२ यूहन्ना 1 - डोटेली नयाँ करार

अगुवा बठेइ चुनियालाइ अबिबादन

¹ म, यूहन्ना मण्डलिको अगुवा यो चिठ्ठी परमेश्वरले चुनेकि महिला रे तिनरा चेला चेलीलाइ लेख्दाछु, जइलाइ म साच्ची प्रेम अददु रे म मान्तर होइन सत्यलाइ चिन्या सबले प्रेम अददाहान।

² म तमनलाइ प्रेम अद्दउ, क्याकि सत्य शिक्षा हामरो ह्रदय भित्तर छ रे सदाइ हामसङै रन्या हो।

³ परमेश्वर पिता रे उनरा चेलो येशू ख्रीष्ट बठेइ अनुग्रह, कृपा रे सान्ति होस, यिन सब कुरणी हामसित रइजाउ जइले सत्यलाइ माणन्छ रे एक अर्खालाइ प्रेम अरन्छ!

ख्रीष्टको आज्ञामी चल्लु

⁴ म भौत खुशी भया, जब तमरा चेलाचेली मध्ये कसइ कसइलाइ पिता परमेश्वरले हामलाइ भण्याको आज्ञा अन्सार सत्यमी जीवन बिताया सुण्या।

⁵ आब हे महिला, म तमलाइ बिन्ति अद्दउ कि हामले एक अर्खालाइ प्रेम अददु पणन्छ। यो एक नयाँ आज्ञा होइन, तर जो शुरुको समय बठेइ हामलाइ थाथ्यो जब हामले ख्रीष्टलाइ अनुसरण अददु पस्या।

⁶ परमेश्वरलाइ प्रेम अद्द्या साँचो तरिका परमेश्वरका आज्ञा अन्सार जिउनु हो। उनरा आज्ञा अनसार हिट्टु नइ प्रेम हो। जब बठेइ तमले ख्रीष्टलाइ अनुसरण अददु सुरु अर्या, तमले सुण्या थ्या कि परमेश्वरको आज्ञा यइ हो कि तमनले एक अर्खालाइ सदाइ प्रेम अद्दु पणन्छ।

ख्रीष्ट बिरोधिको धोका बठेइ साबधान

⁷ म यो भणउ, क्याकि भौत मान्सन औरलाइ झुटा शिक्षाले भ्रममि पड्डयाइलाइ संसारमी आया छन। तिननले येशू ख्रीष्ट यइ संसारमी मानब सरीरमि आया होइन भणि भण्नाहान, यदि कसइ मान्सले इसो भणन्छ भण्या, त्यो ख्रीष्ट बिरोधी हो, जइले सदाइ मान्सनलाइ धोका दिन्छ।

⁸ तबइकिलाइ तमन होशियार बस, कि तमनलाइ यिन मान्सनले धोका जनदिउन, क्याकि तमनले त्यो गुमाउन्या होइन जो पाउनाइलाइ हामले कडा काम अद्दाछौ, तर परमेश्वरले तमरो सेवाको पुरा इनाम दिन्या हुन।

⁹ म तमलाइ यो भणउ, कि यदि कसइले आफ्ना बिचार बठेइ केइ थपन्छ रे ख्रीष्टले सिकायाको शिक्षामि लगातार बिश्वास अद्दाइन्न भण्या, उ परमेश्वरसितको संगतिमि हुनइन। जो ख्रीष्टले सिकायाको शिक्षामि लगातार बिश्वास अरन्छ भण्या, उ परमेश्वर रे उनरो चेलो येशू ख्रीष्ट सितको संगतिमि हुन्छ।

¹⁰ रे यदि उइले ख्रीष्टले सिकायाको शिक्षा भण्ना फरक शिक्षा सिकायो भण्या तइलाइ घरमि स्वागत जन अर्या, तइलाइ अबिबादन अरिबर हौसला जन दिया।

¹¹ कसइले उइलाइ हौसला दिन्छ भण्या उ तइका दुष्ट काममी सहभागी हुन्छ जो उ अद्दा छ।

अन्तिम अबिबादन

¹² मइले तमनलाइ भौत कुरणी भण्नु पड्डया छ, तर म यो चिठ्ठीमि इसेरि लेख्द चाहानैन, म तमरा वाँ आउनौ रे तमनसित सिदा कुरणी अद्दउ रे तब हाम भौत खुशी हुन्या हु।

¹³ परमेश्वरले छानिएकि तमरि बहिनिका चेलाचेलिनले तमनलाइ अबिबादन पठाया छन।