प्रेरित 12 - डोटेली नयाँ करार

पत्रुस झेलमि

¹ तिन दिनमि राजा हेरोदले मण्डलिका केइ मान्सनलाइ सताउन पस्यो।

² उइले येशूका शिष्य यूहन्नाको दाइ याकुबलाइ तरबारले मार्यो।

³ यइ कामले यहुदि मान्सन खुशी भया धेकिबर पत्रुसलाइ लगइ पकड्या तरखर अर्यो। यो घटना अखमिरी रोटाका काजबारका समयमि भयाथ्यो।

⁴ राजा हेरोदले पत्रुसलाइ गिरफ्तार अरिबर झेल हाल्दियो, रे निस्तार काजबार पछा तिनलाइ मान्सनका अगाडी उनरो न्याय अद्दाइ ल्याउन्या बिचार अरिबर तिनरो चौकिदारी अद्दाइ सिपाइका चार समुहका जिम्मा लाइदियो।

⁵ यिसेरी पत्रुस झेलमि केइ दिन राख्यो, तर तिनरा निउति मण्डलिका मान्सनले परमेश्वरलाइ ठुला जोससित प्रार्थना अरिराइथ्यो

⁶ जब राजा हेरोदले तिनरो न्याय अद्दाइ मान्सनका अगाडी ल्याउनाइ बटिरइथ्या, तइ हइ एक रात अगाडी, पत्रुस दुइ साङलाले बादिबर दुइ जाना सिपाइका बिचइनि सिइरइथ्या। सिपाइ लगइ ढोकाका अगाडी कलिबर झेलको चौकिदारी अरिराइथ्यो।

⁷ उतन्जेइ प्रभुका एक स्वर्गदुत पत्रुसका नजिकै धेका पड्या, रे झेलमि उज्यालो चम्कियो। स्वर्गदुतले पत्रुसलाइ घाचघच्यायो रे “छिटाइ उठ” भणबर तिनलाइ उठायो। तब साङला तिनरा हात हइ खुस्या।

⁸ स्वर्गदुतले तिनलाइ भण्यो, “लत्ता ला, रे जुता लगइ ला।” तब तिनले तसोइ अर्यो। उनले तिनलाइ भण्यो, “कोट लाइबर मेरा पछा लाग।”

⁹ पइ तिन स्वर्गदुतका पछा-पछा लागीबर झेल बठेइ बाइर निकल्या। स्वर्गदुतले अर्या कुरणी साँच्चि हो भण्न्या तिनलाइ थाइ भएइन। तर तिनले सुइनामी दर्सन धेक्दाछु भणि सोच्यो।

¹⁰ जब पइलो रे दोसरो चौकिदारी समुह नाङिबर सहर पस्या लुवाका ढोकामि तिनन आया, तब त्यो ढोका आफइ तिनरा निउति उगड्यो, रे तिन बाइर निकलिबर एक गल्लिका बाटा होइबर गया, रे उतन्जेइ स्वर्गदुत तिनलाइ छाडिबर गया।

¹¹ जबइ पत्रुसको होस खुलि तब तिनले भण्यो, “आब मलाइ साँच्चि था भयो, कि प्रभुले आफना स्वर्गदुत पठाइबर राजा हेरोदका सक्ति बठेइ, रे यहुदि अगुवानले जी अद्द खोजन्थ्या तिन सब बठेइ मलाइ छुटकारा दियो।”

¹² यिन कुरणी जाणिबर कि परमेश्वरले तिनलाइ बचायो भणि पत्रुसले था भया पछा, तिन मर्कुस भणिन्या यूहन्नाइ इजा मरियमका घर गया। ताँ भौत बिश्वासि मान्सन जम्मा होइबर प्रार्थना अद्दाथ्या।

¹³ तिनले ढोका घच्घच्याउनज्या रोदा नाउँ भएइ एक नौकरनी ढोका खोल्लाइ आइ।

¹⁴ पत्रुसको डाको पछेण्या पछा त्यो खुशी होइबर दारइ नखोलि भितर दकुड़ीबर गइ रे “पत्रुसले ढोकामि कलिरइछन” भणि रैबार दियो।

¹⁵ तर तिननले तइलाइ भण्यो, “तु बौलाइ हइ।” तर तइले तिन पत्रुसइ हुन भणि जिद्द अद्द पसि। तब तिननले भण्यो, “त्यो उनरो स्वर्गदुत होलो।”

¹⁶ तर पत्रुसले ढोका घच्घच्याइ राख्यो। ढोका खोलन्जेइ तिनलाइ धेकिबर तिनन सब अचम्म पड्या।

¹⁷ तर पत्रुसले “चुप लाग” भणि हातले इसारा अर्यो, रे प्रभुले तिनलाइ कसेरी झेल बठेइ बाइर निकाल्यो त्यो तिननलाइ भणिदियो। रे “यो रैबार याकुब रे और बिश्वासि भाइनलाइ भण” भणबर तिन ताँ बठेइ अर्खाइ ठाउँमि गया।

¹⁸ परभातइ उज्यालो भया पछा “पत्रुसलाइ कि भयो” भणबर झेलका सिपाहिका बिचमि ठुलो खलबल माचियो।

¹⁹ राजा हेरोदले “तइको खोजी अर” भणि आज्ञा दियो, तर तिननले पत्रुसलाइ काइ पाएइन, रे आजी राजा हेरोदले सिपाइनलाइ सोध्यो रे तिननले जबाफ दिन सकेन, तिनन सिपाहिलाइ माद्या आज्ञा दियो। रे राजा हेरोद यहुदिया देस छाडिबर कैसरिया सहरमि गइबर ताँइ बस्या।

राजा हेरोदको मृत्यु

²⁰ राजा हेरोद टुरोस सहर रे सिदोन सहरका मान्सनसित भौत रिसाइरइथ्या। तबइकिलाइ तिन दुएइ सहरका मान्सन राजा हेरोदसित भेट्टाइ तिनन एकहठ्ठा होइबर उनरा वाँ आया, रे सबहइ पइल्ली तिननले बलस्तससित सहयोग माग्यो, जो राजा हेरोदको सहयोग अद्द्या मान्स थ्यो, तब तिननले राजा हेरोदसित सान्ति अद्दाइलाइ भण्यो, क्याकि तिनन आफ्ना अन्नको पुर्ति अददाइ निउति राजा हेरोदका देशमि भर पणन्थ्या।

²¹ जइ दिन राजा हेरोदले तिन सहरका मान्सनसित भेट्या बिचार अर्याथ्यो, तसइ दिन शाहि लत्ता लाइबर राजा हेरोद आफना गद्दिमि बस्या, रे तिननलाइ उनले भासण दियो।

²² मान्सन कला हालिबर भण्न पस्या, “यो त मान्सको बोली होइन तर परमेश्वरको बोली हो।”

²³ तर राजा हेरोदले परमेश्वरलाइ महिमा नदिया हुनाले उतन्जेइ प्रभुका एक स्वर्गदुतले उनलाइ प्रहार अर्यो, रे स्याउँ-स्याउँ किड़ा पड़िबर उन मर्या।

²⁴ तर परमेश्वरको बचन फैलिनोइ गयो रे बिश्वासिन लगइ बड्डाइ गया।

²⁵ जब यहुदिया देशमि यहुदि बिश्वासीनको सहयोग अद्दाइ रुप्या दिया पछा बारनाबास रे शाउल आफना काम पुरा अरिबर यरुशलेम सहर बठेइ एन्टिओखिया सहरमि फर्क्या। तिननसित मर्कुस भणिन्या यूहन्ना लगइ थ्या।