प्रेरित 18 - डोटेली नयाँ करार

पावल कोरिन्थ सहरमि

¹ तइ पछा तिन एथेन्स सहर बठेइ बिदा होइबर कोरिन्थ सहरमि गया।

² तिनले पोन्टस प्रदेसमि बस्या अकिलास नाउँ भया एक जाना यहुदिलाइ भेट्यो। जो पोन्टस प्रदेसमि जन्मया थ्या, तिन आफनी स्वानी प्रिस्किलासित इटालिया प्रदेस बठेइ आइरइथ्या, क्याकि सम्राट क्लौडियसले सब यहुदि मान्सनलाइ रोम बठेइ निकलिबर जान्या आज्ञा दिइराइथ्यो। पावल तिननलाइ भेट्टाइ कोरिन्थ सहरमि गया।

³ पावल रे अकिलासको काम एकइ हुनाले तिन लगइ उनसित बस्या, रे काम अर्यो। क्याकि उनले लगइ तिनरो जसो पाल बनाउन्या काम अरन्थ्या।

⁴ पावल हरेक बिश्राम दिनमि यहुदि सभाघरमी वाद-बिबाद अरन्थ्या, यहुदि रे ग्रीक भासा बोल्या मान्सनलाइ येशू ख्रीष्टमी बिश्वास अद्दाइकिलाइ सम्जाउन्या कोशिस अरन्थ्या।

⁵ जब सिलास रे तिमोथी माकेडोनिया प्रदेस बठेइ आइपुग्या, पावल पाल बनाउन्या काम छाडिबर बचन प्रचारमि लागिरन्थ्या, रे यहुदि मान्सनलाइ येशूइ ख्रीष्ट हुन भणि तिन सिकाउथ्या।

⁶ पइ जब यहुदि मान्सनले बिरोध अरिबर खिस काट्ट पस्या, तब तिनले यो धेकाउनाइ कि परमेश्वर तिननसित रिसाया छन, भणि आफ्ना लत्तामि भया धुलो ट्ट्केइबर तिननलाइ भण्यो, “परमेश्वरको सन्देश इन्कार अर्या हुनाले तमन आफइ तइ दण्डकि निउति जिम्मेबार हुन्या हौ, जो तमनलाइ परमेश्वर बठेइ मिल्या छ। आब बठेइ म गैर-यहुदि मान्सका वाँ परमेश्वरको सन्देश प्रचार अद्द्या।”

⁷ तब तिन यहुदि सभाघर बठेइ बाइर गया। रे पावल परमेश्वरको आराधना अद्द्या गैर-यहुदि तितस युस्तस नाउँ भया मान्सका घर गैर-यहुदि मान्सनलाइ सिकाउनाइलाइ गया। उनरो घर सभाघरका नजिकै थ्यो।

⁸ यहुदि सभाघरको सासक क्रिस्पसका सब परिबारले प्रभुमि बिश्वास अर्यो, रे कोरिन्थी सहर मान्सनमि हइ लगइ भौतले पावलको सन्देश सुणिबर प्रभुमि बिश्वास अर्यो, रे बप्तिस्मा लियो।

⁹ एक रात दर्सनमि प्रभुले पावललाइ भण्यो, “जन डराइ, बोल्लोइ जा, रे चुप जन लागेइ,

¹⁰ क्याकि म तुसित छु, रे कसइले तुलाइ जाइ लागीबर नक्सान अद्द सक्द्या होइन, क्याकि यइ सहरमि मेरा भौत मान्सन छन। जो मेरा शिष्या बनि सक्या छन।”

¹¹ पइ परमेश्वरको बचन सिकाउनाइ पावल एक बर्ष छ मैना सम्म तिननसित बस्यो।

¹² जब गलियोन अखैया प्रदेसका हाकिम भया, तब यहुदि मान्सन मिलिबर पावललाइ जाइ लाग्या रे उनलाइ समाइबर अदालतमि हाकिमका वाँ लैजाइबर भण्यो,

¹³ “यइ मान्सले हामरो कानुनको बिरोधमी परमेश्वरको आराधना अद्दाइ मान्सनलाइ बिग्गाड खोज्जा छ।”

¹⁴ जब पावल बोल्लाइ बटिरइथ्या, तब गलियोन हाकिमले तिन यहुदि मान्सनलाइ भण्यो, “यहुदि मान्सन हो, यदि साच्ची यो केइ अन्याय कि दुष्ट अपराधकि कुरणी भया भयले मइले तमरि कुरणी सुण्नाइ ठिकै हुनेइथ्यो।

¹⁵ तर सब्द, नाउँ रे तमरो आफनोइ कानुनको सवाल भया हुनाले तमन आफइ बिचार अर। म यिसा कुरणीको न्याय अद्दाइ इन्कार अद्दउ।”

¹⁶ पइ गलियोन हाकिमले आज्ञा दियो कि तिननलाइ अदालत बठेइ धपाइ दिय।

¹⁷ तब तिनन सबले यहुदि सभाघरको सासक सोस्थेनेसलाइ समाइबर अदालतका अगाडी हाण्यो। तर गलियोन हाकिमले तइ कुरणीको केइ मतलबइ राखेइन।

प्रिस्किला, अकिलास रे अपोल्लोस

¹⁸ तइ पछा पावल भौत दिन सम्म कोरिन्थ सहरमि बस्या। तब भाइनसित बिदा होइबर तिन जहाजमि चडिबर सिरिया प्रदेसमि गया। तिनसित प्रिस्किला रे तइका बैकान अकिलास लगइ थ्या। केइ समय पइल्ली बाचा अर्या हुनाले पावलले किंक्रिया सहरमि आफना रौ खुडेयो।

¹⁹ पावल, प्रिस्किला रे तइका बैकान अकिलास एफिसस सहरमि पुग्या, पइ पावलले प्रिस्किला रे तइका बैकान अकिलासलाइ ताँइ छाड्यो, रे आफ चाइ एक यहुदि सभाघरमी पसिबर यहुदि मान्सनसित वाद-बिबाद अद्द पस्या।

²⁰ तब यहुदि मान्सनले तिनलाइ आजी केइ दिन बस्साइ बिन्ति अर्यो, तर तिनले इन्कार अर्यो।

²¹ तिननसित बिदा हुनज्या तिनले भण्यो, “परमेश्वरको मन भया, म आजी तमरा वाँ फर्किबर आउन्या हु।” तब तिन जहाजमि चड़िबर एफिसस सहर बठेइ गया।

पावलको तेसरो प्रचार-यात्रा

²² जब पावल कैसरिया सहरमि उतर्या तब मल्तिर उकलिबर यरुशलेम सहरका मण्डलिलाइ भेटघाट अर्यो रे अबिबादन अरिबर एन्टिओखिया सहरमि गया।

²³ तिन ताँ केइ दिन बसिबर एन्टिओखिया सहर बठेइ निकलिबर गलातिया प्रदेस रे फ्रिगिया जिल्ला होइबर सब शिष्यालाइ हौसला दिनाइ ठाउँ ठाउँमि गया।

²⁴ तइ समय अलेक्जेन्ड्रया सहरमि बस्या अपोल्लोस नाउँको एक जाना यहुदि एफिसस सहरमि आयो। तिन भौत नीकेरि बोल्ल जान्या मान्स थ्या, रे तिनलाइ पबित्र सास्त्रको भौत ज्ञान थ्यो।

²⁵ तिनले प्रभुका बारेमि शिक्षा पाइराइथ्यो, रे आत्मामी उत्साहित होइबर तिनले येशूका बारेमिका कुरणी ठीक-ठीकसित बोल्या रे सिकाउन्या अरन्थ्या। पइलगइ तिनले यूहन्नाले दिया बप्तिस्मा मान्तर जाणिराइथ्यो।

²⁶ तिन यहुदि सभाघरमी साहससित बोल्ल पस्या। तर तिनले बोलेइ कुरणी सुणिबर प्रिस्किला रे तइका बैकान अकिलासले तिनलाइ आफना घर लेयो, रे तिनले परमेश्वरको मुक्तिको तरिकालाइ नीकेरि भणबर तिननलाइ सम्जाइ दियो।

²⁷ अपोल्लोसले अखैया प्रदेशमि जानाइ मन अरन्ज्या भाइनले तिनलाइ ताँ जानाइ उत्साह दियो, रे तिनलाइ स्वीकार अरुन भणि ताँका शिष्यालाइ उत्साह दिइबर चिठ्ठी लेख्यो। अपोल्लोसले अखैया प्रदेशमि पुगिबर प्रभुको अनुग्रह बठेइ बिश्वास अद्द्यालाइ भौत सहयोग अर्यो।

²⁸ क्याकि ताँ तिनले बादबिबाद अरन्ज्या यहुदि मान्सनलाइ सक्तिशाली रुपमि मान्सनका अगाडी गलत साबित अरिबर पबित्र सास्त्र बठेइ यो साबित अर्यो कि येशूइ ख्रीष्ट हुन।