२ कोरिन्थी 10 - डोटेली नयाँ करार

पावलको सेवा

¹ म पावल तमरा अगाडी नम्र हुनउ, तर दुर हुन्तक तमन प्रति साहसि हुनउ! ख्रीष्टको नम्रता रे कोमलता बठेइ म तमलाइ बिन्ति अद्दउ।

² केइ मान्सनले भण्या छन कि हाम यइ संसारका मान्सन जसाइ ब्यबहार अददाउ। तबइकिलाइ जब म आउनउ तब म तिननसित कठोर हुनु पड्डया छ। म जोरसित बिन्ति अद्दउ कि जब म आउन्या हु तब मइले तमनसित कठोर ब्यबहार अददु पड्डया आथिन।

³ क्याकि हाम संसारमी बस्साउ पइलगइ यइ संसारका मान्सन जसा हाम आफ्ना सत्तुर सित लड्डाइन।

⁴ क्याकि हामरा युद्दका हातहतियार संसारका होइन, तर किल्ला नास अद्द्या परमेश्वरको सामर्थी हातहतियार हुन।

⁵ परमेश्वरका ज्ञानका बिरोधमी आउन्या बहस रे हरेक अहंकार बठेइ आउन्या हरेक बाधालाइ हाम नास अद्दाउ, रे हरेक बिचारलाइ ख्रीष्टको आज्ञापालन अद्दाइलाइ बसमि पाड्डाउ।

⁶ जब तमन ख्रीष्टमी पुरा आज्ञाकारी हुन्छौ। हरेक जो अनाज्ञाकारी छ उइलाइ दण्ड दिनाइ हाम तयार बस्या हौ।

⁷ तमन बाइर धेकिन्या कुरणीलाइ हेरन्छौ। यदि कसइ मान्सलाइ यो भरोसा छ कि उ ख्रीष्टको हो भण्या, उइले आजी आफइलाइ याद अराओस कि जसो उ ख्रीष्टको हो, हाम लगइ ख्रीष्टइका हौ।

⁸ क्याकि हामरा अधिकारका बारेमि मइले केइ बरताइ घमण्ड अर्या भण्या लगइ म लाजमि पड्ड्या होइन, क्याकि यो अधिकार तमरा बिश्वासलाइ नास अददाइ होइन, तर प्रभुले तमरो बिश्वास बढाउनाइ सहयोग अददाइ हामलाइ दिया हो।

⁹ मइले तमलाइ लेख्या चिठ्ठी तमनलाइ डराउनाइलाइ हो भणि जन सम्ज्या।

¹⁰ क्याकि केइ मान्सन भण्नाहान, तइले लेखेइ चिठ्ठी गहकिलि रे प्रभाबशाली हुन्छे, तर त्यो आफइ हाजिर हुन्तक भण्या त्यो कमजोर हुन्छ रे तइको बचनको केइ महत्त्व हुनइन।

¹¹ तसा मान्सनले याद राखुन कि हाम आफ्ना अनुपस्थितिमि चिठ्ठी बठेइ जी भण्नाउ, उपस्थिति भया बेला लगइ तसइ काम अद्दाउ।

¹² आफनी बडुवाँइ आफइले अद्द्या कसइ कसइ मान्ससित हाम आफइलाइ एकै दर्जामि राख्द चाहानाइन, अथवा आफइलाइ तिननसित दाँज्ज हाम साहस अद्दाइन। तर तिनन आफले-आफइलाइ एक अर्खासित तुलना अरिबर तिनन समज नभया हुनाहान।

¹³ हामसित नभया अधिकारको हाम घमण्ड अद्द्या आथिन। हामरि निउति परमेश्वरको योजनामि हाम सिमित हुन्या हु, रे तमनसित ताँ हामले काम अददु इसइ योजना भितर पणन्छ।

¹⁴ तमरा वाँ आउनाइ नआया जसो हाम बडाइ चड़ाइ घमण्ड अद्दाइन, क्याकि भण्या ख्रीष्टको सुसमाचार लेइबर दुरका यात्रा बठेइ तमरा वाँ पइल्ली कोरिन्थ सहरमि पुग्द्या हामइ थ्या।

¹⁵ हाम सिमा निङालिबर औरका परिश्रममि घमण्ड अद्दाइन, तर हामरो आसा यो छ, कि तमरो बिश्वास बड्डारया बेला तमरा बिचमि हामरो काम झिक बड्डोइ जान्या हो,

¹⁶ ताकि हाम टाडा-दुरका क्षेत्रमी अगाडी और बठेइ भइ सक्या काममी घमण्ड नअरिबर तमन बठेइ बाइरका ठाउँमि सुसमाचार प्रचार अद्द सकौ।

¹⁷ जसेरि पबित्र सास्त्रले भणन्छ, “घमण्ड अद्द्याले प्रभुमि घमण्ड अरउ।”

¹⁸ क्याकि आफ्नो बडुवाँइ आफइ अद्द्या मान्स स्वीकार अरिनइन, तर जइको तारिफ प्रभुले अददाहान, उ निको तरिकाले स्वीकार अरिन्छ।