२ कोरिन्थी 8 - डोटेली नयाँ करार

उद्दारताकी निउति प्रोत्साहान

¹ बिश्वासि भाइन हो, माकेडोनिया प्रदेसका मण्डलिका बिश्वासिनलाइ परमेश्वरले अर्याको अनुग्रहका बिसयमि हाम तमनलाइ बताउन चाहानाउ।

² जब तिनन भौत कष्ट बठेइ परीक्षामि पण्या, तिनन भौत आनन्दित भया रे तिनन भौत गरिब भया लगइ तिननले उदार-चित्तले और बिश्वासिनलाइ सहयोग अददाइ दान दियो।

³ क्याकि म गवाही दिनउ कि तिननले आफ्नो योग्यता अन्सार रे योग्यता भण्ना बरता लगइ आफना इच्छा अनसार दियो।

⁴ तिननले यरुशलेम सहरमि भया पबित्र जनका सहायताका निउति भाग लिन्या मौका पाउँ भणबर हामलाइ आग्रहपुर्वक बिन्ति अर्यो।

⁵ हामले तसो अपेक्षा अर्या लगइ थेइन, तर तिननले पइल्ली आफइलाइ प्रभुमि अर्पण अर्यो रे तइ पछा तिननले परमेश्वरको इच्छामि आफइलाइ हामरो अनुसरण अददाइलाइ सुम्पिदियो।

⁶ तबइकिलाइ तीतसले पइल्ली बठेइ तमरा बिचमि यो दान उठाउन्या काम सुरु अर्या हुनाले, त्यो पुरा लगइ अरुन भणि हामले तिनलाइ बिन्ति अर्या।

⁷ तर जसेरि सब कुरणीमि तमन बडिबर गया छौ, त्यो भण्या बिश्वासमि, प्रचारमि अथवा सिकाउनामि, ज्ञानमि, सब जोसमि रे हाम प्रतिको तमरो प्रेममि, तसेरि गरिब बिश्वासिनलाइ दान दिन्या यइ काममी लगइ बड्डाइ जा।

⁸ मइले यो आज्ञाका रुपमि भण्या होइन तर औरका जोससित तुलना अरिबर तमरो प्रेम लगइ सत्य हो भण्न्या प्रमाणित अद्दाइलाइ मइले यो भण्या हु।

⁹ क्याकि हामरा प्रभु येशू ख्रीष्टको अनुग्रह तमनलाइ था छ, उन धनि थ्या, पइलगइ तमरा खातिर उन गरिब भया ताकि उनरो गरीबी बठेइ तमन धनि हुन सक।

¹⁰ पोर साल तमन दिन्या काममी सब भणन अगाडी मान्तर होइन, तर तसो अद्दया इच्छामि लगइ सब भणन अगाडी थ्या। यइ बारेमि तमरा निउति मेरो उत्तम सल्लाह यइ हो:

¹¹ आब तमनले सुरु अर्या कामलाइ पुरा अर तमनसित भया अनसार जाति दिन सकन्छौ दिय। तमन यइ कामलाइ सुरु अददाइ उत्सुक भया जसेरि यइलाइ पुरा अददाइ लगइ उत्सुक हुनु पणन्छ।

¹² क्याकि यदि तमन और मान्सनलाइ दान दिन चाहन्छौ भण्या तमनसित भया अनसारको दानइ ग्रहणयोग्य हुन्छ, नभया ए अनसार होइन।

¹³ और मान्सनको जीवन सजिलो बनाउनाइ तमरो जीवन असजि होस भणन्या म चाहानइन। तर सबलाइ यो समान रुपमि हुनु पणन्छ।

¹⁴ अइल तमरा प्रसस्ता बठेइ तिनरा खाचोमी सहयोग अर, ताकि भविष्यमी तिननसित प्रसस्त भया बेला तमरो अभावमि तिननले तमनलाइ सहयोग अद्द्या हुन। इसेरि सबइको खाचो पुरा हुन्छ।

¹⁵ जसो पबित्र सास्त्रमि लेखिया छ, “भौत बटोल्ल्या सित बरताइ केइ रएइन रे कम बटोल्ल्यालाइ अभाब भएन।”

तितस कोरिन्थ सहरमि

¹⁶ म परमेश्वरलाइ धन्यबाद दिनउ, जइले तीतसका हृदयमि तमरा निउति तसइ फिक्री राख्दियो, जसो म अद्दया अद्दउ।

¹⁷ क्याकि हामले तमरा वाँ जानाइ अनुरोध अरन्ज्या तिनले हामरो अनुरोधलाइ माण्या मान्तर होइन, तर आफइ लगइ भौत उत्साहित होइबर आफनाइ इच्छाले तमरा वाँ आउन्ना छन।

¹⁸ रे हाम तिनसित अर्खो बिश्वासि भाइलाइ पठाउन्नाछु, जइले सुसमाचार प्रचारका काममी सब मण्डलिका बिश्वासीका बिचमि उच्च आदर पाया छ।

¹⁹ रे इति मान्तर होइन तर प्रभुका महिमाको निउति रे यरुशलेम सहरका बिश्वासिनलाइ हाम सहयोग अददाइ उत्सुक छौ भणि धेकाउनाइलाइ हामले अददार्या असल काममी भेटी लेइबर हामसित यात्रा अददाइ मण्डलि बठेइ तिन नियुक्त भया छन।

²⁰ उदारचित्तले दिया यो दान दुरुपयोग अद्दतक तइ बिसयमि कसइले हामलाइ दोस जन ला भणबर हाम तितससित तइ बिश्वासि भाइलाइ पठाउन्नाछु।

²¹ क्याकि हाम प्रभुको नजरमि मान्तर होइन तर मान्सका नजरमि लगइ जी आदरणीय छ त्यो काम असल तरिकाले अददाइ आफ्नो ध्यान दिनाउ।

²² रे तितससित हाम एक अर्खा बिश्वासि भाइलाइ पठाउन्नाछु, जइलाइ हामले भौत बेर जाँचिबर भौत कुरणीमि जोसिला पाया छु। तमन प्रति भया तिनरो ठुलो भरोसाका लाग्दा तिन आजी बरता जोसिला भया छन।

²³ तीतस मेरा संगी रे तमरा सेवामि मेरा सहकर्मी हुन रे भाइन भण्या तिनन मण्डलिका छान्या शिष्या हुन रे तिनरो जीवन ख्रीष्टको प्रशंसाकि निउति हो।

²⁴ तबइकिलाइ तमनले तिननलाइ आफ्नो प्रेम धेका, रे मण्डलिका सब बिश्वासिनलाइ प्रमाणित अर कि हामले तमरा बारेमि अर्या घमण्ड सत्य हो।