२ पत्रुस 2 - डोटेली नयाँ करार

झुटा शिक्षक रे तिनरो बिनास

¹ भौत समय अगाडी इस्राएलीका बिचमि धेकिया झुटा अगमबक्ता जसाइ, झुटा शिक्षक लगइ तमरा बिचमि धेकिन्या हुन। तिनन झुटा शिक्षामि फस्या हुन, जइले मान्सनलाइ ख्रीष्टमी बिश्वास अद्द बठेइ रोक्द्या हुन। यिन झुटा शिक्षकले ख्रीष्टलाइ आफ्ना मालिकका रुपमि स्वीकार अद्द समेत इन्कार अद्द्या हुन रे जइले तिननलाइ पापका सक्ति बठेइ छुटकारा दियो। इसेरि तिननले अचानक आफलाइ नष्ट पड्डया हुन।

² आफ बिश्वासि हु भणन्या भौतले यिन झुटा शिक्षकका अनैतिक कुरणीको अनुसरण अद्द्या हुन, रे बिश्वास नअद्द्या और मान्सनले साँचो जीवन बिताउन्या बारेमि निन्दा अद्द्या हुन।

³ यिन शिक्षक लोभि हुनाहान, रे तमन बठेइ पैसा पाउनाइ तमनलाइ दन्त्य कथा सुणाइबर तिननले तमनलाइ धोका दिन्या हुन। परमेश्वरले तिननलाइ सजाय दिन्या हुन भणबर भौत अगाडी निर्णय अरिसक्या छ रे उन त्यो अद्द तयार छन। उनले पक्‍कालगइ तिननलाइ नास अद्द्या हुन।

⁴ दुतले पाप अरन्ज्या परमेश्वरले तिननलाइ दण्ड दिना बठेइ रोकेइन तर तिननलाइ नरकमि खितिदियो जाँ न्यायका दिन सम्म पखदाइलाइ तिननलाइ अन्धकारमि साङलाले बादिबर राखिन्छ, रे न्यायका दिनमि तिननले पाउनु पड्डया दण्ड पाउन्या हुन।

⁵ तमनलाइ यो लगइ था छ कि जब भौत समय अगाडीका मान्सनले परमेश्वरको डर माणेइन, उनले तिननले अद्द्या दुष्ट कुरणीलाइ वास्ता अर्यो। बरु उनले तिननलाइ दण्ड दिनाइ सारा संसार डुबाउनाइ बाढी पठायो, ताकि तिनन सब नास होउन। तर उनले नोआ सहित आठ जनालाइ बचायो, नोआले परमेश्वरका नजरमि ठीक हुन्या बारेमि प्रचार अर्याथ्यो।

⁶ परमेश्वरले सदोम सहर रे गमोरा सहरका मान्सनलाइ दोषि ठहराया थ्यो, रे तिनरो छार नभया सम्म तिननलाइ बाल्यो। ताकि तिननसित भया कुरणी उनरा आज्ञा नमाणन्या सब मान्सनकि निउति चेतावनी हुन्या हो।

⁷ तर सदोमलाइ नास अददाहइ अगाडी उनले लोतलाइ जोगायो, जो एक परमेश्वरका नजरमि ठीक मान्स थ्या, लोतले सहर छाडिबर गया रे परमेश्वरले उइलाइ बचायो। लोत भौत चिन्तामी थ्या क्याकि सदोम सहरका मान्सनले नियम पालन अरेइन रे लाज लाग्द्या काम अर्यो।

⁸ लोत एक परमेश्वरका नजरमि ठीक मान्स थ्या, क्याकि उन हरेक दिन दुष्ट मान्ससित बस्नथ्या, उनले धेक्या रे सुण्या ननिका कुरणीले उनरो असल हृदयलाइ चोट पुग्यो।

⁹ प्रभुले यिन सब काम अर्या हुनाले, यइले यो धेकाउन्छ कि उनले परमेश्वरका नजरमि ठीक मान्सलाइ तिनरो कष्ट बठेइ जोगाउनाइ रे न्यायका दिन सम्म दुष्ट मान्सनलाइ निरन्तर सजाय दिन जाण्नाहान।

¹⁰ परमेश्वरले पक्‍कालगइ तिन झुटा शिक्षकलाइ दण्ड दिन्या हुन, जइले आफ्नो दुष्ट, लाज लाग्दो इच्छा अनसार काम अददाहान, रे तिननमि परमेश्वरको अधिकार भया इन्कार अददाहान। तिनन हठी रे अहंकारी हुनाहान। तिनन स्वर्गमि भया महिमित प्राणिका बारेमि अपमान अद्द डराउनाइन।

¹¹ स्वर्गदुतलाइ बिचार अर। तिनन झुटा शिक्षक भण्ना भौत सक्तिशाली छन। तर स्वर्गदुतले अपमानजनक भासा प्रयोग अद्दाइन, जब तिननले यिन शिक्षकलाइ परमेश्वरको अगाडी दोस लाउनाहान।

¹² तर यिन झुटा शिक्षक जंगली जनाबर जसा छन। यिन जनावरले कसेरी सोच्चु हो जाण्नाइन रे तिनन केवल समाइबर मारिन्या उद्देश्यले मान्तर बन्या हुनाहान। यिन मान्सनले जी तिनरा दिमागमि आउछ तेइ अददाहान, रे तिननले नबुज्या कुरणीको लगइ अपमान अददाहान। तिनन पक्‍कालगइ नास हुन्या हुन।

¹³ तिनरो बिनास तिननले अर्या नोक्सानिको इनाम हो। तिनन दिनको उज्यालामि ननिका सुखमि समाबेस हुनाइ मन अददाहान। तिनन तमरा बिचमि अपमान रे दाग हुन। तिननले तमनसित खानाइ खाया लगइ तिनन छल अद्द मन अददाहान।

¹⁴ तिनन आफले हेर्द्देइ हरेक स्वानी सित व्यभिचार अद्द चाहानाहान। तिनन पाप अद्दाइ मौका खोज्ज कभइ छाड्डाइन। तिननले तिन मान्सनलाइ धोका दिनाहान जइले ख्रीष्टलाइ पुरा रुपमि बिश्वास अद्दाइन रे तिनन लगइ पापमि लाउनाहान। तिनरो भौत चिजको बढ्दो इच्छाका लाग्दा, परमेश्वरले तिननलाइ सजाय दिन्या हुन।

¹⁵ तिननले असल अद्द छाडया छन, रे तिननले त्यइ ननिका काम अद्द सुरु अर्या छन, जो बओरको चेलो बालामले भौत समय अगाडी अर्याथ्यो। उनले ननिका काम अरिबर पैसा कमाउन्या मन पणायो।

¹⁶ तर जो ननिको काम बालामले अर्यो तइकि निउति परमेश्वरले उइलाइ हकार्यो। उइको गधाले मान्सले बोल्या भासा बोल्लाथ्यो रे तइ भबिष्यवक्ता बालामलाइ गलत तरिकाले काम अद्दा बठेइ रोक्याथ्यो।

¹⁷ यिन झुटा शिक्षक सुकि सक्या पानीका मुहान जसाइ हुन। तिनन त्वाँला जसाइ बिना कामका छन, जइलाइ पानी पड्डाइ अगाडी सक्तिशाली बतासले उडाइबर लइजान्छ। परमेश्वरले तिनरि निउति एक ठाउँ तयार अर्याछ, त्यो पुरा अनारो छ।

¹⁸ तिननले तिन मान्सनलाइ लोपमि पाड्डाहान जो भर्खरइ बिश्वासि भया छन रे दुष्ट मान्सनले अद्द्या काम अद्द छाडया छन। तिननले तिनरो पापी मानब स्वभाबले अद्द चाया खराब काम अददाइ उत्साहित अरिबर तिननलाइ पापको लोपमि फसाउनाहान।

¹⁹ झुटा शिक्षकले मान्सनलाइ भण्नाहान कि तिनन आफले खोज्या जसोइ काम अददाइ स्वतन्त्र छन, याँ सम्मकि तिनन आफइ लगइ दास जसा छन, क्याकि तिनरो आफनोइ पापी स्वभाबले तिननलाइ पापको काम अद्द बाद्य अराउन्छ। हामलाइ था छ कि जइ कुरणीले कसइ मान्सलाइ जित्नछ तसइ कुरणीले तइलाइ दास बनाउन्छ।

²⁰ जब येशू ख्रीष्टलाइ आफ्नो प्रभु रे मुक्तिदाता भणबर मान्सनले चिन्नाहान तब तिनन संसारका दुष्टता बठेइ भाग्दाहान। तर आब तिनन आजी ननिका काम अददामि लाग्या छन रे तिन ननिका कुरणीले आब तिननलाइ नियन्त्रण अरन्छ, तबइकिलाइ आब तिननले ख्रीष्टलाइ अस्वीकार अर्या तिनरो पछाडिको हालत बिश्वासि हुनाहइ पइल्लिको भण्ना झिक खराब हुन्छ।

²¹ मेरो भणनुको अर्थ यो हो कि, ख्रीष्टलाइ कभइ स्वीकार नअर्या मान्सन भण्ना ख्रीष्टलाइ त्याग्द्या मान्सनलाइ परमेश्वरले कडा दण्ड दिन्या हुन। यदि तिननले धर्मि जीवन बिताउनुको अर्थ कि हो भणबर कभइ था नपाया भया निको हुनेइथ्यो। आब तिननलाइ था छ कि, कि असल हो, तर तिननले परमेश्वरको आज्ञा अर्या कुरणी माण्ना बठेइ इन्कार अर्या छन। यिन आज्ञा हाम, येशू ख्रीष्टले छान्या शिष्याले सिकाया हु।

²² तिननले अर्या काम ठीक यिन दुएइ उखानले भण्या जसोइ छ: “कुकुरले आफले अर्या उल्टि आफइ खान्छ।” रे, “कसइ मान्सले सुँगुरलाइ सफा अर्या पछा, आजी फोहरमि लडीबडी खेलन्छ।”