२ कोरिन्थी 11 - डोटेली नयाँ करार

पावल रे झुटा छान्या मान्स

¹ तमन तिननलाइ स्वीकार अरन्छौ जो आफ्नो प्रसंसा आफइ अददाहान, रे म आसा अद्दउ, कि यदि म अलि मुर्ख जसो काम अद्दउ भण्या तमन मलाइ सन्या हौ।

² परमेश्वरले तमनलाइ प्रेम रे हेरचाह अरेइ जसेरि म लगइ अद्दउ। तबइकिलाइ म बाचा अद्दउ कि ख्रीष्टलाइ तमरा एक मान्तर ब्याउलाका रुपमि दिनउ। रे तमनलाइ उनरो पबित्र ब्याउलीका रुपमि दिन चाहानउ।

³ तर जसेरि सैतान स्यापका रुपमि आफना चलाकिले पइल्ली आइमाइ हव्वालाइ छल्यो, तसेरि तमरा बिचारले छ्लल्या हो रे तमनले ख्रीष्टको आदरमि आफ्नो पुरा रे सुद्द भक्ति अद्द छाड्डया हौ भणबर मलाइ डर लाग्या छ।

⁴ हामले येशूको बारेमि भण्या, रे तमनले हामरो सुसमाचार ग्रहण अरिबर पबित्र आत्मा पाया। तर तमन अर्खा येशूका बारेमि केइ मान्सनलाइ भणन दिन्छौ। आब तमन अर्खा आत्मा रे अर्खो सुसमाचार ग्रहण अददाइलाइ तयार छौ, तमनले गल्तिले पुरा हृदयले त्यो ग्रहण अर्या।

⁵ यदि तिनन आफइलाइ सब येशू ख्रीष्टका छान्या शिष्य भण्ना महान भया जसो ब्यबहार अददाहान रे काम अददाहान भण्या म लगइ आफलाइ तिनन जसोइ असल सोच्चउ।

⁶ म सिपालु बक्ता नभया लगइ ममि ख्रीष्ट रे सुसमाचारका बारेमि ज्ञान छ। यो मइले सिकाया कुरणीमि हर किसमले मइले तमनलाइ धेकाउनोइ आया छु।

⁷ आफलाइ होच्याइबर तमनलाइ उच्च पाणुँ भणि परमेश्वरको सुसमाचार मइले तमनलाइ सितैमि सुणाउन्ज्या कि मइले पाप अर्या ब?

⁸ म और मण्डलिका सहयोगले तमरो सेवा सित्तैमि अद्द सक्या छु। यइलाइ लुट जन भण!

⁹ तमनसित रन्ज्या जब मलाइ पैसाको अभाब पण्याथ्यो म कसइको बोज भएन, क्याकि माकेडोनिया प्रदेस बठेइ आया भाइनले मेरो अभाब पुरा अरिदियो। तबइकिलाइ कसइ किसमले तमनमि बोज पणलो कि भणबर मइले आफइलाइ रोक्या, रे पछा आउन्या दिनमि लगइ रोक्द्या हु।

¹⁰ म पक्‍का छु कि ख्रीष्टको सत्यता ममि छ, रे अखैया प्रदेशका इलाकाका कसइ बठेइ मइले पैसा लइया आथिन, यो मेरो गौरबलाइ कसइले रोक्द सक्दाइन।

¹¹ क्याइ मइले तमरो पैसा लयइन? कि मइले तमनलाइ प्रेम नअर्या हुनाले इसो अर्या? परमेश्वर जाण्नाहान कि म तमनलाइ प्रेम अद्दउ।

¹² म तमनसित सहयोग लिन सक्दइन ताकि म तिननलाइ रोक्द सकु जो हामले परमेश्वरको काम अर्या जसेरि तिननले अददाहान भणि घमण्ड अद्द्या मौका खोज्जाहान।

¹³ क्याकि इसा मान्सन येशू ख्रीष्टका साचो छान्या शिष्या होइन रे छलि काम अद्द्या हुन रे येशू ख्रीष्टका छान्या शिष्याका भेष लिइबर हिट्टया मान्त्तर हुन।

¹⁴ रे यो केइ अचम्मको कुरणी होइन, क्याकि सैतानले लगइ परमेश्वरको महिमा भया स्वर्गदुतको भेष लिइबर धोका दिनाहान।

¹⁵ तबइकिलाइ यो केइ अनौठो कुरणी होइन कि तइका दासले लगइ धार्मिकताका दासका रुपमि आफ्नो भेष बदल्लाहान। तिनरो अन्त्य तिनरा काम अन्सार हुन्छ।

पावलका कष्ट

¹⁶ म आजी भण्नउ, कसइ मान्सले मलाइ मुर्ख जन सम्जउ। तर तमन तसो सम्जन्छौ भण्या लगइ मुर्खलाइ जसेरि मलाइ ग्रहण अर, ताकि म लगइ केइ घमण्ड अद्द सकु।

¹⁷ मेरो यइ घमण्डका निश्चयमि म प्रभुले बोल्या जसेरि बोल्ल सक्दइन तर मुर्खइ जसेरि बोल्ला छु।

¹⁸ भौतले यइ संसारका मान्सन जसेरि घमण्ड अर्या हुनाले म लगइ घमण्ड अद्दउ।

¹⁹ तमन आफइ इति बुद्दिमान भइबर खुसीसित मुर्खलाइ सन्छौ।

²⁰ क्याकि यदि कसइ मान्सले तमनलाइ नौकर बनाउछ अथवा तमनलाइ आफ्नो सिकार बनाउछ अथवा तमन बठेइ फाइदा उठाउछ अथवा धाक लाउन्छ अथवा तमनलाइ मुखमि थप्पडी लाउछ भण्या लगइ तमन सब सन्या रइछौ।

²¹ कि तमन सोचन्छौ कि मइले तसो नअर्या हुनाले, म लज्जित छु? तर कसइले केइ कुरणीमि घमण्ड अरन्छ भण्या, म लगइ तिन कुरणीमि घमण्ड अद्दउ। हो, म मुर्खइ जसेरि बोल्ला छु।

²² कि तिनन हिब्रु हुन? म लगइ हु। कि तिनन अब्राहामका सन्तान हुन? म लगइ हु। कि तिनन इस्राएल देशका मान्सन हुन? म लगइ हु।

²³ कि तिनन ख्रीष्टका सेवक हुन? म झिक असल सेवक हु। पागलइ जसेरि म बोल्ला छु। मइले उइका भण्ना बरता परिश्रम अर्या। म उइका भण्ना बरता झेलमि भौत बेर पण्या। अनगिन्ती कोर्रा खाया, बेर बेरि मृत्युका मुखमि पण्या।

²⁴ पाँच बेर मइले यहुदि मान्सनका सासकका हात बठेइ उनचालिस कोर्रा खाया।

²⁵ तीन बेर मलाइ लठ्ठी हाण्यो, एक बेर भौत ढुङाले हाण्यो। तीन बेर म चडाया जहाज ध्वस्त भयो रे दुब्यो। एक दिन एक रात मइले समुदरमिइ बिताया छु।

²⁶ मेरो बारम्बारका यात्रामि म नदिका जोखिममि पण्या, डाँकुका जोखिममि, आफनाइ जातिका मान्सका जोखिममि, गैर-यहुदिका जोखिममि, सहरका जोखिममि, उजाड ठाउँका जोखिममि, समुद्रका जोखिममि रे झुटा भाइन बठेइ आउने जोखिममि।

²⁷ भौत परिश्रम अर्या रे कष्ट सया, कति उनिला रातमि, भोक रे तिसमि बेर बेरि भोकमरिमि ठणनी रे नग्नतामि पण्या।

²⁸ रे यिन कुरणी बाहेक म सब मण्डलिका बिश्वासीनका बारेमि फिक्री अद्दउ।

²⁹ जब कोइ कमजोर छ रे म लगइ कमजोर महसुस अद्दउ। जब कसइलाइ पापले दोर्याउछ रे म ब्याकुल हुनउ।

³⁰ मइले गर्व अद्दु पड्डया हो भण्या म आफ्नो कमजोरि धेकाउन्या कुरणीमि गर्व अदद्या हु।

³¹ परमेश्वर, हामरा प्रभु येशूका पिता जो सदासर्वदा धन्यका हुन उन जाण्नाहान कि म ढाट्टइन।

³² दमस्कस सहरमि अरितस राजाका हाकिमले मलाइ पकड्डाइ तइ सहरमि पहरा राख्याथ्यो।

³³ तर तइ सहरका पर्खालका खुल्ला ठाउँमि डालामि राखिबर मलाइ तल्तिर ओलाया हुनाले म हाकिम बठेइ उम्क्या।