१ कोरिन्थी 7 - डोटेली नयाँ करार

ब्या सम्बन्धि

¹ आब तमनले चिठ्ठीमि सोध्या प्रस्नको उत्तर दिनउ। तमनले सोध्या थ्या, “कि हामले ब्या नअददु असल हो?”

² तर मान्सन ब्यभिचारको परिक्षा सजिसित पड्डाहान, तबइकिलाइ म भणनउ कि हरेक मान्सले ब्या अरिबर बैकान आफनी स्वानिसित बफादार हुनु पणन्छ रे स्वानी आफ्ना बैकानसित बफादार हुनु पणन्छ।

³ बैकानले आफनी स्वानिलाइ उइको बैवाहिक हक दीओस, रे इसेरि स्वानिले लगइ आफना बैकानलाइ।

⁴ स्वानिले आफ्ना सरीरमि हक राख्दइन, तर उइका बैकानले राखन्छ। इसेरि बैकानले लगइ आफना सरीरमि हक राख्दइन, तर उइकी स्वानिले राखन्छे।

⁵ स्वानी बैकानले आफ्नो शारीरिक सम्पर्कमि एक अर्खालाइ इन्कार जन अरउ। इन्कार अद्द्या भया लगइ एक आपसमी सल्लाह अरिबर केइ समयकी निउति मान्तर, ताकि तमन प्रार्थनामि लागिरउ। तमन आजी स्वानी बैकान जसेरि संङइ बस्सु पणन्छ। ताकि सैतानले तमनलाइ ब्यभिचारको परिक्षा जन पाणउ, क्याकि नतित तमनले आफनो इच्छालाइ बसमि राख्द सक्द्या होइनु।

⁶ यो म तमनलाइ आज्ञाका रुपमि होइन, तर सुजाबका रुपमि भण्नउ।

⁷ सब मान्सन म जसाइ अविबाहित रया म इच्छा अद्दउ। तर हरेकलाइ परमेश्वर बठेइ बिसेस बरदान मिल्या छ, परमेश्वरले कसइलाइ ब्या अद्द्या बरदान, रे कसइलाइ अविबाहित रन्या बरदान दिनाहान।

अविबाहित मान्सनकिलाइ सल्लाह

⁸ अविबाहित रे बिधवालाइ मेरो यो सल्लाह छ, म जसो अविबाहित रनु असल हो।

⁹ तर तिननले आफनो इच्छालाइ बसमि राख्द सक्दाइन भण्या तिननले ब्या अरुन। क्याकि कामवासनामि जल्लु भण्ना ब्या अद्दु ठीक हो।

बिबाहित मान्सनलाइ सल्लाह

¹⁰ आब बिबाहितलाइ म कडा आज्ञा दिनउ, यो मेरो आज्ञा होइन, तर प्रभु येशूको आज्ञा हो। स्वानी बैकान बठेइ अलग जन होउ।

¹¹ तर अलग भइबर बस्याबर लगइ तइले अर्खो ब्या जन अरउ, बरु आफना बैकानसित मिलाप अरउ। बैकानले लगइ आफ्नि स्वानिलाइ जन त्यागउ।

¹² यो आज्ञा प्रभु येशू बठेइ होइन तर म बठेइ हो, आब म और बिश्वासीनसित कुरणी अददाछु, जइले ख्रीष्टमी बिश्वास नअद्दया सित ब्या अर्याछ। यदि कोइ बिश्वासि भाइकि ख्रीष्टमी बिश्वास नअद्देइ स्वानी छ, रे तिन बैकानसित बस्स खोजन्छे भण्या, बैकानले आफ्ना स्वानिलाइ जन त्यागउ।

¹³ रे यदि कसइ स्वानिको ख्रीष्टमी बिश्वास नअद्दया बैकान छ, रे त्यो स्वानी सित बस्स खोजन्छ भण्या, तिनले आफ्ना बैकानलाइ जन त्यागउ।

¹⁴ क्याकि परमेश्वरले ख्रीष्टमी बिश्वास नअद्दया बैकानलाइ आफना मान्सनलाइ जसेरि ब्यबहार अददाहान, क्याकि उइकी स्वानी बिश्वासि हो, रे परमेश्वरले ख्रीष्टमी बिश्वास नअद्दया स्वानिलाइ आफना मान्सनलाइ जसेरि ब्यबहार अददाहान, क्याकि तइको बैकान बिश्वासि हो। यदि ख्रीष्टमी बिश्वास नअद्दया तमरा बैकान अथवा स्वानी परमेश्वरका हुन भणनेइ कुरणी सत्य होइन भण्या तमरा चेलाचेली परमेश्वरका हुन्या होइन। तर आब तमरा चेलाचेली परमेश्वरका हुन।

¹⁵ तर ख्रीष्टमी बिश्वास नअद्दया छुट्टिन्छ भण्या छुट्टियोस। यदि ख्रीष्टमी बिश्वास नअद्द्याले सम्बन्ध बिच्छेद अद्द चाहान्छ भण्या, बिश्वासीले त्यो ख्रीष्टमी बिश्वास नअद्द्या सित ब्याको बन्धनमि रनु जरुरी आथिन। क्याकि परमेश्वरले हामलाइ सान्तिमि बस्साइ बोलाया हो।

¹⁶ स्वानिले यो याद अददु पणन्छ, कि तमरा बैकान तमरा लाग्दा बिश्वासमि आया हुनु पणन्छ, रे बैकानले यो याद अददु पणन्छ, कि तमरि स्वानिले तमरा लाग्दा बिश्वासमि आया हुनु पणन्छ।

परमेश्वरको बोलावट अन्सार जीवन बिताउनु

¹⁷ मइले तमनलाइ भण्नार्या कुरणीको निचोड यो हो, कि परमेश्वरले हरेकलाइ उनरा मान्सन हुनाइ बोलाया सुण्या बेला, प्रभुले तिननलाइ दिया तिनरो स्तर अनसार तइ अवस्थामी तिनरो दिन दिनको जीवन जिउनु पणन्छ। यो नियम मइले सबइ मण्डलिमि सिकाया।

¹⁸ उदाहरणकिलाइ जब एक यहुदि मान्सले प्रभु येशूमि बिश्वास अरन्छ भण्या, तब उइले यहुदि नभया जसो धेकाउनु पड्डइन। तसेरि यदि एक गैर-यहुदि मान्सले प्रभुलाइ बिश्वास अरन्छ भण्या, उइले यहुदि मान्स हुनाइ खतना अददु पड्डइन।

¹⁹ कसइ मान्सको खतना भया लगइ नभया लगइ यइले केइ फरक पड्डइन तर परमेश्वरको आज्ञापालन अददु मुख्य कुरणी हो।

²⁰ परमेश्वरले जइ अवस्थामी उनरा मान्स हुनाइ बोलाया छ, तसइ अवस्थामी हरेक मान्सले दिन-दिनको जीवन बिताओस।

²¹ तमनले बिश्वास अरन्ज्या कि तमन नौकर थ्या? यदि थ्या भण्या तइको बारेमि तमनले ननिको माणनु पड्डइन, तर यदि तमरा मालिकले तमन स्वतन्त्र हुन सकन्छौ भण्यो भण्या तमन जा रे स्वतन्त्र हुनाइ जी अददु पणन्छ अर।

²² क्याकि परमेश्वरले उनरा मान्स हुनाइ बोलाउन्ज्या जो मान्स नौकर थ्यो, त्यो आब स्वतन्त्र मान्स जसो हो, क्याकि प्रभु येशूले तइलाइ तइका पाप बठेइ स्वतन्त्र अर्याछ। तसेरि परमेश्वरले उनरा मान्स हुनाइ बोलाउन्ज्या जो मान्स स्वतन्त्र थ्यो, तिन आब ख्रीष्टका दास भया छन।

²³ परमेश्वरले तमनलाइ मोल तिरिबर किन्यो, मान्सका नौकर जन बन, तर परमेश्वरका दास बन।

²⁴ बिश्वासि भाइन हो, जइलाइ परमेश्वरले जइ अवस्थामी उनरा मान्स हुनाइ बोलाया छ, तसइ अवस्थामी परमेश्वरसित हरेक मान्सले दिन दिनइको जीवन बिताओस।

ब्या सम्बन्धि प्रस्नको उत्तर

²⁵ कन्याका बारेमि प्रभुको आज्ञा मसित केइ आथिन। तर प्रभुले उनरो कृपामि मलाइ बुद्दि दिया छन, जइमि भरोसा अद्द सकिन्छ रे म मेरो सल्लाह दिनउ।

²⁶ बर्तमान समयमि सब ठाउँमि बिश्वासिलाइ सतावट हुन्नाछ, मेरो बिचारमी तमनकीलाइ यिसो अददु असल हो, म सल्लाह दिनउ कि अविबाहित मान्स सब अविबाहित रअ।

²⁷ यदि तमन बिबाहित छौ भण्या बिबाहित रअ। यदि तमन अविबाहित छौ भण्या ब्या अद्द जनखोज।

²⁸ तर यदि तमनले ब्या अर्या भण्या लगइ त्यो पाप होइन। कन्या केटिले ब्या अर्यो भण्या तइले पाप अरेइ हुनिन। तर ब्या अर्या मान्सनले यइ संसारमी आफ्नो जीवनमी कष्ट भोग्दु पड्डया हो, रे इसा समस्या बठेइ तमन मुक्त भया म चाहानउ।

²⁹ बिश्वासि भाइन हो, मइले भण्न्या कुरणी यइ हो, हामसित यइ संसारमी भौत समय बाकि आथिन। तबइकिलाइ तमनले ब्या अर्या अथवा नअर्या भया लगइ चिन्ता जन अर। तर प्रभुको सेवा अदद्या बारेमि लगातार सोचि राख।

³⁰ सोक अद्द्या मान्सनले, अथवा खुशी हुन्या मान्सनले, अथवा आफनी निउति सामान किन्नया मान्सनले यिन सब कुरणिका बारेमि चिन्ता माण्नु पड्डइन।

³¹ रे यो संसारमी हामसित भया केइलगइ थोकलाइ हामरि निउति भौत महत्वपूर्ण नभया माणनु पणन्छ, क्याकि यइ संसारमी भया सब थोक छिट्टाइ बिति जान्या हुन।

³² तमन संसारिक जीवनको अभिलाषा बठेइ मुक्त होउ भणन्या म चाहानौ। ब्या नभया मान्सले प्रभुको सेवा कसेरी अद्द्या रे उनलाइ कसेरी खुशी बनाउन्या बारेमि चिन्ता अरन्छ।

³³ तर ब्या भया मान्सले स्वानिलाइ कसेरी खुशी राखु भणबर संसारकी कुरणीमि चिन्ता अरन्छ।

³⁴ तइले दुइ कुरणिका बारेमि सोच्चु पणन्छ: आफ्नि स्वानिलाइ खुशी पड्डु रे प्रभुलाइ खुशी पड्डु। तसेरि ब्या नभयइ स्वानी शरीर रे आत्मा दुएइमि प्रभुमि समर्पित हुनाइ प्रभुको सेवा कसेरी अद्द्या तइ बारेमि चिन्ता अरन्छे। तर ब्या अर्याले आफना बैकानलाइ कसेरी खुशी राखु भणबर संसारिक कुरणीको चिन्ता अरन्छे।

³⁵ यिन कुरणी तमनमि प्रतिबन्द लाउनाइ होइन, तर तमरा भलाइकी निउति भण्नाछु, ताकि तमन एकइ मनका भइबर प्रभुप्रति भक्तिसित ठीक किसिमले जीवन जिउन सक।

³⁶ यदि तमनमि हइ कसइका बाले मगनि भयइ चेली राखिराइछ भण्या, आब बाले सोचन्छ कि इसो अददु निको होइन, रे चेलीको ब्या अदद्या उमेर ढल्किना छ, रे आब उइले सोचन्छ कि उइकी चेलिले साच्ची ब्या अददु पणन्छ, रे केटाले लगइ ब्या अद्द इच्छा अर्यो भण्या, केटिका बाले ब्या अद्द्या ब्यबस्था अददु पणन्छ। केटिका बाले केटिलाइ ब्या अद्द्या अनुमति दिइबर पाप अद्दइन। उइले आफ्नि चेलीको ब्या अददु पणन्छ।

³⁷ तर यदि तइ केटिका बाले आफ्ना मनमि पक्‍का निर्णय अरन्छ कि उइकी चेलिले ब्या नअर्या असल हो, रे कसइले चेलीलाइ ब्या नअद्दाइ कर अर्या आथिन भण्या, आफले निर्णय अर्या कुरणी अद्द्या अधिकार उइसित छ। रे तसेरि यदि उइले आफ्नि चेलीलाइ तसोइ ब्या नअरेइ राख्द्या निर्णय अददाछ भण्या, उइले परमेश्वरका नजरमि असल काम अददाछ।

³⁸ इसेरि जइले कन्यालाइ ब्या अरन्छ, उइले ठीक अरन्छ, तर जइले ब्या अद्दइन, उइले झिक निको अरन्छ।

³⁹ बैकान बाँचन्ज्या स्वानी बैकानसित बस्सु पणन्छ। तर बैकान मर्या पछा तइको इच्छा भया अर्खा मान्ससित ब्या अद्दाइ उ स्वतन्त्र हुन्छे, तर उ प्रभुमि बिश्वास अद्द्या मान्स हुनु पणन्छ।

⁴⁰ तर यदि तिनले आजी ब्या अद्दइन भण्या मेरा बिचारमी तिन और खुशी हुन्छिन। रे म सम्जनउ कि यिन कुरणीमि परमेश्वरका आत्माले मलाइ अगुवाइ अद्दा छन।