१ कोरिन्थी 4 - डोटेली नयाँ करार

ख्रीष्टको बिश्वासयोग्य भण्डारे

¹ इसेरि हामलाइ ख्रीष्टका सेवक रे सुसमाचारको लुक्या भौत सत्यताको ब्याख्या अद्द्या भण्डारे परमेश्वरले हामलाइ बनाया छ भणन्या माणनु पणन्छ।

² तइ बाहेक यो जरुरी छ कि भण्डारे तइका मालिकले दिया काम अददाइ साच्ची बिश्वासयोग्य हुनु पणन्छ।

³ मेरा बारेमि भणन्या हो भण्या मलाइ चिन्ता आथिन, कि तमन अथवा और कोइ मान्सनले म बिश्वासयोग्य छु अथवा आथिन भणुन। या सम्मकि म बिश्वासयोग्य छु अथवा आथिन भणबर लगइ भणनइन।

⁴ क्याकि मेरा चेतनाले मलाइ केइ कुरणीमि दोषि बनाउनइन, तर तइले मलाइ निर्दोष साबित अद्दैन। मेरो न्याय अद्द्या त प्रभुइ हुन।

⁵ तबइकिलाइ प्रभुको आगमन नभया सम्म कसइको न्याय जन अर: उनले प्रस्ट रुपमि मान्सनमि भया सब बिचार भणन्या हुन, जो कसइलाइ था आथिन। उनले तिनरा हृदयमि भया उद्देश्य प्रकट अद्दया हुन। तइ बेला हरेक मान्सनले परमेश्वर बठेइ आफ्नो प्रसंसा पाउन्या हुन।

ख्रीष्टकि निउती मुर्ख हुनु

⁶ बिश्वासि भाइन हो, मइले आफनो रे अपोल्लोसका बारेमि भण्या छु, ताकि तमनले हामलाइ उदाहरणका रुपमि लिन सक, रे तमनले यइको अर्थ जाण्न सक, जइले इसो भणन्छ, “पबित्र सास्त्रमि लेखिया भण्ना बड्ता जन अर।” यदि तमनले एकलाइ आदर अरन्छौ, रे अर्खालाइ तुच्छ सोचन्छौ भण्या, यो असल होइन।

⁷ क्याकि कसइले तमनलाइ और भण्ना बड्ता महत्वका बनाया आथिन! परमेश्वरले तमनलाइ सब बरदान दिया छ। परमेश्वरले सब कुरणी तमनलाइ दिया हुनाले तमनले घमण्ड अददु पड्डइन।

⁸ यो ठीक होइन, कि तमनले आत्मिक रुपमि चाइन्या सब कुरणी पाइसक्याछौ भणि धेकाउछौ। तमन इसो धेकाउछौ कि तमन आत्मिक रुपमि धनि छौ। तमन इसो धेकाउछौ कि तमनले हाम बिना राजाका रुपमि सासन अद्द सुरु अरि सक्याछौ। तमनले साच्ची उनसित सासन अर्या भया म खुशी हुनेइथ्या, ताकि हाम छान्या मान्स लगइ तमनसित सासन अद्देइथ्या!

⁹ तर मलाइ इसो लागन्छ कि परमेश्वरले हाम छान्या शिष्यालाइ सब भण्ना पछाका ठाउँमि राखिराइछ, जसेरि तिनन मान्सन जइले मृत्यु दण्ड पाया छन। हाम स्वर्गदुत रे यइ संसारका मान्सनका निउति तमासा होइरइछौ।

¹⁰ हामले ख्रीष्टका बारेमि प्रचार अर्या हुनाले मान्सनले हामलाइ मुर्ख माणन्नाहान, तर तमन गल्तिले इसो सोचन्छौ कि ख्रीष्टमी तमन बुद्दिमान छौ! भौत मान्सनले हामसित अधिकार नभया सोच्चाहान। तर तमन घमण्डसित भणन्छौ, कि तमनसित परमेश्वरले दियाको सक्ति छ। मान्सनले हामरो आदर अद्दइन, तर तमरो आदर अददाहान।

¹¹ आज सम्म हाम भोका रे तिसाछौ, रे पुराना फाट्या लत्ता लायाछौ, चुटाइ खान्नाछौ रे हामरो घर आथिन।

¹² आफना हातले मेहेनत अद्दाउ। अपमानित हुन्ज्या हाम तिननलाइ आशिस दिनाउ। सताउङया हाम सहनाउ।

¹³ हामरो बदनाम हुन्ज्या नम्र भइबर हाम तिननसित बोल्लाउ। अइल सम्म मान्सनले हामलाइ आदर दिनाइन, तिनन भण्नाहान हामरो केइ भाउ आथिन।

पावलको अनुसरण अद्द्या सल्लाह

¹⁴ तमरि लाज अद्दाइ मइले यिन कुरणी लेख्या होइन, तर मेरो उद्देश्य तमनलाइ अनुशासनमि राख्द्या हो, क्याकि तमन मेरा बालक जसाइ हौ, जइलाइ म साच्ची प्रेम अद्दउ।

¹⁵ क्याकि ख्रीष्टमी मार्गदर्सन अद्दाइ तमरा हजार शिक्षक भया लगइ, म मान्तर तमरा बा जसोइ हु। क्याकि तमनलाइ सुसमाचार सुणाउन्या म पइलो मान्स हु, जइका लाग्दा तमनले येशू ख्रीष्टमी बिश्वास अर्या।

¹⁶ तबइकिलाइ तमनले मेरो उदहारणको अनुसरण अर भणि म तमलाइ बिन्ति अद्दउ।

¹⁷ तबइकिलाइ तमरा वाँ तिमोथीलाइ पठाउनाछु। उ प्रभुमि मेरो प्यारो रे बिश्वासयोग्य चेलो हो। मइले सब ठाउँमि सारा मण्डलिमि सिकाया अन्सार येशू ख्रीष्टमी मेरो जीवन कसो छ त्यो तिमोथीले तमनलाइ सम्जना अराउन्या हो।

¹⁸ तमनमि हइ कसइले यो सोच्चाहान कि म तमनलाइ भेट्टाइ आउन्या होइन, तबइकिलाइ तिनन घमण्डि भया छन।

¹⁹ तर प्रभुको इच्छा भयो भण्या म तमरा वाँ छिट्टाइ आउन्या हु रे तइ बेला तिनन घमण्डि मान्सनका शिक्षा मान्तर होइन तर तिनरो सक्ति कि रइछ तइको पत्ता लगइ लाउन्या हु।

²⁰ क्याकि परमेश्वरको राज्य कुरणी मान्तर होइन, तर परमेश्वरको सक्ति बठेइ जिउनु हो।

²¹ म तमरा वाँ आया पछा तमन मइले कि अर्या चाहान्छौ? तर तमनले अइल लगइ ननिका काम अद्द छाडयानु भण्या, म तमनलाइ भौत हकाद्या हु। यदि तमनले ननिका काम अद्द छाडया भण्या म तमनसित नम्र रे प्रेमसित ब्यबहार अद्दया हु।