प्रेरित 21 - डोटेली नयाँ करार

यरुशलेम सहरको यात्रा

¹ हामले एफिसस सहरमि भया मण्डलिका अगुवान बठेइ बिदा लिइबर जहाजको यात्रा सुरु अर्या रे सिदाइ कोस भण्या टापुमि आया, अर्खा दिन रोडस टापुमि पुग्या, रे ताँ बठेइ पटरा टापुमि पुग्या।

² पइ फोनिके जिल्लामि जान्या एक जहाज मिल्यो रे हाम तइमि चडिबर गया, रे यात्रा सुरु अर्या।

³ हामरा बाँउतीर साइप्रस टापु धेकियो, हामले तइलाइ छाडिबर सिरिया प्रदेसतिर बड्डाइ गया रे टुरोस सहरमि पुग्या क्याकि ताँ जहाज बठेइ सामान उताद्दु पण्याथ्यो।

⁴ बिश्वासि शिष्यालाइ खोजबर भेट्या भया पछा हाम ताँ सात दिन सम्म बस्या रे तिननले पावललाइ मल्तिर यरुशलेम सहरमि जनजा भणबर पबित्र आत्माले भण्यो

⁵ सात दिन पछा जब ताँ बठेइ जान्या समय आयो, रे तइ ठाउँका प्रभुमि बिश्वास अद्द्या भाइन, बैनिन रे बच्चा लगइ हामलाइ सहर बठेइ बाइर पुर्याउन आया। हाम सबले समुद्रका किनारमी घुणा टेकिबर प्रार्थना अर्या, रे हाम एक अर्खा बठेइ बिदा भया।

⁶ तइ पछा हाम जहाजमि चड्या रे तिनन आफ्ना घर तिर फर्क्या।

⁷ टुरोस सहर बठेइ सुरु अर्या यात्रा पुरा अरिसक्या पछा हाम टोलेमाइस गाउँमी पुग्या, रे भाइनलाइ भेटबर तिननसित एक दिन बस्या।

⁸ भोलिबार ताँ बठेइ बिदा होइबर हाम कैसरिया सहरमि पुग्या, रे ताँ हामले सुसमाचार प्रचार अद्द्या फिलिपका घरमि बस्या, जो सात जनामि हइ एक थ्या, जइलाइ यरुशलेम सहरमि छान्या शिष्याले बिधवानको हेरचाह अद्दाइ छान्याथ्यो।

⁹ फिलिपकि चार जानि ब्या नअरेइ चेली थिन, तिननलाइ भविष्यवाणी बोल्या बरदान थ्यो।

¹⁰ हाम केइ दिन फिलिपका परिबारसित बसन्ज्या, यहुदिया प्रदेस बठेइ अगाबस नाउँ भया एक जना अगमबक्ता हामरा वाँ आया।

¹¹ उनले पावलको पेटी लेइबर आफना हात रे खुट्टा बादिबर भण्यो, “पबित्र आत्मा यिसो भण्नाहान, ‘यरुशलेम सहरमि गइबर यहुदि मान्सनले यो पेटिको मालिकलाइ यिसेरी बाद्या हुन रे गैर-यहुदि जातिका हातमि दिन्या हुन।’”

¹² यो कुरणी सुणबर हाम रे ताँ भया सब मान्सनले पावललाइ यरुशलेम सहर जन्जा भणि बिन्ति अर्यो।

¹³ तर पावलले जबाफ दियो, “तमन क्याइ यिसेरी रोइबर मेरो मनलाइ छ्याउ छ्याउ पाड्डाछौ? क्याकि प्रभु येशूका नाउँकि निउति बादिबर झेलमि पड्डु मान्तर होइन, तर प्रभुकि निउति यरुशलेम सहरमि मददु लगइ तयार छु।”

¹⁴ तिनलाइ माणाउन नसकिबर “प्रभुको इच्छा पुरा होउ” भणि हाम चुप लाग्या।

¹⁵ केइ दिन पछा आफ्ना सामान तयार अरिबर हाम यरुशलेम सहरतिर गया।

¹⁶ कैसरिया सहरमि प्रभुका शिष्या लगइ हामसित आया रे साइप्रस टापुमि एक जानो पुरानो शिष्य मनासोन नाउँ भया मान्सका घरमि बस्या।

पावल यरुशलेम सहरमि पुग्या

¹⁷ हाम जब यरुशलेम सहरमि पुग्या, तब भाइनले हामलाइ खुशी होइबर स्वागत अर्यो।

¹⁸ भोलिबार पावल हामलाइ लैजाइबर याकुबका वाँ गया, याकुबका घरमि सब मण्डलिका अगुवान जम्मा होइरइथ्या।

¹⁹ पावलले तिननलाइ अबिबादन अर्या पछा उनरो सेवा बठेइ गैर-यहुदि मान्सनका बिचमि परमेश्वरले कसा-कसा काम अर्याथ्यो, त्यो सब एक-एक अरिबर भणिदियो।

²⁰ यो सुणिबर तिननले परमेश्वरको महिमा अर्यो रे उनलाइ भण्यो, “हे भाइ, तम जाण्न्छौ, यहुदि मान्सनमि हइ कति हजार मान्सनले प्रभुमि बिश्वास अर्या छन रे तिनन मोशाको कानुनकि निउति जोसिला छन।

²¹ तिनन यहुदि बिश्वासीनले तमरा बारेमि और बठेइ बताया छन, गैर-यहुदि मान्सनका बिचइनि बस्या यहुदि मान्सनलाइ मोशाको कानुन छाडदिय रे तिनरा बच्चाको खतना जन अर रे यहुदि रिति अन्सार जन चल भणि सिकाउन्नाछन भण्न्या रैबार पाया छु।

²² आब हाम कि अद्दाउ? तम आयाछौ भण्न्या कुरणी तिननले पक्‍का सुणन्या हुन।

²³ तबइकिलाइ हाम तमलाइ जी भण्नाउ तसोइ अर, हामसित चार जाना मान्सन छन, जइले त्यो बाचा पुरा अद्दु छ, जो तिननले परमेश्वरका अगाडी अर्याथ्यो।

²⁴ तिननलाइ लैजा रे आफलाइ सुद्द अद्द्या रित पुरा अर, रे तिननलाइ चाहिन्या खर्च तमले ब्यहोर, रे तिननले आफना रौ खुण्याउन। यिसेरी तमले कानुन पालन अर्या धेकिबर तमरा बारेमि सुण्या केइ कुरणी सत्य रइनछन, भणबर सबले था पाउन्या हुन।

²⁵ तर प्रभु येशूमि बिश्वास अद्द्या गैर-यहुदि मान्सन, ‘मुर्तिलाइ चडाया खानाइ, सिकार रे रगत बठेइ अलग बस, व्यभिचार बठेइ अलग बस रे गलो अठ्यइबर मार्या पशुको सिकार जन खा’ भण्न्या पक्‍का अरि चिठ्ठी लेखबर पठाइ सक्या छु।”

²⁶ भोलिबार पावलले तिन चार जाना मान्सनसित गइबर आफलाइ सुद्द पाण्यो, रे उन शुद्दिकरणको दिन कब सकीन्या हो, रे तिननमि हइ हरेककिलाइ भेटी चढाइन्या छ भण्न्या खबर दिनाइलाइ मन्दिर भित्तर पस्या।

मन्दिरमि पावललाइ पकड्यो

²⁷ जब सात दिन पुरा हुन्नाथ्या, तब एसिया प्रदेशका यहुदि मान्सनले पावललाइ मन्दिरमि धेकिबर सब मान्सनलाइ उरेयो रे उनलाइ पकोड्यो।

²⁸ तिनन यिसो भणबर कला हाल्ल पस्या, “हे इस्राएल देशका मान्सन हो, सहयोग अर, मान्सनलाइ जाँ पायो ताँइ हामरा जातिलाइ मोशाको कानुन जन माण रे मन्दिरमि पुजा जन अर भण्न्या शिक्षा दिन्या यइ मान्स हो, इति मान्तर होइन, यइले गैर-यहुदि मान्सनलाइ लगइ मन्दिर भित्तर लेइबर यइ पबित्र ठाउलाइ असुद्द पाण्यो।”

²⁹ तिननले यिसो भण्यो, क्याकि यइहइ अगाडी पावललाइ एफिसस बासि त्रोफिमस नाउँ भया एक जाना मान्ससित धेक्याथ्यो, रे तिनलाइ पावलले मन्दिर भित्तर लेया हो भणि सुच्याथ्या।

³⁰ तब जम्माइ सहर भरि खलबल भयो रे मान्सन चारइ तिर बठेइ दकुडिबर आया, तिननले पावललाइ पकोडीबर मन्दिर बठेइ घसाणीबर बाइर लेयो रे उतन्जेइ ढोका बन्द अरदियो।

³¹ जब तिननले पावललाइ माद्दाइ बटिरइथ्या तब सब यरुशलेम सहरका मान्सनमि खलबल भयो भण्न्या कुरणीको रैबार रोमी हाकिमका वाँ पुग्यो।

³² रोमी हाकिमले उतन्जेइ सिपाइन रे कप्तानलाइ लेइबर तिनरा वाँ दकुडिबर पुग्या, भिडका मान्सनले तिननलाइ आया धेकबर पावललाइ हाण्न छाडयो।

³³ रोमी सेनापति नजिकै आइबर पावललाइ पकड्यो रे उनलाइ दुइ साङलाले बाद भणि आज्ञा दियो। पइ मान्सनलाइ सोध्यो, “यो को हो? रे यइले कि अर्याछ?”

³⁴ तर तइ भिडमि हइ कसइले एक कुरणी कसइले अर्खि कुरणी भणबर कला हाल्ल पस्या, रे उनले त्यो कला हाल्या हुनाले, कि घटना हो, त्यो था नपाया हुनाले पावललाइ सिपाइन बस्या ठाउँमि लैजान्या आज्ञा दियो।

³⁵ जब पावल सिढिमि पुग्या, तब भिडका मान्सनले तिनलाइ माद्दाइ आया, तब सिपाइले बोकिबर तइलाइ ताँ बठेइ लैया।

³⁶ तइ बेला सम्मलगइ मान्सन पावललाइ माददु पणन्छ भणबर कला हाल्लाइ पछा लाग्या।

पावलले भिडलाइ आफ्ना बारेमि भण्यो

³⁷ पावल सिपाइन बस्या ठाउँ भित्तर लैजान्ज्या पावलले रोमी हाकिमलाइ भण्यो, “हजुर, तमरो आज्ञा भयले म केइ भण्न चाहानाउ।” रोमी हाकिमले भण्यो, “कि तुलाइ ग्रीक भासा बोल्ल आउन्छ?

³⁸ कि तु तइ मिश्र देशको हइनि? जइले यिन दिन भण्ना पइल्ली खलबल मच्चायो रे सरकारको बिरोध अद्द्या चार हजार मान्सनलाइ उजाड ठाउँमि लैयाथ्यो?”

³⁹ तर पावलले भण्यो, “नइ, म एक यहुदि हु, म किलिकिया प्रदेसको टार्सस सहरको मान्स हु रे म तमलाइ बिन्ति अद्दउ मलाइ यिन मान्सनसित बोल्ल दिय।”

⁴⁰ जब उनले तिनलाइ बोल्या आज्ञा दियो, तब पावलले सिढिमि चणिबर मान्सनलाइ हातले सान्त बस भणि इसारा अर्यो, रे मान्सन बिलकुल सान्त भया पछा उनले यिसो भणबर तिननसित हिब्रु भासामि बोल्या।