२ कोरिन्थी 7 - डोटेली नयाँ करार

¹ तबइकिलाइ हे प्रिय हो, हामसित यिन प्रतिज्ञा भया हुनाले हरेक किसमको ननिका काम अद्द छाड, जइले हामरो शरीर रे आत्मालाइ अशुद बनाउन्छ, परमेश्वरको आदर अरिबर हामले पूरारुपमी पबित्र जीवन बिताउन्या प्रयास अददु पणन्छ।

पावलको आनन्द

² हामलाइ तमरा पुरा हृदयले प्रेम अर। हामले कसइको खराबी अर्या आथिन। हामले कसइलाइ भ्रष्ट पाण्या आथिन। हामले कसइ मान्स बठेइ फाइदा उठाया आथिन।

³ तमनलाइ दोषि ठहर्याउनलाइ मइले यो भण्या होइन। क्याकि मइले अगाडीइ भणि दिया छु हामले पुरा हृदयले तमनलाइ याँ सम्म प्रेम अददाउ, कि हाम मर्या लगइ, बाच्या लगइ हाम अलग हुन्या आथिन।

⁴ तमनमि मेरो ठुलो भरोसा छ। तमनमि म भौत घमण्ड अद्दउ। म सान्त्वनाले परिपुर्ण छु। हामरा सब कष्टमी म भौत आनन्दित छु।

⁵ क्याकि हामले त्रोआस सहर छाडिबर याँ माकेडोनिया प्रदेसमि आया पछा लगइ हामलाइ केइ आराम मिलेइन तर चारै तिर बठेइ हामलाइ सङकष्ट आयाथ्यो, सबतिर झैझगडा, रे हामरो हृदयभित्र डरइडर थ्यो।

⁶ तर निरास भयालाइ सान्त्वना दिन्या परमेश्वरले तीतस आउन्ज्या हामलाइ सान्त्वना दियो।

⁷ तिनरो आगमनले मान्तर होइन, तर तइ सान्त्वनाले लगइ, जो सान्त्वना तीतसले तमन बठेइ पायाथ्यो। मलाइ भेट्या तमरो ठुलो इच्छाका बारेमि तिनले हामलाइ भण्यो। मेरा निउति तमरा सोकको बिसयमि रे म प्रति तमरो गइलो चिन्ताको बिसयमि लगइ तिनले बतायो, रे इसेरि म आजी झिक बडता आनन्दित भया।

⁸ मइले तमनलाइ त्यो गम्भीर चिठ्ठी पठायामि म पछुताया आथिन, पइल्लिका बेर मलाइ दुख लाग्या भया लगइ, मलाइ था छ कि यइले तमनलाइ थोक्काइ समयकी निउति मान्तर दुखित बनाउन्या हो।

⁹ तर आब तमनलाइ सोक भयो भणबर म खुशी भया होइन, तर तमरा शोकले तमनलाइ पाप अद्द छाडिबर परमेश्वरतिर फर्कन्या बनायो भणबर हो, क्याकि तमनले परमेश्वरको इच्छा अनसार सोक अर्या, रे हामरा तर्फ बठेइ तमनले केइ नोक्सानी सनु पणेइन।

¹⁰ क्याकि परमेश्वरको इच्छा अनसार हामले सोक अर्या भण्या यइले हाम पाप अद्द छाडिबर परमेश्वरतिर फर्कन्या हु, रे यइको परिणाम मुक्ति हो। रे तइ किसिमको शोकले पछुतो हुनइन। तर संसारका मान्सनका शोकले भण्या अनन्त मृत्यु तिर लइजान्छ।

¹¹ हेर, यइ परमेश्वरको इच्छा अनसारको शोकले तमनमि कसो-कसो परिबर्तन आया छ: इसो उत्साहले भरिया तत्परता, आफइलाइ निर्दोष तुल्याउनाइ इति ठुलो इच्छा, अन्याय प्रति इसो क्रोध, समस्या प्रति इसो साबधानि, मलाइ भेट्या इसो ठुलो इच्छा, सेवा प्रति इसो उत्साह, रे ननिक काम अद्दयालाइ दण्ड दिनाइ इसो तीव्रता। रे यइ बठेइ तमनले यो साबित अर्या छौ कि सब कुरणी असल रितिले अददामि तमनले केइलगइ कमी छाड्या आथिन।

¹² मइले यो गम्भीर चिठ्ठी अन्याय अद्द्या मान्सका लाग्दा लेख्या होइन, न त अन्यायमि पड्डया मान्सका लाग्दा हो, तर परमेश्वरका नजरमि हाम प्रति तमरो उत्साह कसो छ, त्यो तमनलाइ था होस भणबर मइले लेख्या हु

¹³ तबइकिलाइ हाम उत्साहित छौ। उत्साह बाहेक बिसेस अरिबर हाम तीतसका आनन्दलाइ हेरिबर खुशी छौ, क्याकि तमन बठेइ तिनले उत्साह पाया छन।

¹⁴ क्याकि तीतसका सामने तमरा बारेमि घमण्ड अर्याथ्या रे तमनले मलाइ तइका बारेमि निरास बनायानु। तर जसेरि हामले तमनलाइ भण्याका सब कुरणी सत्य थ्या, तसेरि तितसका सामने हामले अर्याका घमण्ड लगइ सत्य ठहरिया छ।

¹⁵ रे जब तीतसले तमन आज्ञाकारी भया कुरणिका बारेमि आजी सोच्चाहान, कि तमनले तिनलाइ कसेरी अधिनता रे ठुलो सम्मानसित स्वागत अर्याथ्यो, तब तिनले तमनलाइ झिक बरता प्रेम अददाहान।

¹⁶ म रमाउनउ, क्याकि तमनमि मेरो पुरा भरोसा छ।