१ कोरिन्थी 5 - डोटेली नयाँ करार

मण्डलिमि अनैतिक सदस्य

¹ तमरा बारेमि मान्सनले कुरणी अर्या मइले सुण्या कि तमरा मण्डलिका केइ मान्सले व्यभिचार अद्दा छन, इसो व्यभिचार जो गैर-यहुदि मान्सनमि लगइ हुनइन। तमन मध्ये कसइ एक जनाले आफनाइ सौतेनी आमालाइ राख्याछौ भण्न्या मइले सुण्याछु।

² तमनले यइ कुरणिका बारेमि दुःख रे सोक माणनु पड्डयाथ्यो रे इसो अद्द्या मान्सलाइ मण्डलि बठेइ बाइर निकल्लु पणन्छ। तर तमन त घमण्ड अरन्छौ।

³ म तमनसित नभया लगइ बिचारमी म तमनइ सित छु, माणु कि म ताँ छु रे यिसा काम अद्द्याको न्याय अद्दाछु।

⁴ तमनले यिसो अददु पणन्छ। हामसित प्रभु येशू ख्रीष्टको अधिकार छ भणन्या कुरणी बुजिबर तमन सब बिश्वासिन एकसाथ जम्मा हौ। रे म मेरा बिचारमी ताँ भया जसो लागन्छ। रे हामरा प्रभु येशू ख्रीष्टको सक्ति बठेइ,

⁵ तइ पापी ब्यबहार अद्द्या मान्सलाइ मण्डलि बठेइ बाइर निकाल रे तइ मान्सलाइ सैतानका अधिकारमि आजी दिय। ताकि तइले पाप अद्द छाडिबर परमेश्वरतिर फर्कउ। क्याकि यदि तइले पाप अद्द छाडिबर परमेश्वरतिर फर्कन्छ भण्या प्रभुले न्याय अद्द्या दिनमि साच्ची उ बचाइन्या हो।

⁶ तइ अनैतिक मान्सका बारेमि दुःख माणनु रे तइलाइ हटाउनुका सट्टामी, मण्डलिले तइका बारेमि घमण्ड अददाछ। थोक्काइ खमिरले जम्माइ ढुल्लोलाइ फुलाइ दिन्छ भण्नया तमनलाइ पक्‍का था छ। तसेरि यदि एक मान्सलाइ पाप अद्द अनुमति दिया भण्या, छिट्टाइ तइ मान्सले और मान्सनलाइ प्रभाव पाड्डया हो।

⁷ यहुदि मान्सनले निस्तार काजबार माण्ना हइ पइल्ली घर बठेइ खमिर निकाल्या जसेरि, तमनले लगइ तइ अनैतिक मान्सलाइ तमरा बिच बठेइ निकाल्लु पणन्छ। तब तमन तइ रोटा जसा हुन्या हो जइमि खमिर हुनइन। तमन तइ समुहका बिश्वासिन हुन्या हौ, जइमि इसो कोइ मान्स हुन्या होइन, जइले जाणी जाणिबर पाप अरन्छ। क्याकि जब तमनले ख्रीष्टमी बिश्वास अर्या, तब परमेश्वरले तमनलाइ भितर बठेइ सुद्द बनायो। क्याकि ख्रीष्ट हामलाइ हामरा पाप बठेइ छुटकारा दिनाइ मर्या, रे उन निस्तार काजबारका बेला यहुदि मान्सनले बलि अद्द्या पाठो जसाइ हुन।

⁸ तबइकिलाइ हाम निस्तार काजबार माणउ। निस्तार काजबारका बेलामि, यहुदि मान्सनले आफ्ना घरमि भया सब खमिर बाइर खित्ताहान। तसेरि, हामले बिश्वासि हुनाहइ पइल्ली अद्द्या ब्यबहार अद्द छाड्डु पणन्छ। निस्तार काजबारका बेलामि, यहुदि मान्सनले खमिर न हाल्या रोटा खान्थ्या। तसेरि, हामले परमेश्वरका मान्सनकि जसेरि जीवन बिताउनु पणन्छ, रे हामरो जीवनमी केइ दुष्ट ब्यबहार हुनु पड्डइन। यइको मतलब यो हो कि छलिबर दुष्ट कुरणी हृदयमि राखिबर होइन, बरु हामले इमानदार भइबर ख्रीष्टको अनुसरण अददु पणन्छ।

अनैतिक कुरणिका निउति न्याय

⁹ यइ हइ अगाडी मइले तमनलाइ लेख्या चिठ्ठीमि ब्यभिचारिनसित संगत जन अर्या भणबर लेख्याथ्या।

¹⁰ तइको अर्थ, यइ संसारका व्यभिचारि, लोपारि, अथवा ठग, अथवा मुर्तिपुजक सित बिलकुल संगत जन अर्या भण्या होइन, नतित तमन संसार बठेइ निकलिबर जानु पड्डयाथ्यो।

¹¹ तर इसा मान्सनको संगत जन अर्या भणबर मइले तमनलाइ लेख्या, जइले आफइलाइ बिश्वासि हु भणि भणन्छ, तर साच्ची जो व्यभिचारि, अथवा लोपारि, अथवा मुर्तिपुजक, अथवा निन्दा अद्द्या, अथवा दराहा, अथवा ठग हो। तसा मान्ससित त खानाइ लगइ बसउ जन।

¹² क्याकि ख्रीष्टमी बिश्वास अद्द्या मान्सनको न्याय अददु मेरो जिम्मेवारी होइन। तर पक्‍कालगइ तमनले तमरा मण्डलिका बिश्वासिलाइ हकाद्दु पणन्छ।

¹³ क्याकि ख्रीष्टमी बिश्वास अद्द्या मान्सनको न्याय परमेश्वरले अद्द्या हुन। तर जसेरि पबित्र सास्त्रमि लेखिया छ, “अनैतिक मान्सलाइ तमनले आफना समुहमी सहभागी हुन जन दिय।”