प्रेरित 17 - डोटेली नयाँ करार

थेसलोनिके सहरमि पावल रे सिलास

¹ पावल रे सिलास अम्फिपोलिस गाउँ रे अपोल्लोनिया गाउँको बाटो होइबर थेसलोनिके सहरमि आया। ताँ एक यहुदि सभाघर थ्यो।

² पावल आफना रित अन्सार तिनरा वाँ भितर गया, रे तीन हप्ता सम्म पबित्र सास्त्र बठेइ तिननसित वाद-बिबाद अद्दाइ रया।

³ ख्रीष्टलाइ अवश्य दु:ख भोग्दु रे मर्या बठेइ जिउना हुनु पणन्थ्यो, रे तिनइ येशूको बारेमि म तमनलाइ सुणाउनउ, उनइ ख्रीष्ट हुन भण्न्या कुरणीको मतलब खोलिबर तिनले साबित अरदियो।

⁴ तिननमि हइ केइ यहुदि मान्सन, परमेश्वरको डर माण्न्या भौत गैर-यहुदि मान्सन रे सम्मान पाया स्वानिनले प्रभुमि बिश्वास अरिबर पावल रे सिलाससित लाग्या।

⁵ तर डाहले भरिबर यहुदि मान्सनले सहरका फटाहा मान्सन जम्मा अरिबर हुल बनाइ सहरमि खलबल मचाउन पस्या, पइ यासोनका घरमि जाइलागीबर पावल रे सिलासलाइ मान्सनका अगाडी ल्याउनाइ खोज्यो।

⁶ तर तिननले पावल रे सिलासलाइ फेला पाड्ड नसकिबर तिननले यासोन रे कसइ कसइ भाइनलाइ सहरका हाकिमका वाँ यिसो भणबर जोरले बोल्लाइ घसेरिबर लेयो, “यिन मान्सन जइले संसारका सब ठाउँमि दु:ख दिराइछ, यिन याँ लगइ पुग्या।”

⁷ तिननलाइ यासोनले आफ्ना घरमि बास्साया छ, रे तिनन सबले येशू भण्न्या एक जाना अर्खाइ राजा छन, भणबर सम्राट कैसरका बिरोधमी काम अद्दा छन।

⁸ यिन कुरणी सुणिबर मान्सन रे सहरका हाकिम आत्तिया।

⁹ तिननले यासोन रे तिननसित भया और मान्ससित धरौटि लिइबर तिननलाइ छाडदियो।

बेरिया गाउँमी पावल रे सिलास

¹⁰ भाइनले उतन्जेइ पावल रे सिलासलाइ राता रात बेरिया गाउँमी पठाइदियो, पइ जब तिनन ताँ पुग्या तब तिनन यहुदि सभाघर भितरि पस्या।

¹¹ ताँका यहुदि मान्सन थेसलोनिके सहरका मान्सन हइ भौत निका थ्या, तिननले परमेश्वरको बचन खुशी भइबर सुण्यो, पावलले भण्या कुरणी ठीक छ कि आथिन भणबर तिननले दिना दिन पबित्र सास्त्र पडिबर छानबिन अरन्थ्या।

¹² तबइकिलाइ भौत यहुदि मान्सन, रे भौत ग्रीक भासा बोल्लया बैकान रे स्वानिनले लगइ प्रभुमि बिश्वास अर्यो।

¹³ तर जब परमेश्वरको बचन पावलले बेरिया गाउँमी लगइ प्रचार अर्या थेसलोनिके सहरका यहुदि मान्सनले था पायो, तब उन ताँ लगइ मान्सनलाइ खलबल मचाउनाइ पुग्या।

¹⁴ तब भाइनले उतन्जेइ पावललाइ समुद्रतिर पठाइदियो। तर सिलास रे तिमोथी ताँइ बेरिया गाउँमी बस्या।

¹⁵ पावललाइ पुर्याउन जान्या बिश्वासिन तिनसित एथेन्स सहर सम्म गया। तिन भाइन बेरिया गाउँमी फर्किबर गया, तर सिलास रे तिमोथी जति सक्यो छिटाइ तइका वाँ आउनु पणन्छ भण्न्या आज्ञा पाइबर तिनन फर्क्या।

एथेन्स सहरमि पावल

¹⁶ पावलले तिननलाइ एथेन्स सहरमि पखिरइथ्या, त्यो सहर मुर्ति मुर्तिले भरिया धेकिबर तिनरो मन भौत दुःखी भयो।

¹⁷ तबइकिलाइ तिनले यहुदि रे परमेश्वरको डर माण्न्या गैर-यहुदि मान्सनसित यहुदि सभाघरमी रे जति जाना सहरका बजारमि भेटिया तिनन सबसित दिन दिनइ वाद-बिबाद अरन्थ्या।

¹⁸ तिन शिक्षक जो इपिक्युरी रे स्तोइकी दार्सनिक भणबर चिनीन्थ्या, तिननमि हइ केइ मान्सनले लगइ तिनसित वाद-बिबाद अर्यो। तिनन केइ मान्सनले भण्यो, “यो भकभक्या कि भणन्छ?” और मान्सनले भण्यो, “कोइ और देबतानको प्रचार अद्दा छ।” क्याकि तिननले येशू मर्या बठेइ जिउना भया हुन भण्न्या बचन प्रचार अरन्थ्या।

¹⁹ तब तिननले तिनलाइ अरियोपागस नाउँको सभाघरमी लइय्या रे सोध्यो, “तमले दिया यो नयाँ शिक्षा कि हो, कि हाम जाँण्न सक्दाउ?

²⁰ क्याकि तम हामलाइ नयाँ कुरणी सुणाउनाछौ। तबइकिलाइ यिन कुरणीको मतलब कि हो? तइ हाम जाण्न चाहानाउ।”

²¹ सब एथेन्स सहरका मान्सन रे ताँ बस्या बिदेशी मान्सनले आफ्नो पुरा समय नयाँ-नयाँ कुरणीमि छलफल अरिबर बिताउन्थ्या।

²² पावलले अरियोपागस नाउँ भया सभाघरका बिचइनि कल्लिबर भण्यो, “एथेन्स सहरका मान्सन हो, तमन सब कुरणीमि भौत धर्मिलाइ प्रेम अद्द्या रइछौ।

²³ क्याकि घुम्दोइ जान्ज्या तमनले आराधना अद्द्या चिज मइले धेक्या छु। मइले एक यिसो बेदि लगइ भेट्या जइमि ‘न पछण्या देबताकि निउति’ भण्न्या लेख्या रइछ। तबइकिलाइ जइलाइ तमन नजाणिबर आराधना अरन्छौ, उइ परमेश्वरलाइ म तमरा बिचमि प्रचार अद्दउ।”

²⁴ “परमेश्वर, जइले संसार रे तइमि भया सब थोक बनायो, उन अग्गास रे धर्तिका प्रभु भया हुनाले उन हातले बनाया मन्दिरमि बस्साइन,

²⁵ उनलाइ कसइ मान्सनको सायताको खाचो आथिन। क्याकि उनइले सबलाइ जीवन, सास रे सब चिज दिनाहान।

²⁶ उनले एकइ मान्स बठेइ धर्तीमि बस्या सब मान्सनको हरेक जाति बनायो, रे तिननलाइ धरति भरि बस्स दियो। तिननले बाच्या समय रे बस्या ठाउँ पइल्ली बठेइ तोक्दियो।

²⁷ ताकि मान्सनले परमेश्वरलाइ खोजुन रे खोजीबर उनलाइ पाउन भणन्या आसामि इसो अर्यो। पइलगइ उन हाम बठेइ दुर आथिन।”

²⁸ क्याकि “उन हामसित छन, ताकि हाम उनमी जिउनाउ, रे उनमी इथउथ अद्दाउ रे उनमी हामरो अस्तित्व छ।” ठीक तसेरि जसेरि तमरा आफनाइ कबिले लगइ भणिराइछ, “हाम पक्‍का उनराइ सन्तान हौ।”

²⁹ तबइकिलाइ हाम परमेश्वरका सन्तान भया हुनाले, परमेश्वर सुन, चाँदी कि ढुङा जसा हुन भणि हामले सोच्चु होइन, यिन मान्सनका कला रे उनले सम्ज्या रुप मान्तर हुन।

³⁰ तबइकिलाइ परमेश्वरले मान्सनका नजाण्या बेलालाइ ध्यान दिएइन, तर आब हरेक ठाउँमि सब मान्सनलाइ पाप अद्द छाडिबर परमेश्वरतिर फर्क भण्न्या आज्ञा दिनाहान।

³¹ क्याकि उनले एक दिन तोकिराइछ, जइ दिन उनले आफइले छान्या एक जाना मान्स बठेइ न्यायसित इन्साफ अद्द्या हुन। उनलाइ सब मान्सनको न्याय अद्द्या अधिकार दिइराइछ, भण्न्या सपुत सब मान्सनलाइ दिय भणबर परमेश्वरले उनलाइ मर्या बठेइ जिउनो बनायो।

³² जब तिननले मर्या बठेइ जिउना हुन्या बारेमि सुण्यो, तब कसइ-कसइले खिसि काट्यो। तर औरले हाम आजी यइ कुरणी सुण्नाउ भण्यो।

³³ तइ पछा पावल तिनरा बिचइनि बठेइ गया।

³⁴ तर केइ मान्सन तिनसित लाग्या, पइ प्रभुमि बिश्वास अर्यो। तिननमि हइ अरियोपागासका नाउँ भया सभाघरमी डियनुसियस नाउँको सदस्य, दामारिस नाउँ भएइ एक स्वानी, रे केइ और मान्सनले लगइ प्रभुमि बिश्वास अर्यो।