३ यूहन्ना 1 - डोटेली नयाँ करार

सुभकामना

¹ म, मण्डलिको अगुवा यूहन्ना यो चिठ्ठी मेरा प्रिय मित्र गायसलाइ लेख्दाछु जइलाइ म साँचो प्रेम अद्दउ।

² प्रिय मित्र, म प्रार्थना अद्दउ कि तुइले अद्द्या सब कुरणीमि तेरो भलो होस, तेरो स्वस्थ ठीक रहोस जसेरि तम परमेश्वरसितका सम्बन्धमि बड्डाछौ।

³ केइ भाइन भेटीबर मलाइ भण्या तमन कसेरी बिश्वासयोग्य भइबर सत्यमी जिउनाछौ। यो सुणिबर म भौत आनन्दित भया।

⁴ जब तमन मेरा बालक जसाइ सत्यमी जिउनाछन भणि सुणनउ, तब तइले मलाइ भौत खुशी बनाउछ।

निका कामकी निउति हौसला

⁵ प्रिय हो, तमनले बिश्वासयोग्य भइबर भौत काममी तमरा बिश्वासि भाइनलाइ सहयोग अर्या छौ, या सम्मकि तमनले नचिन्याको लगइ सेवा अर्या छौ।

⁶ तमनले सहयोग अर्या केइ मान्सनले याँ मण्डलिका बिश्वासिनलाइ तमनले आफना भाइनलाइ भौत प्रेम अर्या छौ भणबर भण्या छन। आब म तमनलाइ भणनउ, कि तिननले तमनलाइ छाडिबर गया लगइ तमनले यिसा मान्सनलाइ लगातार सहयोग अददु पणन्छ, क्याकि तसो अरेले परमेश्वर खुशी हुनाहान।

⁷ क्याकि तिन मान्सन येशू ख्रीष्टको बचन प्रचार अद्दाइलाइ यात्रामि जान्या हुन, रे परमेश्वरलाइ नचिन्या मान्ससित केइ सहयोग लिनाइन्न।

⁸ तबइकिलाइ इसा मान्सनलाइ सेवा सत्कार अद्दु पणन्छ, ताकि हाम सत्य कुरणी प्रचार अद्द्या काममी सहभागी हुन सकौ।

डियोत्रिफस रे डेमेत्रियस

⁹ मइले मण्डलिका बिश्वासिलाइ पइल्ली चिठ्ठी लेख्याथ्या, तर डियोत्रिफसले मइले भण्या कुरणी स्वीकार अरेन, क्याकि उ सदाइ तमरो मण्डलिको अगुवा आफइ हुन खोजनथ्यो।

¹⁰ तबइकिलाइ यदि म आयो भण्या, म खुल्ला रुपमि मण्डलिका मान्सनलाइ तइले अर्याका कामको कुरणी भण्नया हु। हामरा बिरुद्दमि तइले खराब कुरणी भणन्छ। यति मान्तर होइन, तइले ख्रीष्टको प्रचार अरिबर यात्रा अद्द्या भाइनलाइ सेवा सत्कार अद्द इन्कार अरन्छ, रे बिश्वासिनलाइ सेवा सत्कार अद्द्यालाइ लगइ रोकन्छ, रे तिननलाइ संगति बठेइ बाइर निकालिदिन्छ।

¹¹ प्रिय हो, खराब काम अद्द्या मान्सनको धेकासिकि जन अर, तर भलाइका काम अद्द्या मान्सनको धेकासिकि अर। जब कसइले भलो काम अरन्छ, तइले यो धेकाउन्छ कि त्यो परमेश्वरको चेलो चेली हो, जब कसइले खराब काम अरन्छ, तइले यो धेकाउन्छ कि त्यो परमेश्वरलाइ चिन्नइन।

¹² मण्डलिका सब मान्सनले डेमेत्रियस राम्रो मान्स हो भणि भणन्छ क्याकि उइको ब्यबहार साँचो परमेश्वरको बचन अनसार छ, हाम लगइ भण्नाउ कि उ असल मान्स हो, तमन जाण्न्छौ कि हामरि गवाही सत्य छ।

अन्तिम सुभकामना

¹³ मइले तमनलाइ भौत कुरणी भण्नु पड्डया छ, तर म यो चिठ्ठीमि इसेरि लेख्द चाहानैन।

¹⁴ म तमनसित छिट्टाइ भेट्टाया आसा अद्दउ, रे म तमनसित सिदा कुरणी अद्दया हु।

¹⁵ म प्रार्थना अद्दउ कि तमलाइ परमेश्वरले सान्ति दिउन। सब बिश्वासि मित्रले तमलाइ अबिबादन भण्या छ। सब मित्रलाइ ब्यतिगत रुपमि मेरो अबिबादन भण्दिय।