प्रेरित 23 - डोटेली नयाँ करार

¹ पावलले यहुदि महासभा तिर एकहोरो होइबर तक्यो, रे भण्यो, “भाइन हो, आजका दिन सम्म परमेश्वरका नजरमि मइले सुद्द बिबेकले जीवन बिताइराइछु।”

² पावलका कुरणी सुणिबर यहुदि प्रधान पुजारि हननियाले तिनरा नजिक कलिन्या मान्सनलाइ पावलका गलामि थप्पडी हाण्न्या आज्ञा दियो।

³ कसइले पावलका गलामि थप्पडी हाण्न्या पछा पावलले उनलाइ भण्यो, “हे पाखण्डी, तमलाइ लगइ परमेश्वर हाण्न्या हुन। तम कानुन अन्सार मेरो इन्साफ अद्द बस्या हौ, रे पइलगइ कानुनका बिरोधमी मलाइ थप्पडी हाण्न्या आज्ञा क्याइ दिन्छौ?”

⁴ पइ कुनामि कल्लिया मान्सनले उनलाइ भण्यो, “कि तु परमेश्वरका यहुदि प्रधान पुजारि को अपमान अरन्छइ?”

⁵ तब पावलले भण्यो, “भाइन हो, उन यहुदि प्रधान पुजारि हुन भण्न्या मलाइ था थेइन। क्याकि पबित्र सास्त्रमि लेखिरइछ, ‘तुइले आफना मान्सनका सासकको खराबी जन बोलइ।’”

⁶ तर तइ यहुदि महासभामि एक दल सदुकीको समुह रे अर्खो दल फरिसि मान्सन रइछन भण्न्या था पाइबर पावलले जोरले भण्यो, “भाइन हो, म फरिसि हु रे म फरिसि मान्सनको सन्तान हु। परमेश्वरले मर्या बठेइ जिउना बनाउन्या हुन भणन्या आसा राख्या हुनाले याँ मेरो मुद्दा चलिरइछ।”

⁷ पावलले इसो भण्या पछा फरिसि मान्सन रे सदुकीको समुहमी वाद-बिबाद भयो, रे सभामी फाटो पड्यो।

⁸ क्याकि सदुकीको समुहको यो बिश्वास छ कि मान्सन मर्या बठेइ जिउना हुनाइन, स्वर्गदुत रे आत्मा आथिन भण्नाहान तर फरिसि मान्सन यिन सब कुरणीमि बिश्वास अद्दाहान।

⁹ ताँ भौत ठुलो खलबल माच्चियो, रे फरिसि मान्सनमि हइ कोइ मोशाको कानुन सिकाउन्यावाला थ्या, रे तिननले सदुकि मान्सनको घोर बिरोध अद्दाइ भण्यो, “हाम यइ मान्समि केइ दोस धेक्दाइन। सायद आत्मा अथवा स्वर्गदुतले यइ मान्ससित बोल्या हुन।”

¹⁰ ताँ ठुलो वाद-बिबाद भया पछा सभामी भया मान्सनका हात बठेइ पावल लुछालुछ पाडिन्या हुन भण्न्या डरले रोम सहरका हाकिमले सिपाइनलाइ तल्तिर जाइबर तिनलाइ उनरा बिचइनि जबरजस्ती लेइबर सिपाइन बस्या ठाउँ भितर लैजा भणि आज्ञा दियो।

¹¹ भोलिबारका रात प्रभु येशूले पावलका नजिक कल्लिबर भण्यो, “साहस अर, पावल, क्याकि जसेरि तुइले यरुशलेम सहरमि मेरो गवाही दिइ, तसेरि तुइले रोम सहरमि लगइ गवाही दिनु पणन्छ।”

पावललाइ माद्द्या षडयंत्र

¹² परभात उजालो भया पछा केइ यहुदि मान्सनले आपसमी सल्लाह अरिबर पावललाइ नमारन्ज्या सम्म केइ नखान्या रे केइ नपिउन्या कसम खायो।

¹³ इसो षड्यन्त्र अद्द्या मान्सन चालिस भण्न्ना बड्ता थ्या।

¹⁴ तिननले मुख्य पुजारिन रे यहुदि मान्सनका अगुवाका वाँ जाइबर भण्यो, “पावललाइ नमारन्ज्या सम्म केइ नखान्या रे केइ नपिउन्या भणि हामले कसम खाइराइछौ।

¹⁵ तबइकिलाइ मुख्य पुजारिन, यहुदि अगुवान रे यहुदि महासभाका और मान्सन मिलिबर रोम सहरका सेनापतिलाइ भण कि, पावलको मुद्दाको फैसला निक्केरि अद्दु पणन्छ भण्न्या निउ बनाइबर पावललाइ झिका रे याँ महासभामि ल्यास। त्यो याँ आउन्जेइ हाम तइलाइ बाटाइमि मारदिनाउ।”

¹⁶ तर पावलका भान्जले यइ षड्यन्त्र था पाइबर सिपाइन बस्या ठाउँ भितर गइबर पावललाइ भण्यो।

¹⁷ तब पावलले कप्तानमि हइ एक जनालाइ बोलाइबर भण्यो, “यिन जबान मान्सलाइ रोम सहरका सेनापतिका वाँ पुगाइदिय, क्याकि यिनरो उनसित केइ भण्न्या कुरणी छ।”

¹⁸ तबइकिलाइ कप्तानले पावलका भान्जलाइ रोम सहरका सेनापतिका वाँ पुगाइबर भण्यो, “हजुर, झेलमि भया पावलले मलाइ बोलाइबर यइ जबान मान्सनलाइ तमरा वाँ लैजा रे तमसित केइ भण्न्या कुरणी छ, भण्या हुनाले मइले यइलाइ तमरा वाँ लेया हु।”

¹⁹ रोम सहरका सेनापतिले तइको हात समाइबर ठोकाइ पलतिर लैजाइबर एकान्तमी सोध्यो, “तुइले मलाइ भण्नेइ कुरणी कि हो?”

²⁰ तइले भण्यो, “यहुदि अगुवानले पावलका बारेमि आजी निक्केरि सोधपुछ अद्द्या निउ अरिबर भोल तिनलाइ यहुदि महासभामि लेइदिय भणि तमनलाइ बिन्ति अद्द्या सल्लाह अरिराइछ।

²¹ रे तमले तिनरो बिन्ति जन माण्या, क्याकि तिननमि हइ चालिस भण्न्ना लगइ बड्ता मान्सनले पावललाइ नमारन्ज्या सम्म केइ नखान्या रे केइ नपिउन्या भण्न्या कसम खाइबर तिनलाइ माद्दाइलाइ लुकीबर बसिरइछन, आब तिनन तमरा आज्ञाको आसामि पखिरइछन।”

²² तब रोम सहरका सेनापतिले तइ जबान मान्सनलाइ इसो चेतावनी दिइबर पठायो, “तुइले मलाइ भणेइ कुरणी और कसइलाइ जन भणेइ।”

पावललाइ कैसरिया सहरमि पठाया

²³ तइ पछा रोम सहरका सेनापतिले दुइ जाना कप्तानलाइ बोलाइबर भण्यो, “आज रात नौ बजे तिर दुइ सय सिपाइ, सत्तरि जाना घोड सवार रे दुइ सय भाला भया सिपाइनलाइ कैसरिया सहरमि जानाइ बटेइ राख।

²⁴ रे पावलकिलाइ लगइ घोडो तयार अर, रे उनलाइ नीकेरि बचाइबर ठुला हाकिम फेलिक्सका वाँ पुर्या।”

²⁵ इति भणि सक्या पछा रोम सहरका सेनापतिले ठुला हाकिम फेलिक्सलाइ यिसो चिठ्ठी लेख्यो,

²⁶ “माननीय ठुला हाकिम फेलिक्सलाइ, म क्लौडियस लुसियसका तिर बठेइ अबिबादन छ!

²⁷ यइ मान्सलाइ यहुदि मान्सनले पकोडीबर माद्दाइ खोज्याथ्यो, तर मइले यो रोम सहरको मान्स रइछ भण्न्या था पाइबर फौजसित ताँइ पुगिबर यइलाइ छुटाया।

²⁸ कि अरोपमि तिननले यइलाइ दोस लाया रइछन भणि जाण्न्या इच्छाले मइले यइलाइ तिनरा यहुदि महासभामि लेया।

²⁹ तिननले आफ्ना यहुदि कानुनका प्रश्नका बारेमि यो दोस लाया रइछन। तर मइले यइ मान्समि ज्यानमारा रे झेल हाल्या सम्मको केइ दोस पाएइन।

³⁰ यइ मान्सका बिरोधमी केइ षड्यन्त्र हुन्नाछ भण्न्या कुरणी मलाइ था भयो, रे यइलाइ उतन्जेइ तमरा वाँ पठाउन्नाछु, रे यिनमि दोस लाउन्या यहुदि मान्सनलाइ लगइ तमराइ वाँ उजुरि अर भण्न्या आज्ञा दिइराइछु।”

³¹ उसइ रात सिपाइनलाइ रोम सहरका सेनापतिले दिया आज्ञा अन्सार सिपाइनले पावललाइ यरुशलेम सहर बठेइ लेया रे एन्टिपाट्रिसरा सहरमि पुगायो।

³² भोलिबार हिटबर जान्या सिपाइनले घोड सवार सिपाइनले पावलसित कैसरिया सहरमि लइजान्या जिम्मा दिइबर आफ यरुशलेम सहरमि भया सिपाइन बस्या ठाउँमि फर्क्या।

³³ कैसरिया सहर पुग्या पछा घोड सवारनले ठुला हाकिमलाइ चिठ्ठी बुजाइ दियो रे पावललाइ तिनरा जिम्मा लाइदियो।

³⁴ ठुला हाकिमले चिठ्ठी पडीसक्या पछा पावललाइ सोध्यो, “तेरो घर काँ हो? रे कइ प्रदेसमि पणन्छ?” पावलले भण्यो, “किलिकिया प्रदेसमि पणन्छ, हजुर।”

³⁵ पइ ठुला हाकिमले भण्यो, “तसो भयाले तुलाइ उजुरि अद्दया मान्सन आया पछा मान्तर तेरा कुरणी सुण्न्या हु।” तइ पछा उनले पावललाइ राजा हेरोदले बनाया दरबारमि राख भणबर आज्ञा दियो।