प्रेरित 16 - डोटेली नयाँ करार

पावल रे सिलाससित तिमोथीको भेट

¹ पावल रे सिलास डर्बि सहर रे लुस्त्रा सहरमि लगइ आया। ताँ प्रभुमि बिश्वास अद्द्या तिमोथी नाउँ भया एक जाना शिष्य थ्या। तिन एक यहुदि बिश्वासि स्वानिको चेला थ्या, तर तिनरा बा भण्या ग्रीक देशमि बस्यावाला थ्या।

² लुस्त्रा सहर रे आइकोनियन सहरमि भया भाइनले तिमोथीलाइ निको मान्स भणनथ्या।

³ तिनलाइ पावलले आफसित लैन्या मन अर्यो। तिन ठाउँमि रन्या यहुदि मान्सनका लाग्दा पावलले तिनलाइ लैजाइबर खतना अर्यो। क्याकि तिनरा बा ग्रीक देशमि बस्यावाला हुन भण्न्या उन सबलाइ थाथ्यो।

⁴ आब पावल रे पावलका साथी गाउँ गाउँको बाटो होइबर जान्ज्या तिननले यरुशलेम सहरका येशू ख्रीष्टका छान्या शिष्या रे मण्डलिका अगुवानले अर्या फैसला बिश्वासिनलाइ पालना अर भणि सुणाइ दियो।

⁵ यिसेरी मण्डलिका मान्सन बिश्वासमि बलिया हुनाइ रे संख्यामि दिन दिनै बड्डाइ गया।

माकेडोनिया प्रदेस जान्या दर्सन

⁶ पबित्र आत्मा बठेइ एसिया प्रदेसमि बचन प्रचार अद्द जन जा भण्या हुनाले पावल, सिलास रे तिमोथी फ्रिगिया जिल्ला रे गलातिया प्रदेस होइबर गया।

⁷ माइसिया प्रदेसको सिमाना आया पछा तिननले बेथिनिया गाउँ तिर जान्या बिचार अर्यो। तर येशूका आत्माले तिननलाइ जान दिएइन।

⁸ तब माइसिया प्रदेस होइबर तिनन त्रोआस सहरमि गया।

⁹ तसइ रात पावललाइ एक दर्सन भयो माकेडोनिया प्रदेसमि बस्या एक जानो मान्स कल्लिबर तिनलाइ बिन्ति अद्दाथ्यो, “समुद्रको पारिबटा ओलीबर माकेडोनिया प्रदेसमि आस, रे हामलाइ सायता अर।”

¹⁰ जब तिनले यो दर्सन पायो, उतन्जेइ हाम माकेडोनिया प्रदेस जानाइ तयार भया। हामले यो पक्‍का अर्या कि तिननलाइ सुसमाचार प्रचार अद्दाइ परमेश्वरले हामलाइ बोलाया रइछ।

फिलिप्पी सहरमि लिडीयाले येशूमि बिश्वास अर्या

¹¹ तब हाम त्रोआस सहर बठेइ जहाजमि चडीबर सिदाइ सामोथ्राके टापुतिर लाग्या, रे भोलिबार नियापोलिस सहरमि पुग्या।

¹² रे ताँ बठेइ फिलिप्पी सहरमि पुग्या, जो माकेडोनिया प्रदेसको ठुलो सहर थ्यो, रे त्यो रोमी मान्सनको कब्जामी थ्यो। हाम तइ सहरमि केइ दिन बस्या।

¹³ आब बिश्राम दिनमि सहरका ढोका बठेइ बाइर नदिका किनार गया, क्याकि ताँ यहुदि मान्सन प्रार्थना अद्द्या ठाउँ छ भणि हामले अनुमान लाइराइथ्या, रे ताँइ हाम बस्या रे जम्मा भएइ स्वानीनसित कुरणीकानी अद्द पस्या।

¹⁴ पइ थिआटीरा सहर बस्सेइ, बैजनि रङ भया लत्ताको ब्यापार अद्देइ लिडिया नाउँकि परमेश्वरको आराधना अद्देइ एक स्वानिले हामरा बचन सुण्यो। पावलले बोल्या कुरणी मन लाइबर सुणुन भणबर प्रभुले तइको मन खोलि दीयाथ्यो।

¹⁵ जब तइको रे तइका घरका सबको बप्तिस्मा भयो, तब तइले हामलाइ बिन्ति अरि, “यदि तमनले मलाइ प्रभुमि बिश्वास अद्देइ बइनि माणन्छौ भण्या मेरा घर आइबर बस।” रे तइले हामलाइ कर अद्द पसि।

पावल रे सिलास झेलमि

¹⁶ जब हाम प्रार्थना अद्द्या ठाउँमि जान्नाथ्या, ताँ एक नौकरनी केटीसित हामरो भेट भयो, जइमि एक यिसो भूत आत्मा थ्यो, जइको सहयोग बठेइ भबिष्यकि कुरणी भणीदिनथि रे तइका मालिकका निउति भौत कमाइ दिन्थि।

¹⁷ त्यो पावल रे हामरा पछा लागी, रे यिसो भणबर जोरले कला हाल्ल पसि, “यिन मान्सन ठुला परमेश्वरका सेवक हुन। यिननले तमनलाइ मुक्तिको बाटो धेक्‍काउन्नाछन।”

¹⁸ तइले भौत दिन सम्म इसोइ अर्यो। तब पावलले दिक्‍क माणिबर फनक्‍क फर्किबर तइ भूत आत्मालाइ भण्यो, “येशू ख्रीष्टका नाउँमि म तुलाइ तइ बठेइ निकल्ल्या आज्ञा अद्दउ।” पइ त्यो भूत आत्मा तसइ बेला निकल्यो।

¹⁹ तर तइका मालिकले तिनरा कमाइको आसा टुट्या धेकिबर तइले पावल रे सिलासलाइ समाइबर सहरका चोक बठेइ हाकिमका वाँ तानिबर लइय्यो।

²⁰ पइ तिननलाइ सहरका हाकिमका वाँ लेइबर भण्यो, “यिन मान्सन यहुदि हुन, यिनले हामरा सहरमि उपद्दर मचाइबर दु:ख दिन्ना छन।

²¹ यिन यिसा-यिसा रित सिकाउना छन जो हाम रोमीकिलाइ ठीक आथिन।”

²² तब मान्सन मिलिबर पावल रे सिलासमि जाइ लाग्या। सहरका हाकिमले तिनरा लत्ता चिरिबर कोर्राले हाण्न्या आज्ञा दियो।

²³ तिननले पावल रे सिलासलाइ भौत हाण्या पछा तिननलाइ झेलमि हाल्दियो, रे झेलका हाकिमलाइ यिन कैदीनलाइ कडा निगरानीमि राख्द्या आज्ञा दियो।

²⁴ यिसो आज्ञा पाइबर झेलका हाकिमले तिननलाइ झेलको सबहइ भितरा कोठामी लैजाइबर तिनरा खुट्टामी काठका साङलाले बेडदियो।

²⁵ तर अधरात पावल रे सिलास प्रार्थना अद्दाइ परमेश्वरको भजन गाउनाथ्या, रे और कैदिनले यो सुणिरइथ्या।

²⁶ तब उतन्जेइ एक ठुलो भुइँचालो गयो, रे झेलका जग हलिया, रे उतन्जेइ जम्माइ ढोका उगड्या, रे सबका साङला खुल्या।

²⁷ झेलको हाकिम निन बठेइ बिउज्यो, रे झेलका सब ढोका उगड्या धेकिबर कैदिन सब भाग्या भणि सोचिबर उइले आत्माहत्या अद्द्या बिचारले आफ्नो तरबार समायो।

²⁸ तर पावलले जोरले यिसो भण्नोइ कला हाल्यो, “तम आफइलाइ केइ नोक्सानी जन अर, हाम सब याँइ छौ।”

²⁹ तब बत्ति मागिबर झेलको हाकिम दकुडिबर भितर आयो, रे डरले काम्दोइ पावल रे सिलासका अगाडी घोप्टो पड्यो।

³⁰ पइ तिननलाइ बाइर लेइबर उइले भण्यो, “उद्दार पाउनाइलाइ मइले कि अददु पणन्छ?”

³¹ पइ तिननले भण्यो, “प्रभु येशू ख्रीष्टमी बिश्वास अर, पइ तम रे तमरा परिबारले उद्दार पाउन्या हौ।”

³² तिननले उइलाइ रे उइका घरमि भया सब मान्सनलाइ प्रभुको बचन सुणायो।

³³ तब रातका तसइ बेला उइले तिननलाइ लैजाइबर तिनरा घा धोइदियो। पइ उ रे उइका मौले उतन्जेइ बप्तिस्मा लियो।

³⁴ तइ पछा तिननलाइ घर लेइबर तिनरा अगाडी खानाइ राख्दियो, रे परमेश्वरमि बिश्वास अरबर उन सब भौत आनन्दित भया।

³⁵ भोलिबार ब्याहानइ हाकिमले पावल रे सिलासलाइ छाडदिन्या आज्ञा दियो।

³⁶ तब झेलका हाकिमले पावललाइ यिन कुरणी भण्यो, “सहरका हाकिमले तमनलाइ छाडिदिन्या आज्ञा दिइराइछ। तबइकिलाइ आब निकलिबर सान्ति सित जा।”

³⁷ पइ पावलले तिननलाइ भण्यो, “हाम रोमी हुनाहुनाइ लगइ तिननले हामरो केइ दोस नपाइबर मान्सनका अगाडी हामलाइ हाण्यो, झेल हाल्यो, रे आब हामलाइ गोप्यमी निकाल्लाइ खोज्जा छन? यो हुन सक्दैन। उन आफइ आउन रे हामलाइ निकालिबर लैजाउन।”

³⁸ तिन सिपाइनले हाकिमलाइ यिन कुरणी सुणायो। पावल रे सिलास त रोमी रइछन भण्न्या सुणिबर तिनन डराया।

³⁹ तिनन आइबर पावल रे सिलाससित माफि माग्यो, रे तिननलाइ बाइर लैजाइबर सहर छाड्ड्या बिन्ति अर्यो।

⁴⁰ रे तिनन झेल बठेइ बाइर निकलिबर लिडियाका घर गया, रे बिश्वासिन भाइनसित भेटघाट अर्या पछा तिननलाइ उत्साह दिइबर ताँ बठेइ गया।