१ कोरिन्थी 9 - डोटेली नयाँ करार

छान्या मान्सको अधिकार

¹ मेरा इच्छा अनसार केइलगइ खानाइलाइ म स्वतन्त्र छु। म एक येशू ख्रीष्टको छान्या शिष्य हु। मइले हामरा प्रभु येशूलाइ धेक्या छु। तमन प्रभुले मलाइ अद्दाइ दिया कामको प्रतिफल हौ।

² यदि और मान्सनले म येशू ख्रीष्टको छान्या शिष्य हु भणबर स्वीकार अद्दाइन भण्या, तमन बिश्वासीले तइलाइ स्वीकार अददु पणन्छ। क्याकि मइले तमरा वाँ सुसमाचार लेया। प्रभु येशूमि तमरो बिश्वासले म एक येशू ख्रीष्टको छान्या शिष्य हु भणबर प्रमाणित अरन्छ।

³ येशू ख्रीष्टको छान्या शिष्य भया हुनाले मेरो न्याय अद्दया मान्सनलाइ मेरो यइ उत्तर छ।

⁴ बारनाबास रे म, येशू ख्रीष्टको छान्या शिष्या भया हुनाले पक्‍कालगइ हामरा कामकी निउति तमन बठेइ आर्थिक सहयोग पाउन्या अधिकार छ।

⁵ क्याकि और येशू ख्रीष्टको छान्या शिष्या रे प्रभुका भाइन रे पत्रुसले (केफास) आफ्ना स्वानिलाइ आफसित यात्रामि लइजानाहान, तबइकिलाइ हामलाइ लगइ यो अधिकार छ।

⁶ प्रभु येशूका और छान्या शिष्या आर्थिक सहयोग पाया जसेरि, बारनाबास रे मलाइ लगइ यो पाउन्या अधिकार छ, रे आफ्नो जीवन चलाउनाइ काम अददु जरुरी आथिन।

⁷ कसइ सिपाइले आफ्नाइ खर्चमि सेनामि काम अद्दइन। कसइ मान्सले केइ अंगुर नखाइबर अंगुर लाउनइन। कसइ मान्सले दुध नखाइबर भेडाबाकराका बगालको हेरचाह अद्दइन।

⁸ म यिन कुरणी मान्सका कामका आधारमी भण्ना रएइन। मोशाका कानुनले लगइ इसोइ भणन्छ।

⁹ क्याकि मोशाका कानुनमी इसो लेख्या छ, “दाइ अरनज्या गोरुका माना जन ला।” तमनलाइ लागन्छ कि परमेश्वरले गोरुका बारेमि मान्तर सोच्चाहान? होइन।

¹⁰ कि उनले हामकिलाइ यो भण्या होइन ब? हामइ किलाइ यो लेखिया हो। क्याकि जोत्या रे दाइ अद्द्याले अन्नको केइ हिस्सा पाउन्या आसाइमि जोतन्छ रे दाइँअरन्छ।

¹¹ हामले तमरा बिचमि आत्मिक बि रोप्या छु, तबइकिलाइ हामले तमन बठेइ भौतिक फाइदा उठाउनु पणन्छ भणन्या आसा अददु ठिकइ हो।

¹² क्याकि तमनले और मान्सनलाइ सहयोग अर्या छौ जइले तमनलाइ प्रचार अर्याथ्यो, पक्‍कालगइ बारनाबास रे म यइकिलाइ तिनन भण्ना भौत योग्य छौ। पइलगइ हाम दुइ जानाले भणनेइ कि हामलाइ चाइया कुरणी तमन दिय। बरु हाम सब कुरणी सहन तयार भया, ताकि हाम कसइलाइ ख्रीष्टको सुसमाचारमि बिश्वास अद्दा बठेइ रोक्द सक्दाइन।

¹³ कि तमनलाइ था आथिन कि मन्दिरमि काम अद्द्या मान्सनले तिनरो खाना मन्दिर बठेइ पाउनाहान? हो, बेदिमि बलि चडाउन्याले बलिको भाग पाउनाहान।

¹⁴ तसेरि सुसमाचार प्रचार अद्द्याले लगइ सुसमाचार सुण्या मान्सन बठेइ जीविका चलाउन भणि प्रभुले भणिराइछ।

¹⁵ तर मइले यिन अधिकार मध्ये कसइ अधिकार लिया आथिन। तमनले मेरा निउति आब केइ अरला भणबर मइले यो लेख्या होइन। बिलकुल होइन! मेरी निउति मद्दु असल हो! क्याकि मइले आफ्नो खर्च आफइ चलायामि मलाइ कसइले घमण्ड अद्द बठेइ रोक्द सक्दइन।

¹⁶ यदि मइले सुसमाचार प्रचार अर्या भण्या, तइमि मइले घमण्ड अद्द्या केइ कारण आथिन। क्याकि येशू ख्रीष्टले मलाइ इसो अद्दया जिम्मेवारी दिया छ। यदि सुसमाचार प्रचार अरेइन भण्या, म भयानक समस्यामि हुन्या हु।

¹⁷ यदि मइले आफ्नो इच्छाले यो काम अर्या भण्या, मइले इनाम पाउन्या हु। तर यदि मइले आफना इच्छाले अर्या होइन रे परमेश्वरले मलाइ दिया जिम्माका लाग्दा अर्या भण्या मइले केइ इनाम पाउन्या आसा अद्द सक्दइन।

¹⁸ तब मेरो इनाम कि हो? इति मान्तर हो कि उसोइ सुसमाचार प्रचार अद्द पाउनु आनन्दकी कुरणी हो, जबकि मसित मेरो जीवन चलाउनाइ आर्थिक सहयोग पाउन्या अधिकार छ।

सब मान्सनको सेवा अददु

¹⁹ यइको मतलब यो हो कि तिननले मलाइ पैसा तिर्या हुनाले म मान्सनको आज्ञापालन अददाइ बाद्य आथिन, तर म सबको दास भया छु, ताकि म तिननलाइ ख्रीष्टमी ल्याउन सकु।

²⁰ त्यो भण्या, जब म यहुदि मान्सनसित हुनउ, तब म तिननलाइ ख्रीष्टमी ल्याउनाइ मइले यहुदि मान्सनकि जसेरि जीवन बिताया। जब म यहुदि कानुन पालन अद्द्यासित थ्या, तब मइले लगइ कानुनका अधिनमी जीवन बिताया। जबकि मइले तिन कानुन पालन अददु पड्डया थेइन, मइले इसो अर्या, ताकि म कानुनका अधिनमी भयालाइ ख्रीष्टमी ल्याउ सकु।

²¹ तसेरि जब म गैर-यहुदि मान्सनसित काम अद्दाथ्या तब मइले गैर-यहुदि मान्सनलाइ ख्रीष्टमी ल्याउनाइ तिनरि जसेरि जीवन बिताया जइले यहुदि कानुन पालन अद्दइन। यइको मतलब यो होइन कि मइले परमेश्वरका कानुन माणनइन, क्याकि म सदाइ ख्रीष्टको कानुन पालन अद्दउ।

²² जब म बिश्वासमि कमजोर भया मान्सनसित हुनउ, तिनरि जसेरि ब्यबहार म अद्दउ, तकि म तिननलाइ ख्रीष्टमी ल्याउनाइ सहयोग अद्द सकु म सब किसिमले केइ मान्सनलाइ बचाउन सकु भणबर सबइका निउति म सब थोक बन्या।

²³ म ख्रीष्टका बारेमि सुसमाचार प्रचार अददाइ यिन सब थोक अद्दउ ताकि, म सुसमाचारमि प्रतिज्ञा अर्या आशिषमी सहभागी हुन सकु।

बिश्वासीको दौड

²⁴ तमनलाइ था छ, कि दौडमि दकुड्डया भौत हुनाहान, तर इनाम एकइले मान्तर पाउन्छ। तबइकिलाइ तमन इनाम पाउन्या हिसाबले दौड।

²⁵ खेलाडिले नष्ट हुन्या मुकुट पाउनाइ भौत महेनत अरन्छ, तर हाम सदाइ रन्या मुकुटकिलाइ काम अद्दाउ।

²⁶ एक दौडया मान्सले आफ्नो लक्ष्य राख्या जसेरि अथवा मुक्‍काबाजले आफ्नो मुक्‍का नियन्त्रणमि राख्या जसेरि म आफ्नो ख्रीष्टिय जीवन ख्रीष्टको अधिनमी भइबर जिउनउ।

²⁷ म आफ्नो शरीरलाइ नियन्त्रण अद्दउ, ताकि म दुष्ट इच्छा अनसार जीवन जन बिताउ। नतित मइले और मान्सनलाइ सुसमाचार प्रचार अर्या इनाम पाउन्या होइन।