२ कोरिन्थी 6 - डोटेली नयाँ करार

¹ परमेश्वरका सहकर्मी भया हुनाले हाम तमनलाइ बिन्ति अद्दाउ, कि उनरो अनुग्रह व्यर्थ हुन जन दिय।

² क्याकि पबित्र सास्त्रमि परमेश्वरले भण्नाहान ग्रहणयोग्य समयमि मइले तमरो पुकार सुण्या रे मुक्तिका दिनमि मइले तमनलाइ सहायता अर्या। सुण, ग्रहणयोग्य समय अइल हो, मुक्तिको दिन अइल हो।

पावलको संकष्ट

³ परमेश्वरका साजेदारका रुपमि, हामरा सेवामि दोस जनमिलौ भणबर हाम कसइका मार्गमि बाधाको कारण बन्नाइन।

⁴ तर यिन सब कुरणीमि हाम परमेश्वरका सेवकन हौ भण्न्या धेकाउनाउ, धैर्यतासित कष्ट, कठिनाइ, आपत बिपद सइबर,

⁵ कुटाइ पिटाइमि, कैदमी, हुलदङ्गमि, परिश्रममि, उनिलो बस्स्या बेलामि, भोकमि,

⁶ सुद्दतामि, ज्ञानमि, धैर्यतामि, दयामि, पबित्र आत्माका अगुवाइमी, साँचो प्रेममि,

⁷ सत्य बोलिमि, रे परमेश्वरको सक्तिमि। हाम धार्मिकताको तरिका प्रयोग अरिबर आफ्नो प्रसंसा अददाउ, जो दाइन हात रे बाँउ हातका हतियार जसा छन।

⁸ मान्सनले हामरो प्रसंसा अरन्ज्या अथवा तिननले हामलाइ घृणा अरन्ज्या, मान्सनले औरलाइ हाम ननिका छौ भणन्ज्या, अथवा निका छौ भणन्ज्या। हाम इमानदार छौ, तर तिननले भण्नाहान कि हाम झुटा छौ।

⁹ कसइले हामलाइ सुपरिचित माण्या लगइ कसइले हामलाइ अपरिचित मान्स माणनाहान। मर्या जसा भया लगइ बाँच्याछौ, सजाय पाया लगइ मारिया आथिन।

¹⁰ हामलाइ भौत दुःख भया लगइ सदाइ खुशी छौ। हाम गरिब भया लगइ भौतलाइ आत्मिक धनि बनाउनाउ। केइ नभया जसा भया लगइ सब चिज छ।

¹¹ कोरिन्थी सहरका बिश्वासिन हो, हामले तमनलाइ प्रष्टइ भणिदिया छौ हामरा हृदयमि तमरा निउति ठाउँ छ।

¹² हामले तमनकीलाइ आफ्नो प्रेम लुकाया आथिन। बरु तमनले हामकिलाइ आफ्नो प्रेम लुकाया छौ।

¹³ आब यइका सट्टामी म आफनाइ बालखसित जसेरि भण्नउ, कि तमनले लगइ आफना हृदयले प्रेम अर।

बिश्वासि रे अबिश्वासी

¹⁴ अबिश्वासिनसित साजेदार जन होउ। क्याकि धर्म रे दुष्ट काम बिचमि केइ मेल आथिन अथवा अनारासित उज्यालाको केइ सम्बन्ध आथिन।

¹⁵ ख्रीष्ट सैतानसित सहमत हुन सक्दाइन। अथवा ख्रीष्टमी बिश्वास अद्दया ख्रीष्टमी बिश्वास नअद्दया सित सहमत हुन सक्दाइन।

¹⁶ परमेश्वरको मन्दिरमि मुर्तिकी निउति केइ स्थान हुनइन, रे हाम जिबित परमेश्वरका मन्दिर हौ, जसेरि परमेश्वरले पबित्र सस्त्रामि भण्या छ, म तिनन मान्सनमि बास अद्द्या हु, रे तिनरा बिचमि हिडडुल अद्द्या हु, रे म तिनरा परमेश्वर हुन्या हु रे तिनन मेरा प्रजा हुन्या हुन।

¹⁷ तबइकिलाइ प्रभुले पबित्र सास्त्र बठेइ भण्नाहान, तमन तिनन अबिश्वासीनका बिच बठेइ निकलिबर आस, रे तिनन बठेइ तमन अलग होउ, परमप्रभु भण्नाहान असुद्द कुरणी बठेइ टाडा बस, रे म तमनलाइ ग्रहण अद्दया हु।

¹⁸ म तमरा पिता हुन्या हु रे तमन मेरा चेलचेली हुन्या हौ, सर्वसक्तिमान परमप्रभु भण्नाहान।