प्रेरित 4 - डोटेली नयाँ करार

महासभाका अगाडी पत्रुस रे यूहन्ना

¹ पत्रुस रे यूहन्ना मान्सनसित बोल्लाथ्या, यहुदि पुजारिन, मन्दिरको चौकिदारको कप्तान रे सदुकीको समुह तिनरा वाँ आया।

² उन रिसाइरइथ्या, क्याकि येशूमि मर्या बठेइ जिउना हुनाहान भण्न्या कुरणी तिननले मान्सनलाइ सिकाउनाथ्या, कि जो मान्सन मरिसक्या छन, तिननलाइ परमेश्वरले मर्या बठेइ जिउना बनाउन्या हुन, जसेरि परमेश्वरले येशूलाइ मर्या बठेइ जिउना बनायो।

³ तब तिननले यिननलाइ पकोड्यो, रे भोलिबार सम्म थुनामि राख्यो, क्याकि तइ बेला बसाइतक भइगइथ्यो।

⁴ पइ सन्देश सुण्न्यामि हइ भौतले येशूमि बिश्वास अर्यो, रे बिश्वास अद्द्या मान्सनको संख्या लगभग पाँच हजार बैकान मान्सन भया।

⁵ भोलिबार यिनरा सासक, मण्डलिका अगुवान रे मोशाको कानुन सिकाउन्यावाला यरुशलेम सहरका एक ठाउमि जम्मा होइरइथ्या।

⁶ तिन मान्सन जो सभामी आइरइथ्या, तिननमि हइ यहुदि प्रधान पुजारि हन्नास, कैयाफा, यूहन्ना, अलेक्जेण्डर रे यहुदि प्रधान पुजारिका परिबारका जम्माइ ताँ थ्या।

⁷ तिननले पत्रुस रे यूहन्नालाइ बिचइनि कल्लेइबर सोध्यो, “यइ मान्सलाइ निको अद्दाइ कइले तमनलाइ सक्ति रे अधिकार दियो?”

⁸ तब पबित्र आत्माले भरिबर पत्रुसले तिननलाइ भण्यो, “यहुदि मान्सनका अगुवा रे मण्डलिका अगुवान हो,

⁹ हामले एक डुणो मान्सलाइ निको पाड्या रे आज हामसित सोधपुछ अरिन्ना छ कि त्यो कसेरी निको भयो,

¹⁰ तमन सबलाइ रे इस्राएल देशका सारा मान्सनलाइ था होउ, कि यो नासरत गाउँका येशू ख्रीष्टको नाउँमि निको भया छ, उनइ येशू ख्रीष्ट जइलाइ तमनले क्रुसमि टाङयाथ्या। तर परमेश्वरले उनइलाइ मर्या बठेइ जिउना बनायो। आज उनरोइ नाउँ बठेइ यो मान्स तमरा अगाडी निको भया छ।

¹¹ ‘येशू ख्रीष्ट तेइ ढुङ्गो हुन, जइका बारेमि पबित्र सास्त्रमि लेखिया छ कि जइ ढुङ्गोलाइ घर बनाउन्या मिस्तिरिले इन्कार अर्यो, तेइ ढुङ्गो अइल कुनाको सीर ढुङ्गो हुन आइरइछ।’

¹² येशू बाहेक और कसइमी उद्दार आथिन, क्याकि परमेश्वरले येशूको नाउँ बाहेक अग्गासका तल्तिर और कोइ नाउँ दिया आथिन, जइ बठेइ हामले मुक्ति पाउन सक्दाउ।”

¹³ जब तिननले पत्रुस रे यूहन्ना साहससित बोल्या धेक्यो, रे यिन अनपड रे साधारण मान्स रइछन भणबर था पायो, तब तिनन अचम्म पड्या, रे यिन येशूसितइ रन्थ्या भण्न्या तिननले था पायो।

¹⁴ तर निको भया मान्सलाइ पत्रुस रे यूहन्नासित कल्लिया धेकिबर सभाका मान्सनले केइ बोल्ल सकेइन।

¹⁵ तबइकिलाइ यिनलाइ यहुदि महासभा बठेइ बाइर जान्या आज्ञा दिइबर तिननले यिसो भणबर आपसमी सल्लाह अर्यो।

¹⁶ “यिन मान्सनलाइ आब हामले कि अद्दाउ? क्याकि साँच्चि यिन बठेइ एक अचम्मका काम होइरइछ भण्न्या यरुशलेम सहरका बासिन्दा जम्माइलाइ प्रकट होइय्यो, रे हाम यो इन्कार अद्द सक्दाइन।

¹⁷ तर मान्सनमि यो सुसमाचार और बड्ता प्रचार नहउ भणबर ‘येशूको नाउँमि आब बठेइ केइ कुरणी लगइ कसइसित नअरुन’ भणबर कडा चेताउनी दिनु पणन्छ।”

¹⁸ तइ पछा तिननले पत्रुस रे यूहन्नालाइ भितर बोलाइबर “आब बठेइ येशूका नाउँका बारेमि कसइसित कभइ लगइ कुरणी जन अर्या रे जन सिकाया” भणबर कडा चेतावनी दियो।

¹⁹ तर पत्रुस रे यूहन्नाले तिननलाइ जबाफ दियो, “परमेश्वरकि कुरणी सुण्नु भण्ना तमरि कुरणी सुण्नु परमेश्वरका नजरमि ठीक हो कि होइन तमन आफइ बिचार अर।

²⁰ क्याकि हामले धेक्या रे सुण्या कुरणी हाम नबोलिबर बस्स सक्दाइन।”

²¹ तिननले सजाय दिन्या केइ उपाय नभइबर यिननलाइ आजी बड्ता धम्कि दिबर छाडदियो। क्याकि जी घटना घटिरइथ्यो, तइको निउति सब मान्सनले परमेश्वरको महिमा अद्दाथ्या।

²² क्याकि जो मान्स अचम्मका काम बठेइ निको पाड़िया थ्यो, तइको बर्ष चालिस भण्ना बड्ता थ्यो।

बिश्वासीनको प्राथर्ना

²³ छुटकारा पाइबर पत्रुस रे यूहन्ना आफना साथिका वाँ फर्क्या रे यहुदि मुख्य पुजारिन रे यहुदि मान्सनका अगुवाले भण्या सब कुरणी आफ्ना साथिनलाइ बताइदियो।

²⁴ जब तिननले यो सुण्यो, तब तिनन सब मिलिबर परमेश्वरसित यिसेरी प्राथर्ना अद्द लाग्या, “हे प्रभु, जइले अग्गास, धर्ति, समुद्र रे तइमि भया सब थोक बनायो,

²⁵ जइले पबित्र आत्मा बठेइ आफना सेवक हामरा पुर्खा राजा दाउदका मुख बठेइ यिसेरी भण्यो, ‘गैर-यहुदि मान्सन क्याकि रिसाउनाहान, रे मान्सनले ब्यर्थका कुरणीमि क्याकि कल्पना अददाहान?

²⁶ परमप्रभुको बिरोधमी रे उद्दार दिन्या ख्रीष्टको बिरोधमी धर्तिका राजान रे सासक लगइ खडा भया।’

²⁷ क्याकि भण्या साँच्चि तमनले अभिषेक अर्या, तमरा पबित्र सेवक येशूको बिरोधमी राजा हेरोद रे पन्तियस पिलातस हाकिम दुइ जाना, गैर-यहुदि रे इस्राएल देशका मान्सनसित इसइ सहरमि जम्मा भयाथ्या।

²⁸ तिननले तेइ अर्यो, तर तिननले तमरो सक्ति रे तमरा इच्छा बठेइ तमले पइल्ली बठेइ बिचार अर्या अन्सार मान्तर काम अर्यो।

²⁹ आब हे प्रभु, तिनरा धम्कि सुण, रे तमरा दासलाइ पुरा साहससित तमरो सन्देश बोल्ल दिय,

³⁰ रे निका बनाउनाइ तमले आफ्नो हात बडा, रे आफना पबित्र सेवक येशूको नाउँ बठेइ चमत्कारी चिन्ह रे अचम्मका काम होइजाउन।”

³¹ तिननले प्रार्थना अरिसक्या पछा तिनन जम्मा भया ठाँउ काम्यो, रे तिनन सब जाना पबित्र आत्माले भरिया, रे तिननले साहससित परमेश्वरको सन्देश बोल्या।

बिश्वासीनको साजा सम्पति

³² बिश्वास अद्द्या समुह सब एकै मन रे एकै आत्माका होइरइथ्या, रे तिननमि हइ एकले लगइ आफ्नो धन सम्पत्तिको केइ चिज यो मेरो आफ्नो हो भणि भण्नाइन्थ्या, तर तिनरा सब थोक साजाथ्या।

³³ तिनन येशू ख्रीष्टका छान्या शिष्याले ठुला सक्तिसित प्रभु येशू मर्या बठेइ जिउना भया छन भणबर गवाही दिन्थ्या, रे तिनन सबमि ठुलो अनुग्रह रयाथ्यो।

³⁴ तिननमि हइ कसइलाइ केइ कुरणीको खाँचो पण्थेइन, क्याकि जति जाना जग्गा जमिन रे घरका मालिक थ्या, तिननले तिन बेचिबर तइको रुप्या ल्याउथ्या,

³⁵ रे येशू ख्रीष्टका छान्या शिष्यालाइ दिन्थ्या, रे जइ-जइलाइ जी-जी कुरणीको खाँचो पड़न्थ्यो, त्यो सबलाइ बाड़िदिन्थ्या।

³⁶ आब साइप्रस टापुको लेवि कुलका योसेफ, जइलाइ येशू ख्रीष्टका छान्या शिष्याले “बारनाबास” भणि नाउँ राखराइथ्यो (जइको अर्थ उत्साहको चेलो),

³⁷ उनले आफ्नो जमिन बेचिबर त्यो रुप्या लेइबर येशू ख्रीष्टका छान्या शिष्यालाइ दियो।