प्रेरित 25 - डोटेली नयाँ करार

ठुला हाकिम फेस्तसका अगाडी पावलको मुद्दा

¹ फेस्तस हाकिमका रुपमि यहुदिया प्रदेशमि आया, रे तीन दिन पछा उन कैसरिया सहर बठेइ यरुशलेम सहरमि गया।

² मुख्य पुजारि रे यहुदि अगुवानले फेस्तसलाइ भेट्यो, रे तिननले पावलका बिरोधमी दोस लायो।

³ रे पावललाइ यरुशलेम सहरमि पठाइबर कृपा अरिदिय भणि बिन्ति अर्यो, क्याकि तिननले पावललाइ बटाइनि माद्द्या योजना बनायाथ्यो।

⁴ ठुला हाकिम फेस्तसले जबाफ दियो, “पावललाइ कैसरिया सहरका झेलमि राखिया छ, मइले लगइ छिटाइ जान्या मन अर्या छु भण्यो।”

⁵ उइले आजी भण्यो, “तबइकिलाइ तमनमि हइ अगुवान ताँ मसित जाउन, रे तइ मान्समि केइ खराबी छ भण्या तइलाइ दोस लाउन।”

⁶ ठुला हाकिम फेस्तस यरुशलेम सहरमि आठ-दस दिन बस्या पछा उन कैसरिया सहर फर्किया, रे भोलिबार न्याय अद्द्या ठाउँमि बसिबर उनले पावललाइ ल्याउन्या आज्ञा दियो।

⁷ तिन आया पछा यरुशलेम सहर बठेइ आया यहुदि अगुवान तिनरा वलतिर पलतिर कल्लिया, रे पावलका बिरोधमी अनेक दोस लायो, तर जइको प्रमाण तिननले दिन सकेइन।

⁸ पावलले आफना पक्षमि बोलिबर भण्यो, “मइले यहुदि मान्सनका कानुनको बिरोधमी, मन्दिरका बिरोधमी, रे सम्राटका बिरोधमी केइ अपराध अर्या आथिन।”

⁹ तर ठुला हाकिम फेस्तसले यहुदि अगुवानलाइ खुशी पाड्डाइ निउति पावललाइ भण्यो, “कि तु यरुशलेम सहरमि गइबर ताँ मेरा अगाडी यिन कुरणिका बारेमि न्याय अरदिय भण्या मन अरन्छइ?”

¹⁰ तर पावलले भण्यो, “म सम्राटको न्याय अद्द्या ठाउँका अगाडी कल्लीरइछु, ठीक ताँ छु जाँ एक रोम सहरको मान्सका रुपमि मेरो न्याय हुनु पणन्छ। यहुदि मान्सनलाइ मइले केइ खराब अर्या आथिन, त्यो हजूरलाइ नीकेरि थाइछ।

¹¹ यदि म दोषि हु, रे मइले ज्यान सजाय पाउन्या लायकको काम अर्या छु भण्या, म मद्दाइ लगइ तयार छु। तर यदि यिननले मलाइ लाया दोस सत्य आथिन भण्या मलाइ यिनरा हातमि दिन्या कसइसित अधिकार आथिन। मेरो बिन्ति छ, मेरो न्याय सम्राट बठेइ हुन पणन्छ।”

¹² तब ठुला हाकिम फेस्तसले सल्लाकारसित सल्लाह अरिबर पावललाइ भण्यो, “तुइले आफ्नो न्याय सम्राट बठेइ हुन पणन्छ, भणबर बिन्ति अरि रे आब म तुलाइ कैसर सम्राटका वाँइ पठाइ दिनउ।”

राजा अग्रीपाससित ठुला हाकिम फेस्तसको सल्लाह

¹³ केइ दिन पछा ठुला हाकिम फेस्तसलाइ स्वागत अद्दाइ राजा अग्रिपास रे नानि बैनि बरनिकिलाइ आफसित लेइबर कैसरिया सहरमि आया।

¹⁴ तिनन ताँ भौत दिन बस्या पछा ठुला हाकिम फेस्तसले पावलको मुद्दा राजा अग्रिपासका अगाडी यिसो भण्नोइ पेस अर्यो, “हाकिम फेलिक्सले झेलमि राखिबर गया एक जाना मान्स याँ छ।

¹⁵ जइका बारेमि, म यरुशलेम सहरमि हुन्ज्या, मुख्य पुजारि रे यहुदि मान्सनका अगुवा तइका बिरोधमी दोस लाइबर तइलाइ दण्ड दिनु पणन्छ भणि बिन्ति अर्याछ।”

¹⁶ तर मइले तिननलाइ भण्या, “मान्सलाइ दोषि नलाउनज्या सम्म रोमी सरकारको सजाय दिन्या चलन आथिन। दोस लाग्या मान्सले दोस लाउन्या मान्सनका अगाडी आफ्ना कुरणी सुणाउन्या मौका पाउनु पणन्छ।

¹⁷ तबइकिलाइ यहुदि अगुवान मसित कैसरिया सहरमि आया, रे मइले ब्यालो नअरिबर भोलिबार न्याय अद्द्या ठाउँमि बसिबर तिननलाइ मइले आज्ञा दिया कि पावललाइ लेइबर आस।

¹⁸ पावलका बिरोधिनले उइले अपराध अर्या केइ खास दोस लाउन्ना भण्न्या मइले सम्ज्याथ्या, तर तिननले तसो केइ दोस लाउन सकेइन।

¹⁹ तर तिननले आफनाइ धर्म रे मरिसक्या येशू भण्न्या मान्सका बारेमि मान्तर पावलसित वाद-बिबाद अरन्थ्या। पावल चाइ मर्या येशू जिउना भया छ भणबर दाबा अरन्थ्यो।

²⁰ क्याकि मलाइ था थेइन कि यइ कुरणीको सोधपुछ कसेरि अरु, तबइकिलाइ मइले पावललाइ सोध्या, यरुशलेम सहरमि गइबर तेरो न्याय ताँइ अरेले हुन्या हो ब?

²¹ तर पावलले मेरो न्याय सम्राट बठेइ हुन पणन्छ, भणबर बिन्ति अर्या हुनाले मइले तइलाइ सम्राटका वाँ नपठाउन्ज्या सम्म नीकेरि परेबर राख्या भण्न्या आज्ञा दिया।”

²² तब राजा अग्रिपासले ठुला हाकिम फेस्तसलाइ भण्यो, “यइ मान्सकि कुरणी म आफइ लगइ सुण्न पायले हुनेथ्यो।” पइ उनले भण्यो, “भोल तम सुण्या।”

पावल राजा अग्रिपासका अगाडी

²³ भोलिबार राजा अग्रिपास रे नानि बैनि बरनिकि ठुला सम्मानसित सेनापति रे सहरका मुख्य मान्सनसित सभाघर भितर पस्या। पइ ठुला हाकिम फेस्तसको आज्ञा पाइबर पावललाइ सभाघरमी लेयो।

²⁴ ठुला हाकिम फेस्तसले भण्यो, “राजा अग्रिपास रे हामसित याँ भया सब मान्सन हो, तमले यइ मान्सलाइ धेक्दाछौ, जइका बारेमि सारा यहुदि मान्सनले यो मान्स आब बठेइ बाच्च्या लायकको आथिन भणि यरुशलेम सहरमि रे याँ कैसरिया सहरमि लगइ मसित बिन्ति अद्दाथ्या।

²⁵ तर मइले यइ मान्समि ज्यानसजाय दिन्या लायकको केइ दोस लगइ पाउन सकेइन। तर यइ आफइले रोमी सम्राट बठेइ उनरो न्याय हुनाइ बिन्ति अर्या हुनाले मइले यइलाइ रोमी सम्राटका वाँ पठाउन्या फैसला अर्या।

²⁶ यइका बारेमि मइले मेरा रोमी सम्राटलाइ लेख्द्या लायकको केइ दोस पाएइन। तबइकिलाइ मइले यइलाइ तमरा अगाडी, रे खास अरिबर, हे राजा अग्रिपास, तमरा अगाडी लेइराइछु, रे तमले यइको सोधपुछ अर्या पछा सायद मइले केइ लेख्द्या कुरणी पाउनउ।

²⁷ क्याकि कैदीका बिरोधमी केइ दोस नभणिबर तइलाइ पठाउनाइ मलाइ ठीक लागेइन।”