प्रेरित 5 - डोटेली नयाँ करार

हननिया रे तिनरि स्वानी सफिरा

¹ तर हननिया नाउँ भया कोइ एक जाना रे तिनरि स्वानी सफिराले आफ्नो जमिनको एक खुल्लो बेच्यो,

² रे तइका मोल बठेइ तइकि स्वानी रे तिनलाइ भणबर केइ हिस्सा आफसित राख्यो, रे केइ हिस्सा लेइबर येशू ख्रीष्टका छान्या शिष्यालाइ दियो।

³ तर पत्रुसले भण्यो, “ए हननिया, पबित्र आत्मासित झुटि बोल्या रे जमिन बेच्या रुप्या बठेइ केइ हिस्सा आफसित राख्द्या कुरणी सैतानले कसेरी तेरा मनमि हाल्दियो?

⁴ त्यो नबेचन्ज्या कि त्यो तेरो आफनोइ थेइन ब? रे त्यो बेचिया पछा लगइ त्यो तेराइ अधिकारमि थेइन ब? यिसो काम अद्द्या खराब बिचार तेरा मनमि कसेरी आयो? तुइले मान्सनलाइ होइन, तर परमेश्वरलाइ ढाँटिराइछइ।”

⁵ यिन कुरणी सुणिन्जेइ हननिया भइय्यइनि लोट्यो रे त्यो मर्यो। यो सुण्न्या सब डरले काम्या।

⁶ जब जबान मान्सनले आइबर तइलाइ लत्ताले बेडिबर बाइर लइय्या रे गाडीदियो।

⁷ जी होइरइथ्यो त्यो थाइ नपाइबर लगभग तीन घन्टा पछा तइकि स्वानी लगइ भितर आइ।

⁸ पत्रुसले तइलाइ सोध्यो, “मलाइ भण, कि तमन दुएइले तइ जमिन ततिइमि बेच्या हौ?” पइ तइले भणि, “हजुर, ततिमि।”

⁹ तर पत्रुसले तइलाइ भण्यो, “तमले परमेश्वरका आत्माको परिक्षा अद्दाइ कसेरी मिलिबर सल्लाह अर्या? हेर, तेरा बैकान गाडड्यावाला ढोकालाइ छन रे तिननले तुलाइ बोकिबर बाइर लैजान्या हुन।”

¹⁰ पइ उतन्जेइ त्यो भइय्यइनि लोटि रे मरि। जब जबान मान्सन भितर आया, तइलाइ मरिसक्या धेकिबर बाइर बोकिबर लइय्या रे तइको बैकान गाण्ड्या नजिकै गाडदियो।

¹¹ रे यरुशलेम सहरका सब मण्डलिका मान्सन रे यिन कुरणी सुण्न्या सब मान्सन डरले काम्या।

येशू ख्रीष्टका छान्या शिष्याले भौतका बिमार निको बनायाको

¹² आब येशू ख्रीष्टका छान्या शिष्याका हात बठेइ भौत चमत्कारी चिन्ह रे अचम्मका काम मान्सनका बिचइनि अरन्थ्या, रे ख्रीष्टमी बिश्वास अद्द्या सब सोलोमन नाउँ भया दलानमि एकहठ्ठा होइरइथ्या।

¹³ तर जइले अइल सम्म ख्रीष्टमी बिश्वास अर्या थेइन, तिननमि हइ कसइको लगइ तिननसित भेट्टाइ आउन्या हिम्मत भएइन, पइलगइ मान्सनले तिननलाइ आदर अरन्थ्या।

¹⁴ प्रभु येशूमि बिश्वास अद्दया बैकान रे स्वानि दुएइको भिड झिक बड्ता थपिन पस्यो,

¹⁵ येशू ख्रीष्टका छान्या शिष्याले जी अचम्मका काम अरन्थ्या तइका उइले मान्सनले बाटा-बाटामि बिमारी लेइबर आया, रे पत्रुस आउन्ज्या तिनरो छाइल मान्तर भया लगइ तिननमि हइ कोइ-कोइमि पडउ भणबर बिस्तरा रे खाटमी तिननलाइ स्याइ राखन्थ्या।

¹⁶ यरुशलेम सहरका वलतिर पलतिर भया सहर बठेइ लगइ भौत मान्सनले बिमारी रे भूत लाग्या मान्सनलाइ येशू ख्रीष्टका छान्या शिष्याका वाँ लेइबर आउँथ्या रे तिन सब निका हुन्थ्या।

येशू ख्रीष्टका छान्या शिष्यालाइ सतावट

¹⁷ यहुदि प्रधान पुजारि रे तिनसित हुन्या सब (जो सदुकीको समुह थ्या) डाहाले भरिबर येशू ख्रीष्टका छान्या शिष्याका बिरोधमी खडा भया,

¹⁸ रे छान्या शिष्यालाइ पकोडीबर सरकारि झेलमि हाल्दियो।

¹⁹ तर प्रभुका एक दुतले रात झेलका ढोका खोल्दियो, रे तिननलाइ बाइर लेइबर भण्यो,

²⁰ जा रे मन्दिरका आगनमी खडा होइबर यइ अनन्त जीवनको सन्देश सब मान्सनलाइ भणदिय।

²¹ यो सुण्या पछा येशू ख्रीष्टका छान्या शिष्या परभातइ मन्दिरका आगन भितर पस्या रे शिक्षा दिन लाग्या। तर यहुदि प्रधान पुजारि रे तिननसित भया साथिनले इस्राएल देशका सब अगुवानलाइ यहुदि महासभामि बोलायो, तइ पछा तिननले झेलमि भया येशू ख्रीष्टका छान्या शिष्यालाइ ल्याउनाइ पठायो।

²² मन्दिरका चौकिदारले तिननलाइ झेलमि नभेट्या हुनाले फर्किया रे आइबर यो रैबार दियो,

²³ हामले झेलमि सुरक्षितसित ताला लाया रे झेलको चौकीदार लगइ ढोकालाइ कल्लिया धेक्या, तर ढोका उगाड़न्ज्याँ हामले भितर कसइलाइ भेटेइन।

²⁴ जब मन्दिरका चौकिदारको कप्तान रे यहुदि मुख्य पुजारिले यो रैबार सुण्यो तब यिन सबको नतिजा कि हुन्या हो भणबर तिनन येशू ख्रीष्टका छान्या शिष्याका बारेमि दोधारमि पड्या।

²⁵ तसइ बेला मान्सन आया रे तिननलाइ भण्यो, “सुण, तमनले झेलमि राख्या मान्सन त मन्दिरमि कल्लिबर शिक्षा दिन्ना छन।”

²⁶ जब तिननले यो रैबार सुण्यो, तब मन्दिरका चौकीदार रे कप्तान मन्दिर भितर गया। तिननले छान्या शिष्याको सभामी आइबर तिननलाइ जबरजस्ती नअरिबरइ ताँ लेइबर आया, क्याकि मान्सनले तिननलाइ ढुङाले हाणबर मारदिन्या हुन कि भणि तिनन डराइरइथ्या।

²⁷ रे यहुदि महासभाका अगाडी कल्ल्यायो, रे यहुदि प्रधान पुजारिले तिननलाइ सोध्यो,

²⁸ “हामले तमनलाइ येशू ख्रीष्टका नाउँमि कसइलाइ केइ जन भण भणबर कडा चेतावनी दिइराइथ्या, तर तमनले आफना शिक्षाले जम्माइ यरुशलेम सहर भरिसक्या, रे तइ मान्सको हत्याको दोस जबरजस्ती हाममि लाउन खोज्जा छौ।”

²⁹ पइ पत्रुस रे येशू ख्रीष्टका छान्या शिष्याले भण्यो, “हामले मान्सनको होइन तर परमेश्वरको आज्ञा पालना अद्दुइ पणन्छ।

³⁰ हामरा पिता पुर्खाका परमेश्वरले येशूलाइ मर्या बठेइ जिउना बनायो, जइलाइ तमनले क्रुसमि टाङिबर मार्या।

³¹ उनलाइ राजा रे मुक्तिदाता बनाइबर परमेश्वरका दाइन तिर सम्मानसित उच्च पाड्यो, ताकि इस्राएल देशका मान्सन आफ्नो खराब सोच बिचार बठेइ परमेश्वरतिर फर्कुन रे उन बठेइ आफ्नो पापको क्षमा पाउन।

³² यिन सब कुरणीमि हाम गवाही छौ, रे तसोइ अरिबर पबित्र आत्मा लगइ जइलाइ परमेश्वरले आफना आज्ञा पालना अद्द्या मान्सनलाइ दिइराइछ।”

³³ जब सभाका सब मान्सनले यो सुण्यो तब उन भौत रिसाया, रे येशू ख्रीष्टका छान्या शिष्यालाइ माद्दाइ खोज्यो।

³⁴ तइ बेला गमलिएल नाउँ भया फरिसि मान्सले यहुदि महासभाका अगाडी कल्लिया। उन तिनन सब मान्सनले माणेका मण्डलिका अगुवा थ्या। उनले येशू ख्रीष्टका छान्या शिष्यालाइ एक बेरइ निउति सभा बठेइ बाइर जान्या आज्ञा दियो।

³⁵ रे उनले सभाका मान्सनलाइ भण्यो, “हे, इस्राएल देशका मान्सन हो, तमन यिन मान्सनलाइ जी अद्दाइ बटिरइछौ, तइमि होशियार भया।

³⁶ क्याकि आज भण्ना पइल्ली लगइ थुदासले म लगइ एक ठुलो मान्स हु भण्न्या दाबि अर्यो रे लगभग चार सय मान्सन तइका पछा लाग्या। त्यो मारियो, तइका पछा लाग्द्या सब मान्सन छीरबिट्टिया रे तिनरो नाउँ निसानोइ हरायो।

³⁷ तइ पछा जन गणनाका बेलामि गालील जिल्लाको यहूदा भण्न्या खडा भयो, रे कति मान्सनलाइ आफतिर तान्यो। त्यो लगइ मर्यो, रे तइका पछा लाग्द्या सब मान्सन लगइ छीरबिट्टिया।

³⁸ अइलका यइ मामिलामि म तमनलाइ भण्नउ, कि यिन मान्सनको बिरोध जन अर, रे यिननलाइ छाड्दिय, क्याकि यिननले यो बिचार रे काम मान्सन आफइले बनाया हो भण्या त्यो आफइ हराउन्या छ।

³⁹ तर यदि यो परमेश्वर बठेइ हो भण्या तमनले यिन मान्सनलाइ रोक्द सक्दानु। नति तमन परमेश्वरका बिरोधमी उठ्या ठहरिन्या हौ।”

⁴⁰ तब तिननले तिनरो सल्लाह माण्यो। पइ तिननले येशू ख्रीष्टका छान्या शिष्यालाइ भितर बोलाइबर हाण्यो, रे आब बठेइ येशूका नाउँमि प्रचार जन अर्या भण्न्या आज्ञा दिइबर तिननलाइ छाडदियो।

⁴¹ तब येशूकी निउति अपमान सहन्या योग्यका ठहरिया भण्नेइ कुरणीमि आनन्द मनाउनाइ तिनन यहुदि महासभा बठेइ बाइर निकलिबर गया।

⁴² रे दिना दिन येशू ख्रीष्टका छान्या शिष्या मन्दिरमि रे घर-घर गइबर येशूइ ख्रीष्ट हुन भणबर सिकाउन रे बचन प्रचार अद्द छाडेइन।