प्रेरित 22 - डोटेली नयाँ करार

¹ भाइन रे बा हो, तमरा अगाडी मइले आफना बारेमि भण्नु पड्या कुरणी आब सुण।

² पावलले हिब्रु भासामि बोल्या सुणिबर तिनन आजी चुप लाग्या।

³ पावलले भण्यो, “म यहुदि हु, मेरो जन्म किलिकिया प्रदेसको टार्सस सहरमि भया हो, तर यइ सहरमि मइले गमलिएल बठेइ तालिम पाया हु। हामरा पिता पुर्खाले माण्या कानुन अन्सार मइले पबित्र सास्त्रको शिक्षा नीक्केरि सिकिराइछु। आज तमन परमेश्वरमि जति समर्पित छौ, म लगइ उति समर्पित थ्या।

⁴ मइले यइ उद्दारका बाटामि लाग्या मान्सनलाइ मृत्यु सम्मइ सताया, पइ बैकान रे स्वानी मान्स दुएइलाइ बादिबर झेल हाल्दिया।

⁵ यहुदि प्रधान पुजारि रे सभामी भया जम्माइ यहुदि मान्सनका अगुवा लगइ मेरा पक्षमि गवाही दिन सक्दाहान। उननले मलाइ दमस्कस सहरमि भया यहुदि भाइनको नाउँमि चिठ्ठी दियो, रे तइ चिठ्ठीमि मलाइ प्रभु येशूमि बिश्वास अद्द्या मान्सनलाइ पकड्या अधिकार मिल्याथ्यो, तबइकिलाइ तिननलाइ बादिबर यरुशलेम सहरमि सजाय दिन्या उद्देश्यले दमस्कस गाउँमी जान्नाथ्या।”

⁶ “मेरा यात्रामि दमस्कस सहरमि पुगन्ज्या छाकलो भयाथ्यो, अचानक स्वर्ग बठेइ एक ठुलो ज्योति मेरा वलतिर पलतिर चम्क्यो,

⁷ रे म भय्यइनि लोट्या, पइ मइले यिसो भण्न्या आवाज सुण्या, ‘ए शाउल, ए शाउल, तु क्याइ मलाइ सताउनाछइ?’

⁸ पइ मइले सोध्या, ‘प्रभु, तम को हौ?’ उनले मलाइ भण्यो, ‘म नासरत गाउँको येशू हु, जइलाइ तु सताउन्नाछइ।’

⁹ तब मसित जति जाना लगइ थ्या, तिननले आवाज त सुण्यो, तर आवाजले मलाइ कि भण्यो त्यो तिननले बुजेइन।”

¹⁰ “मइले भण्या, ‘प्रभु, आब म कि अरु?’ पइ प्रभुले मलाइ भण्यो, ‘उठ, दमस्कस सहरमि जा, रे परमेश्वरले तुलाइ अद्दु पड्या कामको बारेमि तुलाइ ताँइ भणिन्या हो’

¹¹ तइ ज्योतिका चमकले म केइ धेक्द सकेइन, तब मसित भया साथिनले मेरो हात समाइबर दमस्कस सहरमि लेया।”

¹² “हननिया नाउँ भया एक जाना मान्स तइ सहरमि बसनथ्या। उन कानुन अन्सार चल्या भक्त मान्स थ्या, जइले ताँ बस्या सब यहुदि मान्सन बठेइ आदर पाइराइथ्यो।

¹³ उन मेरा वाँ आया, रे मेरा वाँलाइ कलिबर मलाइ भण्यो, ‘भाइ शाउल, आजी धेक्द्या हो।’ मइले तसइ बेला बठेइ धेक्द्या भया, रे हननियालाइ धेक्या।”

¹⁴ “तइ पछा तिनले मलाइ भण्यो, ‘हामरा पिता पुर्खाका परमेश्वरको इच्छा तमले जाण भणबर उनले तमलाइ छान्यो। तमले धार्मि सेवक येशूलाइ धेक्दपाया रे उनले भण्या कुरणी सुण्नाइकिलाइ तमलाइ छान्या छ।

¹⁵ क्याकि सब मान्सनका अगाडी उनरा निउति तमले जी धेक्या रे सुण्याछौ, तम तइको गवाही हुन्या हौ।

¹⁶ आब क्याकि पख्दाछौ? उठ, रे बप्तिस्मा लिय, आफ्ना पापको क्षमा पाउनाकिलाइ उनरा नाउँ लिय।’”

¹⁷ “म यरुशलेम सहरमि फर्किबर आया पछा मन्दिरमि प्रार्थना अद्दा-अद्दाइ मइले दर्सन धेक्या।

¹⁸ मइले प्रभुलाइ धेक्या रे प्रभुले मलाइ भण्यो, ‘छिटाइ यरुशलेम सहर बठेइ जा, क्याकि मेरा बारेमि तुइले दिया गवाही तिन मान्सन जो अइल याँ छन तिननले स्वीकार अद्द्या होइन।’”

¹⁹ “मइले भण्या, ‘प्रभु, मइले बुजेनकि यरुशलेम सहरमि यहुदि मान्सनले ममि बिश्वास क्याइ अरेइन, क्याकि मइले हरेक यहुदि सभाघरमी गइबर तममि बिश्वास अद्द्यालाइ झेल हाल्या रे हाण्या, यिन सबइलाइ थाइछ।

²⁰ तमरो गवाही दिन्या स्तिफनसको रक्तपात भइबर मारन्ज्या म ताँइ थ्या, उनरो हत्या अद्द्यासित सहमत भइबर तिनरा लत्ता परेइबर बसिरइथ्या।’”

²¹ “तब प्रभुले मलाइ भण्यो, ‘जा, क्याकि म तुलाइ गैर-यहुदि मान्सनका वाँ दुर-दुर सम्म पठाउन्या हु।’”

²² तिन मान्सनले पावलकि कुरणी याँ सम्म मान्तर सुण्यो, रे यिसो भण्नाइ उन जोरले कला हाल्ल पस्या, “यिसो मान्सलाइ मार। क्याकि त्यो बाच्या लायकको आथिन।”

²³ उननले आफना कोट चिद्दाइ रे आफ्नो रिस धेकाउकिलाइ धुलो उडाइबर कला हाल्ल पस्या।

²⁴ रोमी सेनापतिले आज्ञा अर्यो, “तइलाइ सिपाइनको बस्या ठाउँ भितर लेइबर आस, रे कोर्रा लाइबर यहुदि मान्सन क्याइ रिसाया रइछन रे तइका बिरोधमी कला हाल्ला छन भणबर उइलाइ सोध।”

²⁵ जब सिपाइनले कोर्रा लाइबर बाद्द लाग्या, तब पावलले नजिकै कलिया कप्तानलाइ सोध्यो, “कि दोस नभया रोमीलाइ कोर्रा लाउन न्याय अनसार ठीक छ?”

²⁶ कप्तानले यो सुण्या पछा रोम सहरका सेनापतिका वाँ आइबर यिसो भण्यो, “तम कि अद्दाइ बटिरइछौ? क्याकि यो मान्स त रोम सहरको रइछ।”

²⁷ तब रोम सहरका सेनापतिले आइबर पावललाइ सोध्यो, “मलाइ भण, कि तु रोम सहरको मान्स हइ?” तिनले भण्यो, “म हु।”

²⁸ रोम सहरका सेनापतिले जबाफ दियो, “मइले त भौत रुप्या तिरिबर रोम सहरको मान्स भया हु।” पावलले भण्यो, “तर म त जन्मइ बठेइ रोम सहरको मान्स हु।”

²⁹ पइ तिनलाइ सोधपुछ अद्दाइ बटीया सब मान्सन उतन्जेइ ताँ बठेइ गया, रे पावल एक रोम सहरका मान्स हुनाहुनाइ यिसेरी साङला बाद्दु लाया हुनाले तिन रोम सहरका सेनापति लगइ डरायो।

पावल सभाका अगाडी

³⁰ यहुदि मान्सनले पावललाइ क्याइ दोस लाया हुन, त्यो कुरणी रोम सहरका सेनापति बुज्ज चाहान्थ्या। तबइकिलाइ भोलिबार उनले मुख्य पुजारिन रे यहुदि महासभाका सब मान्सनलाइ बोल्याउन्या आज्ञा अर्यो, पइ पावललाइ लेइबर तिनरा अगाडी कल्यायो।