प्रेरित 15 - डोटेली नयाँ करार

यरुशलेम सहरको सभाघर

¹ आब केइ यहुदि बिश्वासीनले यहुदिया जिल्ला बठेइ एन्टिओखिया सहरमि आइबर बिश्वासि भाइनलाइ यिसो सिकाउन पस्या, “तमनले मोशाको कानुनको अन्सार खतना अर्यानु भण्या तमनले उद्दार पाउन सक्दाहान।”

² तब तिनन मान्सनसित पावल रे बारनाबासको बड्ताइ मतभेद रे वाद-बिबाद भया पछा, ताँका बिश्वासि मान्सनले पावल, बारनाबास रे और कति जाना मान्सनलाइ यइ प्रस्नको फैसलाकि निउति येशू ख्रीष्टका छान्या शिष्या रे मण्डलिका अगुवानका वाँ यरुशलेम सहर जानाइ निउति नियुक्त अर्यो।

³ मण्डलिका मान्सनले तिननलाइ रुप्प्या रे खानाइ दिइबर ताँ बठेइ बिदा अर्यो। तिनन फोनिके जिल्ला रे सामरिया जिल्ला बठेइ होइबर जान्ज्या कसेरी गैर-यहुदि मान्सनलाइ सुसमाचार सुणाइबर बिश्वासि बन्नाछन भणन्या कुरणी सुणबर सब भाइन भौत खुशी भया।

⁴ जब पावल रे बारनाबास यरुशलेम सहरमि पुग्या, तब तिननलाइ मण्डलि, येशू ख्रीष्टका छान्या शिष्या रे मण्डलिका अगुवानले स्वागत अर्यो। परमेश्वरले तिननसित अर्या सब कुरणी तिननलाइ ताँ भण्यो।

⁵ तब फरिसि मान्सनका दलका केइ बिश्वास अद्द्याले कलिबर भण्यो, “गैर-यहुदि मान्सन बठेइ आउन्या येशू ख्रीष्टका शिष्याले यहुदि रित अन्सार खतना हुनुइ पणन्छ रे तिननलाइ मोशाको कानुन पुराइ पालना अद्द लाउनु पणन्छ।”

⁶ यइ बारेमि सोच-बिचार अद्दाइलाइ येशू ख्रीष्टका छान्या शिष्या रे मण्डलिका अगुवान जम्मा भया।

⁷ भौत वाद-बिबाद भया पछा पत्रुसले कल्लिबर तिननलाइ भण्यो, “भाइन हो, तमनलाइ थाइछ, सुरुका दिनमि कसेरी परमेश्वरले म बठेइ गैर-यहुदि मान्सनले सुसमाचारको बचन सुणुन रे बिश्वास अरुन भणि तमरा बिच बठेइ मलाइ छान्यो।

⁸ सब मान्सनका मनकि कुरणी जाण्न्या परमेश्वरले तिननलाइ लगइ हामलाइ जसो पबित्र आत्मा दिइबर उनले धेकायो कि उनले तिननलाइ आफ्ना मान्सनका रुपमि स्वीकार अर्याछ।

⁹ उनले यहुदि रे गैर-यहुदि मान्सनका बिचइनि केइ भेदभाव राखेइन, तर परमेश्वरले तिनरा मन बिश्वास बठेइ सुद्द पाड्यो।

¹⁰ तबइकिलाइ हामरो यहुदि कानुन रे रितको पालन अद्दाइकिलाइ यिन गैर-यहुदि बिश्वासीमि ठुलो भारि राखिबर क्याइ परमेश्वरको परिक्षा अर्न्छौ, जइलाइ न त हामरा पुर्खानले न त हामले बोक्द सक्या।

¹¹ हामले यिसो अद्दु निको होइन, तर हाम बिश्वास अद्दाउ कि, मोशाको कानुन पालना अरबर होइन तर प्रभु येशूको अनुग्रह बठेइ हामले उद्दार पाइराइछौ।”

¹² तइ बेला सभामी भया सब मान्सन चुप लाग्या, रे बारनाबास रे पावलले गैर-यहुदि मान्सनका बिचइमि परमेश्वरले तिनन बठेइ अर्या चमत्कारी चिन्ह रे अचम्मका कामका बारेमि बताउन्ज्या ताँ भया सब मान्सनले ध्यान दिइबर सुण्यो।

¹³ जब तिननले बोलिसक्या पछा याकुबले भण्यो, “भाइन हो, मेरा कुरणी सुण,

¹⁴ सिमोन भणिन्या पत्रुसले सम्जाया छ कि, परमेश्वरले आफनाइ नाउँका निउति गैर-यहुदिनमि हइ केइ मान्सनलाइ आफ्नो मान्सन हुनाइलाइ छान्यो।

¹⁵ इसइ कुरणीसित अगमबक्तानको बचन लगइ मिल्लाहान, जसो लेखिरइछ,

¹⁶ ‘यिन कुरणी पछा म फर्कन्या हु, रे राजा दाउदको राज्य जो उनरो सत्तुर बठेइ नास भया छ, त्यो राज्यलाइ आजी म सक्तिशाली बनाउन्या हु,

¹⁷ रे बाँकि मान्सनले परमप्रभुलाइ खोज्ज सकुन, रे सब गैर-यहुदि लगइ, जइलाइ मइले आफ्नो मान्सन हुनाइ छान्या छु।

¹⁸ यिन कुरणी परमप्रभु भण्नाहान, जइले सृष्टिको सुरु बठेइ यिन कुरणी जाणिराइछ।’”

¹⁹ “तबइकिलाइ मेरो फैसला यो छ, कि परमेश्वरका वाँ आउन्या गैर-यहुदि मान्सनलाइ जबरजस्ती अरबर हामरो सब यहुदि कानुन रे रितलाइ माण्नुइ पण्न्छ, भणि दु:ख जनदिउ,

²⁰ तर यिन कुरणी हाम एक चिठ्ठीमि लेखबर पठाउनाउ, ‘कि तिनन मुर्तिलाइ चडाया खानाइ रे व्यभिचार बठेइ अलग रउन, गलो अठ्यइबर मार्या पशुको सिकार रे रगत जन खाउन।’

²¹ क्याकि पइल्लिका पुस्ता बठेइ गाउँ-गाउँमी मोशाको कानुन प्रचार होइरइछ, क्याकि यो हरेक यहुदि सभाघरमी हरेक बिश्राम दिनमि पणन्छ।”

गैर-यहुदि बिश्वासिलाइ लेख्या चिठ्ठी

²² तब छान्या शिष्या, मण्डलिका अगुवान रे यरुशलेम सहरका सब मण्डलि मिलिबर आफना बिच बठेइ केइ मान्सनलाइ छानिबर पावल रे बारनाबाससित एन्टिओखिया सहरमि भया मण्डलिमि पठाउनाइ ठीक माण्यो, रे बिश्वासि भाइनमि हइ भौत सम्मान पाया मान्सन यहूदा भणिन्या बारनाबास रे सिलासलाइ छान्यो।

²³ रे यहूदा भणिन्या बारनाबास रे सिलाससित तिननले यो चिठ्ठी पठायो, “एन्टिओखिया सहर, सिरिया प्रदेस रे किलिकिया प्रदेसमि रन्या गैर-यहुदि बिश्वासि भाइनलाइ, येशू ख्रीष्टका छान्या शिष्या रे मण्डलिका अगुवानको अबिबादन।

²⁴ हामले सुणिराइछौ, कि हामरा बिचइनिका कसइ कसइ मान्सनले हामरो आदेस बिना तमनलाइ उल्टो शिक्षा दिइबर तमनलाइ भौत कुरणीमि दु:ख दिइराइछ।

²⁵ तबइकिलाइ हाम सबले अर्या फैसला अन्सार केइ बैकान मान्सनलाइ छान्या, तिननलाइ हामरा प्यारो बारनाबास रे पावलसित तमरा वाँ पठाउनु हामलाइ ठीक लाग्यो।

²⁶ यिन मान्सन यिसा हुन, जइले हामरा प्रभु येशू ख्रीष्टकी निउति आफ्नो ज्यान खतरामी पाडिराइछ।

²⁷ तबइकिलाइ हामले यहूदा रे सिलासलाइ पठाइराइछौ। तिननले तेइ कुरणी भेटीबर बताउन्या हुन।

²⁸ क्याकि पबित्र आत्मा रे हामलाइ यो ठीक लाग्यो, कि यिन जरुरी कुरणी बाहेक और बड्ता बोज तमनलाइ बोकाउनु हुनइन।

²⁹ कि तिनन मुर्तिलाइ चडाया खानाइ रे व्यभिचार बठेइ अलग रउन, गलो अठ्यइबर मार्या पशुको सिकार रे रगत जन खाउन रे यिन कुरणी बठेइ अलग रया भण्या असल हुन्या हो।”

³⁰ पइ बिदा भया पछा तिनन एन्टिओखिया सहरमि गया, रे ताँ भया मण्डलिका सब मान्सनलाइ बोलाइबर तइ चिठ्ठी दियो।

³¹ चिठ्ठीमि भएइ उत्साहकि कुरणी पडिबर तिनन खुशी भया।

³² यहूदा रे सिलास आफइ लगइ अगमबक्ता भया हुनाले बिश्वासि भाइनलाइ भौत बचन बठेइ उत्साह दिइबर तिननलाइ तकड़ा बनायो।

³³ यहूदा रे सिलास केइ दिन ताँइ बस्या पछा, ताँइका बिश्वासि भाइनले तिननलाइ आशिस दिइबर यरुशलेम सहरको मण्डलिका वाँ फिर्ता पठायो।

³⁴ तर सिलासले एन्टिओखिया सहरमि बस्या फैसला अर्यो, तबइकिलाइ यहूदा एक्‍कलाइ यरुशलेम सहरमि फिर्ता गया।

³⁵ पावल रे बारनाबास चाइ सिकाउनाइ रे प्रभु यशूको बचन प्रचार अद्दाइ और भौत जाना बिश्वासीनसित एन्टिओखिया सहरमि बस्या।

पावलको दोसरो प्रचार-यात्रा

³⁶ केइ दिन पछा पावलले बारनाबासलाइ भण्यो, “आइ, जइ-जइ सहरमि प्रभु येशूको बचन हामले प्रचार अरिराइथ्या, तिन सहरमि फर्किबर बिश्वासि भाइनलाइ भेट्टाउ रे तिनन कि कसा छन हेद्दाउ।”

³⁷ बारनाबासले मर्कुस भणिन्या यूहन्नालाइ तिननसित लइजान्या मन अर्यो।

³⁸ तर पावलले मर्कुसलाइ लैजानु ठीक माणेइन, क्याकि तिन पामफिलिया जिल्ला बठेइ तिननसित छुटिबर गइरइथ्या, रे तिननसित काममी गया थेइन।

³⁹ पावल रे बारनाबासका बिचइनि इति ठुलो मतभेद भयो कि, तिनन एक-अर्खा बठेइ छुटिया, रे बारनाबास मर्कुसलाइ आफसित लैजाइबर साइप्रस टापुतिर गया।

⁴⁰ तर पावलले सिलास छान्यो, पइ बिश्वास अद्द्या भाइनलाइ परमेश्वरको अनुग्रहमी छाडबर बिदा भया।

⁴¹ आजी तिनन सिरिया प्रदेस रे किलिकिया प्रदेसमि गया, रे मण्डलिका बिश्वासिनलाइ उत्साह दिनाइ गया।