२ कोरिन्थी 2 - डोटेली नयाँ करार

¹ तमनलाइ दुखि बनाउनाइ आजी नआउन्या मइले पक्‍का अर्या।

² क्याकि मइले तमनलाइ दु:खी बनाया भण्या मइले दु:खी बनाया तमन बाहेक और कसइले लगइ मलाइ खुशी बनाउन सक्दइन।

³ रे मइले जो कुरणी लेख्या त्यो येइ हेतुले लेख्या, कि म आउन्ज्या जइ मान्सन बठेइ मइले आनन्द पाउनु पड्ड्या थ्यो तिनन बठेइ म दु:खित जन हु। क्याकि मेरो आनन्द तमन सबको आनन्द हुन्छ भण्या मलाइ तमन सबका बारेमि भरोसा थ्यो।

⁴ क्याकि तमनलाइ दु:खित बनाउनाइ होइन, तर तमन प्रति भया मेरो प्रसस्त प्रेम तमनले जाण भणबर हृदयको भौत पिडा रे बेदनामि भौत आँउस बगाइबर मइले यो चिठ्ठी तमनलाइ लेख्याथ्या।

पापको क्षमा

⁵ जइ मान्सले यिन सब समस्या लेया छ, उइले मलाइ भण्ना तमन सबलाइ भौत दुःखी बनाया छ। म यइका बारेमि यइ भण्ना बड्ता और केइ भण्न चाहानइन।

⁶ तमन मध्ये भौत बिश्वासीनले दिया सजाय तइलाइ पर्याप्त छ।

⁷ बरु तमनले तइलाइ क्षमा अद्दु रे सान्त्वना दिनु पणन्छ नतित त्यो भौत दु:खी हुन्या हो, रे पानिमि दुब्या मान्स जसो हुन्या हो।

⁸ तबइकिलाइ म तमनलाइ बिन्ति अद्दउ, कि तमनले तइलाइ पक्‍का प्रेम अददाउ भणबर भण।

⁹ तबइकिलाइ तमनलाइ जाँच्चाइ रे मेरा आदेस माण्नाइ तमन आज्ञाकारी छौ कि छइनु भण्न्या था पाउनका निउति मइले तमनलाइ लेख्याथ्या।

¹⁰ जइलाइ तमन क्षमा अरन्छौ तइलाइ म लगइ क्षमा अद्दउ। यदि कोइ मान्सन छ जसलाइ मइले क्षमा अददु पड्डया हो, तइलाइ मइले पइल्ली क्षमा अरिसक्या छु। म तमरो भलाइकी निउति ख्रीष्टको अधिकारसित इसो अद्दउ।

¹¹ ताकि सैतानले हाममि मौका छोप्दु जन पाउ, क्याकि हामलाइ तइका सब युक्ति था छ।

नयाँ करारका सेवक

¹² ख्रीष्टको सुसमाचार प्रचार अद्दाइ त्रोआस सहरमि पुगन्ज्या परमेश्वरले मलाइ सुसमाचार प्रचार अद्द्या ठुलो मौका दियाथ्यो।

¹³ तर ताँ मेरा बिश्वासि भाइ तीतसलाइ तमन बठेइ खबर लेया नभेट्या हुनाले मेरा मनमि सान्ति भएन। तबइकिलाइ त्रोआस सहरका बिश्वासिन बठेइ बिदा लिबर म माकेडोनिया प्रदेसमि तितसलाइ भेट्टाइ फर्किबर आया।

¹⁴ तर परमेश्वरलाइ धन्यबाद होस, क्याकि हामरो ख्रीष्ट सितको एकताका लाग्दा, हाम सदाइ ख्रीष्टको बिजय जुलुसमि कैदीका रुपमि परमेश्वर बठेइ डोर्याइनाउ। रे परमेश्वरले हाम बठेइ ख्रीष्टका बारेमिको ज्ञान मिठो बासइ जसेरि चारै तिर फइलाउनाहान।

¹⁵ क्याकि हामरो जीवन परमेश्वर सम्म पुग्द्या ख्रीष्टका जसोइ बासना हो। तर यो बासना उद्दार पाउन्नारया रे नास हुन्नारया बठेइ फरक रुपमि बुजीन्छ।

¹⁶ एकका निउति मृत्युको दुर्गन्द रे अर्खाका निउति जीवनको सुगन्द। पक्‍का यो काम कसइले अद्द सक्दइन।

¹⁷ क्याकि भौत मान्सन सरह हाम परमेश्वरको बचन पैसाकी निउति प्रचार अद्दइन तर निष्कपट मनले ख्रीष्टको अधिकारसित हाम परमेश्वरको बचन प्रचार अददाउ, यो जाणिबर कि परमेश्वरले हामलाइ हेरिराइछ।