ, क्याकि परमेश्वरका अगाडी तेरो मन ठीक आथिन।

²² तबइकिलाइ तेरो आफ्नो यइ दुष्टताका निउति पाप अद्द छाडिबर परमेश्वरतिर फर्क पइ प्रभुमि प्रार्थना अर रे सायद परमेश्वरले तेरो मनको खराब बिचारलाइ क्षमा अद्द्या हुन।

²³ पाप अद्द छाडिबर परमेश्वरतिर फर्क क्याकि तु भौत डाहले भरिरइछइ रे पापका बन्धनमि छइ।”

²⁴ तब सिमोनले भण्यो, “तमनइ मेरा निउति प्रार्थना अरिदिय, रे तमनले भणेइ केइ कुरणी लगइ ममि जन आउ।”

²⁵ तिननले गवाही दिइसक्या पछा रे प्रभु येशूको बचन बोलिसक्या पछा सामरि मान्सनका भौत गाउँमी सुसमाचार प्रचार अद्दा-अद्दाइ तिनन यरुशलेम सहरमि फर्क्या।

इथोयोपिया देशको ठुलो हाकिम

²⁶ तइ पछा प्रभुका एक दुतले फिलिपलाइ भण्यो, “उठीबर दक्षिण तिर यरुशलेम सहर बठेइ गाजा सहरतिर जान्या बाटामि जा। ताँ उजाड ठाउँको बाटो छ।”

²⁷ पइ फिलिप उठीबर गयो, रे एक जाना इथोपिया देशका नपुसकलाइ भेट्यो, जो इथोपिया देशकि रानी कन्दाकिका ठुला हाकिम रे सब सम्पतिको कोषाध्यक्ष थ्या, उन यरुशलेम सहरमि आराधना अद्दाइ गइरइथ्या।

²⁸ उन आफ्ना देस फर्किन्या बेला आफना रथमि बसिबर जोर जोरले यशैया अगमबक्ताको किताब पड्डाथ्या।

²⁹ तब पबित्र आत्माले फिलिपलाइ भण्यो, “जा रे तइ रथसित हिट।”

³⁰ फिलिप दकुडिबर रथका वाँ गयो, रे तइलाइ यशैया अगमबक्ताको किताब पड्या सुणिबर उनले सोध्यो, “तमले पड्या कुरणी बुजन्छौ?”

³¹ तब तिनले भण्यो, “कसइले नभणेइ म कसेरी बुज्ज सक्दउ?” पइ तइले फिलिपलाइ रथामि चड़ाइ आफसित बस्साइ बिन्ति अर्यो। रे उ रथामि चड्यो।

³² आब तइले पड्या पबित्र सास्त्रको खण्ड यो थ्यो, “जसेरि भेडा काटिनाइ लैजाइन्छ, रे थुमा उन काटिन्ज्या अगाडी चुप्प रन्छ, तसेरि जब मान्सनले उनलाइ दुख दियो, उइले आफ्नो मुख खोलेइन।

³³ उइलाइ अपमानित अर्यो रे उइलाइ न्याय मिलेइन। उइको पुस्ताको बयान कइले अद्द्या? क्याकि उइको जीवन धर्ति बठेइ लैया।”

³⁴ तब तइ नपुसकले फिलिपलाइ भण्यो, “कृपा अरबर मलाइ भण, अगमबक्ताले यो कइका बारेमि भण्या हो, उनरा आफनाइ बारेमि कि और कसइका बारेमि?”

³⁵ तब फिलिपले भण्न सुरु अर्यो, रे पबित्र सास्त्रको इसइ खण्ड बठेइ तइलाइ येशूको सुसमाचार सुणायो। तिन ठुला हाकिमले बुज्यो रे येशूमि बिश्वास अर्यो।

³⁶ पइ उन बाटाका नजिकइ ताल धेक्यो। रे तइ नपुसकले भण्यो, “हेर, याँ ताल रइछ, मलाइ बप्तिस्मा हुनाइ क्याले रोक्द सकन्छ?”

³⁷ फिलिपले भण्यो, “यदि सारा मनले बिश्वास अरन्छइ भण्या तुइले बप्तिस्मा लिन सकन्छइ।” तिनले जबाफ दियो, “येशू ख्रीष्टइ परमेश्वरका चेलो हुन भणि म बिश्वास अद्दउ।”

³⁸ तिनले रथ रोक्दाइ आज्ञा दियो, पइ फिलिप रे तिन नपुंसक दुएइ तालइनि गया, रे फिलिपले तिनलाइ बप्तिस्मा दियो।

³⁹ पइ जब उन ताल बठेइ बाइर आया, तब परमेश्वरका आत्माले फिलिपलाइ पकोडीबर लैय्या, रे तइ नपुसक्ले उनलाइ धेकेइन, रे परमेश्वरले तिनलाइ बचायो रे तिन आफ्ना देस फर्किबर गया।

⁴⁰ वाँ फिलिपले आफलाइ अश्‍दोद सहरमि पायो, तिन कैसरिया सहर नपुगन्ज्या सम्म सहर-सहर बठेइ सुसमाचार प्रचार अद्दाइ गया।