२ थेसलोनिकि 3 - डोटेली नयाँ करार

प्रार्थनाकि निउति अनुरोध

¹ अन्त्यमि बिश्वासि भाइन हो, हामरा निउति प्रार्थना अद्दया अर, ताकि हामले प्रभु येशू ख्रीष्टको बारेमि यो सन्देश छिट्टाइ सब ठाउँमि फैलाउन सकु रे तमनले बिश्वास अर्या जसेरि और मान्सनले बिश्वास अरुन।

² रे प्रार्थना अर कि परमेश्वरले हामलाइ बचाउन ताकि यिन भौत खराब मान्सन हामलाइ नोक्सानी जन अरुन, क्याकि भौत मान्सन प्रभु येशू ख्रीष्टको बारेमि सुण्याको सन्देशमि बिश्वास अद्दाइन्न।

³ तर प्रभु त बिश्वासयोग्य छन। उनले तमनलाइ आत्मिक रुपमि बलिया बनाउन्या हुन रे सुरक्षा अद्या हुन, ताकि सैतानले तमनलाइ हानीअद्या आथिन।

⁴ हामले तमनलाइ जी कुरणी अद्दाइलाइ भण्या थ्या तमन तसोइ अद्दाछौ रे लगातार अद्दया होउ भण्न्या हामले तमनका बारेमि प्रभुमि भरोसा राख्याछौ।

⁵ हाम प्रार्थना अददाउ कि प्रभु येशूले तमनलाइ धेकाया होस कि परमेश्वरले तमनलाइ कति प्रेम अददाहान, रे ख्रीष्टले कष्ट सया जसेरि तमन लगइ कष्ट सन सक।

अल्छीलाइ चेतावनी

⁶ बिश्वासि भाइन हो, प्रभु येशू ख्रीष्टले हामलाइ दियाको अधिकार बठेइ आज्ञा दिनाउ कि आफ्ना बिश्वासि भाइ बइनि बठेइ टाडा बस जइले अल्छी अरन्छ रे जइले हामले दिया माणनाइन।

⁷ क्याकि तमन आफइ निक्केरि जाणन्छौ कि हामले जसेरि तमनले जीवन बिताउनु पणन्छ, क्याकि जब हाम तमनसित थ्या, हाम अल्छी थेइन तर काम अरनथ्या।

⁸ हामले कसइका रोटा सुदिसार खाएइन। रे हाम आफ्नो खाचोमी लगइ तमनमि हइ कसइमी भर पड्डु पडइन भणबर हामले रातदिन मिहनत अरिबर काम अर्या।

⁹ हामले कडा मिहनत अर्या, क्याकि हामसित तमन बठेइ सहायता मागद्या अधिकार नहोइबर होइन, तर हामरो बानि तमरि निउति एक आदर्स बनउ भणबर हामले तसो अर्या।

¹⁰ जब हाम तमनसित थ्या हामले तमनलाइ एक नियम दिया: कसइले केइ काम अद्दैन भण्या तइले केइ खाना जन खाउ।

¹¹ क्याकि हाम सुण्नाउ कि तमन मध्ये कतिले अल्छी जीवन बिताउन्नाछन। तिनन आफ केइ काम अद्दाइन्न तर और मान्सनलाइ हस्तक्षेप अददाहान रे तिननलाइ काम अद्दा बठेइ रोक्दाहान।

¹² इसा मान्सनलाइ प्रभु येशू ख्रीष्टले हामलाइ दियाको अधिकार बठेइ हाम आज्ञा रे अर्ति दिनाउ, कि तिननले चुपचाप आफना काम अरुन रे आफ्नो जीवन चलाउन पैसा कमाउन।

¹³ तर बिश्वासि भाइन हो, तमन असल कुरणी अद्दाइ कभइ निरास जन होउ।

¹⁴ यइ चिठ्ठीमि हामले भण्या सन्देश यदि कसइले पालन अद्दाइ इन्कार अरन्छ भण्या, पक्‍का अर कि त्यो को हो भणबर सबले चिनुन रे तइसित केइ सम्बन्ध जन राख ताकि तइले लाज माणउ।

¹⁵ पइलगइ त्यो तमरो दुस्मन भया जसेरि तइसित ब्यबहार जन अर, तर तमनले आफना बिश्वासि भाइ सुधार्या जनि तइलाइ सुधार।

अन्तिम अबिबादन

¹⁶ म प्रार्थना अद्दउ कि प्रभु जो सान्तिका स्रोत हुन उनले तमनलाइ हरेक समय रे सब किसिमले लगातार सान्ति दिउन। म प्रार्थना अद्दउ कि प्रभु तमन सबसित लगातार रहुन।

¹⁷ म पावल, यो चिठ्ठीको भाग तमनलाइ अबिबादन अददाइलाइ आफनाइ हातले लेख्दाछु। म मेरा सब चिठ्ठीको अन्तमी इसेरि लेख्दउ, ताकि सबले जाणुन कि यो चिठ्ठी म बठेइ हो।

¹⁸ म प्रार्थना अद्दउ कि हामरा प्रभु येशू ख्रीष्टको अनुग्रह लगातार तमनसित होइरउ।