प्रेरित 14 - डोटेली नयाँ करार

आइकोनियन सहरमि पावल रे बारनाबास

¹ आब आइकोनियन सहरमि यिसो भयो, पावल रे बारनाबास यहुदि सभाघर भितर पस्या रे यिसेरी बोल्या कि यहुदि रे गैर-यहुदि मान्सन बठेइ भौतले येशू ख्रीष्टमी बिश्वास अर्यो।

² तर बिश्वास नअद्द्या यहुदि मान्सनले गैर-यहुदि मान्सनलाइ उर्यायो रे तिननले बिश्वासि भाइनको बिरोध अर्यो।

³ प्रभुका निउति साहससित बोल्लाइ भौत बेर सम्म पावल रे बारनाबास ताँइ रया। प्रभुले तिनन बठेइ चमत्कारी चिन्ह रे अचम्मका काम अराइबर तिननले यो साबित अर्यो कि यइ अनुग्रहका बारेमि तिनरो सन्देश साच्ची थ्यो।

⁴ तइ सहरका मान्सनमि फाटो आयो रे कोइ यहुदि मान्सनतिर कोइ येशू ख्रीष्टका छान्या शिष्या तिर लाग्या।

⁵ जब गैर-यहुदि रे यहुदि दुएइ मान्सनले आफना हाकिमसित मिलिबर तिननलाइ सतायो रे माद्दाइलाइ ढुङाले हाण्यो।

⁶ तब यो कुरणी था पाइबर तिनन लुकोनिया जिल्लाका लुस्त्रा सहर रे डर्बि सहरका वलतिर पल्तिरका गाउँमी भाग्या।

⁷ रे ताँ तिननले सुसमाचार प्रचार अर्यो।

लुस्त्रा रे डर्बि सहरमि

⁸ पइ लुस्त्रा सहरमि आफनी इजाका गर्भइ बठेइ डुणो जन्म्या एक मान्स थ्यो, जो खुट्टा चलाउन सकनथेइन रे उ कभइ हिट्या थेइन।

⁹ तइले पावललाइ बोल्लार्या सुण्न्नाथ्यो, पावलले तइलाइ एकहोरो हेर्यो रे तइ मान्सले “म लगइ निको हुन सक्दउ” भणि बिश्वास अर्याछ भण्न्या पावलले था पायो।

¹⁰ रे पावलले कला हालिबर भण्यो, “आफना खुट्टामी सिदा कल्ले” पइ यिसो भणन्जेइ त्यो मान्स जुरुक्‍क उठ्यो रे हिट्ट लाग्यो।

¹¹ जब मान्सनले पावलले अर्या तिन कुरणी धेक्यो तब तिननले लुकोनिया जिल्लाको भाषामि इसो भणबर जोरले कला हाल्यो, “देबता मान्सका रुपमि हामरा वाँ ओलीबर आइरइछन।”

¹² पइ तिननले बारनाबासलाइ जिउस देबता रे पावललाइ हेर्मेस देबता भण्यो क्याकि उन ताँका सन्देश दिन्या मुख्य बक्ता थ्या।

¹³ तब जिउसका पुजारिनले जइको मन्दिर तिनरा सहरकाइ अगाडीतिर थ्यो मुल ढोकामि गोरु रे फुलका माला ल्यायो रे ताँका मान्सनसित मिलिबर बलिदान चढाउन्या इच्छा अर्यो।

¹⁴ तब छान्या शिष्याले अर्थात बारनाबास रे पावलले यो कुरणी सुण्या पछा तिनन भौत दुःखी भइबर तिननले आफना लत्ता आफइ चिर्यो रे कला हालिबर मान्सनका बिचइनि गया रे भण्यो,

¹⁵ “होइन, तमन क्याकि इसा कुरणी अरन्छौ? हाम त तमन जसाइ दु:ख सुख भोग्द्या मान्सन हउ रे ब्यर्थका कुरणी बठेइ जिबित परमेश्वरतिर फर्क भणन्या तमनलाइ सुसमाचार सुणाउनाउ, उनले अग्गास, धर्ति, समुद्र रे तिनमि भएका सब चिज बनायो।

¹⁶ उनले गया समयमि सब पुस्ताका जातिलाइ तिनरा आफन आफनाइ बाटामि हिट्ट दियो।

¹⁷ पइलगइ उनले सदाइ आफ्नो अस्तित्वको गवाही उनले निका कुरणी बठेइ दियो, जो उन अरन्थ्या। जो कि अग्गास बठेइ बर्सा रे फल लाग्द्या ऋतु दिइबर तमरा निउति खानाइ रे तमरा मनलाइ आनन्दले भरिदियो।”

¹⁸ पइ यिन कुरणी भणबर तिननले आफलाइ चढाउन्या बलिदानलाइ बडा मुस्किलले रोक्यो।

¹⁹ पइ एन्टिओखिया सहर रे आइकोनियन सहर बठेइ केइ यहुदि मान्सन ताँ आया रे ताँका मान्सनलाइ उरेइबर पावललाइ ढुङाले हाण्यो रे उन मर्यारइछन सुचिबर उनलाइ सहर बठेइ खड्काइबर बाइर लैया।

²⁰ तर जब प्रभुका शिष्या तिनरा वलतिर पलतिर कल्लिया पइ उन उठ्या रे सहर भितर गया रे भोलिबार बारनाबाससित डर्बि सहरतिर लाग्या।

²¹ पावल रे बारनाबासले मान्सनलाइ सुसमाचार सुणाइबर भौत मान्सनलाइ शिष्या बनाइबर पावल रे बारनाबास आफ्ना बाटा होइबर फर्किन्नाथ्या, तिनन आजी लुस्त्रा सहर, आइकोनियन सहर रे पिसिदिया प्रदेसको एन्टिओखिया सहरमि फर्क्या।

²² रे शिष्याले हरेक गाउँका मान्सनको मनलाइ बनाउनाइ बिश्वासमि रइरनु पणन्छ भणि साहास दियो, रे भौत दुख कष्ट सइबर हामले परमेश्वरको राज्यमि पस्सु पणन्छ भणबर सिकायो।

²³ पइ हरेक मण्डलिमि तिनरा निउति मण्डलिका अगुवान नियुक अरिबर उपवास रे प्रार्थना अरिबर तिननलाइ प्रभु येशूलाइ सुम्पिदियो। जइमि तिननले बिश्वास अर्याथ्यो।

²⁴ पइ पिसिदिया प्रदेस बठेइ होइबर तिनन पामफिलिया जिल्लामि फर्किबर आया।

²⁵ पइ पामफिलिया जिल्लाको पर्गा सहरमि परमेश्वरको बचन प्रचार अर्यो रे तिनन आजी अटालिया सहरमि गया।

²⁶ पइ ताँ बठेइ तिनन जहाजमि चडिबर एन्टिओखिया सहरमि गया, जा बठेइ तिननले परमेश्वरको अनुग्रह दिइबर तइ कामकी निउति पठायाथ्यो, जइ काम तिननले पुरा अरबर फर्क्याथ्या।

²⁷ तिनन एन्टिओखिया सहरमि पुग्या पछा, तिननले मण्डलिका सब मान्सनलाइ बोलायो। परमेश्वरले तिनन बठेइ कसा कसा काम अर्यो रे उनले गैर-यहुदि मान्सनलाइ लगइ येशू ख्रीष्टमी बिश्वास अद्द्यामि गवाही बनायो, भणबर सब मान्सनलाइ भण्यो।

²⁸ पइ पावल रे बारनाबास एन्टिओखिया सहरमि भया मण्डलिका येशू ख्रीष्टका छान्या शिष्यासित भौत दिन बस्या।