२ कोरिन्थी 13 - डोटेली नयाँ करार

आखिरी चेताउनी

^1-2 पबित्र सास्त्रमि इसेरि लेखिया छ, “सब दोस दुइ या तीन साचि गवाही बठेइ साबित अरिनु पणन्छ” जब म दोसरा बेरका भेटमि ताँ थ्या, मइले पापमय काम अद्द्यालाइ पइल्ली चेताउनी दिसक्या थ्या। पइल्लिका चिठ्ठीमि तमनलाइ चेताउनी दिया जसेरि आजी म तमनलाइ रे औरलाइ लगइ चेताउनी दिनउ। आब म तेसरी बेर तमरा वाँ आउन्यावालो छु, यदि तिननले आजी लगइ पाप अद्द छाड्या आथिन भण्या कोइलगइ दण्ड बठेइ उम्कन सक्द्या आथिन।

³ म यो भणनउ क्याकि तमनले ख्रीष्ट म बठेइ बोल्लाहान भणन्या प्रमाण खोजन्छौ। तमनसितका व्यवहारमि उन दुर्बल हुनाइन, तर उन तमनमि सक्तिशाली हुनाहान।

⁴ क्याकि दुर्बलतामि उन क्रुसमि टाँङिया तर परमेश्वरकि सक्तिमि उन जिउना छन। ख्रीष्ट कमजोर भया जसेरि हाम लगइ कमजोर छौ, तर तमन सितको हामरो ब्यबहार अददाइलाइ परमेश्वरको सक्ति बठेइ हाम उनसितइ जिउन्या हौ।

⁵ तमन बिश्वासमि बलिया छौ कि आथिन भणि आफले आफइलाइ जाँचिबर हेर रे जाँच कि तमरो बिश्वास सत्य छ कि आथिन। तमन जाँचमि असफल भया आथिनु, यदि तमन जाणन्छौ कि येशू ख्रीष्ट तमनमि छन।

⁶ म आसा अद्दौ कि हाम असफल भएका आथिनौ भण्न्या तमन था पाउन्या हौ।

⁷ तर हाम परमेश्वरमि प्रार्थना अददाउ कि तमन केइ खराबी जन अर। हाम यो प्रार्थना अददाउ कि तमनलाइ हामरो सेबकाइ सफल भया धेकाउनाइ होइन, तर यदि हाम आफइ असफल धेकिया लगइ तमन असल काम अर भणन्या हाम चाहानाउ।

⁸ क्याकि हाम सत्यको बिरोधमी केइ अद्द सक्दाइन, सत्यका निउति मान्तर अद्द सक्दाउ।

⁹ क्याकि हाम कमजोर हुन्ज्या रे तमन बिश्वासमि बलिया हुन्ज्या हाम आनन्दित हुनाउ। हाम प्रार्थना अद्दाउ कि तमरा बिश्वासमि सिद्द हुनाइ जा।

¹⁰ तबइकिलाइ म तमरा वाँ आउना हइ पइल्ली म तमनलाइ यो कुरणी लेख्दाछु, ताकि प्रभुले मलाइ तमनलाइ दण्ड दिन्या अधिकार दिया छन भणि म तमनलाइ धेकाउन सकु। क्याकि म आफ्नो अधिकार प्रयोग अरिबर तमनलाइ बिश्वासमि बलियो बनाउन चाहानउ, नास अद्द चाहानइन।

आखिरी अबिबादन

¹¹ अन्तमी बिश्वासि भाइन हो, आब बिदा पाउ। सिद्दताको लक्ष राख। एक अर्खालाइ उत्साहित अर। एक अर्खासित सहमत होओ। सान्तिमि रअ रे प्रेम रे सान्तिका परमेश्वर तमनसित हुन्या हुन।

¹² एकले अर्खालाइ ख्रीष्टिय अबिबादन अर।

¹³ सब पबित्र जनले तमनलाइ अबिबादन पठाया छन।

¹⁴ प्रभु येशू ख्रीष्टको अनुग्रह, परमेश्वरको प्रेम रे पबित्र आत्माको संगति तमन सबसित रहुन।