प्रेरित 28 - डोटेली नयाँ करार

पावल माल्टा टापुमि

¹ हाम सब नीक्केरि किनारमी पुग्या पछा तइ टापुको नाउँ माल्टा रइछ भण्न्या हामलाइ था भयो।

² ताँका मान्सनले हामलाइ निको सत्कार अर्यो। पानी पड्या रे जाडि भया हुनाले तिननले आगो बालिबर हाम सबलाइ स्वागत अर्यो।

³ पावलले एक अङाली दरुँवा जम्मा अर्याथ्यो रे त्यो लेइबर आगाइनी हाल्यो। आगाका रापले एक बिसालु स्याप निकलिबर आयो, रे तिनरा हातमि बेडियो।

⁴ ताँका मान्सनले पावलका हातमि स्याप झुन्निया धेकिबर आपसमी भण्न पस्या, “यो मान्स पक्‍कालगइ ज्यानमारा हुनु पणन्छ। यो समुद्र बठेइ बाँचिबर त निकल्यो तर हामरि न्याय देबिका हात बठेइ निकल्ल सकेइन।”

⁵ तर पावलले तइ स्यापलाइ आगाइनी खिद्दियो, रे पावलको केइ बिगाड हुन पाएइन।

⁶ रे तइको शरीर ओसाउछ, अथवा त्यो अचानक लोटिबर मरन्छ कि भणबर तिन मान्सन पख्द पस्या। तर भौत बेर सम्म पख्या लगइ पावलको केइ बिगाड नभया धेकिबर तिननले आफ्नो बिचार बदलिबर भण्न पस्या, “यिन त देबता ब रइछन।”

⁷ तइ टापुका नजिकै पब्लियस नाउँ भया मुख्याको जग्गा जमिन तइ ठाउँका वलतिर पल्तिरइ थ्यो। उनले हामलाइ स्वागत अर्यो, रे तीन दिन सम्म हाम उनरा घरमि पाउना होइबर बस्या।

⁸ पब्लियसका बा जर रे जल्मासी रोगले बिमारी थ्या। पावल तिनलाइ हेद्दाइ कोठा भितर गया रे तिनरि निउति प्रार्थना अर्यो, रे आफ्नो हात तिनमि राखिबर तिनलाइ निको बनायो।

⁹ यो घटना भया पछा, तइ टापुका और बिमारी मान्सन लगइ पावलका वाँ आया, रे निका भया।

¹⁰ तिननले हामलाइ आदर अरिबर भौत उपहार दियो, रे जब हाम तीन मैना पछा जानाइ बटियाथ्या, तब तिननले हामलाइ चाइया जति समान जहाजमि हाल्दियो।

पावल रोम सहरमि

¹¹ तीन मैना पछा, हाम अलेक्जेन्ड्रिया सहरको जहाजमि चड्या। यो जहाज हिउन इसइ टापुमि थ्यो। जहाजका अगाडीका भागमि जोलाया देबताको मुर्ति खोपिराइथ्यो।

¹² सुराकुसाइ सहरमि पुग्या रे हाम ताँ तीन दिन बस्या।

¹³ ताँ बठेइ हाम किनारइ-किनार रेगियन गाउँमी पुग्या। एक दिन पछा दक्षिण तिर बतास चल्यो, रे भोलिबार हाम पटिओली सहरमि पुग्या।

¹⁴ ताँ हामले भाइनलाइ भेट्या, रे तिननले हामलाइ सात दिन सम्म उननसित रनाइ बिन्ति अर्यो। यिसेरी हाम उनसित सात दिन रया पछा हाम रोम सहरमि जान्या बाटातिर लाग्या।

¹⁵ रोम सहरका बिश्वासि भाइनले हाम रोम सहरमि आउन्ना छु भणन्या रैबार सुणिबर सब हामलाइ भिट्टाइ रे रोम सहरमि लैजानाइ अप्पियस गाउँका बजार रे तीन-पाटि भण्न्या ठाउँमि आयाथ्या। तिननलाइ धेकिबर पावलले परमेश्वरलाइ धन्यबाद चडायो, रे साहस पायो।

¹⁶ जब हाम रोम सहरमि पस्या, तब पावललाइ एक जाना सिपाइको रेखधेखमि एकलोइ बस्साइ अनुमति मिल्यो।

रोम सहरमि पावलको प्रचार

¹⁷ तीन दिन पछा पावलले यहुदि मान्सनका ताँइका अगुवानलाइ बोलाउन पठायो। तिनन जमा भया पछा पावलले तिननलाइ भण्यो, “भाइन हो, मइले त आफना देशका मान्सन रे पिता-पुर्खाको रितका बिरोधमी केइ काम अर्या थेइन। पइलगइ पकोडीबर यरुशलेम सहर बठेइ रोम सहरका सरकारका हातमि मलाइ दियो।

¹⁸ तिननले सोधपुछ अर्या पछा ममि मृत्यु दण्डको केइ कारण नभेट्या हुनाले मलाइ छाडदिन्या मन अर्याथ्यो।

¹⁹ तर यहुदि अगुवानले बिरोध अर्या हुनाले मइले सम्राटसित याँ रोम सहरमि मेरो न्याय अरिदिय भणि बिन्ति अददु पर्यो। जबकि मेरा आफ्ना मान्सनका बिरोधमी केइ दोस लाउन्या कुरणी थेइन।

²⁰ तबइकिलाइ मइले तमनसित भेटीबर कुरणीकानी अद्दाइ तमनलाइ बोलाया हु। म यइ साङलामि बादिरइछु क्याकि म हामरा ख्रीष्टमी बिश्वास अद्दउ, जइकी निउति इस्राएल देशका मान्सनले आसा अर्याथ्यो।”

²¹ तिननले पावललाइ भण्यो, “हामले त तमरा बारेमि यहुदिया प्रदेशका मान्सन बठेइ केइ चिठ्ठी पाया आथिन। कोइ बिश्वासि भाइनले आइबर तमरा बिरोधमी केइ ननिकि कुरणी सुण्या अथवा बोल्या आथिन।

²² तर तमरो बिचार कि हो, त्यो तमन बठेइ सुण्न चाहानौ। क्याकि हाम जाण्नाउ कि सब ठाउँका मान्सन प्रभुका बाटाका बारेमि ननिका कुरणी अददाहान।”

²³ तब यहुदि मान्सनले पावलकि निउति एक दिन तोक्दियो, रे भौत संख्यामि मान्सन तिनरा डेरामि आया। तिनले तिननलाइ परभात बठेइ बसाइतक सम्म परमेश्वरको राज्यका बारेमि शिक्षा दियो, रे मोशाको कानुन रे अगमबक्तानका किताब बठेइ परमेश्वरका राज्यका बारेमि गवाही दियो, पइ येशूका बारेमि सम्जाइबर तिननलाइ बिश्वासमि ल्याउनु खोज्यो।

²⁴ तिनले भणेइ कुरणी कसइले बिश्वास अर्यो, कसइले बिश्वास अरेइन।

²⁵ तिनन एक अर्खासित सहमत भएइन, रे तिनन ताँ बठेइ जान लाग्या, तब पावलले छाड्डीबार भण्यो, “तमरा पिता-पुर्खालाइ यशैया अगमबक्ता बठेइ पबित्र आत्माले भण्या बचन ठिकै थ्यो,

²⁶ यिन मान्सका वाँ गइबर भण, ‘जो म भण्नउ तमन सुण्ना त सुणन्छौ तर कभइ बुज्जानु, रे जो म अद्दउ तमन हेद्दा त हेरन्छौ तर कभइ धेक्दानु।’

²⁷ क्याकि यिन मान्सनका मन कठोर होइरइछन, रे तिनरा कान टोलिरइछन, रे तिननले आफना आँखा बन्द अर्राइछन, नतित तिननले आँखाले धेक्देइथ्या, कानले सुण्नेइथ्या, मनले बुज्जेइथ्या, रे फर्कनेइथ्या, रे म तिननलाइ निको बनाउनेइथ्या।

²⁸ तबइकिलाइ तमनलाइ था होउ, कि परमेश्वरको यो मुक्ति गैर-यहुदि मान्सनका निउति पठाया छ, रे तिनन स्वीकार अद्द्या हुन।”

²⁹ पइ पावलले यिन बचन भण्या पछा, यहुदि मान्सन आपसमी वाद-बिबाद अद्दा-अद्दाइ बिदा भया।

³⁰ पावल पुरा दुइ बर्ष सम्म आफनाइ खर्चमि रोम सहरमि बस्या, रे तिनरा वाँ आउन्या सबलाइ तिनले स्वागत अर्यो।

³¹ तिनले साहासी भइबर बिना रोकटोक परमेश्वरको राज्यको प्रचार अरन्थ्या, रे प्रभु येशू ख्रीष्टका बारेमि शिक्षा दिन्थ्या।